Napatawad Na Gid Bala Ako Matuod?
Ang promisa sang lubos kag perpekto nga kapatawaran ginhimo sa tanan—sa kag paagi sa wala dulonan nga Pagbayad-Sala ni Jesucristo.
Pila na katuig ang nagligad, ako kag si Sister Natress nagsaylo sa Idaho, kon diin nagbukas kami sang bag-o nga negosyo. Malawig nga mga oras ang amon ginhinguyang sa pag-obra sa opisina. Maayo lang, malapit lang ang amon ginaistaran sa ulobrahan. Kada semana, si Shawna kag ang tatlo namon ka mga bata nga babayi—tanan wala pa mag-sais anyos—nagakadto sa opisina para magdungan kami panyaga.
Sa isa sinang mga adlaw, pagkatapos namon panyaga, natalupangdan ko ang amon singko-anyos nga bata nga si Michelle, nagbilin sang personal nga mensahe para sa akon, nga ginsulat sa Post-it kag gintapik sa telepono sa opisina.
Simple lang ini basahon, “Dad, tandai gid nga palanggaon ako. Nagapalangga, Michelle.” Isa ato ka mabaskog nga pahanumdom sa hubin pa nga tatay parte sinang mga butang nga pinakaimportante gid.
Mga kauturan, nagasaksi ako nga ang aton Amay nga Langitnon nagadumdom gid sa aton pirme kag perpekto gid ang Iya pagpalangga sa aton. Ang pamangkot ko amo ini: Natandaan bala naton Sia? Kag palangga bala naton Sia?
Pila ka tuig ang nagligad, nagserbe ako bilang lokal nga lider sang Simbahan. Isa sang amon young men, si Danny, nagapanguna gid sa bisan ano nga butang. Masinulundon, mabuot, maayo, kag maalwan. Pero, sang maggradwar sia sa hayskul, nagsugod sia upod-upod sa daw mga salawayon. Nag-entra sia sa droga, ilabi na gid sa shabu, kag nagsugod sa paglala padulong sa adiksyon kag kalaglagan. Wala madugayi, naglain gid ang iya hitsura. Indi na sia halos makilal-an. Ang pinakadako gid nga pagbag-o sa iya ara sa iya mga mata—nagdulom ang kasanag sang iya mga mata. Pila ka beses ko sia nga gintinguhaan nga istoryahon, pero napaslawan ako. Indi sia interesado.
Kabudlay magtulok sa sining dalayawon nga pamatan-on nga nagaantos kag nagapangabuhi nga malayo sa iya kinaandan! Masobra pa diri ang iya masarangan.
Dayon isa ka adlaw, nagsugod ang iya milagro.
Nagtambong sia sa pangsakramento nga miting kon diin nagpaambit sang panaksihon ang iya manghod antes maglakat sa misyon. Sa sina nga miting, nabatyagan ni Danny ang madugay na niya nga wala mabatyagi. Nabatyagan niya ang pagpalangga sang Ginuo. Sang ulihi nakabatyag sia sang paglaum.
Bisan pa nga may handum sia nga magbag-o, nangin mabudlay ini para kay Danny. Ang iya mga adiksyon kag ang kaupod sini nga paghinulsol haluson niya masarangan.
Isa ka partikular nga hapon, sang nagapanghagbas [gamit ang mower] ako sang amon ugsaran, nag-abot ang salakyan ni Danny sing hinali. Grabe gid ang iya pagpanikasog. Ginpatay ko ang mower, kag nagpungko kami sa handong sang balkonahe sa atubang. Didto kag ginpautwas niya ang mga balatyagon sang iya tagipusuon. Matuod gid nga gusto niya magbalik. Pero, mabudlay kaayo ang magtalikod sa iya mga adiksyon kag nakagawian nga pagsinalayo. Dugang pa diri, nakonsensya gid sia, nahuya nga nagdangat sia sa amo sadto. Pamangkot niya, “Mapatawad gid bala ako matuod? May paagi bala matuod nga makabalik ako?”
Matapos niya nga ginsugid ang ginakabalak-an sang iya tagipusuon, ginbasa namon ang Alma kapitulo 36 sing dungan:
“Huo, nadumduman ko ang tanan ko nga mga sala kag mga kalautan. …
“Subong man, … ang paghunahuna mismo sang pagkari sa atubang sang akon Dios nagsakit sang akon kalag sing indi mapaathag nga kakugmat” (mga bersikulo 13–14).
Pagkatapos sadtong mga bersikulo, siling ni Danny, “Amo gid ini ang nabatyagan ko!”
Nagpadayon kami:
“Samtang ginatublag ako sang akon panumduman sang akon madamo nga mga sala, yari karon, nadumduman ko man nga nabatian ang akon amay nga nagapanagna sa katawhan nahanungod sang pagkari sang isa ka Jesucristo, nga isa ka Anak sang Dios, sa pagpasag-uli para sa mga sala sang kalibutan. …
“Kag O, daw ano nga kalipay, kag daw ano kamakahalangyag nga kapawa ang akon nakita” (mga bersikulo 17, 20).
Samtang ginabasa namon ining mga berikulo, nagtulo ang iya luha. Ang kalipay ni Alma amo ang kalipay nga iya ginapangita!
Ginhambalan namon nga si Alma pinasahi ang pagkatonto. Pero, sang naghinulsol sia, wala na sia magbalik liwat. Nangin matutom sia nga disipulo ni Jesucristo. Nangin isa sia ka propeta! Nagdako ang mga mata ni Danny. “Nangin propeta?” siling niya.
Simple ko sia nga ginsabat, “Huo, propeta. Wala ko ikaw gina-pressure!”
Ginhambalan namon nga bisan wala maglab-ot ang iya mga sala sa lebel sang mga sala ni Alma, ang pareho nga promisa sang kompleto kag perpekto nga kapatawaran ginahatag sa tanan—sa kag paagi sa wala dulonan nga Pagbayad-Sala ni Jesucristo.
Naintiendihan na ni Danny. Nahibal-an na niya ang iya himuon: kinahanglan niya sugdan ang iya pagpanglakaton paagi sa pagsalig sa Ginuo kag pagpatawad sa iya kaugalingon!
Ang mabaskog nga pagbag-o sang tagipusuon ni Danny makabig nga isa ka milagro. Amat-amat, nagliwat ang iya dagway, kag ang kasanag sa iya mga mata nagbalik. Nangin bagay na sia magsulod sa templo! Nagbalik na gid man sia!
Pagligad sang pila ka bulan, ginpamangkot ko si Danny kon gusto niya nga magpasa sang papeles para magserbe sa full-time nga misyon. Ang iya reaksyon amo ang kakibot kag kalangkag.
Siling niya, “Gusto ko gid maglakat sa misyon, pero kabalo ka gid sang akon ginhalinan kag ang mga ginpanghimo ko sadto! Abi ko indi na ako pwede.”
Sabat ko, “Basi husto ka man. Pero, wala man sing may nagapugong sa aton nga magpangabay. Kon indi ka pagpalakton, basta nahibal-an mo nga nagpabutyag ka sang sinsero nga handum nga magserbisyo sa Ginuo.” Nag-igpat ang iya mga mata. Nanamian gid sia sini nga ideya. Para sa iya daw malayo ini matabo, pero gusto niya nga magpasimpalad.
Pila ka semana ang nagligad, kag sa iya kakibot, isa pa ka milagro ang natabo. Nakabaton si Danny sang tawag nga magserbe sa full-time nga misyon.
Pila ka bulan pagkatapos nga mag-abot si Danny sa misyon, nakabaton ako sang tawag. Simple nga ginsiling sang iya president, “Ano ning ari sa sining pamatan-on? Sia ang pinakadalayawon nga misyonero nga akon nakilala!” Ini nga president nakabaton sang Alma nga Bataon sa karon nga panahon.
Pagkatapos sang duha ka tuig, nagpauli si Danny nga may pasidungog, nga nagserbisyo sa Ginuo sa bug-os niya nga tagipusuon, ikasarang, hunahuna, kag kusog.
Pagkatapos sang iya pangmisyonaryo nga report sa sakramento nga miting, nagpauli ako, sang makabati ako sang pagpanuktok sa pwertahan. Nagatindog didto si Danny nga nagahibi. Siling niya, “Pwede ta ka maistorya sing makadali?” Naggwa kami sa amo man gihapon nga halintang sang balkonahe.
Siling niya, “President, pamatyag mo napatawad na ako matuod?”
Karon naghibi naman ako. Nagatindog sa atubang ko ang matutom nga disipulo ni Jesucristo nga naghatag sang tanan niya nga masarangan sa pagtudlo kag pagpamatuod parte sa Manluluwas. Sia ang ehemplo sang nagapang-ayo kag nagapabakod nga gahum sang Pagbayad-Sala sang Manluluwas.
Siling ko, “Danny! Ginatulok mo man ang imo kaugalingon sa espeho? Nakita mo ang imo mga mata? Puno ini sang kasanag, kag nagasilak ka upod ang Espiritu sang Ginuo. Siyempre napatawad ka na! Dalayawon ka! Ang kinahanglan mo na lang himuon amo ang magpadayon sa imo kabuhi. Indi na magbalik! Magtulok sa unhan nga may pagtuo sa madason nga ordinansa.”
Nagapadayon ang milagro ni Danny tubtob karon. Nagpakasal sia sa templo kag nagbalik sa pag-eskwela, kon diin nakabaton sia sang master’s degree. Padayon sia nga nagaserbisyo sa Ginuo nga may kadungganan kag dignidad sa iya mga calling. Mas importante, nangin dalayawon sia nga bana kag matinuohon nga tatay. Isa sia ka matutom nga disipulo ni Jesucristo.
Si Pangulong Russell M. Nelson nagtudlo, “Kon wala ang wala dulonan nga Pagbayad-Sala sang [Manluluwas], ang tanan nga katawhan madula gid tubtob san-o.”1 Wala madula si Danny, kag amo man kita sa Ginuo. Nagatindog Sia sa pwertahan para alsahon kita, pabakuron kita, kag patawaron kita. Ginatandaan Niya pirme nga palanggaon kita!
Ang indi matupungan nga pagpakita sang pagpalangga sang Manluluwas sa mga anak sang Dios nasulat sa Libro ni Mormon: “Sang makahambal si Jesus sing subong, ginpalibot niya liwat ang iya panulok sa kadam-an, kag nakita nga may mga luha sila, kag nagatulok sa iya sing tadlong nga daw buot nila nga pangayuon sa iya nga magpabilin sing diutay pa gid upod sa ila” (3 Nefi 17:5).
Bilog na nga adlaw nga nag-alagad ang Manluluwas sa katawhan. Pero madamo pa Sia sang himuon— bisitahan pa Niya ang iban Niya nga mga karnero; mabalik pa Sia sa Iya Amay.
Wala sapayan sa sining mga obligasyon, nahangpan Niya nga gusto sang mga tawo nga magtiner pa Sia sing makadali. Dayon, upod ang tagipusuon sang Manluluwas nga puno sang kaluoy, isa sa pinakadako nga mga milagro sa kasaysayan sang kalibutan ang natabo:
Nagtiner Sia.
Ginbendisyunan Niya sila.
Ginpakamaayo Niya ang ila kabataan sing tag-isaisa.
Nagpangamuyo Sia para sa ila; naghibi Sia upod sa ila.
Kag ginpang-ayo Niya sila. (Tan-awa sa 3 Nefi 17.)
Ang Iya promisa wala katapusan: paayuhon Niya kita.
Sa mga nagtalang sa dalan sang kasugtanan, palihog tandai nga may ara gid sang paglaum, may ara gid sang pag-ayo, kag may ara gid sang dalan pabalik.
Ang iya wala katapusan nga mensahe sang paglaum amo ang nagapaayo nga bulong para sa tanan nga nagakabuhi sa magamo nga kalibutan. Siling sang Manluluwas, “Ako amo ang dalan, kag ang kamatuoran, kag ang kabuhi.” (Juan 14:6).
Mga kauturan, tandaan naton nga pangitaon Sia, nga palanggaon Sia, kag dumdumon Sia pirme.
Nagapamatuod ako nga ang Dios buhi kag palangga Niya kita. Nagasaksi pa gid ako nga si Jesucristo amo ang Manluluwas kag Manunubos sang kalibutan. Sia amo ang makagagahum nga manugbulong. Nakahibalo ako nga buhi ang Manunubos ko! Sa ngalan ni Jesucristo, amen.