Magtutok kay Jesucristo

Ni Brother Milton Camargo

Unang Manuglaygay sa Kabilogan nga Pangulohan sang Sunday School

Ang Ginuong Jesucristo amo ang solusyon sa aton mga problema, pero kinahanglan naton alsahon ang aton mga mata kag ibayaw ang aton panulukan para makita Sia.

Ginasiling pirme ni tatay sadto sa akon, “Indi pagpatam-i ka tutok sa imo mga problema nga indi mo na makita ang solusyon.”

Nagapamatuod ako nga ang Ginuong Jesucristo amo ang solusyon bisan sa pinakamabudlay naton nga mga problema. Ilabi na gid, ginlampuwasan Niya ang apat ka problema nga ginaatubang sang kada isa sa aton nga wala gid sa aton may makasolbar nga kita lang.

Ang una nga problema amo ang pisikal nga kamatayon. Pwede naton ini tinguhaan nga maatrasar ukon indi pagsapakon, pero indi naton ini malampuwasan nga kita lang. Pero, gindaog ni Jesucristo ang kamatayon para sa aton, kag bilang resulta, tanan kita mabanhaw sa pila ka adlaw.¹
Ang ikaduha nga problema nagalakip sang mga pag-antos, mabudlay nga mga eksperiyensya, kasubo, kasakit, kag kakulang sang katarungan sa sining kalibutan. Gindaug ni Jesucristo ini tanan. Sa mga nagatinguha nga sundon Sia, magasiling Sia sa pila ka adlaw “pagapahiran ang tanan nga mga luha” kag mangin husto liwat ang tanan.² Sa karon, pwede Niya kita pabakuron para maatubang ang aton mga pagtilaw nga may kaisog, kalipay, kag paghidaet.³
Ang ikatatlo nga problema amo ang espirituhanon nga kamatayon nga dala sang sala. Ginlampuwasan ni Jesucristo ining problema paagi sa pagdala sa Iya Kaugalingon sang “silot sang aton paghidaet.”⁴ Tungod sang Iya nagabayad-sala nga sakripisyo, pwede kita mahilway sa mga konsikwensya sang aton mga sala kon may pagtuo kita sa Manluluwas, sinsero nga maghinulsol, batunon ang kasugtanan nga ginatanyag sang Amay sa aton paagi sa kinahanglanon nga mga ordinansa pareho sang bunyag, kag magpadayon tubtob sa katapusan.⁵
Ang ikaapat nga problema amo ang aton limitado, indi perpekto nga mga kinaugali. May solusyon man si Jesucristo sa sining problema. Indi lang Niya mapanas ang aton mga sayop kag himuon kita nga inosente liwat. Sarang Sia maghikot sang “dako nga pagbag-o sa … [aton] mga tagipusuon, sa bagay nga wala na [kita] sing huyog nga maghimo sing malain, kundi dalayon nga maghimo sing maayo.”⁶ Sarang kita mangin perpekto paagi sa grasya ni Cristo kag pila ka adlaw mangin pareho sa Iya.⁷

Ang masubo, masami kita nagatutok sa aton kaugalingon nga mga problema nga wala na naton matalupangdi ang solusyon, ang aton Manluluwas nga si Jesucristo. Paano naton malikawan ina nga sayop? Nagapati ako nga ang sabat ara sa mga kasugtanan nga ginaagda Niya nga himuon naton upod sa Iya kag sa aton Amay sa Langit.

Pagtutok kay Jesucristo paagi sa mga Kasugtanan

Ang aton mga kasugtanan nagabulig sa aton nga itutok ang aton atensyon, mga panghunahuna, kag aton mga aksyon kay Cristo. Sa aton “[pagtuman] sang mga kasugtanan nga [aton] ginhimo,” mas madali naton makilala ang “ang mga butang sining kalibutan” nga dapat naton “ipahigad,” kag ang “mga butang sang mas maayo nga [kalibutan]” nga dapat naton pangitaon sing matutom.⁸

Amo ina ang ginhimo sang katawhan ni Amon sa Libro ni Mormon. Samtang nagatuon sila parte kay Jesucristo kag nagsugod nga itutok ang ila mga kabuhi sa Iya, narealisar nila nga dapat nila ilubong ang ila mga armas sang inaway kag nangin perpekto sa katampad kag “ginkilala man sila tungod sang ila kasidla tuhoy sa Dios.”⁹

Ang pagtuman sang kasugtanan nagagiya sa aton nga pangitaon ang bisan ano nga nagaimbitar sang impluwensya sang Espiritu kag sikwayon ang bisan ano nga nagatabog sini—“tungod nakahibalo kita nga kon takos kita sa presensya sang Balaan nga Espiritu, sarang man kita mangin angayan nga magpangabuhi sa presensya sang Amay nga Langitnon kag sang Iya Anak, nga si Jesucristo.”¹⁰ Mahimo nga nagakahulugan man ini nga kinahanglan naton islan ang aton bokabularyo, nga maggamit sang mas malulo nga mga tinaga. Mahimo nga nagakahulugan ini nga bayluhan ang indi maayo nga mga gawi sa espirituhanon sang bag-o nga mga gawi nga nagapabakod sang aton relasyon sa Ginuo, pareho sang adlaw-adlaw nga pangamuyo kag pagtuon sang balaan nga kasulatan, bilang indibidwal kag upod sa aton pamilya.

Si Pangulong Russell M. Nelson nagsiling nga “ang tagsa ka tawo nga nagahimo sang mga kasugtanan sa mga tulugmawan sa bunyag kag sa mga templo—kag nagatuman sang mga ini—may mas dako nga ikasarang sa paglab-ot sang gahum ni Jesucristo. …

“Ang premyo sa pagtuman sang mga kasugtanan upod sa Dios amo ang langitnon nga gahum—gahum nga nagapabakod sa aton para mas mapakigbatuan ang aton mga pagtilaw, mga tentasyon, kag mga kapaslawan.”¹¹

Ang pagbag-o sang aton mga kasugtanan sa tion sang sakramento kada Domingo dako nga oportunidad para tan-awon ang aton mga kaugalingon¹² kag itutok liwat ang aton mga kabuhi kay Jesucristo. Sa pag-ambit sang sakramento, ginahambal naton nga kita “dalayon nga magdumdom sa iya.”¹³ Ang tinaga nga dalayon importante kaayo. Ginapalab-ot sini ang impluwensya sang Manluluwas sa tagsa ka bahin sang aton mga kabuhi. Indi lang naton Sia pagdumdumon kon ara kita sa simbahan ukon sa aton mga pangamuyo kon aga ukon kon ara kita sa ital-ital kag may kinahanglan kita.

Huo, kon kaisa nagakaagaw ang aton atensyon. Nagakalipat kita. Nagakadula kita sa aton tutok. Pero ang pagbag-o sang aton mga kasugtanan nagakahulugan nga gusto naton nga panumdumon pirme ang Manluluwas, nga tinguhaan naton ini himuon sa bilog nga semana, kag magpangako kita kag magatutok liwat sa Iya sa lamisa sang sakramento sa madason nga semana.

Pagtutok kay Jesucristo sa Aton mga Puluy-an

Maathag gid, ang pagtutok kay Jesucristo masobra pa sangsa aktibidades sa Domingo, sa simbahan. Sang ginpakilala ni Pangulong Nelson ang Dali, Magsunod sa Akon sang 2018, siling niya, “Panahon na nga ang Simbahan nakasentro sa puluy-an.”¹⁴ Siling niya nga dapat naton “himuon ang [aton] puluy-an nga isa ka santuaryo sang pagtuo” kag “sentro sang pagtuon sang ebanghelyo.” Kag naghimo sia sang apat ka matahum nga mga promisa sa aton kon himuon naton ini.¹⁵

Ang una nga promisa: “Ang inyo mga Adlaw nga Inugpahuway matuod nga mangin makalilipay.” Mangin adlaw ini nga mas nagapalapit kita sa aton Manluluwas. Ginsiling sang isa ka dalaga halin sa Peru, “Ang adlaw sang Ginuo amo ang adlaw nga nagakabaton ko ang pinakadamo nga sabat halin sa Ginuo.”

Ang ikaduha nga promisa: “Ang inyo kabataan mangin malipayon nga magtuon kag magpangabuhi sang mga pinanudlo sang Manluluwas.” Amo ina nga “nagahambal kita nahanungod kay Cristo, nagakasadya kita kay Cristo, nagawali kita nahanungod kay Cristo, … agud nga mahibal-an sang aton mga kaanakan kon sa ano nga ginhalinan sila mahimo nga magpaabot para sa kapatawaran sang ila mga sala.”¹⁶

Ginahimo naton ini para sa pila ka adlaw, kon maglakat ang aton bata nga lalaki sa trabaho ukon magtaklad sa bukid ukon mangayam sang mga sapat sa kalasangan, pareho sang ginhimo ni Enos, madumduman niya ang aton gintudlo sa iya parte kay Cristo kag parte sa kalipay sang pagpangabuhi sang ebanghelyo. Kag sino abi ang makahibalo? Basi amo na ini ang adlaw nga mabatyagan na niya ang espirituhanon nga kagutom nga magaliso sa iya kay Jesucristo para mabatian niya ang tingug sang Ginuo nga nagasiling sa iya, “Ang imo mga sala ginpatawad na, kag ikaw pagapakamaayuhon.”¹⁷

Ang ikatatlo nga promisa: “Ang impluwensya sang kaaway sa inyo kabuhi kag sa inyo puluy-an magabuhin.” Ngaa? Tungod kon mas nagatutok kita kay Jesucristo, mas indi na makagalanyat ang sala.¹⁸ Samtang nagakapuno ang aton mga puluy-an sang kasanag sang Manluluwas, mas nagagamay ang lugar sang kadulom sang kaaway.

Ang ikaapat nga promisa: “Ang mga pagbag-o sa inyo pamilya mangin talalupangdon kag dalayon.” Ngaa? Tungod ang pagbag-o nga ginadala ni Jesucristo isa ka “dako nga pagbag-o.”¹⁹ Ginabag-o Niya ang aton mga kinaugali; kita mangin mga “bag-o nga mga tinuga.”²⁰ Amat-amat kita nga mangin mas pareho sang Manluluwas, nga puno sang Iya tunay nga pagpalangga para sa tanan nga mga anak sang Dios.

Sin-o ang indi gusto nga matuman ining mga promisa sa ila mga kabuhi kag sa ila mga pamilya? Ano ang kinahanglan naton himuon para mabaton ang mga ini? Ang sabat amo nga himuon ang aton puluy-an nga isa ka santuaryo sang pagtuo kag sentro sang pagtuon sang ebanghelyo. Kag paano naton ina himuon? Paagi sa pagtutok sa aton Amay nga Langitnon kag kay Jesucristo, sa paghimo sa Ila nga sentro sang aton pangabuhi sa pamilya, ang pinakaimportante nga impluwensya sa aton puluy-an.

Pwede bala ako magpanugyan nga sugdan ninyo paagi sa paghimo sang mga pulong ni Cristo, nga makita sa balaan nga mga kasulatan, nga adlaw-adlaw nga parte sang inyo kabuhi? Wala sang rekomendado nga pormula sa perpekto nga pagtuon sang balaan nga mga kasulatan. Pwede ini nga 5 ukon 10 ka minutos kada adlaw—ukon mas malawig pa kon gusto ninyo. Pwede nga isa ka kapitulo ukon pila ka bersikulo kada adlaw. Ang iban nga pamilya gusto nga magtuon sa aga antes sila maglakat sa eskwelahan ukon sa trabaho. Ang iban mas gusto nga magbasa sa gab-i antes magtulog. Ang iban nga mga hubin nga mag-asawa nagasugid sa akon nga nagatuon sila nga sila lang pakadto sa trabaho kag dayon iistorya ang ila mga panghunahuna sa kada isa paagi sa text, para nga ang ila mga komento kag paghinambalanay narekord.

Ang Dali, Magsunod sa Akon nagahatag sang madamo nga panugyan sang aktibidades kag balasahon nga makabulig sa mga indibidwal kag mga pamilya nga magtuon sang mga prinsipyo sang ebanghelyo sa balaan nga mga kasulatan. Ang mga video sa Biblia kag sa Libro ni Mormon makabulig man nga mga kasangkapan para madali magamit ang balaan nga mga kasulatan sa inyo pamilya. Ang mga lamharon kag kabataan masami nagakainspirar sang indi malimtan nga mga istorya sa balaan nga mga kasulatan. Ini nga mga istorya, kag ang mga prinsipyo sang ebanghelyo nga ila ginatudlo, magapabilin sa inyo kabataan, pareho sang masaligan nga mga abyan, kon kinahanglan nila sang maayo nga mga ehemplo sang serbisyo, dungog, pagkamatinumanon, pagkapasensyoso, pagpursige, personal nga rebelasyon, pagpalangga sa isigkatawo, pagpaubos, kag pagtuo kay Jesucristo. Sa kadugayan, ang inyo katutom sa pagpaayaw sa pulong sang Dios makabulig sa inyo kabataan nga maglapit nga maglapit sa Manluluwas. Mas makilala pa nila Sia sing lubos.

Ang Ginuong Jesucristo buhi sa karon. Pwede Sia mangin aktibo, adlaw-adlaw nga presensya sa aton mga kabuhi. Sia ang solusyon sa aton mga problema, pero kinahanglan naton alsahon ang aton mga mata kag ibayaw ang aton panulukan para makita Sia. Siling Niya, “Magtulok sa akon sa tagsa ka panghunahuna; indi magduhaduha, indi magkahadlok.”²¹ Samtang nagatutok kita sa Iya kag sa aton Amay sa Langit, nagahimo kag nagatuman sang mga kasugtanan upod sa Ila, kag ginahimo Sila nga pinakaimportante nga impluwensya sa aton puluy-an kag pamilya, mahimo kita nga mga tawo nga ginapanan-aw ni Pangulong Nelson: “Katawhan nga makasarang, handa, kag nagakaangay nga magbaton sang Ginuo kon magbalik Sia liwat, katawhan nga nagpili na ngadaan kay Jesucristo imbes sang sining nahulog nga kalibutan, katawhan nga nagakalipay sa ila kahilwayan sa pagpili nga ipangabuhi ang mas mataas, mas balaan nga mga layi ni Jesucristo.”²² Sa ngalan ni Jesucristo, amen.