Ministering
Sa diin man kita sining panahon sang Paskwa sang Pagkabanhaw, magdab-ot kita kag mag-atipan pareho sang aton Ginuo, ilabi na sa ila nga ginhatag sa aton ang pribelihiyo paagi sa gugma kag takay sa pag-minister.
Pinalangga kong kauturan, mga kaabyanan, ginaabiabi ko kamo sa pangkabilogan nga komperensya!
Pagkatapos sang pangkabilogan nga komperensya sang nagligad nga Oktubre, ako kag si Sister Gong naglakat sa tunga sang Conference Center agud magtamyaw kag mamati sang inyo mga eksperiyensya sa ebanghelyo.
Ang aton mga miyembro halin sa Mexico nagsiling, “Hoy es el tiempo de Mexico. [Amo ini ang tiyempo para sa Mexico.]”
Amon nahibal-an nga si Gilly kag si Mary mag-abyan nga taga-England. Sang magsulod si Mary sa Simbahan, nadulaan sia sang maestaran. Maalwan ni Gilly nga gin-agda si Mary nga mag-upod puyo sa iya. Puno sang pagtuo, si Gilly nagsiling, “Wala gid ako nagduda nga ang Ginuo nagagiya sa akon.” Sa komperensya, malipayon man si Gilly nga makaupod ang misyonera nga nagtudlo sa iya 47 ka tuig na ang nagligad.
Si Jeff kag ang iya asawa nga si Melissa, nagatambong sadto sa pangkabilogan nga komperensya sa nahauna nga tion. Si Jeff propesyunal nga nagahampang sang baseball (isa sia ka catcher) kag sa karon isa na ka physician anesthesiologist. Ginhambalan niya akon, “Sa akon dako nga kakibot, ginatinguhaan ko nga mabunyagan tungod daw amo ini ang pinakamatuodtuod kag pinakatampad nga pagpangabuhi.”
Sang temprano pa, si Melissa nagpangayo sing pasaylo sa ministering brother ni Jeff, “Si Jeff nasaw-ahan sing ‘nakaputi bayo’ sa amon balay.” Ang ministering brother nagsiling, “Pangitaan ko sing paagi ah.” Karon, sia kag si Jeff maayo na nga mag-abyan. Sa bunyag ni Jeff, nakilala ko ang kongregasyon sang mga Santos sa Ulihing mga Adlaw nga palangga ni Jeff, Melissa, kag sang ila anak nga babayi nga si Charlotte.
Bilang mga sumulunod ni Jesucristo, nagatinguha kita nga mag-alagad sa iban kasubong sa Iya ginahimo tungod may mga kabuhi nga nagahulat nga mabag-o.
Sang ginsugiran ako ni Peggy nga ang iya bana nga si John, pagkatapos sang 31 katuig nila nga pag-asawahay, pagabunyagan na, namangkot ako kon ano ang nagbag-o.
Si Peggy nagsiling, “Ako kag si John nagatuon sang Bag-ong Katipan Dali, Magsunod sa Akon, kag si John namangkot parte sa doktrina sang Simbahan.”
Si Peggy nagsiling, “Imbitaron naton ang mga misyonero.”
Si John nagsiling, “Indi ako sa mga misyonero—luwas lang kon makaupod ang akon abyan.” Masobra sa 10 ka tuig, ang ministering brother ni John nangin iya masaligan nga abyan. (Nahunahuna ko, Ano ayhan kon ang ministering brother ni John nag-untat sa pagkadto pagkatapos sang isa, duha, ukon siyam ka tuig?)
Si John nagpamati. Ginbasa niya ang Libro ni Mormon nga may tunay nga tinutuyo. Sang gin-agda sang mga misyonero si John nga magpabunyag, nagsiling sia nga huo. Si Peggy nagsiling, “Pwerte gid ang kakibot ko kag nagsugod ako sa paghibi.”
Si John nagsiling, “Nagbag-o ako sang mas nagpalapit pa gid ako sa Ginuo.” Sang ulihi, sanday John kag Peggy ginhugpong sa balaan nga templo. Sang nagligad nga Disyembre, si John napatay sa edad nga 92. Si Peggy nagsiling, “Si John mabuot gid nga tawo, pero nagbag-o sia sa manami nga paagi pagkatapos nga sia mabunyagan.”
Nakilala ko kag ni Sister Gong sanday Meb kag Jenny paagi sa video sa tion sang pandemya sang COVID. (Madamo kami sing nakilala nga manami nga mga mag-asawa kag mga indibidwal paagi sa video sang panahon sang COVID, ang kada isa mainampuon nga ginpakilala sang ila mga stake president.)
Sanday Meb kag Jenny mapainubuson nga naghambal nga ang ila mga palaligban sa kabuhi nakapahunahuna sa ila kon bala ang ila kasal sa templo masalbar pa, kag kon posible, paano. Nagapati sila nga ang Pagbayad-Sala ni Jesucristo kag ang ila mga pangako sa kasugtanan makabulig sa ila.
Hunahunaa ang akon kalipay sang si Meb kag si Jenny nakabaton sang ila mga temple recommend kag magkaupod nga nagbalik sa balay sang Ginuo. Sang ulihi si Meb diutayan lang mapatay. Daw ano nga bugay nga sanday Meb kag Jenny nagpanumbalik sang ila mga kaangtanan sa kasugtanan sa Ginuo kag sa isa kag isa kag nabatyagan ang nagaalagad nga gugma sang madamo sa palibot nila.
Bisan diin ako magkadto, mapinasalamaton ako nga nakatuon sa ila nga nagaalagad kag nagaatipan pareho sang himuon sang Manluluwas.
Sa Peru, nakilala ko kag ni Sister Gong si Salvador kag ang iya mga utod.1 Si Salvador kag ang iya mga utod mga ilo. Kaadlawan sadto ni Salvador. Ang mga lider kag mga miyembro sang Simbahan nga matutom nga naga-minister sa ini nga pamilya nag-inspirar sa akon. “Putli nga pagtuluohan kag walay dagta … amo ini, Ang pagduaw sa mga ilo kag sa balo nga mga babayi,”2 “buligi ang mga maluya, ibayaw ang mga kamot nga nagapalamuypoy, … pabaskoga ang mga tuhod nga maluya.”3
Sa Hongkong, isa ka elders quorum president ang mapainubuson nga nagpaambit kon paano ang ila korum sigesige nga nagahiwat sang siento porsiento nga mga ministering interview. “Mainampuon namon nga ginaorganisar ang mga companionship agud ang kada isa sarang makaatipan sang iban kag maatipan,” siling niya. “Regular namon nga ginapamangkot sa kada companionship ang ila mga ginaalagaran. Wala kami nagatsek lang sang mga kahon; nagaalagad kami sa mga alagad nga nagaatipan sa aton katawhan.”
Sa Kinsasha, Democratic Republic of the Congo, si Pangulong Bokolo nagpaambit kon paano sia kag ang iya pamilya nagsulod sa Simbahan sa France. Isa ka adlaw, samtang nagabasa sia sang iya partiarchal blessing, ang Espiritu nag-inspirar kay Brother Bokolo nga magbalik upod ang iya pamilya sa DR Congo. Si Brother Bokolo nakahibalo nga magaatubang sila sang madamo nga mga hangkat kon magbalik sila. Kag ang ila Simbahan, Ang Simbahan ni Jesucristo sang mga Santos sa Ulihing mga Adlaw, wala pa maestablisar sa Kinshasa.
Pero, upod ang pagtuo, subong sang madamo pa nga iban, ang mga Bokolo nagsunod sa Espiritu sang Ginuo. Sa Kinshasa, nag-minister sila kag ginpakamaayo ang mga tawo nga ara sa ila palibot, ginlampuwasan ang mga hangkat, nagbaton sang mga temporal kag mga espiritwal nga mga bugay. Sa karon, nagakalipay sila sa pag-angkon sang balay sang Ginuo sa ila pungsod.4
Isa ka hinaylo ang gin-alagaran paagi sa personal nga halimbawa. Sang lamharon pa sia, naghinguyang sia sang iya panahon nga nagapahunayhunay sa baybay. Isa ka adlaw, sia nagsiling, “Nakakita ako sang isa ka matahum nga babayi nga nagasuksok sang maugdang nga swimsuit.” Natingala, naglakat sia kag namangkot kon ngaa nga ang isa ka matahum nga babayi nagasuksok sang maugdang nga swimsuit. Miyembro sia sang Ang Simbahan ni Jesucristo sang mga Santos sa Ulihing mga Adlaw kag nagpamangkot nga nagayuhum, “Luyag ka bala magkadto sa simbahan sa Domingo?” Nagsiling sia nga huo.
Mga tinuig na ang nagligad, si Elder L. Tom Perry nagpaambit kon paano sia kag ang iya companion regular nga nagaalagad sa isa ka sister nga isahanon nga nagpuyo sa magamo nga lugar sa Boston. Kon si Elder Perry kag ang iya companion mag-abot, ang sister mainandamon nga nagasiling, “Ipasuhot ang inyo temple recommend sa idalom sang puertahan.” Sa tion nga makita ang mga temple recommend amo pa lang nga hukason niya ang madamo nga mga trangka kag buksan ang puertahan.5 Siyempre, wala ako nagasiling nga ang mga ministering companionship nagakinahanglan sang mga temple recommend. Pero nanamian ako nga pamensaron nga kon ang mga naga-minister nagatahod sang mga kasugtanan, magaabri ang mga puluy-an kag magabukas ang mga tagipusuon.
Si Elder Perry naghatag man sang praktikal nga panugyan. Siling niya, “Hatagi ang mga companionship sang hustuhan nga kadamuon sang mga asaynment, nga mainampuon nga ginpili, gingrupo sing suno sa lokasyon kon nagakaigo agud ang panahon sa pagbiyahe magamit sing husto.” Laygay niya, “Mag-umpisa sa ila nga mas nagakinahanglan gid sang mga pagbisita. Magsugod sa ila nga labanlaban mag-abiabi kag magbaton sang mga pagbisita.” Naghingapos sia, “Ang matutom nga kapisan nagadala sang mga milagro.”
Ang mas mataas kag mas sagrado nga pag-alagad6 nagaabot kon magpangamuyo kita para sa “sa putli nga gugma ni Cristo”7 kag sundon ang Espiritu. Nagaabot man ini kon ang mga pangulohan sang elders quorum kag Relief Society, sa idalom sang direksyon sang bishop, magdumala sang mga pagpanikasog sa ministering, lakip ang pag-asayn ang mga ministering companionship. Palihog hatagi ang aton mga lamharon nga mga kabataan sang kinahanglanon nga mga oportunidad nga makaupod kag matudloan sang eksperiyensyado nga mga ministering brother kag sister. Kag palihog tuguti ang inyo ulihing-tubo nga mag-inspirar sang kaupod nga mga ministering brother kag sister.
Sa iban nga lugar sa Simbahan, indi balanse ang ministering. Mas madamo ang nagahambal nga nagaministering sila sangsa nagahambal nga ginministeran sila. Indi naton gusto sang mga kabalaka sa checklist. Pero sa masami kinahanglan naton sang labi pa sa sinsero nga pagpangamusta sa alagyan ukon sang kaswal nga “May mabulig ako sa imo?” sa parkingan. Sa madamo nga lugar, pwede kita makig-istorya, nga intiendihon ang kahimtangan sang iban, kag makapasad sang mga relasyon kon regular kita nga nagabisita sa mga miyembro sa ila puluy-an. Ang inspirado nga mga imbitasyon nagabag-o sang mga kabuhi. Kon ang mga imbitasyon nagabulig sa aton nga maghimo kag magtuman sang sagrado nga mga kasugtanan, mas nagalapit kita sa Ginuo kag sa isa kag isa.
Ginasiling nga ang mga nakahangop sang matuodtuod nga espiritu sang ministering mas madamo ang ginahimo sangsa sang una, samtang ang wala nakahangop mas diutay ang ginahimo. Maghimo kita sang mas madamo, pareho sa aton Manluluwas. Kasubong sang ginasiling sang himno, ini “bugay sang katungdanan kag gugma.”8
Mga ward council, mga elders quorum, kag mga Relief Society, palihog magpamati sa Maayong Manugpahalab kag buligi Sia nga “pangitaon ang nadula, … pabalikon liwat ang gintabog sa malayo, … bugkosan ang nabali, … pabakuron ang masakiton.”9 Mahimo kita mag-amoma sang “mga [anghel] nga wala [naton] mahibaloi”10 kon mas nagapanikasog kita nga buligan ang tanan nga nagakinahanglan sang bulig.11
Ang inspirado nga ministering nagapakamaayo sa mga pamilya kag mga indibidwal; nagapabakod man ini sa mga ward kag mga branch. Panumduma ang inyo ward ukon branch bilang isa ka sistema sang ekolohiya. Suno sa paanggid sang mga kahoy nga olivo sa Libro ni Mormon, ang Ginuo sang kaolivohan kag ang iya mga suluguon naghatag sang malahalon nga prutas kag nagpabakod sang kada kahoy paagi sa paghigot sing tingob sang mga kusog kag mga kahuyangan sang tanan nga kahoy.12 Ang Ginuo sang kaolivohan kag ang iya mga suluguon sulitsulit nga nagapamangkot, “Ano pa gid ang akon pwede himuon?”13 Nga magkaupod, ila ginpakamaayo ang mga tagipusuon kag mga puluy-an, mga ward kag mga branch, paagi sa inspirado, sigesige nga ministering.14
Ang pag-alagad—pagbantay—nagahimo sang aton kaolivohan nga “isa ka lawas”15—isa ka sagrado nga kakahuyan. Ang kada kahoy sa aton kakahoyan isa ka buhi nga kahoy sang panimalay. Mga gamot kag mga sanga nga nagainangot-angot. Ang ministering nagapakamaayo sang mga henerasyon. Kon ang pagserbisyo ginakinahanglan, ang maalam nga mga bishop, mga pangulohan sang korum sang mga elder kag Relief Society nagapamangkot, “Sin-o ang mga ministering brothers kag sisters?” Ang mga ward council kag ministering interview wala lamang nagapamangkot parte sa mga hangkat kundi nagatulok man sa aktwal nga sitwason kag nagakalipay sa madamo nga mga kaluoy sang Ginuo sa aton mga kabuhi samtang kita nagaminister pareho sa Iya.
Ang aton Manluluwas ang aton perpekto nga halimbawa.16 Bangud maayo Sia, makalibot sia nga nagahimo sing kaayohan.17 Ginpakamaayo Niya ang isa kag ang 99. Sia ang tiglawas sang ministering. Mangin mas kasubong kita kay Jesucristo kon aton himuon “sa … labing kubos sa mga ini” ang himuon naton sa Iya,18 kon palanggaon naton ang aton isigkatawo subong sa aton mga kaugalingon,19 kon kita “maghigugmaanay; subong nga Ako nagahigugma sa inyo,”20 kag kon “ang bisan sin-o sa inyo ang buot mangin dako, mangin alagad ninyo.”21
Si Jesucristo nagaalagad. Ang mga anghel nagaalagad.22 Ang mga sumulunod ni Jesucisto “[nagaalagad] ang isa sa isa,”23 “[nagakalipay] upod sa mga nagakalipay, kag [nagahibi] upod sa mga nagahibi,”24 “ginabantayan [kag] … ginasagod [ang katawhan] sang mga butang nga mahiangot sa pagkamatarong,”25 “[ginadumdom] … ang mga imol kag ang mga nagakinahanglan, ang mga nagamasakit kag ang mga nagaantos,”26 ginapakilala ang Iya ngalan paagi sa aton pag-alagad.27 Kon nagaalagad kita subong sa ginahimo Niya, masaksihan naton ang Iya mga milagro, Iya mga bugay.28 Maagom naton ang “pag-alagdan nga labing maayo.”29
Mahimo nga kapuyon ang aton lawas. Pero sa pag-alagad sa Iya kita “indi magkataka sa paghimo sing maayo.”30 Maukod naton nga ginahimo ang aton masarangan, wala nagadalagan sing madasig sangsa kita may kusog,31 kundi nagasalig, subong sa ginatudlo ni Apostoles Pablo, nga “ang Dios nagahigugma sa nagahatag nga malipayon.”32 Kay ang Dios “nagahatag sing binhi sa manugsab-og kag pagkaon para kaunon, kag magahatag man sa inyo sang tanan nga binhi nga inyo kinahanglanon.”33 Sa lain nga pulong, ang Dios magapamanggad sa inyo agod “magmaalwan kamo sa tanan nga tion.”34 Sila nga “nagasab-og sing madamo magapatubas sing madamo.”35
Sa diin man kita sining panahon sang Paskwa sang Pagkabanhaw, magdab-ot kita kag mag-atipan pareho sang aton Ginuo, ilabi na sa ila nga ginhatag sa aton ang pribelihiyo paagi sa gugma kag takay sa pag-minister. Sa paghimo sini, kabay nga mas magalapit pa gid kita kay Jesucristo kag sa kada isa, magmangin mas kasubong Niya kag ang mga sumulunod ni Jesucristo sa luyag Niya nga kita mangin. Sa Iya sagrado nga ngalan, nga si Jesucristo, amen.