Ang Buluhaton sa Templo kag Family History—Isa kag Pareho Lang nga Buluhaton
Ang sentro nga tutok sang plano sang aton Amay nga Langitnon amo ang paghiusa sang pamilya para sa sini nga kabuhi kag para sa wala katapusan.
Nagapasalamat ako para sa padayon nga pagtukod sang mga templo sa sini nga “dispensasyon sang kabug-osan sang mga panahon” (Doktrina kag mga Kasugtanan 128:18). Halin sang primero nga mga adlaw sang Pagpanumbalik, ang mainunungon nga mga Santos naghimo sang madamo nga mga pagsakripisyo agud makabaton sang mga ordinansa kag mga kasugtanan sa templo. Sa pagsunod sa ila dalayawon nga halimbawa, sang 1975, pagkatapos sang madamo nga pinansyal nga sakripisyo sa pagbiyahe halin sa Siudad sang Mexico, ako kag ang akon pinalangga nga asawa nga si Evelia, nga gin-updan sang amon mga ginikanan, ginselyohan bilang wala katapusan nga mag-asawa sa Templo sang Mesa Arizona. Sina nga adlaw, samtang ginahugpong kami paagi sa awtoridad sang priesthood sa balay sang Ginuo, matuod namon nga naeksperiensiahan sing makadali ang langit.
Ang Buluhaton kag Katuyoan sang mga Templo
Ato nga eksperiensia nagtugot sa akon nga mas maapresyar pa gid kon paano nga pagkatapos sang tatlo ka tuig sang pagpangabudlay kag grabe nga pagsakripisyo, natapos man gid sang mga Santos sa Kirtland, Ohio ang ila matahum nga templo sa tion sang tigpamulak sang tuig 1836—ang pinakauna sa sining dispensasyon. Sang Marso sang amo man nga tuig, masobra sa isa ka libo ka tawo ang nagtipon sa templo kag sa mga salamputan sini para sa serbisyo sa pagdedikar (dedicatory service). Si Propetang Joseph Smth nagtindog agud maghatag sang pangamuyo sa pagdedikar, nga iya nabaton paagi sa rebelasyon (tan-awa sa Doktrina kag mga Kasugtanan 109). Sa sini, iya ginlaragway ang madamo nga mga pinasahi nga bugay nga ginahatag sa sinang nagakaangay nga nagasulod sa mga templo sang Ginuo. Dayon ang choir nagkanta sang himno nga “Ang Espiritu sang Dios Daw Kalayo (The Spirit of God)” kag ang kongregasyon nagtindog para sa Pagsinggit sing Hosana “nga may tuman nga [pwersa nga ini] dawsa… nag-alsa sang atop sang bilding” (Teachings of Presidents of the Church: Joseph Smith [2007], 307).
Pagligad sang isa ka semana ginlaragway sang Propeta ang pagpakita sang Ginuo sa templo, nga nagsiling:
“Kay tan-awa, ginbaton ko ining balay, kag magapabilin diri ang akon ngalan; kag magapakita ako sa akon katawhan sa kaluoy sa sining balay. …
“Kag ang kabantug sining balay magalapta sa iban nga lugar; kag ini ang pagsugod sang bugay nga igabubo sa mga ulo sang akon katawhan” (Doktrina kag mga Kasugtanan 110:7, 10).
Pagkatapos sini kag iban pa nga mga panan-awon, si propetang Elias, nga gindala sa langit nga wala makatilaw sang kamatayon, nagpakita kay Propetang Joseph Smith kag kay Oliver Cowdery kag nagsiling:
“Tan-awa, nag-abot na gid ang tion nga ginhambal paagi sa baba ni Malaquias—nga nagapamatuod nga dapat ipadala sia [si Elijah] [ang propeta] antes mag-abot ang dako kag makahaladlok nga adlaw sang Ginuo—
“Agud lisuon ang mga tagipusuon sang mga amay sa mga anak, kag ang mga anak sa mga amay, indi gani pagasakiton ang bilog nga duta sang sumpa—
“Gani, ang mga yabi sining dispensasyon gintugyan sa inyo mga kamot; kag paagi sini mahibaloan ninyo nga malapit na ang dako kag makahaladlok nga adlaw sang Ginuo nga yara na sa mga puwertahan”(Doktrina kag mga Kasugtanan 110:14–16).
Ang Templo kag Family History
Pagkatapos nga mapanumbalik sang Ginuo ang mga yabi sang pagselyo kay Joseph Smith, ang buluhaton sang kaluwasan sa magkatimbang nga bahin sang kabuhi nagsugod sa aton dispensasyon (tan-awa sa 1 Mga Taga-Corinto 15:22, 29; Doktrina kag mga Kasugtanan 128:8–18).
Si Pangulong Boy K. Packer nagtudlo nga “Ining talandaan nga hitabo wala ginsapak sang kalibutan, apang magaimpluwensya ini sa tagsa ka kalag nga nabuhi sadto kag mabuhi pa sa palaabuton. Ang mga bagay amat-amat nga nagkalahanabo. Ang Simbahan nangin simbahan nga nagatutok sa pagtukod sang mga templo.
“Sa kalibutan may nagatuluhaw sa bisan sa diin, sa paagi nga makabig nga natural sa diin ang mga tawo, mga organisasyon kag mga sosyedad nagakalangkag nga mausoy ang ila mga kaliwatan. Ini tanan nagkalatabo humalin sang si Elias nagpakita kay Joseph Smith sa Templo sang Kirtland” (The Holy Temple [1980], 141).
“Sugod mismo sadtong adlaw, Abril 3, 1836, ang mga tagipusuon sang mga anak nag-umpisa sa pagliso sa ila mga amay. Pagkatapos sadto, ang mga ordinansa indi umalagi, kundi permanente. Ang gahum sang pagselyo nangin ara na sa aton. Wala na sing awtoridad nga labaw pa ang bili sa sini. Ining gahum nagahatag sang pagpamatuod kag wala katapusan nga pagkapermanente sa tanan nga ordinansa nga ginhikot sa husto nga awtoridad pareho para sa buhi kag sa patay” (Paghanda sa Pagsulod sa Balaan nga Templo [2002], 28).
Pinalangga kong mga kauturan, ang pagtukod kag husto nga paggamit sang mga templo sa bisan ano man nga dispensasyon nangin patimaan sang matuod nga Simbahan ni Jesucristo. Pagkatapos sang pagdedikar sang templo sang Salt Lake sang 1893, Si Pangulong Wilford Woodruff nagpaisog sang mga miyembro sang Simbahan nga pangitaon ang mga rekord sang ila katigulangan kag irekord ang ila lista sang kaliwatan (genealogy) paagi sa pag-usoy pagbalik tubtob sa masarangan agud dal-on ang ila mga ngalan sa templo kag hikuton ang mga ordinansa sang kaluwasan kag pangkahitaasan (tan-awa sa Teachings of Presidents of the Church: Wilford Woodruff [2004], 174).
Buluhaton sa Templo kag Family History—Isa ka Buluhaton
Pagligad sang isa ka tuig (1894), si Pangulong Woodruff gihapon ang nagdumala sang paghimo sang Genealogical Society sang Utah. Isa ka gatos ka tuig ang nagligad, sang 1994, si Elder Russell M. Nelson, sadto miyembro sang Dose ka Apostoles nagsiling, “Ang mga hitabo sa sinang makasaysayan nga tuig nagpamatuod nga ang pagpanalawsaw sa family history kag pagserbisyo sa templo isa ka buluhaton sa Simbahan” (“The Spirit of Elijah,” Ensign, Nob. 1994, 85).
Buluhaton sa Family History
Mahal kong mga kauturan, ang Ginuo nagapaisog sa aton bilang mga miyembro sang Iya Simbahan nga magtipig sang aton kaugalingon nga kasaysayan sang pamilya, nga magtuon parte sa aton mga kaliwatan, kag maghimo sang kinahanglanon nga mga areglamento para sila makabaton sang mga ordinansa sang ebanghelyo sa mga templo agud mabuligan sila nga mag-uswag padulong sa ila dalan sang kasugtanan, nga magabugay sa ila sang wala katapusan nga pamilya. Amo ina ang sentro nga ginatuonan sang plano sang Amay nga Langitnon: ang paghiusa sang pamilya para sa sini nga kabuhi kag para sa wala katapusan.
Sa inyo nga nagapensar nga indi makasarang sa paghimo sining buluhaton, dapat ninyo mahibaloan nga wala kamo nagaisahanon. Mahimo kita tanan magdangop sa mga galamiton nga ginhanda sang Simbahan kag makita sa mga FamilySearch center, nga sadto ginatawag naton nga mga family history center. Ining mga FamilySearch Center gindisenyo agud halos ang sin-o man, sa diutay nga bulig, makasarang na mangita sang mga impormasyon sang ila mga katigulangan kag maorganisar ini agud ila ini madala sa balay sang Ginuo. Palihog makig-angot sa mga family history consultant sa inyo ward ukon branch nga among maggiya sa inyo sa tagsa ka tikang nga inyo pagahimuon.
Kon aton sundon ang paggiya sang mga propeta kag tun-an kon paano himuon ang aton family history kag hikuton ang mga ordinansa sa templo sang aton mga katigulangan, maeksperiensiahan naton ang dakong kalipay sa punto nga indi na kita luyag mag-untat sa paghimo sini. Mabatyagan naton sing mabaskog ang Espiritu sa aton mga tagipusuon, mapukaw ang aton mga ikasarang nga himuon ini, kag giyahan kita samtang nagapangita kita sang mga ngalan sang aton mga katigulangan. Pero dumdumon naton nga ang family history masobra pa sa pagpangita lang sang mga ngalan, mga petsa, kag mga lugar. Ini amo ang paghiusa sang mga pamilya kag pagbatyag sang kalipay sa paghikot sang mga ordinansa sang ebanghelyo para sa ila.
Nanamian ako sang inspirado nga panudlo sang aton pinalangga nga propeta nga si Pangulong Russell M. Nelson, nga nagsiling: “Ang templo ara sa sentro sang pagpabakod sang aton pagtuo kag espiritwal nga kapag-on tungod ang Manluluwas kag ang Iya doktrina amo ang sentro sang templo. Ang tanan nga ginatudlo sa templo, paagi sa panulin kag paagi sa Espiritu, nagapadugang sang aton paghangop kay Jesucristo. Ang Iya importante gid nga mga ordinansa nagabugkos sa aton sa Iya paagi sa sagrado nga mga kasugtanan sang priesthood. Dayon, samtang aton ginatipigan ang aton mga kasugtanan, ginabugayan Niya kita sang Iya nagapang-ayo, nagapabakod nga gahum” (“The Temple and Your Spiritual Foundation,” Liahona, Nob. 2021, 93–94).
Sa pagkamatuod, ang buluhaton sa templo kag family history isa kag pareho lang nga buluhaton sa Simbahan.
Ginapamatud-an ko ining mga kamatuoran. Nahibaloan ko nga ini ang Simbahan ni Ginuong Jesucristo, ang aton Manluluwas kag Manunubos, nga among aton ginadumdum kag ginahatagan sing tuman nga pagtahod sining panahon sang Paskwa sang Pagkabanhaw. Nakahibalo ako nga palangga Niya kita, kag kon aton tipigan ang aton mga kasugtanan kag ihatag ang aton pagsalig sa Iya, ginabugayan Niya kita sang Iya nagapang-ayo, nagapabakod nga gahum. Sa ngalan ni Jesucristo, amen.