9:58

“Wala na sing Butang nga Tuman Kadako kag Katam-is Pareho sang Akon Kalipay”

Ni Elder Craig C. Christensen

Sang Sitenta

Ang paghinulsol adlaw-adlaw kag pagkari kay Cristo amo ang paagi agud mabatyagan ang kalipay—kalipay nga labaw sa aton mahunahuna.

Sa bilog Niya nga mortal nga pag-alagad, ang Manluluwas nagpakita sing dako nga kaluoy para sa tanan nga anak sang Dios—labi na gid sa mga nagaantos ukon nagpalayo. Sang ginpakalain sang mga Fariseo tungod sa pagsimpon kag pagkaon upod sa mga makasasala, si Jesus nagsabat paagi sa pagtudlo sing tatlo ka mga paanggid.¹ Sa tagsa sining mga paanggid, gintalupangod Niya ang importansya sang pagpangita sang mga nagtalang kag ang kalipay nga mabatyagan sa ila pagbalik. Halimbawa, sa paanggid sang nadula nga karnero nagsiling Sia, “May [labi] pa nga kalipay sa langit tungod sa isa ka makasasala nga nagahinulsol.”²

Ang luyag ko subong amo ang pabakuron ang relasyon sang kalipay kag paghinulsol—labi na, ang kalipay kon maghinulsol kita kag ang mga balatyagon sang kalipay nga maeksperiyensyahan naton kon mag-agda kita sa iban nga magkari kay Cristo kag magbaton sang Iya nagabayad-sala nga sakripisyo sa ila mga kabuhi.

Kita Nagakabuhi Agud Makaangkon Kita sing Kalipay

Sa balaan nga mga kasulatan, ang tinaga nga kalipay masami nagakahulugan sing labaw sangsa malip-ot nga mga tinion sang pagkakontento ukon bisan gani kasadya. Ang kalipay sa sini nga konteksto diosnon nga kinaiya, nga maagom sa iya sini kabug-osan kon magbalik kita sa pagpuyo sa presensya sang Dios.³ Mas madalom ini, makaalsa, nagadugay, kag makabag-o sang kabuhi sangsa bisan ano pa man nga kasadya ukon kasulhay nga mahatag sining kalibutan.

Gintuga kita agud makaangkon sang kalipay. Ini ang kapalaran nga ginplano para sa aton bilang mga anak sang mahigugmaon nga Amay nga Langitnon. Luyag Niya ipaambit ang Iya kalipay sa aton. Ang propetang si Lehi nagtudlo nga ang plano sang Dios para sa tagsa sa aton amo nga “[kita] makaangkon sing kalipay.”⁴ Tungod nagakabuhi kita sa kalibutan nga puno sang kalainan, ang nagadugay ukon wala katubtuban nga kalipay daw haluson pirme malab-ot. Pero sa madason nga bersikulo, nagapadayon si Lehi sa pagpaathag nga “ang Mesias [nagkari agud] … tubuson [kita] halin sa pagkahulog sa sala.”⁵ Ang pagtubos, paagi kag tungod sa Manluluwas nga si Jesucristo, nagahimo sang kalipay nga posible.

Ang mensahe sang ebanghelyo mensahe sang paglaum, sang “maayong balita sang dakung kalipay,”⁶ kag amo ang paagi nga mabatyagan sang tanan ang paghidaet kag mga higayon sang kalipay sa sining kabuhi kag mabaton ang kabug-osan sang kalipay sa madason nga kabuhi.⁷

Ang kalipay nga aton ginatumod regalo para sa matutom, apang may kabaylo ini. Ang kalipay indi barato ukon ginahatag sing pasapayan lang. Sa baylo, ginbakal ini “sang hamiling dugo ni [Jesu] Cristo.”⁸ Kon nahangpan gid naton ang bili sang matuod, diosnon nga kalipay, indi kita magduhaduha nga isakripisyo ang bisan ano nga dutan-on nga pagkabutang ukon maghimo sang kinahanglanon nga mga pagbag-o sa kabuhi agud mabaton ini.

Nahangpan ini sang gamhanan pero mapainubuson nga hari sa Libro ni Mormon. “Ano ang akon pagahimuon,” siling niya, “agud mahimo nga mabun-ag ako sa Dios, nga ining malaut nga espiritu magabot gikan sa akon dughan, kag makabaton sang iya Espiritu, agud mahimo nga mapuno ako sang kalipay … ? Yari karon, siling niya, ihatag ko ang tanan nga yari sa akon, huo, talikdan ko ang akon ginharian, agud mahimo nga mabaton ko ining dako nga kalipay.”⁹

Bilang sabat sa pamangkot sang hari, ang misyonaryong si Aaron nagsiling, “Kon ginapangayo mo ini nga butang, … [magyaub] sa atubang sang Dios … [kag hinulsulan] mo ang tanan mo nga mga sala.”¹⁰ Ang paghinulsol nagapadulong sa kalipay,¹¹ tungod ini ang dalan padulong sa Manluluwas nga si Jesucristo.¹²

Ang Kalipay Nagaabot paagi sa Sinsero nga Paghinulsol

Para sa iban, ang pagkabig sa paghinulsol nga dalan padulong sa kalipay dawsa kabaliskaran. Ang paghinulsol, kon kis-a, masakit kag mabudlay. Nagapangayo ini sang pag-ako nga ang pila sang aton mga hunahuna kag mga buhat—bisan pa gani ang pila sang aton mga ginapatihan—sala. Ang paghinulsol nagapangayo man sang pagbag-o, nga, kon kis-a, mabudlay. Pero ang kalipay kag kasulhay indi pareho. Ang sala—lakip na ang sala sang pagpabaya—nagapugong sang aton kalipay.

Sa ginhambal sang salmista, “Ang paghibi magapadayon sa kagab-ihon, apang ang kalipay magaabut sa kaagahon.”¹³ Sa paghinulsol naton sang aton mga sala, dapat kita magtutok sa dako nga kalipay nga nagasunod. Ang gab-i ayhan malawig, pero ang aga maabot gid, kag, o, daw ano kanami sang paghidaet kag kalipay nga aton mabatyagan sa paghilway sa aton sa sala kag pag-antos sang Pagbayad-Sala sang Manluluwas.

Wala na sing Butang nga Tuman Kadako kag Katam-is Pareho sang Akon Kalipay

Binagbinaga ang eksperiyensia ni Alma sa Libro ni Mormon. “Ginsakit sia sang wala’y katapusan nga pagpaantos” kag ang iya kalag “gintublag” tungod sang iya mga sala. Pero pagdangop niya sa Manluluwas para sa kaluoy, “wala na sia gintublag pa sang panumduman sang [iya] mga sala.”¹⁴

“Kag O, daw ano nga kalipay,” siling niya, “kag daw ano kamakahalangyag nga kapawa ang akon nakita; huo, … wala na sing butang nga tuman kadako kag katam-is pareho sang akon kalipay.”¹⁵

Ini ang sahi sang kalipay nga matigayon sinang mga nagakari kay Jesucristo paagi sa paghinulsol.¹⁶ Sa gintudlo ni Pangulong Russell M. Nelson:

“Matigayon naton ang gahum sang Pagbayad-Sala ni Jesucristo paagi sa paghinulsol. …

Kon ginapili naton nga maghinulsol, ginapili naton nga magbag-o! Ginatugotan naton ang Manluluwas nga bag-uhon kita sa pinakamaayo nga bersyon sang aton mga kaugalingon. Ginapili naton nga magtubo sing espirituhanon kag magbaton sang kalipay—ang kalipay sang pagtubos Niya sa aton. Kon ginapili naton nga maghinulsol, ginapili naton nga mangin pareho kay Jesucristo!”¹⁷

Ang paghinulsol nagadala sang kalipay tungod ginahanda sini ang aton mga tagipusuon nga mabaton ang impluwensya sang Balaan nga Espiritu. Ang mapuno sang Balaan nga Espiritu nagakahulugan sang pagkapuno sang kalipay. Kag ang mapuno sang kalipay nagakahulugan nga mapuno sang Balaan nga Espiritu.¹⁸ Ang aton kalipay nagadugang sa aton pagtinguha adlaw-adlaw nga dal-on ang Espiritu sa aton mga kabuhi. Pareho sa gintudlo ni propetang Mormon: “Wala’y sapayan sini nagpuasa sila kag nagpangamuyo sing masunson, kag nagbakod kag nagbakod sa ila pagkamapainubuson, kag naglig-on kag naglig-on sa [ila] pagtuo kay Cristo, tubtob sa pagkapuno sang ila mga kalag sing kalipay kag kaumpawan.”¹⁹ Ang Ginuo nagapromisa sa tanan nga nagatinguha nga sundon Sia, “Ipahayag ko sa inyo … ang akon Espiritu, nga magapasanag sang inyo hunahuna, nga magapuno sang inyo kalag sang kalipay.”²⁰

Ang Kalipay sang Pagbulig sa Iban nga Maghinulsol

Pagkatapos naton mabatyagan ang kalipay tungod sang sinsero nga paghinulsol, natural lang nga gusto naton ipaambit inang kalipay sa iban. Kon himuon naton ini, ang aton kalipay nagadamo. Amo gid ina ang natabo kay Alma.

“Amo ini ang akon kasadya,” siling niya, “nga basi pa lang mangin isa ako ka galamiton sang Dios sa pagdala sang pila ka kalag sa paghinulsol; kag amo ini ang akon kalipay.

“Kag yari karon, kon makita ko ang madamo sang akon mga kauturan nga matuod-tuod nga mahinulsulon, kag nagakari sa Ginuo nga ila Dios, nian ang akon kalag napuno sang kalipay; nian madumduman ko kon ano ang ginhimo sang Ginuo para sa akon, …huo, nian madumduman ko ang iya maluluy-on nga butkon nga iya gin-untay [sa] akon.”²¹

Ang pagbulig sa iban nga maghinulsol natural nga pagpabutyag sang aton pagpasalamat sa Manluluwas; kag kuluhaan ini sang daku nga kalipay. Ang Ginuo nagpromisa:

“Kon mangin amo sini nga kamo … makadala sing bisan isa lang ka kalag sa akon, daw ano kadako ang inyo kalipay upod sa iya sa ginharian sang akon Amay!

“Kag karon, kon ang inyo kalipay mangin dako sa isa ka kalag nga inyo gindala sa akon … , daw ano kadako ang inyo mangin kalipay kon magdala kamo sing madamo nga kalag sa akon!”²²

Daw Ano Kadako ang Iya Kalipay sa Kalag nga Nagahinulsol

Makabulig para sa akon nga hunahunaon ang kalipay nga mabatyagan sang Manluluwas sa tagsa nga mabaton naton ang mga bugay sang Iya nagabayad-sala nga sakripisyo sa aton mga kabuhi.²³ Sa ginhinambitan ni Pangulong Nelson,²⁴ ginpaambit ni Apostoles Pablo sa iya Sulat sa mga Hebreo ining panghunahuna: “Isikway ta man ang tagsa ka … sala nga nagatapik gid, … nga nagatulok kay Jesus nga pangulo kag manughimpit sang aton pagtuo; nga tungod sa kalipay nga ginbutang sa iya atubang nagbatas sang krus … kag nagalingkod sa tuo sang trono sang Dios.”²⁵ Masami nagahambal kita parte sa kasakit kag pag-antos sang Getsemani kag Kalbaryo, pero talagsa lang nagahambal parte sa daku nga kalipay nga siguro ginpaabot sang Manluluwas sa paghalad Niya sang Iya kabuhi para sa aton. Klaro, ang Iya kasakit kag Iya pag-antos para gid sa aton, agud matilawan naton ang kalipay sang pagbalik upod sa Iya sa presensya sang Dios.

Pagkatapos tudlo sa katawhan sa dumaan nga Amerika, ang Manluluwas nagpabutyag sang Iya daku nga gugma para sa ila sa pagsiling:

“Karon, tan-awa, dako ang akon kalipay bisan tubtob sa kabug-usan, tungod sa inyo … ; huo, kag bisan ang Amay nagakasadya, kag pati man ang tanan nga balaan nga mga anghel. …

“… Sa [inyo] nalubos ang akon kalipay.”²⁶

Magkari kay Cristo kag Batona ang Iya Kalipay

Mga kauturan, nagahingapos ako paagi sa pagpaambit sang akon personal nga saksi, nga ginakabig ko nga sagrado nga dulot. Nagapamatuod ako nga si Jesucristo ang Manluluwas kag Manunubos sang kalibutan. Nakahibalo ako nga palangga Niya ang tagsa sa aton. Ang Iya solo nga ginatutokan, ang Iya “buluhaton kag [Iya] himaya,”²⁷ amo ang buligan kita nga mabaton ang kabug-osan sang kalipay sa Iya. Personal ako nga saksi nga ang paghinulsol adlaw-adlaw kag pagkari kay Cristo amo ang paagi agud mabatyagan ang kalipay—kalipay nga labaw sa aton mahunahuna.²⁸ Amo ina kon ngaa ari kita sa duta. Amo ina kon ngaa ginhanda sang Dios ang Iya dako nga plano sang kaluwasan para sa aton. Si Jesucristo matuod “ang dalan, ang kamatuoran, kag ang kabuhi”²⁹ kag amo lang gid ang “ngalan nga ginhatag sa idalom sang langit sa diin ang tawo mahimo nga maluwas sa ginharian sang Dios.”³⁰ Nagasaksi ako sini sa sagrado nga ngalan ni Jesucristo, amen.