Si Jesucristo Amo ang Kusog sang mga Ginikanan

Ni Elder Dieter F. Uchtdorf

Sang Korum sang Dose ka Apostoles

Buligi ang inyo kabataan nga pauswagon ang pagtuo kay Jesucristo, palanggaon ang Iya ebanghelyo kag ang Iya Simbahan, kag maghanda para sa bug-os kabuhi nga pagpili sang matarong.

Isa sadto ka bes, manuglakat na ang isa ka tatay para sa panggab-i niya nga miting sa bishopric. Ginlambatan sia sang iya apat ka tuig nga bata nga babayi, nga nagasuksok sang pajama kag nagauyat sang kopya sang Mga Sugilanon sa Libro ni Mormon.

“Ngaa kinahanglan mo gid magkadto sa miting haw?” siling niya.

“Tungod counselor ako sa bishopric,” sabat niya.

“Pero tatay ta ka!” reklamo sang iya bata.

Nagluhod sia sa iya atubang. “Langga,” siling niya, “Kabalo ko nga gusto mo basahan ta ka antes ka magtulog, pero sini nga gab-i kinahanglan ko buligan si bishop.”

Siling sang bata niya, “Wala tatay ang bishop nga magpatulog sa iya haw?”

Wala katapusan ang amon pagpasalamat sa indi maisip nga mga miyembro nga matutom nga nagaserbisyo sa Simbahan ni Jesucristo kada adlaw. Sagrado gid ang inyo sakripisyo.

Pero pareho sang pag-intiendi sining bata, may ara sang pareho kasagrado—butang nga indi mabuslan—parte sa pag-atipan sang ginikanan sa anak. Nagapakita ini sang sulundan sang langit.¹ Ang aton Amay sa Langit, ang aton Diosnon nga Ginikanan, nagakalipay matuod kon ang Iya mga anak ginatudloan kag ginaatipan sang ila mga ginikanan sa duta.²

Mga ginikanan, salamat sa tanan ninyo nga ginahimo sa pagpadako sang inyo kabataan. Kag kabataan, salamat sa tanan nga ginahimo ninyo sa pagpadako sang inyo ginikanan, tungod pareho sa nahibal-an sang tagsa ka ginikanan, masami naton nga matun-an sa aton mga kabataan ang parte sa pagtuo, paglaum, kag pagpalangga sa isigkatawo pareho nga nagatuon sila halin sa aton!³

Ang mga Ginikanan May Sagrado nga Katungdanan

Nahunahuna bala ninyo ang dako nga risgo nga ginaatubang sang aton Amay sa Langit tagsa nga ipadala Niya ang isa ka anak sa duta? Mga espiritu nga anak nga lalaki kag babayi Niya ini. Wala sang limitasyon ang ila potensyal. Kapalaran nila nga mangin mahimayaon nga mga tinuga sang kaayo, grasya, kag kamatuoran. Pero makadto sila sa duta nga wala sang ikasarang, nga wala sang mahimo magluwas sa paghibi para mangayo sang bulig. Ang ila handurawan sang ila panahon upod sa Dios natabunan, upod sang ihibalo kon sin-o gid sila kag mangin sin-o sila sa palaabuton. Nagaporma ang ila pag-intiendi parte sa kabuhi, pagpalangga, sa Dios, kag sa Iya plano base sa ila maobserbahan sa mga tawo sa ila palibot—ilabi na gid sa ila mga ginikanan, nga sa matuod lang, nagatinguha pa gani nga intiendihon man ang mga bagaybagay.

Bag-ong bun-ag nga lapsag

Ginhatagan sang Dios ang mga ginikanan sang “sagrado nga tulumanon sa pagpadako sang ila mga kabataan sa gugma kag pagkamatarong, sa pagpanangkap sang ila pisikal kag espirituhanon nga mga panginahanglan, kag sa pagtudlo sa ila sa … pagtuman sang mga kasuguan sang Dios.”⁴

Igo na ina para indi makatulog bisan ang pinakamaayo nga mga ginikanan.

Ang mensahe ko sa tanan nga ginikanan, amo ini:

Palangga kamo sang Ginuo.

Kaupod ninyo Sia.

Nagatindog Sia sa tupad ninyo.

Sia ang inyo kusog sa paggiya sang inyo kabataan sa paghimo sang matarong nga mga pagpili.

Batuna ining pribelihiyo kag responsibilidad sing maisog kag malipayon. Indi pag-ipasa ining ginahalinan sang diosnon nga mga bugay sa bisan kay sin-o. Sa balayan sang mga panindugan kag mga prinsipyo sang ebanghelyo, kamo dapat ang maggiya sang inyo anak sa detalye sang adlaw-adlaw nga pangabuhi. Buligi ang inyo kabataan nga pauswagon ang pagtuo kay Jesucristo, palanggaon ang Iya ebanghelyo kag ang Iya Simbahan, kag maghanda para sa bug-os kabuhi nga pagpili sang matarong. Ang matuod, amo ina ang plano sang Dios para sa mga ginikanan.

Kontrahon kamo ni Satanas, kuhaon ang inyo atensyon, paluyahon kamo.

Pero ang tagsa ka bata nakabaton sang Kasanag ni Cristo bilang direkta nga impluwensya sang langit. Kag ang Manluluwas magabulig sa inyo, magagiya sa inyo, kag magapaisog sa inyo. Pangayoa ang Iya bulig. Magpamangkot sa Ginuo!

Ang Ginuong Jesucristo

Pareho nga si Jesucristo amo ang kusog sang mga lamharon, si Jesucristo amo man ang kusog sang mga ginikanan.

Ginapadako Niya ang Gugma

Kon kaisa nagapamangkot kita kon may iban pa nga mas kalipikado sa paggiya kag pagtudlo sang aton kabataan. Pero bisan sa pamatyag ninyo indi kamo angayan, may ara gid sang butang nga kamo lang ang makahimo: ang imo pagpalangga sa imo nga bata.

Ang pagpalangga sang ginikanan sa anak isa sa pinakamabaskog nga pwersa sa uniberso. Isa ini sa pila ka butang diri sa duta nga wala gid matuod sang katapusan.

Karon, mahimo nga pamatyag ninyo ang inyo relasyon sa inyo anak indi dalayawon. Dira sina magamit ang gahum sang Manluluwas. Ginapaayo Niya ang nagamasakit, kag mapaayo Niya ang mga relasyon. Ginapadamo Niya ang tinapay kag isda, kag mapadamo Niya ang pagpalangga kag ang kalipay sa inyo puluy-an.

Ang inyo pagpalangga sa inyo kabataan nagatuga sang maayo nga lugar sa pagtudlo sang kamatuoran kag pagpatubo sang pagtuo. Himoa ang ang inyo balay nga balay sang pagpangamuyo, pagtuon, kag pagtuo; balay sang malipayon nga mga eksperiyensya, balay sang pagbaton, balay sang Dios.⁵ Kag “magpangamuyo sa Amay sa bug-os nga ikasarang sang tagipusuon, agud mapuno [kamo] sining [Iya] gugma, nga iya [ginahatag] sa … mga sumolunod sang iya Anak nga si Jesucristo.”⁶

Ginapadako Niya ang Gamay kag Simple nga mga Pagpaninguha

Isa pa ka kusog ninyo, bilang ginikanan, amo ang oportunidad sang adlaw-adlaw, nagapadayon nga impluwensya. Ang mga kaedad, mga titser, kag media influencers nagaabot kag nagalabay. Pero kamo ang pinakatayuyon nga impluwensya sa kabuhi sang inyo bata.

Ang inyo mga pagpaninguha daw gamay lang ikumparar sa mabaskog nga mga tingug nga mabatian sang inyo kabataan sa kalibutan. Kon kaisa, makabatyag kamo nga daw diutay lang ang inyo nga nahimo. Pero tandai nga “sa magagmay nga mga paagi ang Ginuo mahimo nga makapahanabo sang dalagko nga mga butang.”⁷ Ang isa ka home evening, isa ka paghinambalanay parte sa ebanghelyo, ukon isa ka maayo nga halimbawa mahimo nga indi dayon magpabag-o sang kabuhi sang inyo anak, pareho nga indi dayon magtubo ang tanom sa isa ka tulo sang ulan. Pero ang sige-sige nga ginagmay kag simple nga mga butang, adlaw-adlaw, nagahatag sang sustansya sa inyo kabataan sangsa panalagsa nga pagbaha.⁸

Amo ina ang pamaagi sang Ginuo. Nagahambal Sia sa inyo kag sa inyo kabataan sa mahinay kag diutay nga tingug, indi sa tingug sang daguob.⁹ Ginpaayo Niya si Naaman indi paagi sa “mabudlay nga butang” kundi paagi sa simple, liwat-liwat nga paghugas.¹⁰ Ang mga anak sang Israel nalipay sa piyesta sang pitaw sa kamingawan, pero ang nagbulig gid sa ila nga mabuhi amo ang gamay kag simple nga milagro sang mana—ang ila adlaw-adlaw nga tinapay.¹¹

Mga kauturan, ang adlaw-adlaw nga tinapay pinakamaayo nga ginahanda kag ginaserbe sa puluy-an. Ang pagtuo kag testimonya nagatubo sing pinakamaayo sa normal kag natural nga pamaagi, isa ka kagat tagsa ka tion, sa gagmay kag simple nga tinion, sa sige-sige nga pagligad sang adlaw-adlaw nga pagpangabuhi.¹²

Ang tagsa ka tion, tion sa pagtudlo. Ang kada tinaga kag aksyon mangin giya sa paghimo sang mga pagpili.¹³

Mahimo nga indi ninyo dayon makita ang epekto sang inyo pagpaninguha. Pero indi kamo mag-untat. “Ang tanan nga butang kinahanglan matabo sa ila panahon,” siling sang Ginuo. “Karon, indi magpaluya sa paghimo sang maayo, kay nagapasad kamo sang pundasyon sing isa ka dako nga buluhaton.”¹⁴ Ano nga buluhaton ang mas dako pa sangsa pagbulig sa malahalon nga mga anak sang Dios nga matun-an kon sin-o gid sila kag patubuon ang ila pagtuo kay Jesucristo, sa Iya ebanghelyo, kag sa Iya Simbahan? Bugayan kag padakuon ni Jesucristo ang inyo sige-sige nga pagpaninguha.

Nagahatag Sia sang Rebelasyon

Isa pa ka mabaskog nga paagi nga ginasuportahan sang Ginuo ang mga ginikanan amo ang paagi sa dulot sang personal nga rebelasyon. Gusto gid Niya nga ibubo ang Iya Espiritu para giyahan ang mga ginikanan.

Kon mainampuon kamo kag sensitibo sa Espiritu, paandaman Niya kamo sang indi makita nga mga peligro.¹⁵ Ipakita Niya ang mga talento, kusog, kag ang indi mahambal nga mga problema sang inyo kabataan.¹⁶ Buligan kamo sang Dios nga makita ang inyo kabataan pareho sang Iya panan-aw sa ila—labaw pa sa ila panggwa nga hitsura kag sa ila mga tagipusuon.¹⁷

Sa bulig sang Dios, matun-an ninyo nga kilalahon ang inyo kabataan sa puro kag langitnon nga paagi. Ginaagda ko kamo nga batunon ang tanyag sang Dios nga giyahan ang inyo pamilya paagi sa personal nga rebelasyon. Pangayoa ang Iya giya sa inyo mga pangamuyo.¹⁸

“Isa ka Dako nga Pagbag-o”

Siguro ang pinakaimportante nga bulig nga ginatanyag ni Jesucristo sa mga ginikanan amo ang “mabaskog nga pagbag-o” sang tagipusuon.¹⁹ Isa ini ka milagro nga kinahanglan sang kada isa sa aton.

Sa makadali, hunahunaa ini nga sitwasyon: Ara ka sa simbahan, nagapamati sa pamulong-pulong parte sa mga pamilya. Ginalaragway sang manughambal ang perpekto nga puluy-an kag ang mas perpekto pa gid nga pamilya. Wala gid nagaaway ang bana kag asawa. Nagauntat lang basa sang balaan nga mga kasulatan ang kabataan kon oras na nga mag-obra sang ila homework. Kag ang musika nga “Love One Another”²⁰ nagatukar sa palibot. Antes maglab-ot ang manughambal sa parte nga ang tanan malipayon nga nagbinuligay sa pagpaninlo sang kasilyas, napinsar mo na, “Wala gid tsansa ang pamilya ko.”

Pinalangga nga kauturan, kalma! Ang tanan diri sa kongregasyon pareho man ang ginapinsar! Ang matuod, tanan nga ginikanan nagakabalaka sang ila kakulangan.

Maayo lang, may diosnon nga bulig para sa mga ginikanan: si Jesucristo. Sia ang ginhalinan sang aton pagbag-o sang tagipusuon.

Kon inyo buksan ang inyo tagipusuon sa Manluluwas kag sa Iya mga pinanudlo, ipakita Niya sa inyo ang inyo kahuyang. Kon magsalig kamo kay Jesucristo nga may mapainubuson nga tagipusuon, pabakuron Niya ang mga butang nga mahuyang.²¹ Sia ang Dios sang mga milagro.

Ginasiling bala sina nga mangin perpekto na kamo kag ang inyo pamilya? Wala. Pero mangin mas maayo kamo. Paagi sa grasya sang Manluluwas, amat-amat, mapatubo ninyo ang mga kinaiya nga kinahanglan sang mga ginikanan: pagpalangga sa Dios kag sa Iya kabataan, pasensya, kaalwan, kalulo, kag kaisog nga himuon ang husto.

Si Jesucristo Nagatanyag sang Suporta paagi sa Iya Simbahan

Ang pagpaninguha nga patubuon ang pagtuo kay Jesucristo amo ang una nga prinsipyo sang ebanghelyo. Kag suportado ini sang Simbahan. Magluwas sa pagtigana sang balaan nga mga kasulatan kag sa mga pulong sang mga propeta, ang Simbahan sang Manluluwas nagatanyag sang madamo nga bulig para buligan ang mga ginikanan kag kabataan nga maghimo sang matarong nga mga pagpili:

Para sa Kusog sang mga Lamharon: Giya sa Paghimo sang mga Pagpili

• Ang Para sa Kusog sang mga Lamharon: Giya sa Paghimo sang mga Pagpili wala nagahatag sa inyo sang lista sang dapat kag indi dapat himuon. Nagatudlo ini sang wala katapusan nga mga kamatuoran para buligan kamo nga maghimo sang mga pagpili nga nasentro sa kabuhi kag mga pinanudlo ni Jesucristo. Basaha ini upod sa inyo kabataan. Tugoti sila nga hambalan ini. Buligi sila nga maangkon ining wala katapusan kag diosnon nga mga kamatuoran nga maggiya sa ila mga pagpili.²²

• Ang mga FSY conference isa pa gid ka matahum nga bulig. Nagalaum ako nga ang tagsa ka lamharon magatambong. Ginaagda ko ang mga young single adult nga mag-entra sa sining mga komperensya bilang mga mentor kag mga counselor. Ginaagda ko ang mga ginikanan nga pauswagon ang espirituhanon nga buylo nga ginadala pauli sang mga lamharon halin sa mga FSY conference.

• Ang mga kabataan kag lamharon sa Ang Simbahan ni Jesucristo sang mga Santos sa Ulihing mga Adlaw may mga titser, lider, kag mga mentor. Masami nagasulod kamo sa kabuhi sang lamharon sa kritikal nga tion para patubuon kag suportahan ang pagtuo kag testimonya. Ang iban sa inyo mga single adult. Ang iban wala pa sang inyo kabataan. Ang malipayon ninyo nga serbisyo sa mga anak sang Dios sagrado sa mga mata sang Dios.²³

Indi Mag-untat sa Pagpangayo sang Milagro

Pinalangga kong mga kaabyanan, ang pagpatubo sang pagtuo sang bata daw pareho sang pagpatubo sang bulak. Indi mo pwede inaton ang puno para magtaas ini. Indi mo pwede bukaron ang bokol para magbuskag dayon. Kag indi inyo mo pwede nga pabay-an ang bulak kag maghulat nga magtubo lang ini kag mamulak nga sia lang.

Ang pwede kag kinahanglan ninyo nga himuon para sa mga ulihing-tubo amo ang magtigana sang manami, masustansya nga duta, nga may kuluhaan sang langitnon nga tubig. Gabuta ang mga hilamon kag bisan ano nga nagatabon sang langitnon nga silak sang adlaw. Patigayona ang pinakamaayo nga kahimtangan sa pagtubo. Pasensyoso nga tugoti ang ulihing-tubo nga maghimo sang inspirado nga mga pagpili kag tugoti ang Dios nga buhaton ang Iya milagro. Ang resulta mangin mas matahum kag mas makakilibot kag mas makapalipay sangsa bisan ano nga pwede ninyo himuon nga kamo lang.

Sa plano sang Amay nga Langitnon, ang mga relasyon sa pamilya gintuyo nga mangin wala katapusan. Amo ina nga, bilang ginikanan, indi kamo mag-untat, bisan pa nga indi ninyo mapabugal ang mga nagkalatabo sang nagliligad.

Upod kay Jesucristo, ang Punong Manugpaayo, may ara gid pirme sang panugod; Nagahatag Sia pirme sang paglaum.

Si Jesucristo amo ang kusog sang mga pamilya.

Si Jesucristo amo ang kusog sang mga lamharon.

Si Jesucristo amo ang kusog sang mga ginikanan.

Sa sini ako nagapamatuod sa ngalan ni Jesucristo, amen.

Mga Tanda

1. “Duna sa halos tanan nga ginikanan ang handum nga tudloan ang iya mga kabataan sang moral nga mga panindugan. Parte ini sang milagro sang plano sang Amay nga Langitnon. Gusto Niya nga ang Iya mga anak magkadto sa kalibutan, sunod sa wala katapusan nga sulundan sang mga pamilya nga ara sa langit. Ang mga pamilya amo ang panguna nga yunit sang organisasyon sa wala katapusan nga mga kalibutan, kag gani luyag man Niya nga ini mangin panguna nga yunit sa duta. Bisan pa nga ang dutan-on nga mga pamilya indi perpekto, ginahatagan sini ang mga anak sang Dios sang pinakamaayo nga oportunidad nga abiabihon sa kalibutan sa gugma nga daw amo-amo sa aton nabatyagan sa langit—gugma sang ginikanan. Ang mga pamilya amo man ang pinakamaayo nga paagi agud mapabilin kag mapadayon ang moral nga mga panindugan kag matuod nga mga prinsipyo nga laban-laban magagiya sa aton balik sa presensya sang Dios” (Henry B. Eyring, “Ang Pagtipon sang Pamilya sang Dios,” Liahona, Mayo 2017, 20).

2. Siyempre, nahibal-an naton nga ang pagbuot sang Dios indi pirme matuman “sa duta subong sang sa langit” (Mateo 6:10). Ang dutan-on nga pagkaginikanan indi gid man matuod makumparar sa talaksan sang Dios. Nakita Niya ina. Kinahanglan Niya nga maghibi sa tanan nga kasubo kag kasakit sang mga relasyon sa pamilya. Pero, wala Sia nagapangampo sa pamilya. Kag indi gid Sia magpangampo, tungod ang Dios may mahimayaon nga plano para sa wala’y katapusan nga kapalaran sang Iya mga kabataan.” Kag ang sentro sang ina nga plano amo ang pamilya.

3. Tan-awa sa Mateo 18:1–5; Mosias 3:19.

4. “Ang Panimalay: Isa ka Proklamasyon sa Kalibutan,” ChurchofJesusChrist.org; tan-awa man sa Doktrina kag mga Kasugtanan 68:25–28.

5. Tan-awa sa “Ang Pagtuon sa Balay Nasandig sa mga Kaangtanan,” Pagtudlo sa Paagi sang Manluluwas: Para sa mga Nagatudlo sa Balay kag sa Simbahan (2022), 30–31; tan-awa man sa Doktrina kag mga Kasugtanan 109:8.

6. Moroni 7:48.

7. 1 Nefi 16:29; tan-awa man sa Alma 37:6–7.

8. Tan-awa sa “Ang Pagtuon sa Balay Nagalakip sang Ginagmay, Simple, Sige-sige nga Pagpaninguha,” Pagtudlo sa Paagi sang Manluluwas, 31. Si Pangulong David O. McKay nagtudlo: “Indi naton pagpaminsaron nga, tungod kay ang iban nga [butang] … daw gagmay lang kag indi hilmunon, indi na ini importante. Ang kabuhi, kon hunahunaon, human sang magagmay nga mga butang. Ang aton kabuhi, ang aton pagkatawo, sa pisikal, human sa magagmay nga pitik sang kasingkasing. Pauntata inang kasingkasing sa pagpitik, kag ang kabuhi diri sa kalibutan magauntat. Ang adlaw isa ka dako nga pwersa sa uniberso, pero mabaton naton ang bugay sang [iya] sini kasanag tungod nagalab-ot ini sa aton sa magagmay nga silak, nga, kon tipunon, nagapuno sa bilog nga kalibutan sang kasanag. Ang madulom nga gab-i nagatahum sa igpat sang daw mga magagmay nga bituon; kag gani ang matuod nga Cristohanon nga kabuhi ginahuman sang magagmay nga Cristohanon nga mga buhat nga ginahimo sini nga oras, sini nga minuto, sa puluy-an” (Teachings of Presidents of the Church: David O. McKay [2003], 219).

9. Tan-awa sa Helaman 5:30.

10. Tan-awa sa 2 Mga Hari 5:9–14.

11. Tan-awa sa Exodo 16.

12. Tan-awa sa “Paghanda sang Inyo Kabataan para sa Bilog-Kinabuhi nga Paglakat sa Dalan sang Kasugtanan sang Dios,” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023, appendix (sa digital lamang).

13. Tan-awa sa “Ang Pagtuon sa Balay Mahimo nga Planuhon kag Pwede Man Wala Ginhungod,” Pagtudlo sa Paagi sang Manluluwas, 31; 1 Peter 3:15.

14. Doktrina kag mga Kasugtanan 64:32–33.

15. Tan-awa sa Mateo 2:13.

16. Tan-awa sa Alma 40:1; 41:1; 42:1.

17. Tan-awa sa 1 Samuel 16:7.

18. Tan-awa sa 1 Nefi 15:8.

19. Alma 5:13.

20. Tan-awa sa “Love One Another,” Hymns, num. 308.

21. Tan-awa sa Eter 12:27

22. “Sa kaso sang kabataan, ang responsibilidad sang paghatag sang moral nga giya ara sa mga ginikanan. Nakahibalo sila sang disposisyon, pag-intiendi, kag kaalam sang tagsa ka bata. Ang mga ginikanan nagatinguha bilog nga kabuhi sa pagpahamtang kag pagmentinar sang maayo nga komunikasyon sa tagsa nila ka bata. Ara sila sa pinakamaayo nga lugar sa paghimo sang pinakamataas nga moral nga mga desisyon parte sa ikaayo kag kaluwasan sang ila kabataan” (James E. Faust, “The Weightier Matters of the Law: Judgment, Mercy, and Faith,” Ensign, Nob. 1997, 54).

23. Duha pa ka mga bulig nga dapat mitlangon: Ang digital nga bersyon sining tuig nga Dali, Magsunod sa Akon nagalakip sang bag-o nga seksyon nga ginatig-ulohan “Paghanda sang Kabataan para sa Bilog-Kinabuhi nga Paglakat sa Dalan sang Kasugtanan sang Dios.” Nagapanugyan ini sang simple, nasentro-sa-puluy-an nga mga ideya para buligan ang mga kabataan sa paghanda para sa bunyag kag iban pa nga mga kasugtanan kag ordinansa. Kag ang bag-o ginrebisa nga Pagtudlo sa Paagi sang Manluluwas may seksyon nga gintug-ulohan “Sa Balay kag Pamilya” nga nagalaragway kon paano magamit sa balay ang mga prinsipyo sa Cristohanon nga pagtudlo (tan-awa sa mga pahina 30–31).”