Sarang Niya Ako Paayuhon!
Ang nagapang-ayo kag nagatubos nga gahum sang Manluluwas madapat sa mga wala-gintuyo nga mga kasaypanan, pigaw nga mga desisyon, mga hangkat, kag mga pagtilaw sing tagsa ka sari—subong man sa aton mga kasal-anan.
Si Moroni nagpromisa nga kon magbasa kita sang Libro ni Mormon kag dayon mamangkot sa Dios nga Walay Katapusan nga Amay, nga may bunayag nga tagipusuon, nga may matuod-tuod nga tinutuyo, nga may pagtuo kay Cristo kon matuod ini, ipakita sang Dios ang kamatuoran sini, paagi sa gahum sang Balaan nga Espiritu.1 Minilyon ka tawo ang nag-aplikar sining promisa kag nagbaton sang nagapasalig nga saksi sang Pagpanumbalik sang kabug-osan sang ebanghelyo ni Jesucristo.
Si Moroni nagalaygay sa aton, kon magbasa kita sang Libro ni Mormon, nga “dumdumon kon nangin daw ano kamaluluy-on ang Ginuo sa mga anak sang tawo, gikan pa sa pagtuga kay Adan bisan padalayday tubtob sa [sining] tion, … kag [nga] binagbinagon ini sa [aton] mga tagipusuon.”2 Ang mga sugilanon kag mga pinanudlo sa Libro ni Mormon nagapadumdum sa aton kag nagasaksi sang paghigugma, kaawa, kag kaluoy sang Manluluwas.
Ang akon amay nagtaliwan sang Abril 2013. Samtang nagahanda ako nga maghambal sa iya lubong, akon narealisar kon daw ano ako kabulahan nga mahibaloan kag mapalangga ang iya paborito nga mga balaan nga mga kasulatan. Ginpaambit niya ang mga ini sa mga pagtipon-tipon sang pamilya, kag ginbasa niya ang mga ini sa akon sang nagakinahanglan ako sang laygay, paggabay, ukon pagpabakod sang akon pagtuo. Nabatian ko sia nga ginpaambit ang mga ini sa iya mga pamulongpulong kag mga takay. Indi lang nga nahibaloan ko ang mga ini, kundi madumduman ko pa gihapon ang iya tingog kag ang akon espirituhanon nga mga balatyagon sadto sang iya ginpaambit ang mga ini. Paagi sa pagpaambit sang balaan nga mga kasulatan kag mga balatyagon, ginbuligan ako sang akon amay nga magpasad sang isa ka malig-on nga pundasyon sang pagtuo sa kay Ginuong Jesucristo.
Ang akon amay nanamian gid sang sugilanon sang pagbisita sang Manluluwas sa katawhan ni Nefi.3 Ining sagrado nga sugilanon iya sang nabanhaw kag napahitaas nga Ginuong Jesucristo. Nag-inom Sia gikan sa mapait nga ilimnan kag nag-antos sang tanan nga butang agud nga indi kita mag-antos kon maghinulsol kita.4 Ginduaw Niya ang kalibutan sang mga espiritu kag nag-organisar sang pagtudlo sang ebanghelyo didto.5 Nabanhaw sia sa pagkamatay, kag nakaupod Niya kag nagbaton sang mga kasuguan halin sa Amay nga ipaambit ang balaan nga mga kasulatan sa mga Nefinhon nga magapakamaayo sang palaabuton nga mga henerasyon.6 Ginpahitaas Sia kag nag-agom sang Iya tanan nga walay katapusan nga gahum kag ikasarang. Pwede naton matun-an ang tagsa ka detalye sang Iya mga pinanudlo.
Sa 3 Nefi 11, mabasa naton kon paano ang Manluluwas nagpanaog halin sa langit agud tudloan ang mga Nefinhon nga Sia si Jesucristo, nga ang mga propeta nagpamatuod nga magaabot sa kalibutan. Sia nagpahayag nga Sia ang Kasanag sang Kalibutan kag nga Iya ginhimaya ang Amay sa pagdala sang mga sala sang kalibutan. Gin-agda Niya ang mga tawo nga magpalapit kag ikab-ot ang ila mga kamot sa Iya kilid kag hikapon ang mga agi sang mga lansang sa Iya mga kamot kag sa Iya mga tiil. Luyag Niya nga ila mahibaloan nga Sia ang Dios sang Israel, nga ginpatay tungod sang mga sala sang kalibutan. Ang mga tawo masadya nga nagtuman, nga nagpalapit sing tinag-isaisa tubtob nga nakita nila kag nabatyagan tanan nga amo ini Sia, nga ginsulat sang mga manalagna, nga magakari.7
Gintudloan ni Jesus ang mga Nefinhon parte sa kaimportante sang paghinulsol, parte sa pagmangin subong sang isa ka bata nga diutay, kag kinahanglan nga magpabunyag sa isa nga may awtoridad Niya. Dayon nagtudlo Sia sing madamo parte sa doktrina nga aton ginatun-an sini nga tuig sa Bag-ong Katipan.
Sa 3 Nefi 17, aton mabasa nga si Jesus nagsiling sa mga tawo nga tion na Niya nga magkayab sa Amay kag agud ipakita man ang Iya kaugalingon sa nagkaladula nga mga tribo sang Israel.8 Sang ginpalibot niya ang iya panulok sa kadam-an, Iya nakita nga may mga luha sila, kag nagatulok sa Iya sing tadlong nga daw buot nila nga pangayuon sa iya nga magpabilin sing diutay pa gid upod sa ila.9
Ang sabat sang Manluluwas sa mga Nefinhon pareho nga makatalandog kag nagapanudlo. Sia nagsiling, “Yari karon, ang akon tagipusuon napuno sing kaluoy para sa inyo.”10
Nagapati ako nga ang Iya kaluoy mas labi pa sangsa sabat sa mga luha sang mga tawo. Daw makita Niya ang ila ginapamensar paagi sa Iya nagabayad-sala nga pagsakripisyo. Iya nakita ang tagsa nila ka kasakit, kapipit-an, kag pagsulay. Iya nakita ang ila mga balatian. Nakita Niya ang ila mga kahuyangan, kag Iya nahibal-an paagi sa Iya masakit nga pag-antos sa Getsemani kag Golgota kon paano sila buligan suno sa ila mga kahuyangan.11
Sa amo man, kon ang Manluluwas nga si Jesucristo, magtulok sa aton, makita kag mahangpan Niya ang kasakit kag kabug-at sang aton mga sala. Makita Niya ang aton mga adiksyon kag mga hangkat. Makita Niya ang aton mga paghimakas kag mga kabudlayan sa ano man nga sari—kag napuno Sia sang kaluoy sa aton.
Ang Iya maalwan nga pangagda sa mga Nefinhon nagsunod: “May mga masakiton bala dira sa inyo? Dalha sila diri. May mga lupog bala kamo, ukon bulag, ukon piang, ukon paralitiko, ukon aruon, ukon mga naitos, ukon mga bungol, ukon mga may kon ano man nga sari sang ginaantos? Dalha sila diri kag paayuhon ko sila, kay naluoy ako sa inyo; ang akon tagipusuon napuno sang kaawa.”12
Kag ang kadam-an nagpalapit, “upod ang tanan nga ginbudlayan sa ano man nga sari sang ginaantos; kag ginpaayo niya sila ang tagsa-tagsa nga gindala palapit sa iya.”13
Sang 1990 nagapuyo kami sa isa ka gamay nga banwa sang Sale, sa Victoria, Australia. Malipayon kami sa kasakuon sa pamilya, sa Simbahan, kag sa mga obligasyon sa trabaho. Isa ka matahum nga tig-ilinit nga adlaw nga Sabado antes lang gid mag-Paskwa, nagdesisyon kami nga magbisita sa pila ka mga parke kag sa isa ka paborito nga baybay. Pagkatapos maglingawlingaw sa isa ka manami nga adlaw sang paghinampang bilang pamilya, nagsakay na kami tanan sa awto kag nagpauli. Samtang nagamaneho, natulogan ako sing makadali kag nagresulta sa pagkabunggo sang ulo sang salakyan. Sang maumpawan ako, gintan-aw ko ang palibot sang salakyan. Ang akon asawa, si Maxine, nabali ang batiis kag ginabudlayan magginhawa. Nabali ang iya tul-an sa dughan (sternum). Ang amon tatlo ka bata nga babayi na-shock pero maayo lang kay daw OK man sila. Ako ya, may gagmay nga mga kasamaran. Pero ang amon lima ka bulan nga anak nga lalaki wala nagagiho.
Sa tunga sang tensyon kag kinagumon sa sinang eksena sang aksidente, ang amon kamagulangan nga anak nga babayi, si Kate nga 11 anyos nagsiling nga nagadali, “Tay, kinahanglan mo hatagan si Jarom sang bendisyon.” Pagkatapos sang pila ka pagpaninguha, ang akon mga anak nga babayi kag ako nakatigayon nga makagwa sa awto. Si Maxine indi gid magiho. Mahinalungon ko nga ginhakwat si Jarom; dayon, samtang nagahigda sa duta, mahinay ko sia nga gintungtong sa akon dughan kag ginhatagan sia sing bendisyon sang priesthood. Sang mag-abot ang ambulansya pagligad sang mga 40 ka minutos, si Jarom may pangalibutan na.
Sina nga gab-i ginbilin ko ang tatlo ka miyembro sang akon pamilya sa ospital kag malinong nga nag-taxi pauli upod ang akon duha ka bata nga babayi. Sa malawig nga kagab-ihon, nagpangamuyo ako sa Amay nga Langitnon nga ang akon pamilya kag yadtong mga nagkalasamaran sa pihak nga salakyan mag-ayo. Ginkaluy-an, ang akon mga pangamuyo kag ang hanuot nga mga pangamuyo sang madamo nga iban pa ginsabat. Ang tanan nag-ayo paglipas sang panahon, isa ka dako nga bugay kag mahinuklugon nga kaluoy.
Pero, padayon ako sa gihapon nga nagabatyag sang pagkakonsensya kag pagkanugon sa pagtuga sadtong grabe nga aksidente. Nagabugtaw ako sa kagab-ihon kag ginabalikbalik panumdum ang makahaladlok nga hitabo. Ginbudlayan ako sa pila ka tuig nga patawaron ang akon kaugalingon kag makakita sang kalinong. Dayon, bilang lider sang priesthood, samtang ginabuligan ang iban nga maghinulsol kag mabatyagan ang kaluoy, kaawa, kag gugma sang Manluluwas, akon narealisar nga sarang Niya ako paayuhon.
Ang nagapang-ayo kag nagatubos nga gahum sang Manluluwas madapat sa mga wala-gintuyo nga mga kasaypanan, pigaw nga mga desisyon, mga hangkat, kag mga pagtilaw sing tagsa ka sari—subong man sa aton mga kasal-anan. Sang nagliso ako sa Iya, ang akon balatyagon sang pagkakonsensya kag pagkanugon amat-amat nga nabuslan sang kalinong kag kapahuwayan.
Si Pangulong Nelson nagpanudlo: “Sang nagbayad-sala ang Manluluwas para sa tanan nga katawhan, ginbuksan Niya ang alagyan nga ang mga nagasunod sa Iya makabaton sang Iya pagpang-ayo, pagpabakod, kag nagatubos nga gahum. Ining espirituhanon nga mga pribelihiyo mabaton sang tanan nga nagahandum nga magpamati sa Iya kag magsunod sa Iya.”14
Mga kauturan, kon nagapas-an man kamo sang kabug-at sang wala pa malubad nga sala, nagaantos tungod sang pagsaklaw nga madugay na nga ginhimo sa inyo, ukon ginabudlayan nga magpatawad sang inyo kaugalingon tungod sang indi-hungod nga sayop, makabaton kamo sang nagapang-ayo kag nagatubos nga gahum sang Manluluwas nga si Jesucristo.
Nagasaksi ako nga buhi Sia. Sia ang aton Manluluwas kag Manunubos. Palangga Niya kita. May kaawa Sia sa aton, puno Sia sing kaluoy, kag sarang Niya kamo paayuhon. Sa ngalan ni Jesucristo, amen.