14:20

Ang Pinakadako nga Istorya sang Paskwa sang Pagkabanhaw nga Nasugid

Ni Elder Gary E. Stevenson

Sang Korum sang Dose ka Apostoles

Tuluka ang Libro ni Mormon sa bag-o nga paagi kag binagbinaga ang matahum nga saksi nga dala sini parte sa realidad sang nabanhaw nga Cristo.

Sulat sang Unang Pangulohan parte sa Paskwa sang Pagkabanhaw

Siguro madumduman pa ninyo ang pagbasa sang sulat halin sa Unang Pangulohan sa inyo ward ukon branch pila na ka semana ang nagligad. Ina nga sulat nag-anunsyo nga sa madason nga Domingo—Domingo sang Paskwa sang Pagkabanhaw—ang tanan nga ward kag branch magatipon lamang para sa sakramento nga miting, para may dugang nga tiyempo sa pagsimba sa balay samtang ginahanduraw sang mga pamilya ining pinakaimportante nga okasyon.¹

Nakuha sang sulat sang Unang Pangulohan ang akon atensyon, kag ginbinagbinag ko ang pamaagi nga ginaselebrar sang amon pamilya ang Paskwa sang Pagkabanhaw sa mga tinuig. Samtang ginabinagbinag ko ang amon mga selebrasyon, mas nahunahuna ko kon bala indi hungod nga wala na namon matutoki ang matuod nga kahulugan sining okasyon, nga sentro sa tanan nga mga nagapati kay Jesucristo.

Tradisyon sa Paskwa kag Paskwa sang Pagkabanhaw

Ato nga mga panghunahuna nagpabinagbinag sa akon sang kinalain sang amon pagselebrar sang Paskwa kon ikumparar sa Paskwa sang Pagkabanhaw. Kon Disyembre, bisan paano ginadugang namon ang kasadya sang “Jingle Bells,” pagpakabit sang medyas, kag mga regalo upod ang iban pa nga tradisyon—pareho sang pag-atipan sang mga nagakinahanglan, pagkanta sang paborito namon nga mga kanta kag himno sa Paskwa, kag siyempre pagbukas sang balaan nga mga kasulatan kag pagbasa sang istorya sang Paskwa sa Lucas 2. Kada tuig samtang ginabasa namon ining pinalangga nga istorya halin sa dako kag daan na nga Biblia, ginahimo sang amon pamilya ang siguro ginahimo man sang inyo pamilya—nagatakurong sang mga tualya kag nagakunop para irepresentar si Jose, Maria, kag ang madamo pa nga nag-upod sa pagsimba sa bata nga si Jesus, ginadrama-drama namon ang ginapakamahal nga istorya sang Paskwa sang pagkabun-ag sang Manluluwas.

Ugaling, ang amon mga selebrasyon sa pamilya kon Paskwa sang Pagkabanhaw, daw lain. Pamatyag ko ang amon pamilya nagsalig na lang sa “pagsimba” sa sinang espesyal nga Domingo para sa makahulugan, nasentro-kay-Cristo nga bahin sang Paskwa sang Pagkabanhaw; dayon bilang pamilya, nagatipon kami para maghiwat sang iban pa nga mga tradisyon parte sa Paskwa sang Pagkabanhaw. Nanamian ako magtulok sa amon mga kabataan kag karon mga apo nga nagapangita sang Easter eggs kag nagapangukay sa ila mga Easter basket.

Pero ang sulat sang Unang Pangulohan isa ka pagpukaw. Wala lamang kita gin-agda nga siguruhon nga ang aton selebrasyon sang pinakaimportante nga hitabo nga natabo diri sa duta—ang Pagbayad-Sala kag Pagkabanhaw ni Jesucristo—nagalakip sang pagtahod kag respeto nga bagay para sa Ginuo, gintagaan man kita sang dugang nga tiyempo upod sa aton mga pamilya kag kaabyanan sa Domingo sang Paskwa sang Pagkabanhaw para himuon ini.

Ining mga pulong sang Propetang Joseph Smith nagahatag sang dugang nga konteksto sa kaimportante sang mga hitabo sa Paskwa sang Pagkabanhaw: “Ang pundasyon nga mga prinsipyo sang aton relihiyon amo ang testimonya sang mga Apostoles kag mga Propeta, nahanungod kay Jesucristo, nga Sia napatay, ginlubong, kag nabanhaw sang ikatatlo nga adlaw, kag nagkayab pa-langit; kag ang tanan nga may kaangtanan sa aton relihiyon mga sanga lamang sini.”²

Ginhambalan namon ni Lesa ang mas maayo nga himuon sang amon pamilya sa tion sang Paskwa sang Pagkabanhaw. Siguro ang dapat namon ipamangkot sa amon kaugalingon amo ang butang nga dapat naton tanan binagbinagon: Paano bala naton i-modelo ang pinanudlo kag selebrasyon sang Pagkabanhaw ni Jesucristo, ang istorya sang Paskwa sang Pagkabanhaw nga may pareho nga balanse, kabug-osan, kag katahum sa relihiyoso nga tradisyon sang pagkabun-ag ni Jesucristo, ang istorya sang Paskwa?

Daw tanan kita nagatinguha. Naobserbahan ko ang nagadako nga pagtinguha sa mga Santos sa Ulihing mga Adlaw padulong sa nasentro-kay-Cristo nga Paskwa sang Pagkabanhaw. Nagalakip ini sang mas dako kag mas madinumdumon nga pagkilala sang Domingo de Ramos kag Biyernes Santo nga ginasunod sang iban nga mga Cristohanon nga relihiyon. Pwede man naton sundon ang nagakabagay nga mga tradisyon sa Paskwa sang Pagkabanhaw nga nasentro kay Cristo nga makita sa mga kultura kag mga kagawian sa mga pungsod sa bilog nga kalibutan.

Ang iskolar sang Bag-ong Katipan nga si N. T. Wright nagpanugyan: “Dapat nagahimo kita sang mga tikang sa pagselebrar sang Paskwa sang Pagkabanhaw sa bag-o nga mga paagi: sa art, literatura, hampang sang kabataan, binalaybay, musika, sinaot, mga pista, mga bell, kag espesyal nga mga konsiyerto. … Amo ini ang aton pinakadako nga pista. Kakasa ang Paskwa, kag sa bahin sang biblia duha lang ka kapitulo ang madula sa umpisa sang Mateo kag Lucas, wala na sang iban. Kakasa ang Paskwa sang Pagkabanhaw, kag wala na sang Bag-ong Katipan; wala na sang Kristiyanismo.”³

Ang Paskwa sang Pagkabanhaw, ang Biblia, kag ang Libro ni Mormon

Palangga naton ang Biblia tungod sang tanan nga ginatudlo sini sa aton parte sa pagkabun-ag, pag-alagad, Pagkalansang sa krus, kag Pagkabanhaw ni Jesucristo. Wala na sang tinaga nga nagaunod sang mas dako nga paglaum kag wala katapusan nga konsikwensya sa tanan nga katawhan sangsa ginhambal sang anghel sang aga sang Paskwa sang Pagkabanhaw sa Lulubngan sa Hardin: “Nabanhaw sia.”⁴ Dako ang aton kapasalamatan sa balaan nga kasulatan sa Bag-ong Katipan nga nagatipig sang istorya sang Paskwa sang Pagkabanhaw kag sang pag-alagad sang Manluluwas sa Paskwa sang Pagkabanhaw sa Judea kag Galilea.

Samtang padayon namon ni Lesa nga ginabinagbinag kon paano mapasangkad ang amon selebrasyon sang Paskwa sang Pagkabanhaw sa pamilya para mas masentro kay Cristo, ginhambalan namon kon ano nga tradisyon sang pagbasa sang balaan nga kasulatan ang amon sugdan sa pamilya—ang katumbas sang Lucas 2 para sa Paskwa sang Pagkabanhaw.

Dayon nabaton namon ining langitnon nga ideya: Dugang pa sa importante nga mga bersikulo parte sa Paskwa sang Pagkabanhaw sa Bag-ong Katipan, kita nga mga Santos sa Ulihing mga Adlaw ginhatagan sang pinakamatahum nga regalo sa Paskwa sang Pagkabanhaw! Regalo sang pinasahi nga pamatuod, isa pa ka testamento sang milagro sang Paskwa sang Pagkabanhaw nga nagaunod, siguro, sang pinakamatahum nga balaan nga kasulatan parte sa Paskwa sang Pagkabanhaw sa bilog nga Kristiyanismo. Ginatumod ko siyempre ang Libro ni Mormon, kag ilabi na gid, ang rekord ni Jesucristo nga nagapakita sa pumuluyo sa Bag-ong Kalibutan, sa Iya nabanhaw nga himaya.

Ginlaragway ni Joseph Smith ang Libro ni Mormon bilang “ang labing husto sa ano man nga libro,”⁵ kag ang puno sang 3 Nefi 11, nagasugod sang matahum nga istorya sang pagbisita sang nabanhaw nga Cristo sa mga Nefinhon, ang pag-alagad sang Manluluwas sa Paskwa sang Pagkabanhaw. Ining balaan nga mga kasulatan parte sa Paskwa sang Pagkabanhaw, nagapamatuod sang Pagkabanhaw sang Ginuong Jesucristo.

Sa sining mga kapitulo, nagtawag si Cristo sang Dose ka Apostoles, nagtudlo sa tanan nga nagatipon sang Iya pinanudlo sa Iya Wali sa Bukid, nag-anunsyo nga natuman na Niya ang layi ni Moises, kag nagpropesiya parte sa pagtipon sang Israel sa ulihing mga adlaw. Nagpang-ayo Sia sang masakiton kag nagpangamuyo para sa mga tawo sa mahimayaon nga paagi nga “wala sing dila nga makahambal, ukon man mahimo nga masulat sang bisan sin-o nga tawo, ukon man mapanghunahuna sang mga tagipusuon sang mga tawo ang amo kadako kag makahalangyag nga mga butang nga amon alangay nga nakita kag nabatian nga ginpanghambal ni Jesus; kag wala sing isa nga makatungkad sang kalipay nga nagpuno sang amon mga kalag sa tion nga nabatian namon sia nga nagapangamuyo sa Amay para sa amon.”⁶

Si Jesucristo nga nagapakita sa mga Nefinhon

Sining Paskwa sang Pagkabanhaw, tutokan sang amon pamilya ang una nga 17 ka bersikulo sang 3 Nefi 11, nga pamilyar na sa inyo. Matandaan ninyo ang dako nga kadam-an sa palibot sang templo sa duta nga Bugana nga nakabati sang tingug sang Dios nga Amay kag nakakita kay Jesucristo nga nagapanaog halin sa langit para itanyag ang pinakamatahum nga pangagda sa Paskwa sang Pagkabanhaw.

“Bangon kag magpalapit sa akon, … agud inyo mahikap ang mga agi sang mga lansang sa akon mga kamot kag sa akon mga tiil, agud inyo mahibal-an nga ako … ang Dios sang bug-os nga duta, kag ginpatay tungod sang mga sala sang kalibutan.

“Kag… ang kadam-an nagpalapit … sing tinag-isaisa … kag nakita sa ila mga mata kag nahikap sang ila mga kamot, … kag nagpamatuod, nga amo ini sia, …

“Kag … nagsinggit sila sing dulungan, nga nagasiling:

“Hosana! Bulahan ang ngalan sang Labing Mataas nga Dios! Kag naghalapa sila sa tiilan ni Jesus, kag nagsimba sa iya.”⁷

Hunahunaa: ang mga Nefinhon sa templo nakahikap gid sang mga kamot sang nabanhaw nga Ginuo! Gusto namon nga himuon ining mga kapitulo sa 3 Nefi nga bahin sang amon tradisyon sa Paskwa sang Pagkabanhaw pareho nga ang Lucas 2 kabahin sang amon tradisyon sa Paskwa. Sa pagkamatuod, ang Libro ni Mormon nagapaambit sang pinakadako nga istorya sang Paskwa sang Pagkabanhaw nga nasugid. Indi naton pagtugtan nga ini mangin pinakadako nga istorya sang Paskwa sang Pagkabanhaw nga wala masugid.

Ginaagda ko kamo nga tulukon ang Libro ni Mormon sa bag-o nga paagi kag binagbinagon ang matahum nga saksi nga dala sini parte sa realidad sang nabanhaw nga Cristo upod sa katahum kag kasangkad sang doktrina ni Cristo.

Ang Libro ni Mormon Nagapamatuod kay Jesucristo

Mamangkot kita, Paano ang pagbasa sang balaan nga mga kasulatan sa Libro ni Mormon sa tion sang Paskwa sang Pagkabanhaw makabugay sang aton mga kabuhi kag sang kabuhi sang aton mga pinalangga sa makahulugan nga paagi? Masobra pa sangsa aton marealisar. Tagsa nga magbasa kita kag magtuon halin sa Libro ni Mormon, makapaabot kita sang manami nga mga resulta.

Sang naligad lang, nagtambong kami ni Lesa sang haya sang isa ka suod nga abyan, babayi nga puno sang pagtuo nga ang kabuhi ginkuha sing temprano tungod sa balatian. Nagtipon kami upod sa iya pamilya kag suod nga mga abyan, nga nagabayluhanay sang mga istorya parte sa sining mabuot nga tawo nga nagbugay sa amon mga kabuhi.

Samtang nagatindog sa unhan sang lungon nga nagaistorya sa iban, natalupangdan ko ang duha ka bata nga babayi sa pangidaron sang Primary nga nagpalapit sa lungon kag nagtihin—ang mga mata tupong lang sa kilid sini—para maghatag sang pagtahod sa ila pinalangga nga tiya. Kay wala sang iban nga malapit, nagpalapit si Lesa kag nagkatinkatin sa tupad nila para paumpawan sila kag tudloan. Ginkamusta niya sila kag ginpamangkot kon nakahibalo sila kon diin na ang ila tiya sa karon. Ginsugid nila ang ila kasubo, pero ining pinalangga nga mga anak sang Dios, nga may kumpiyansa sa ila mga mata, nagsiling nga nahibal-an nila nga malipayon na karon ang ila tiya, kag posible nga upod na sia ni Jesus.

Sa sini kahubin nga edad, nakakita sila sang kalinong sa dako nga plano sang kalipayan, kag sa kaugalingon nila nga paagi bilang bata, nagpamatuod sang matahum nga realidad kag simple nga katahum sang Pagkabanhaw sang Manluluwas. Nahibal-an nila ini sa ila mga tagipusuon tungod sa madinumdumon nga pagtudlo sang mapinalanggaon nga mga ginikanan, pamilya, kag mga lider sang Primary nga nagatanom sang binhi sang pagtuo kay Jesucristo kag sa kabuhi nga wala katapusan. Maalam para sa ila edad, madamo sa kamatuoran nga naintiendihan sining mga bata ang nagaabot sa aton paagi sa mensahe sang Paskwa sang Pagkabanhaw, kag sa pag-alagad sang nabanhaw nga Manluluwas kag sa mga pulong sang mga propeta nga ginasugid sa Libro ni Mormon.

Naobserbahan ko nga kon maghatag si Pangulong Russell M. Nelson sang regalo nga Libro ni Mormon sa indi naton kaupod sa pagtuo, lakip na sa mga lider sang kalibutan, masami niya ginabuksan ang 3 Nefi kag ginabasa ang parte sa pagpakita sang nabanhaw nga Cristo sa mga Nefinhon. Sa paghimo sini, ang buhi nga propeta matuod nga nagasaksi sa buhi nga Cristo.

Indi kita makatindog bilang mga saksi ni Jesucristo tubtob nga makahatag kita sang pagpamatuod parte sa Iya. Ang Libro ni Mormon isa pa ka saksi ni Jesucristo tungod sa tanan nga sagrado nga mga pahina sini, sunod-sunod nga mga propeta ang nagpamatuod indi lang nga maabot si Cristo, kundi nga nag-abot gid Sia.

Tungod sa Iya

Ginauyatan ko sa akon kamot ang isa ka kopya sang una nga edisyon sang Libro ni Mormon. Ang paghimo sini makatalandog gid pirme para sa akon. Sa kalabanan sang akon pagkahamtong, nanamian gid ako, nagadayaw, kag natandog sa ginhimo sang lamharon nga Joseph Smith para malubad kag maimprinta ining sagrado nga libro sang balaan nga kasulatan. Ang mga milagro nga kinahanglan matabo daw indi mapatihan.

Pero indi ina ang rason nga natandog ako sining libro. Tungod ini kay ining libro, masobra pa sangsa bisan ano nga libro nga naimprinta sa sining duta, nagasaksi sang kabuhi, pag-alagad, mga pinanudlo, Pagbayad-Sala, kag Pagkabanhaw ni Jesucristo. Mahal kong mga kauturan, ang regular nga pagtuon sa sining libro parte kay Jesucristo magabag-o sang inyo kabuhi. Buksan sini ang inyo mga mata sa bag-o nga mga posibilidad sa inyo kabuhi. Dugangan sini ang inyo paglaum kag pun-on kamo sang pagpalangga sa isigkatawo. Ilabi sa tanan, tukuron sini kag pabakuron ang inyo pagtuo kay Jesucristo kag bugayan kamo sang sigurado nga ihibalo nga Sia kag ang aton Amay nakakilala sa inyo, nagapalangga sa inyo, kag gusto Niya nga makita ninyo ang dalan papauli, nga may dako nga P.

Pinalangga nga kauturan, nag-abot na ang tiyempo, nga ginsugid sang mga propeta sadto, “kon san-o ang ihibalo nahanungod sa isa ka Manluluwas magalapnag sa tanan nga bahin sang tagsa ka pungsod, kabikahan, hinambalan, kag katawhan.”⁸ Nagakakita na naton ang katumanan sining propesiya sa aton atubang, paagi sa panaksihon kay Jesucristo nga makita sa Libro ni Mormon.

Wala na sang iban nga libro nga nagapakita nga:

Tungod kay Jesucristo, nagbag-o ang tanan.
Tungod sa Iya, ang tanan mas maayo.
Tungod sa Iya, masarangan na ang kabuhi—ilabi na ang masakit nga mga tinion.
Tungod sa Iya, ang tanan nangin posible.

Ang pagbisita Niya bilang nabanhaw nga Manluluwas, nga ginpakilala sang Dios nga Amay, amo ang pinakamahimayaon kag madinalag-on nga mensahe sang Paskwa sang Pagkabanhaw. Buligan sini ang mga miyembro sang aton mismo pamilya nga makaangkon sang testimonya parte kay Jesucristo bilang aton Manluluwas kag Manunubos, nga nagbugto sang mga gapos sang kamatayon.

Nagatapos ako upod ang akon testimonya parte sa pagkamatuod sang Libro ni Mormon kag ni Jesucristo bilang Anak sang buhi nga Dios. Sa ngalan ni Jesucristo, amen.