Ang Imo Patriarchal Blessing—Inspirado nga Pagtuytoy halin sa Amay nga Langitnon
Ang akon patriarchal blessing nagbulig sa akon nga maintiendihan ang akon matuodtuod nga pagkatawo—kon sin-o gid ako sadto kag mangin sin-o ako sa ulihi.
Ginpadako ako sang dalayawon nga mga ginikanan nga nagpalangga kag matutom nga nagtudlo sang ebanghelyo sa amon nga ila mga kabataan. Ang masubo, ginbudlayan ang pinalangga ko nga ginikanan sa ila pag-asawahay sing tinuig. Ara pa ako sa Primary sang ginsugiran ako nga labanlaban nga mabulagay sila kag kinahanglan namon sang mga utod ko nga magpili kon kay sin-o nga ginikanan maupod. Gani, sa malawig nga panahon, nakaeksperiensia ako sang sobra nga kabalaka; apang, sang ulihi isa ka regalo halin sa akon Amay nga Langitnon ang nagbag-o sang tanan para sa akon—ang akon patriarchal blessing.
Sa edad nga 11, tungod sa nagadugang nga kabalaka parte sa relasyon sang akon mga ginikanan, ginhandum ko gid nga makuha ang akon patriarchal blessing. Nakahibalo ako nga kilala ako sing lubos sang Amay nga Langitnon kag nahibal-an ang akon mga sirkumstansya.” Kag nakahibalo man ako nga magabaton ako sang paggiya halin sa Iya. Insigida pagkatapos ang akon ika-12 nga kaadlawan, nabaton ko ang akon patriarchal blessing. Masobra na ato tunga sa siglo nga nagligad, pero maathag ko pa nga madumduman ang detalye sadtong sagrado nga eksperiensia.
Salamat nga may ara kita sing inspirado nga pagtuytoy parte sa mga patriarchal blessing sa General Handbook sang Simbahan:
“Ang kada nagakaangay, nabunyagan nga miyembro mahimo makabaton sang patriarchal blessing, nga nagahatag sang pagtuytoy halin sa aton Amay nga Langitnon.”
Ang isa ka miyembro dapat “husto ang pagkahamtong agud maintiendihan ang kaimportante kag kasagrado sang blessing” kag “maintiendihan ang kinaubsan nga doktrina sang ebanghelyo.”
“Nagakabagay nga ang miyembro dapat hustohan ang kabataon agud madamo sa importante nga mga desisyon sa kabuhi ang hilimuon pa lang sa palaabuton. … “Ang mga lider sa priesthood indi dapat magpahamtang sang minimum nga edad agud ang miyembro makabaton sang patriarchal blessing. …
“Ang kada patriarchal blessing sagrado, kompidensyal, kag personal. …
“Ang tawo nga nagabaton sang patriarchal blessing dapat maghatag bili sa mga pulong sini, binagbinagon ang mga ini, kag magkabuhi nga nagakaangay sa pagbaton sang mga ginsaad nga mga bugay sa sining kabuhi kag sa walay katapusan.”1
Si Pangulong Russell M. Nelson liwat-liwat nga nagtudlo parte sa kaimportante sang patriarchal blessing,2 nga nagahatag ini sa tagsa ka nagabaton sang “deklarasyon sang kaliwatan pabalik kanday Abraham, Isaac, kag Jacob”3 kag nga tagsa ka blessing “personal nga balaan nga kasulatan sa imo.”4
Ang akon partriarchal blessing importante gid sa akon sang bata pa ako sa madamo nga rason. Una, paagi sa gahum sang Balaan nga Espiritu, ang akon patriarchal blessing nagbulig sa akon nga maintiendihan ang akon matuodtuod nga pagkatawo— kon sin-o gid ako sadto kag mangin sin-o ako sa ulihi. Nagbulig ini sa akon nga mahibaloan, subong sang gintudlo ni Pangulong Nelson, nga ako “isa ka anak sang Dios,” “isa ka [anak] sang kasugtanan,” kag “isa ka sumulunod ni Jesucristo.”5 Nahibaloan ko nga kilala kag palangga ako sang akon Amay nga Langitnon kag sang akon Manluluwas kag personal Sila nga may kalabtanan sa akon kabuhi. Nagbulig ini sa akon nga maghandum nga mas magpalapit pa gid sa Ila kag dugangan ang akon pagtuo kag pagsalig sa Ila.
Isa ka abyan nga nagbuylog sa Simbahan bilang isa ka young adult nagpaambit: “Sang ang patriarka nagtungtong sang iya mga kamot sa akon ulo kag ginhambal ang akon ngalan, ang tanan nagbag-o, … indi lang sadto kundi sa bilog nga nabilin ko nga kabuhi. Gilayon ko nga nabatyagan nga—paagi sa gahum nga sa diin sia nagahambal—ako nakilal-an sing suod kag tudok. Ang mga pulong nga iya ginpanghambal nagpanalupsop gid sa bug-os ko nga pagkatawo. Nakahibalo ako nga kilala ako sang Amay nga Langitnon sing lubos.”
Ang mahibaloan kon sin-o gid ako nagbulig sa akon nga maintiendihan kag maghandum nga himuon kon ano ang ginapaabot sang Dios sa akon.6
Naggiya ini sa akon nga tun-an ang mga kasugtanan nga akon ginhimo kag ang mga ginsaad nga mga bugay sa kasugtanan sang Dios kay Abraham.7 Naghatag ini sa akon sing walay katapusan nga panan-aw nga nag-inspirar sa akon nga lubos nga tipigan ang akon mga kasugtanan.
Gintun-an ko ang akon patriarchal blessing pirme, kag bilang youth, halos adlaw-adlaw, nga ang amo nagbulig sa akon nga mabatyagan ang nagapaumpaw, nagagiya nga impluwensya sang Balaan nga Espiritu, nga nagbulig buhin sang akon kabalaka tagsa nga ginasunod ko ang Iya mga pagpabatyag. Nagpadugang ini sang akon handum nga aktibo nga agdahon ang kasanag, kamatuoran, kag ang Balaan nga Espiritu paagi sa pagtuon sang akon balaan nga mga kasulatan kag pagpangamuyo adlaw-adlaw, kag maukod nga pagtinguha nga tun-an kag sundon ang mga pinanudlo sang mga propeta kag mga apostoles sang Dios. Ang akon patriarchal blessing nagbulig man sa akon nga maghandum nga mangin mas mapainubuson sa pagbuot sang Amay nga Langitnon, kag ang ina nga pagtutok nagbulig sa akon nga mabatyagan ang daku nga kalipay, wala sapayan sang mabudlay ko nga mga sirkumstansya.8
Nakabaton ako sang espirituhanon nga kusog tagsa ka tion nga ginatun-an ko ang akon patriarchal blessing. Sang magbulagay na gid ang akon mga ginikanan, ang akon patriarchal blessing, subong sang gintudlo ni Pangulong Thomas S. Monson, nangin “isa ka malahalon kag bilidhon nga personal nga manggad,” nga “isa ka personal Liahona” sa akon.9
Karon, palihog indi paghangpa sing sayop. Indi ako nangin perpekto. Nakahimo ako sing madamo nga klase sing kasaypanan. Ang akon tiayon sa walay katapusan magapamatuod nga matuod ina sa gihapon. Pero ang akon patriarchal blessing nagbulig kag padayon nga nagabulig sa akon nga maghandum sa paghimo sing mas maayo kag mangin mas maayo.10 Ang masami nga pagtuon sang akon patriarchal blessing nagdugang sang akon handum nga batoan ang pagsulay. Nagbulig ini hatag sa akon sang handum kag kaisog nga maghinulsol, kag ang paghinulsol amat-amat nga nangin isa ka makalilipay nga proseso.
Importante sa akon nga makabaton sang patriarchal blessing samtang bata pa ako kag samtang ang akon testimonya nagatubo pa lang. Mapinasalamaton ako sa katubtoban nga ang akon mga ginikanan kag bishop nakahangop nga ang akon handum nagapakita nga handa ako.
Sang 12 anyos ako, ang kalibutan indi gawa makalilibog kag makatulublag pareho sang kalibutan sa karon. Si Pangulong Nelson naglaragway sang karon nga panahon bilang “pinakakomplikado nga panahon sa kasaysayan sang kalibutan,” kalibutan nga “nahil-ob sang mga sala” kag “maiyaiyahon.”11 Maayo na lang kay ang aton mga lamharon sa karon mas hamtong sangsa akon sang 12 anyos ako, kag sila man may importante kaayo nga mga pagpili nga dapat himuon samtang bata pa sila! Kinahanglan man nila mahibaloan kon sin-o gid sila, nga ang Dios nagapalangga sa ila kag lubos nga nakakahibalo parte sa ila!
Indi tanan magahandum sang ila patriarchal blessing sang tion nga ginhandum ko ini. Pero ginapangamuyo ko nga ang mga miyembro nga wala pa makabaton sang patriarchal blessing mainampuon nga magahibalo kon san-o sila handa. Ginapromisa ko nga kon maghanda kamo sing espirituhanon, ang inyo eksperiensia, pareho sa akon, mangin sagrado sa inyo. Ginapangamuyo ko man nga sa mga nakabaton na sang ila patriarchal blessing tun-an nila ini kag pakamahalon ini. Ang paghatag bili sa akon patriarchal blessing nagbugay sa akon sang kaisog sang ginluyahan ako, pagpaumpaw sang ginhadlokan ako, katawhay sang nagkabalaka ako, paglaum sang nadulaan ako sing paglaum, kag kalipay sang ang akon kalag nagkinahanglan gid sini. Ang akon patriarchal blessing nagdugang sang akon pagtuo kag pagsalig sa akon Amay nga Langitnon kag sa akon Maluluwas. Nagdugang man ini sang akon gugma para sa Ila—kag padayon ini sa gihapon.12
Nagapamatuod ako nga ang mga patriarchal blessing nagahatag sang inspirado nga pagtuytoy halin sa aton Amay nga Langitnon. Nagasaksi ako nga buhi ang aton Amay sa Langit, kag ang Iya Anak—ang aton Manluluwas, si Jesucristo—nga nakakilala sa aton, nagapalangga sa aton, kag nagahandum nga bugayan kita. Nakahibalo man ako sing pat-od nga si Pangulong Russell M. Nelson amo ang propeta sang Dios sa kalibutan sa karon. Sa ngalan ni Jesucristo, amen.