11:4

Magpadayon Lang—nga may Pagtuo

Ni Elder Carl B. Cook

Sang Pangulohan sang Sitenta

Ang pagpakita sang pagtuo sa aton Manluluwas nga si Jesucristo, makabulig sa aton nga madaog ang kaluya sang buot bisan ano ang mga sablag nga aton masugata.

Si Elder George A. Smith, isa ka Apostoles, nakabaton sang laygay halin kay Propetang Joseph Smith sa tion sang dako kabudlayan: “Ginhambalan niya ako nga indi gid ako dapat maluyahan sang buot, ano man ang mga kabudlayan nga nagapalibot sa akon. Kon nahulog ako sa pinakadalom nga buho sang Nova Scotia kag ang tanan nga Rocky Mountains nagapit-al sa akon, indi ako dapat magpaluya sang buot kundi magpanguyapot, magtuo, kag magpabilin nga maisog kag makabutwa gid ako sa ulihi.”¹

Paano ina mahambal ni Propetang Smith—sa isa nga nagaantos? Tungod nahibal-an niya nga matuod ato. Ginpangabuhi niya ato. Si Joseph sulitsulit nakaeksperiyensya sing tuman nga mga kabudlayan sa iya kabuhi. Ugaling, sa iya paggamit sang pagtuo kay Jesucristo kag Iya Pagbayad-Sala, kag pagpadayon lang, nalampuwasan niya ang daw indi masarangan nga mga sablag.²

Karon, luyag ko suliton ang pangabay ni Joseph nga indi pagtugotan ang kaluya sang buot nga magpabug-at sa aton kon nagaatubang kita sang mga kapaslawan, masakit nga mga eksperiensya, aton kaugalingon nga mga kakulangan, ukon iban pa nga mga hangkat.

Kon magsiling ako kaluya sang buot, wala ako nagahambal parte sa makapaluya nga mga hangkat sang mga malala nga depresyon, ukon iban pa nga mga balatian nga nagakinahanglan sang espesyal nga mga pagbulong.³ Nagahambal lamang ako parte sa kinaandan nga mga pagkaluya sang buot nga nagaupod sa mga maayo kag malain nga mga hitabo sa kabuhi.

Nainspirar ako sang akon mga baganihan nga nagapadayon lang—nga may pagtuo—ano man ang matabo.⁴ Sa Libro ni Mormon, mabasa naton ang parte kay Zoram, ang suluguon ni Laban. Sang makuha ni Nefi ang saway nga lamina, kinahanglan ni Zoram nga magpili kon magsunod kay Nefi kag sa iya mga utod sa kamingawan ukon posible nga madulaan sang iya kabuhi.

Grabe nga pililian! Ang una nga gusto ni Zoram amo ang magdalagan, pero ginpunggan sia ni Nefi kag nagpanumpa nga kon mag-upod sia sa ila, mangin hilway sia kag makaangkon sang lugar upod sa iya pamilya. Nagbakod ang buot ni Zoram kag nag-upod sa ila.⁵

Si Zoram nag-antos sing madamo nga kabudlayan sa iya bag-o nga kabuhi, pero nag-abante sia nga may pagtuo. Wala kita sang makita nga indikasyon nga si Zoram nagpabilin sa iya nagligad ukon naghupot sang kalain sang buot sa Dios ukon sa iban nga mga tawo.⁶ Nangin matuodtuod sia nga abyan kay Nefi, isa ka propeta, kag sia kag ang iya kaliwatan nagpuyo sa kahilwayan kag kabuganaan sa duta nga ginpanaad. Ang dalagko nga mga sablag kuntani sa dalan ni Zoram nangin dalagko nga mga bugay, tungod sa iya katutom kag kahanda nga magpadayon lang—nga may pagtuo.⁷

Sang sini lang, nagpamati ako sa isa ka maisog nga sister nga nagpaambit kon paano sia nagbatas sang mga kabudlayan.⁸ May mga hangkat sia, kag isa ka Domingo nagapungko sia sa Relief Society nga nagapamati sa isa ka titser nga abi niya nagakabuhi nga wala sing problema—malayo kaayo sa iya kabuhi. Kapoy sia kag ginaluyahan sang buot. Pamatyag niya indi gid sia makatupong sa talaksan—ukon malakip—gani nagtindog sia kag nagpauli, nga nagaplano nga indi na magbalik liwat sa pagsimba. Sang nagalakat pakadto sa iya salakyan, may nabatyagan sia nga maathag nga pagpabatyag: “Magsulod sa kapilya kag magpamati sa manughambal sa pangsakramento nga miting.” Ginduhaduhaan niya ang pagpabatyag pero nabatyagan niya ini sa liwat sing mabaskog, gani nagkadto sia sa miting.

Ang mesahe amo gid mismo ang iya ginakinahanglan. Nabatyagan niya ang Espiritu. Nahibal-an niya nga luyag sang Ginuo nga magpabilin sia sa Iya, mangin Iya sumulunod, kag magsimba, gani ginhimo niya ini.

Nakahibalo kamo kon ano ang iya ginapasalamatan? Nga wala sia nangampo. Nagpadayon lang sia—nga may pagtuo kay Jesucristo, bisan pa nga mabudlay ini sa iya, kag sia kag ang iya pamilya bugana nga ginabugayan sa iya padayon nga pag-abante.

Ang Dios sang langit kag duta magabulig sa aton nga madaug ang kaluya sang buot kag ang ano man nga mga sablag nga aton masugata kon magtulok kita sa Iya, magsunod sa mga pagpabatyag sang Balaan nga Espiritu,⁹ kag magpadayon lang—nga may pagtuo.

Salamat nga kon maluya kita ukon indi makasarang, ang Ginuo mahimo magpabakod sang aton pagtuo. Madugangan Niya ang aton ikasarang sing labaw sa aton lang masarangan. Naeksperiyensyahan ko ina. Masobra 20 ka tuig ang nagligad, wala ginpaabot nga gintawag ako bilang isa ka Area Seventy, kag pamatyag ko indi ako makasangkol. Pagkatapos sang akon mga paghanas, kinahanglan ko nga magpanguna sa akon una nga komperensya sang stake.¹⁰ Ako kag ang pangulo sang stake maid-id nga nagplano sang kada detalye. Antes lang gid sang komperensya, si Pangulong Boyd K. Packer, ang anay–Acting nga Pangulo sang Korum sang Dose ka Apostoles, nagtawag kon pwede niya ako updan. Nakibot ako kag, siyempre, nagpasugot. Nagpamangkot ako kon paano niya luyag sugdan bangod sia ang magapanguna. Iya ginpanugyan nga indi namon pagsundon ang mga ginplano kag maghanda nga sundon ang Espiritu. Maayo lang, may 10 pa ako ka adlaw nga magtuon, mangamuyo, kag maghanda.

Nga may blangko nga agenda, ara na kami sa atubang 20 ka minutos antes magsugod ang nga miting sang mga lider. Naglingi ako sa pangulo sang stake kag naghutik, “Kanami sini nga stake.”

Ginsiko ako ni Pangulong Packer kag nagsiling, “Wala istoryahanay.”

Nag-untat ako sa paghambal, kag ang iya pamulongpulong sa pangkabilogan nga komperensya nga “Reverence Invites Revelation”¹¹ nagsulod sa akon pensar. Akon napanilagan nga ginasulat ni Pangulong Packer ang mga reperensya nga balaan nga mga kasulatan. Ang Espiritu nagkompirma sa akon nga nagabaton sia sang mga pagpabatyag para sa miting. Ang akon eksperiyensya sa pagtuon nagsugod pa lang.

Si Pangulong Packer naghambal sa una nga 15 minutos kag ginsulit ang kaimportante sang pagpamuno sang tanan nga miting suno sa giya sang Balaan nga Espiritu. Kag nagsiling sia, “Mamati kita karon kay Elder Cook.”

Sang nagapadulong ako sa pulpito, namangkot ako kon ano kalawig ako mahambal kag kon may topiko sia nga luyag ipahambal sa akon. Siling niya, “Kuhaa ang 15 ka minutos kag magpadayon ka sa ano man nga ginapabatyag sa imo.” Naghambal ako sang mga 14 ka minutos kag ginpaambit ang tanan nga ara sa akon hunahuna.

Si Pangulong Packer nagtindog liwat kag naghambal sing 15 naman ka minutos. Ginpaambit niya ini nga balaan nga kasulatan:

“Ihambal ang mga panghunahuna nga ipahayag ko sa inyo mga tagipusuon, kag indi kamo mahuy-an sa panulok sang mga tawo;

“Kay igahatag sa inyo … sa mismo nga tion kon ano ang inyo ihambal.”¹³

Dayon nagsiling sia, “Mamati kita karon kay Elder Cook.”

Nakibot ako. Wala ko gid mapinsar ang posibilidad nga pahambalon ako sing duha ka beses sa isa ka miting. Wala gid ako sang mapinsaran nga ihambal. Nga nagapangamuyo sing hugot kag nagasalig sa Ginuo para sa bulig, bisan paano, ginbugayan ako sang isa ka panghunahuna, isa ka balaan nga kasulatan, kag naghambal ako sa sulod naman sang 15 minutos Nagpungko ako nga ginkapoy kaayo.

Si Pangulong Packer naghambal liwat sang 15 ka minutos parte sa pagsunod sa Espiritu kag ginpaambit ang pinanundlo ni Pablo nga indi kita dapat maghambal sang “mga pulong nga gintudlo sang kaalam sang tawo, kundi sa mga pulong nga gintudlo sang Espiritu.”¹⁴ Sa mahunahuna ninyo, daw maano gid ako sang ginpabatyag sia nga maghambal sa ikatatlo nga tion, “Mamati kita karon kay Elder Cook.”

Nablangko ako. Wala ako sing mahambal. Nahibaloan ko nga tion na ato nga magpakita ako sang mas dako nga pagtuo. Hinayhinay, naglakat ako padulong sa pulpito, nga nagapangayo sang bulig sa Dios. Sang nagapasaka na ako sa mikropono, milagroso ako nga ginpakamaayo sang Ginuo nga bisan paano makahatag sing isa pa ka 15-minutos nga mensahe.¹⁵

Ang miting natapos gid man, pero madasig ko nga narealisar nga ang sesyon sang mga hamtong magasugod sa isa ka oras. Ay abaw! Pareho kay Zoram, tuodtuod gid nga daw madalagan ako, pero pareho nga gindakop sia ni Nefi, nahibaloan ko nga dakpon ako ni Pangulong Packer. Ang sesyon sang mga hamtong nagsunod sang amo man nga pamaagi. Naghambal ako makatlo pa ka beses. Sang madason nga adlaw, sa tion sang pangkabilogan nga sesyon, naghambal ako kis-a.

Pagkatapos sang komperensya, si Pangulong Packer nagsiling nga may pagpalangga, “Himuon ta na liwat sa dason ah.” Palangga kag ginaapresyar ko gid si Pangulong Boyd K. Packer kag ang tanan ko nga natun-an.

Nakahibalo kamo kon ano ang akon ginapasalamatan? Nga wala ako nangampo—ukon naglikaw. Kon nagpadala ako sa akon desperado nga handum nga magpalagyo sa mga miting nga ato, nadula kuntani sa akon ang oportunidad nga madugangan ang akon pagtuo kag makabaton sang bugana nga pagbubo sang gugma kag paggiya halin sa Amay nga Langitnon. Natun-an ko ang Iya kaluoy, ang milagroso nga nagapabakod nga gahum ni Jesucristo kag Iya Pagbayad-Sala, kag ang gamhanan nga impluwensya sang Balaan nga Espiritu. Walay sapayan sang akon mga kahuyang,¹⁶ natun-an ko nga sarang ko magserbisyo; makabulig ako kon ang Ginuo nagagiya sa akon kon magpadayon lang ako—nga may pagtuo.

Bisan ano ang kadakuon, kasangkaron, kag kaseryoso sang mga hangkat nga aton ginaatubang sa kabuhi, tanan kita may mga tinion nga daw gusto naton mag-untat, mabiya, malagyo, ukon mangampo pa gani. Apang ang pagpakita sang pagtuo sa aton Manluluwas nga si Jesucristo, makabulig sa aton nga madaog ang pagkaluya bisan ano ang mga sablag nga aton masugata.

Pareho nga gintapos sang Manluluwas ang buluhaton nga ginpahimo sa Iya, Sia may gahum nga buligan kita nga matapos ang buluhaton nga ginhatag sa aton.¹⁷ Sarang kita bugayan nga magpadayon padulong sa dalan sang kasugtanan, bisan ano man ini kabudlay, kag sa ulihi mabaton ang kabuhi nga walay katapusan.¹⁸

Pareho sa ginsiling ni Propetang Joseph Smith, “Magpakabakod, kamong mga santos sang Dios, mag-agwanta pa gid sing diutay, kay ang mga unos sang kabuhi may katapusan, kag pagapadyaan kamo sinang Dios nga inyo ginaalagaran.”¹⁸ Sa ngalan ni Jesucristo, amen.