Indi Gid Pagpaligara ang Oportunidad nga Magpamatuod kay Cristo
Ang matuod nga kalipay nasandig sa aton kahanda nga mas magpalapit kay Cristo kag magsaksi sa aton kaugalingon.
Lima ka tuig sang sini nga adlaw, gin-alsa naton ang aton mga kamot para sakdagon ang aton pinalangga nga propeta, si Pangulong Russell M. Nelson, bilang Pangulo sang Ang Simbahan ni Jesucristo sang mga Santos sa Ulihing mga Adlaw—ang baba sang Ginuo sa sining dalayawon nga panahon sang pagtubo kag rebelasyon. Paagi sa iya, nabaton naton ang indi maisip nga imbitasyon kag ginpromisahan kita sang mahimayaon nga mga bugay kon isentro naton ang aton mga kabuhi sa aton Manluluwas nga si Jesucristo.
Sang 2011, samtang nagaalagad ako upod sa akon bana bilang mga mission leader sa matahum nga Curitiba, Brazil, naghuni ang akon telepono samtang ara sa miting. Hingagaw ko nga gin-silent ini, nakita ko nga ang tawag halin sa akon tatay. Dali-dali ako nga naggwa sa miting para magsabat: Ay, Tay!”
Wala ko ginpaabot, ang iya tingug puno sang emosyon: “Ay, Bonnie. May ihambal ako sa imo. Gin-diagnose ako nga may ALS.”
Daw naglibog ang ulo ko, “Dali lang! Ano ang ALS?”
Samtang ginapaathag ni Tatay, “Alerto ang akon pinsar pero ang akon lawas amat-amat na nga indi magiho.”
Nabatyagan ko nga nauyog ang bilog ko nga kalibutan samtang ginabinagbinag ko ang buot silingon sining masubo nga balita. Pero sa sinang indi malimtan nga adlaw, ang ulihi niya nga mga tinaga ang nagtiner sa akon tagipusuon. Ang pinalangga ko nga tatay nagsiling nga nagadali, “Bonnie, indi gid pagpaligara ang tagsa ka oportunidad nga magpamatuod kay Cristo.”
Ginbinagbinag kag ginpangamuyoan ko ang laygay ni Tatay. Masami ko ginapamangkot ang akon kaugalingon kon ano ang buot silingon sang indi pagpaligaron ang oportunidad nga magpamatuod kay Jesucristo.
Pareho sa inyo, sa panalagsa nagatindog ako sa una nga Domingo sang bulan kag nagasaksi kay Cristo. Madamo nga beses nagapamatuod ako parte sa mga kamatuoran sang ebanghelyo bilang parte sang leksyon. Maisog ako nga nagtudlo sang kamatuoran kag ginpahayag ang pagkadios ni Cristo bilang misyonero.
Pero ini nga pangabay daw mas personal gid! Daw ato balang nagahambal sia nga, “Bonnie, indi pagtugoti nga matublag ka sang kalibutan! Magpabilin ka nga matutom sa imo nga kasugtanan sa Manluluwas. Handuma nga maeksperiyensyahan ang Iya mga bugay adlaw-adlaw, kag magpamatuod paagi sa Balaan nga Espiritu sang Iya gahum kag presensya sa imo kabuhi!”
Nagakabuhi kita sa kalibutan nga nahulog sa sala, nga ang tanan nga tentasyon nagabutong sang aton mga mata kag mga tagipusuon paidalom imbes nga paibabaw. Daw pareho sa mga Nefinhon sa 3 Nefi 11, kinahanglan naton si Jesucristo. Mahunahuna bala ninyo ang inyo kaugalingon didto, upod sa mga tawo nga nakaeksperiyensya sang grabe nga kinagubot kag kalaglagan? Ano ayhan ang pamatyag nga mabatian ang personal nga imbitasyon sang Ginuo:
Bangon kag magpalapit sa akon, agud inyo makab-ot sang inyo mga kamot ang akon kilid, kag agud inyo man mahikap ang mga agi sang mga lansang sa akon mga kamot kag sa akon mga tiil, agud inyo mahibal-an nga ako … Dios sang bug-os nga duta, kag ginpatay tungod sang mga sala sang kalibutan.
“Kag … ang kadam-an nagpalapit … sing tinag-isaisa … kag nakita sa ila mga mata kag nahikap sang ila mga kamot, kag nahibal-an sing pat-od … kag nakasaksi para sa ila mga kaugalingon.”1
Ini nga mga Nefinhon nalangkag nga nagpalapit para ikab-ot ang ila mga kamot sa Iya kilid kag hikapon ang agi sang mga lansang sa Iya mga kamot kag mga tiil, para makabaton sang personal nga pagsaksi nga ini amo ang Cristo. Sa amo man, madamo nga matinuohon nga mga tawo ang aton matun-an sa Bag-ong Katipan sini nga tuig nga pasensyoso nga naghulat sang pag-abot ni Cristo. Dayon naghalin sila sa ila mga uma, mga ulobrahan, kag kalan-an kag nagsunod sa Iya, nga nagapanagil-ot sa Iya, kag nagtupad sa Iya. Amo man bala kita kalangkag nga magsaksi para sa aton kaugalingon pareho sang kadam-an sa balaan nga mga kasulatan? Ang mga bugay bala nga ginapangayo naton indi pareho kakinahanglanon sangsa sa ila?
Sang pisikal nga ginbisita ni Cristo ang mga Nefinhon sa ila templo, ang Iya imbitasyon indi ang magtindog sa malayo kag magtulok sa Iya, kundi nga tandugon Sia, nga batyagon sa ila kaugalingon ang pagkamatuod sang Manluluwas sang katawhan. Paano kita mas magpalapit pa gid para makaangkon sang personal nga saksi kay Jesucristo? Mahimo nga parte ini sang gusto itudlo sa akon sang akon tatay. Indi man kita makapalapit sa pisikal pareho sadtong mga nakaupod ni Cristo sa tiyempo sang Iya dutan-on nga pag-alagad, paagi sa Balaan nga Espiritu maeksperiyensyahan naton ang Iya gahum adlaw-adlaw! Samtang ginakinahanglan naton ini!
Kadako sang gintudlo sa akon sang mga young women sa bilog nga kalibutan parte sa pagpangita kay Cristo kag pag-angkon sang adlaw-adlaw, personal nga saksi nahanungod sa Iya. Tugoti ako nga ipaambit ang kaalam sang duha sini sa ila:
Si Livvy bilog-kabuhi sia nga nagatan-aw sang pangkabilogan nga komperensya. Ang matuod, sa ila balay tradisyon nila nga magtan-aw sang lima gid ka sesyon bilang pamilya. Sang una, para kay Livvy ang komperensya nagakahulugan sang pagsulat-sulat ukon pagpatuyo kon kaisa. Pero lain ining nagligad nga Oktubre nga pangkabilogan nga komperensya. Nangin personal ini.
Sini nga tion, nagdesisyon si Livvy nga mangin aktibo nga tagbaton. Gin-silent niya ang iya telepono kag ginsulat ang mga panghunahuna halin sa Espiritu. Nasadyahan gid sia nga nabatyagan niya ang mga butang nga gusto sang Dios nga iya mabatian kag himuon. Halos insigida, ini nga desisyon naghatag sang dako nga kinalain sa iya kabuhi.
Pagligad lang sang pila ka adlaw, ginhagad sia sang iya mga abyan nga magtan-aw sang indi nagakabagay nga sine. Siling niya, “Nagbalik ang mga tinaga kag ang espiritu sang komperensya sa akon tagipusuon, kag nabatian ko ang kaugalingon ko nga nagpamalibad sa ila imbitasyon.” Nagkaisog man sia sa pagpaambit sang iya testimonya parte sa Manluluwas sa iya ward.
Pagkatapos sining mga hitabo, siling niya, “Ang nami kay, sang mabatian ko ang akon kaugalingon nga nagapamatuod nga si Jesus amo ang Cristo, nabatyagan ko ang Balaan nga Espiritu nga nagakumpirma sini liwat sa akon.”
Wala ni Livvy ginpili-pili lang ang gusto niya sa komperensya; bug-os ang hunahuna kag espiritu sia nga nagpamati, kag nakita niya ang Manluluwas didto.
Dayon ara pa gid si Maddy. Sang nag-untat ang iya pamilya sa pagsimba, daw naglibog man si Maddy kag indi mahibal-an kon ano ang iya himuon. Iya narealisar ang isa ka importante nga bagay. Gani, sa edad nga 13 anyos, si Maddy nagsugod sa pagsimba nga sia lang. Bisan nga kon kaisa mabudlay kag indi komportable nga sia lang isa, nahibal-an niya nga makita niya ang Manluluwas sa simbahan kag gusto niya makaupod Sia didto. Siling niya, “Sa simbahan, nabatyagan sang akon kalag nga amo ato ang akon puluy-an.”
Nagpaisog sa iya ang kamatuoran nga ginselyohan ang iya pamilya sa wala katubtuban. Amat-amat niya nga ginaupod ang iya mga manghod sa pagsimba kag nagatuon sang balaan nga kasulatan upod sa ila sa balay. Sang ulihi nag-upod naman ang ila nanay sa ila. Ginhambal ni Maddy sa iya nanay ang iya handum nga maglakat sa misyon kag ginpamangkot ang iya nanay kon mangin handa sia sa pag-upod sa iya sa templo.
Sini nga adlaw ara si Maddy sa MTC. Nagaalagad sia. Nagasaksi sia parte kay Cristo. Ang iya ehemplo nagbulig sa duha niya ka ginikanan nga magbalik sa templo kag magbalik kay Cristo.
Pareho kay Livvy kag Maddy, sa padayon naton nga pagpili nga pangitaon si Cristo, ang Espiritu magasaksi parte sa Iya sa lainlain nga mga sitwasyon. Ini nga mga pagsaksi sang Espiritu nagakatabo kon kita nagapuasa, nagapangamuyo, nagapaabot, kag nagapadayon sa pag-abante. Ang aton kalapit kay Cristo nagadako paagi sa pagsimba pirme sa templo, paghinulsol adlaw-adlaw, pagtuon sang balaan nga mga kasulatan, pagsimba kag pagtambong sa seminary, pagbinagbinag sang aton mga patriarchal blessing, takos nga pagbaton sang mga ordinansa, kag pagtahod sang sagrado nga mga kasugtanan. Ini tanan nagaimbitar sang Espiritu nga pasanagon ang aton mga kaisipan, kag ang mga ini nagadala sang dugang nga kalinong kag proteksyon. Pero ginatahod bala naton ang mga ini bilang sagrado nga mga oportunidad sa pagsaksi parte kay Cristo?
Madamo nga beses na ako nga naglakat sa templo, pero kon magsimba ako sa balay sang Ginuo, ginabag-o ako sini. Kon kaisa samtang nagapuasa, daw nagapagutom lang ako, pero sa iban nga tion, nagapakabusog ako sa Espiritu nga may katuyuan. Kon kaisa nagapangamuyo ako sang sulit-sulit kag naandan na, pero ako nalangkag man nga makabaton sang laygay halin sa Ginuo paagi sa pangamuyo.
May gahum sa paghimo sining balaan nga mga pamatasan nga daw indi buluhaton kundi bilang pagsaksi. Amat-amat ang proseso sini pero magadako ini sa adlaw-adlaw, aktibo nga partisipasyon kag hungod nga mga eksperiyensya upod kay Cristo. Kon sige-sige kita nga nagaakto sa Iya mga pinanudlo, makabaton kita sang testimonya parte sa Iya; nagatukod kita sang relasyon upod sa Iya kag sa aton Amay nga Langitnon. Amat-amat kita nga mangin pareho sa Ila.
Ang kaaway nagatuga sang grabe nga kagahod nga mabudlay mabatian ang tingug sang Ginuo. Sa aton kalibutan, ang aton mga kabudlayan, ang aton mga sirkumstansya indi magalinong, pero pwede kita kag kinahanglan kita nga mangin gutom kag uhaw sa mga butang parte kay Cristo para “mabatian Sia” sing maathag.2 Nagapatubo kita sang mga pamatasan sang pagkadisipulo kag testimonya nga magaklaro sang aton pagsalig sa aton Manluluwas kada adlaw.
Ang akon tatay masobra 11 ka tuig na nga nagtaliwan, pero buhi ang iya mga pulong sa akon. “Bonnie, indi gid pagpaligara ang tagsa ka oportunidad nga magpamatuod kay Cristo.” Ginaagda ko kamo nga updan ako sa pagbaton sining iya imbitasyon. Pangitaa si Cristo bisan diin―ginapromisa ko nga ara Sia!3 Ang matuod nga kalipay nasandig sa aton kahanda nga mas magpalapit kay Cristo kag magsaksi sa aton kaugalingon.
Nahibal-an naton nga sa ulihing mga adlaw, “ang tagsa ka tuhod magaluhod, kag ang tagsa ka dila magatuad” nga si Jesus amo ang Cristo.4 Kabay nga ining saksi mangin normal kag natural nga eksperiyensya para sa aton karon—nga kuhaon naton ang tanan nga oportunidad nga malipayon nga magsaksi: Si Jesucristo buhi!
O, palangga ko gid Sia. Daw ano kita ka mapinasalamaton sa Iya Wala Dulonan nga Pagbayad-Sala, nga “naghimo sang kabuhi nga wala katapusan nga posibilidad kag sang pagkaimortal nga realidad para sa [aton] tanan.”5 Nagapamatuod ako sang kaayo kag dako nga himaya sang aton Manluluwas sa Iya sagrado nga ngalan, nga si Jesucristo, amen.