Pagsalig sa Doktrina ni Cristo
Kon gintukod naton ang aton mga balay sa pundasyon sang relasyon sa sulod sang kasugtanan kay Cristo, may pagsalig kita sa doktrina ni Cristo.
Sa akon kaisipan, nakita ko ang nagatigulang nga Nefi sa iya lamisa, ang mga lamina sang bulawan bukas sa iya atubang, nga ginakaptan ang iya inugkurit.
Ginatapos na ni Nefi sang iya katapusan nga pagkurit sa sululatan. Ginsulat niya, “Kag karon, pinalangga kong mga kauturan, ginatapos ko ang akon mga hambalanon.”1 Pero pagligad sina, gintandog si Nefi sang Espiritu nga balikan ang iya rekord kag magsulat sang panghingapos nga mensahe. Sa idalom sang mabaskog nga impluwensya sang Balaan nga Espiritu, ginkuha liwat sinang bantog nga propeta ang iya inugkurit kag nagsulat, “Gani, ang mga butang … nga akon ginsulat tama na sa akon, luwas sa pila ka pulong … nga kinahanglan ko gid nga ihambal nahanungod sa doktrina ni Cristo.”2
Daw ano kadako sang aton kapasalamatan sa “pila ka pulong”3 kag sa Espiritu nga nagtulod kay Nefi nga isulat ini. Ang pagpaathag ni Nefi sang doktrina ni Cristo isa ka manggad para sa mga nagabasa sini. Nagaunod ini sang panan-awon sang bunyag sang Manluluwas4 kag sang tingug sang Anak, nga nagaagda sang tanan nga sundon Sia5 kag “himuon ang mga butang nga [aton] nakita nga [Iya] ginahimo.”6 Nagaunod ini sang pamatuod ni Nefi nga ang may pagtuo kay Cristo, sinsero nga nagahinulsol sang ila mga sala kag nagasunod sa Manluluwas padulong sa mga tubig sang bunyag “magabaton sang Balaan nga Espiritu; huo, sang bunyag sang kalayo kag sang Balaan nga Espiritu.”7 Mabatian naton ang tingug sang Amay nga nagapamatuod: “Huo, ang mga pulong sang akon Pinalangga matuod kag mainunungon. Sia nga magapadayon tubtob sa katapusan, ang amo man maluwas.”8
Si Pangulong Russell M. Nelson nagpaathag sang solo nga importansya sang doktrina ni Cristo sang naghambal sia sa bag-o gintawag nga mga mission leader: “Labaw sa tanan, gusto naton nga ang doktrina ni Cristo … makurit sa mga tagipusuon sang aton mga misyonero—nga manggamot … sa unod sang ila mga tul-an.”9
Ang Preach My Gospel nagapakita sang lima ka elemento sang doktrina ni Cristo. Ini nagasiling, “Ginaagda [naton] ang iban nga magpalapit kay Cristo paagi sa pagbulig sa ila nga mabaton ang ginpanumbalik nga ebanghelyo paagi sa pagtuo kay Jesucristo kag sa Iya Pagbayad-Sala, paghinulsol, bunyag, pagbaton sang dulot sang Balaan nga Espiritu, kag pagpadayon tubtob sa katapusan.”10
Pero ang importansya sang doktrina ni Cristo indi lamang para sa mga misyonero! Kag labaw pa ini sangsa pinalip-ot nga pagsulit sang lima ka mayor nga elemento sini. Nagalakip ini sang layi sang ebanghelyo. Ini ang dakong plano para sa kabuhi nga wala katapusan.
Mga kauturan, kon batunon naton ang imbitasyon ni Pangulong Nelson nga tugotan nga manggamot ang doktrina ni Cristo sa unod sang aton mga tul-an, kinahanglan naton mapabakod ang aton pagkahaylo sa Ginuo paagi sa pagtuon, pagpangamuyo, pagkabuhi sing matutom, kag padayon sa paghinulsol. Kinahanglan naton nga imbitahon ang Balaan nga Espiritu nga ikurit ang doktrina ni Cristo “sa [mga] tagipusoon [naton]”11 pareho kadalom kag ka permanente sang pagkurit ni Nefi sa mga lamina nga bulawan.
Sang nagligad nga Oktubre namangkot si Pangulong Nelson, “Ano ang buot silingon sang daugon ang kalibutan?” Lakip sa iban nga butang siling niya, “Nagakahulugan ini sang pagsalig sa doktrina ni Cristo sangsa mga pilosopiya sang tawo.”12
Ang tinaga nga salig ginhatagan kahulugan nga “may kompiyansa nga pagsandig sa karakter, ikasarang, kusog, ukon kamatuoran sang isa ka tawo ukon butang.”13 Ina nga tawo amo si Jesucristo, kag ina nga butang amo ang Iya doktrina.
Paano ang hungod nga pagsalig sa doktrina ni Cristo magbag-o sang pamaagi naton sa pagpangabuhi?
Kon nagasalig kita sa doktrina ni Cristo, magasalig kita nga tindugan ni Cristo ang tagsa Niya ka tinaga.14 Tun-an naton sa bug-os-kinabuhi ang parte kay Jesucristo,15 ang Iya pag-alagad, ang Iya mga pinanudlo, ang Iya wala-dulonan nga Pagbayad-Sala, lakip ang Iya mahimayaon nga Pagkabanhaw. Tun-an naton ang Iya mga promisa kag ang kondisyones sa diin inang Iya mga promisa ginhatag.16 Samtang nagatuon kita, mapuno kita sang mas dako nga gugma para sa Ginuo.
Kon nagasalig kita sa doktrina ni Cristo, magapalapit kita sa aton Amay nga Langitnon kada adlaw sa mapainubuson, tago nga pangamuyo, sa diin makapabutyag kita sang pagpasalamat sa regalo nga Iya Anak kag sa tanan naton nga mga bugay.17 Ipangamuyo naton ang pagpakig-upod sang Balaan nga Espiritu18 nga mag-ugyon ang aton mga pagbuot sa Iya,19 nga binagbinagon ang aton mga kasugtanan kag pabakuron ang aton pangako nga tumanon ang mga ini.20 Magpangamuyo kita para sakdagon kag ipahayag ang aton pagpalangga para sa aton mga propeta, mga manugpanan-aw, kag manugpahayag sang rebelasyon;21 ipangamuyo ang nagatinlo nga gahum sang kapatawaran;22 kag magpangamuyo para sa kusog nga mapakigbatuan ang tentasyon.23 Ginaagda ko kamo nga himuon ang pangamuyo nga prayoridad sa inyo kabuhi, adlaw-adlaw nga magtinguha nga mga-uswag ang inyo pagpakig-angot sa Dios.
Kon nagasalig kita sa doktrina ni Cristo, ipahigad naton ang nagainggat nga mga butang sang kalibutan para magtutok sa Manunubos sang kalibutan.24 Limitahan ukon dulaon naton ang oras nga ginausik sa social media; digital games; wala pulos, sobra-sobra, ukon indi bagay nga kalingawan; ang pagpangganyat sang manggad sang kalibutan kag mga luho; kag bisan ano nga buluhaton nga nagaakumodar sang sala nga mga tradisyon kag sayop nga mga pilosopiya sang mga tawo. Kay Cristo lamang kita makakita sang kamatuoran kag nagadugay nga katumanan.
Ang sinsero nga paghinulsol25 mangin malipayon26 nga parte sang aton mga kabuhi—para mapatawad sa sala kag para mabag-o sa dagway ni Cristo.27 Ang paghinulsol nga may pagtuo nagakaangay sa aton nga magamit ang Pagbayad-Sala ni Cristo. Si Pangulong Dallin H. Oaks nagtudlo nga kon ang Manluluwas nagapatawad, “Masobra pa nga ginatinloan Niya [kita] sa sala. Ginahatagan man Niya [kita] sang bag-o nga kusog.”28 Ang kada isa sa aton nagakinahanglan sining kusog para matuman ang mga kasugoan sang Dios kag para matuman ang wala katapusan nga katuyuan sang aton mga kabuhi.
Makakuha kita sang kusog kay Jesus kag sa Iya doktrina. Siling Niya, “Sa pagkamatuod, sa pagkamatuod, ginasiling ko sa inyo, nga amo ini ang akon doktrina, kag kon sin-o man ang magapasad sa sini magapasad sa akon bato, kag ang mga gawang sang impiyerno indi makapangibabaw batok sa ila.”29
Makita naton ining promisa nga nagakatuman sa mga kabuhi sang katawhan nga matinuohon. Masobra diutay isa ka tuig sadto sang nakahigayon ako nga makilala si Travis kag Kacie. Ginkasal sila sa sibil sang 2007. Si Travis indi pa sadto miyembro sang Simbahan. Si Kacie, bisan nga nagdako sa aktibo nga panimalay sang mga Santos sa Ulihing-adlaw, nagpalayo sa iya pagtuo sang sia tin-edyer kag nagtalang sa iya pundasyon.
Sang 2018, nakilala ni Travis ang mga misyonero, kag ginbunyagan sia sang Marso 2019. Nangin misyonero si Travis kay Kacie, nga nakaeksperiyensya man sang bilog-kabuhi nga pagkahaylo. Ginselyohan sila sa templo sang Septyembre 2020. Mga duha ka tuig pagkatapos niya nga mabunyagan, gintawag si Travis nga mag-alagad sa bishopric.
May pinasahi nga balatian si Travis nga nagasige porma sang mga tumor sa iya mga kasudlan. Kapila na sia gin-operahan para kakason ang nagabalik-balik nga mga tumor, pero ang iya balatian wala sing bulong. Pila ka tuig na ang nagligad, ginhambalan si Travis nga indi na sia maglawig pa sa 10 ka tuig.
Si Kacie may retinitis pigmentosa, pinasahi nga ginapanubli nga balatian nga nagatuga sang pagkitid sang panulok hasta maglab-ot sa lubos nga pagkabulag.
Nag-istorya si Kacie sa akon parte sa iya palaabuton. Ginapaabot niya ang panahon, nga indi na malayo, nga mabalo sia, mabulag, mawad-an sang pinansyal nga suporta, kag magaisahanon sa pagpadako sang apat niya ka kabataan. Ginpamangkot ko si Kacie kon paano niya atubangon ang masubo nga palaabuton. Matawhay sia nga nagyuhum kag nagsiling, “Malipayon ako karon kag mas may paglaum sa akon kabuhi. Nagakapyot gid kami sa mga promisa nga amon nabaton sa templo.”
Si Travis na karon ang bishop. Duha ka bulan ang nagligad, liwat naman sia nga nag-agi sa isa ka mayor nga operasyon. Pero hugot ang iya pagtuo kag may kalinong. Naglala na gid ang panan-aw ni Kacie. May giya nga ido sia karon kag indi na makadrayb. Pero kontento sia, nga nagaatipan sang iya kabataan kag nagaserbisyo bilang counselor sa Young Women presidency.
Ginatukod ni Travis kag Kacie ang ila balay sa bato. Nagasalig si Travis kag Kacie sa doktrina ni Cristo kag sa promisa nga ang Dios “[magakonsagrar sang ila] mga kapipit-an para sa [ila] kaayuhan.”30 Sa perpekto nga plano sang Dios, ang pag-antos nga may pagtuo kay Cristo nakaangot sa aton nga mangin perpekto kay Cristo.31 Pareho sang maalam nga tawo nga nagtukod sang iya balay sa ibabaw sang bato,32 kon magbundak ang ulan, kag magbaha, kag maghuyop ang hangin, kag maghampak sa balay nga ginatukod ni Travis kag Kacie, indi ini natumba, kay natukod ini sa bato.33
Wala si Jesus naghambal parte sa posibilidad sang ulan kag baha kag hangin sa aton mga kabuhi; naghambal Sia nga sigurado maabot ang mga bagyo. Ang pamangkot sa paangid indi kon bala maabot ang mga bagyo kundi kon paano kita nag-akto sa Iya mapinalanggaon nga imbitasyon nga pamatian kag himuon ang Iya pinanudlo.34 Wala na sang iban pa nga paagi agud makalampuwas.
Kon gintukod naton ang aton mga balay sa pundasyon sang relasyon sa sulod sang kasugtanan kay Cristo, may pagsalig kita sa doktrina ni Cristo, kag sa aton pagpalapit sa Iya. Ang mga tawo nga nagasalig sa doktrina ni Cristo nagadutdot pasulong nga may kalig-on kag nagabatas hasta sa katapusan. Wala na sing iban pa nga paagi nga sa diin kita mahimo nga maluwas sa ginharian sang Dios.35
Nagahatag ako sang akon personal nga pagsaksi sa buhi, matuod-tuod nga nabanhaw nga si Jesucristo. Nagasaksi ako nga palangga kaayo sang Dios ang kalibutan amo nga ginpadala Niya ang Iya Anak para tubuson kita sa sala36 kag paumpawan kita sa kalisod.37 Nagasaksi ako nga nagtawag Sia sang propeta sang Dios sa aton panahon, si Pangulong Russell M. Nelson, nga amo ang paagi nga nagahambal Sia kag nagagiya sa aton.
Sa bug-os ko nga tagipusuon, ginaagda ko kamo nga magsalig sa doktrina ni Cristo kag itukod ang inyo mga kabuhi sa bato sang Manunubos. Indi gid Niya kita pagpaslawon. Sa ngalan ni Jesucristo, amen.