11:17

Cristohanon nga Kompiyansa

Ni Elder Mark A. Bragg

Sang Sitenta

“Kag nagmata sia kag nagsabdong sang hangin, kag nagsiling sa dagat, Maglinong, magpuas. Dayon naglinong kag naglinaw” (Marcos 4:39).

Sang ulihi ko nga paghambal sa pangkabilogan nga komperensya, ginpakita sa akon sang akon umagad nga si Ryan ang tweet nga nagasiling, “Tuod? Ang apelyido niya Bragg”—buot silingon “tikal”—“tapos indi sia maghambal parte sa pagpaubos? Kanugon!” Ang masubo, padayon kamo nga mapaslawan.

Ang mabuot ko nga tatay isa ka All-America basketball player sang UCLA sa idalom sang sikat nga Coach John Wooden. Nangin suod sila sa bilog nga kabuhi sang akon tatay, kag kon kaisa si Coach kag Mrs. Wooden nagakadto sa amon balay para manyapon. Nasadyahan gid sia pirme mag-istorya sa akon parte sa basketball ukon bisan ano nga ginapinsar ko. Makaisa nangayo ako sa iya sang laygay sang manugsulod na ako sa senior year sang hayskul. Bilang titser, siling niya, “Siling ni tatay mo nagsulod ka kuno sa Simbahan ni Jesucristo, gani kabalo ko nga may pagtuo ka sa Ginuo. Upod sina nga pagtuo siguroha pirme nga may kompiyansa ka sa tagsa ka sitwasyon. Mangin maayo nga tawo sa tunga sang unos.”

Sa tinuig, ina nga pag-istoryahanay namon nagpabilin sa akon. Ang laygay nga mangin kalmado, mabugnaw, kag may kontrol sa tanan nga sitwasyon, ilabi na gid sa tiyempo sang kabudlayan kag pressure nagapabilin sa akon. Makita ko kon paano ang mga grupo ni Coach Wooden naghampang nga may kompiyansa kag dako nga kadalag-an nga nadaog gid nila ang 10 ka nasyonal nga kampeonato.

Pero ang kompiyansa wala maayo ginahambalan sa sining mga panahon kag halos wala ginagamit sa sining panahon sang kagamo kag pagbinahin-bahin. Masami ini ginatumod sa isports—ang manughampang nga may kompiyansa wala nagakawad-an sang kontrol sa mainit nga hampang ukon ang grupo nagakawad-an sang kontrol tungod sa kakulang sang kompiyansa. Ining maayo nga kinaiya magamit bisan sa gwa sang isports. Ang kompiyansa mas may dako nga gamit sa pagpangabuhi kag sarang magbugay sa mga ginikanan, mga lider, mga misyonero, mga titser, mga estudyante, kag ang tanan nga nagaatubang sang mga unos sang kabuhi.

Ang espirituhanon nga kompiyansa nagabugay sa aton para mangin kalmado kag nakatutok sa kon ano gid ang importante, ilabi na kon ara kita sa kompromiso. Si Pangulong Hugh B. Brown nagtudlo, “Ang pagtuo sa Dios kag ang kadalag-an sang matarong sa ulihi nagaamot sa mental kag espirituhanon nga kompiyansa sa atubang sang mga kabudlayan.”¹

Si Pangulong Russell M. Nelson isa ka manami nga ehemplo sang espirituhanon nga kompiyansa. Isa ka bes, samtang ang sadto-Dr. Nelson naga-opera sa quadruple coronary artery bypass, gulpi lang nagnubo ang blood pressure sang pasyente. Si Dr. Nelson kalmado nga nag-eksamin sang sitwasyon kag nakita nga isa ka clamp ang indi hungod nga ginkakas sang isa sa mga nagabulig sa pag-opera. Ginbalik ato gilayon, kag si Dr. Nelson nagpaumpaw sa miyembro sang team nga nagasiling, “Palangga ta ka gyapon,” kag dayon lahog nga nagdugang, “Kon kaisa mas palangga ta ka sangsa iban nga tion!” Ginpakita niya kon paano dapat atubangon ang emerhensya—nga may kompiyansa, nga nagatutok lamang sa importante gid—nga ginasabat ang emerhensya. Siling ni Pangulong Nelson, “Kinahanglan lang gid sang grabe nga disiplina sa kaugalingon. Ang masami ninyo nga reaksyon, ‘Pagwaa na ko, coach! Gusto ko na nga magpauli.’ Pero siyempre indi pwede. Isa ka kabuhi ang ara sa mga kamot sang bilog nga nagahikot sang operasyon. Gani kinahanglan nga magkalma lang kag magrelaks kag mas mangin maid-id pa gid.”²

Siyempre, ang Manluluwas amo ang perpekto nga ehemplo sang kompiyansa.

Sa Hardin sang Getsemani, sa indi mahunahuna nga kasakit, samtang “Ang iya balhas daw kasubong ka dalagku nga mga tinulo sang dugo,”³ nagpakita Sia sang diosnon nga kompiyansa sa simple pero harianon nga mga tinaga, “Pero indi ang akon kabubot-on, kundi ang imo kabubot-on ang tumanon.”⁴ Sa idalom sang dako kaayo nga pressure nga ipatigayon ang kaluwasan sang tanan nga katawhan, ginpakita ni Jesus ang tatlo ka importante nga kondisyon nga nagabulig sa aton nga maintiendihan ang Iya dako nga kompiyansa. Una, nahibal-an Niya kon sin-o Sia kag nangin tampad sa Iya diosnon nga misyon. Dason, nahibal-an Niya nga may dako nga plano sang kalipayan. Kag katapusan, nahibal-an Niya nga paagi sa Iya wala dulonan nga Pagbayad-Sala, ang tanan nga matinuohon nga magahigot sang ila mga kaugalingon sa Iya paagi sa paghimo kag pagtuman sang sagrado nga mga kasugtanan nga nabaton paagi sa mga ordinansa sang priesthood maluwas, pareho sang matahum nga gintudlo ni Elder Dale G. Renlund subong nga adlaw.

Para mahibal-an ang kinalain sang pagkadula kag pagmentinar sang kompiyansa, paminsara kon ano ang matabo kon si Cristo kag ang Iya Apostoles nagbiya sa Hardin sang Getsemani. Sang gin-atubang sang mga soldado para dakpon si Jesus, ang nangin reaksyon ni Pedro amo ang mawad-an sang kompiyansa kag masingki nga nag-akto paagi sa paglabo sang dulunggan sang suluguon sang mataas nga pari, nga si Malchus. Sa pihak nga bahin, ang reaksyon ni Jesucristo, amo ang magpabilin nga may kompiyansa kag nagpakalma sang masingki nga sitwasyon paagi sa pag-ayo kay Malchus.⁵

Kag sa aton nga ginabudlayan nga magpabilin nga may kompiyansa kag basi ginapangluyahan na, paminsara ang sugpon sang istorya ni Pedro. Wala madugayi pagkatapos sining insidente kag sang masubo nga pagpanginwala sang iya kaangtanan kay Jesucristo,⁶ nagtindog sia sa atubang sang amo man nga mga lider sang relihiyon nga nagpakalain sang Manluluwas, kag upod ang dako nga kompiyansa sa idalom sang pagpisa-pisa nagpahayag sang iya matahum nga testimonya parte sa pagkadios ni Jesucristo.⁷

Kilalaha ang Inyo Kaugalingon kag Tindugi ang Inyo Diosnon nga Pagkatawo

Binagbinagon naton ang mga elemento sang Cristohanon nga kompiyansa. Sa panugod, ang pagkilala kon sin-o gid kita kag ang pagkatampad sa aton diosnon nga pagkatawo nagadala sang kalinong. Ang Cristohanon nga kompiyansa nagapangayo nga likawan naton ang pagkumparar sang aton mga kaugalingon sa iban ukon pagpakunokuno nga lain sangsa kon sin-o gid kita.⁸ Gintudlo ni Joseph Smith, “Kon indi maintiendihan sang mga tawo ang karakter sang Dios, indi man nila maintiendihan ang ila mga kaugalingon.”⁹ Indi mahimo nga makaangkon kita sang diosnon nga kompiyansa, nga wala makahibalo nga kita mga diosnon nga anak sang mapinalanggaon nga Amay nga Langitnon.

Sa iya pamulong-pulong nga “Choices for Eternity,” gintudlo ni Pangulong Nelson ining wala katapusan nga mga kamatuoran parte sa kon sin-o kita: kita mga anak sang Dios, kita mga anak sang kasugtanan, kag mga disipulo kita ni Cristo. Dayon nagpromisa sia, “Kon inyo batunon ining mga kamatuoran, buligan kamo sang aton Amay nga Langitnon nga malab-ot ang inyo pinakamataas nga tuyo nga magpuyo sa Iya balaan nga presensya sing wala katapusan.”¹⁰ Matuod kita nga diosnon nga espirituhanon nga mga tinuga nga may mortal nga eksperiyensya. Ang pagkilala kon sin-o gid kita kag pagtindog sa sinang diosnon nga pagkatawo ang haligi sang pagpatubo sang Cristohanon nga kompiyansa.

Hibaloa nga May Diosnon nga Plano

Dayon, panumduma nga may dako nga plano nga nagaresulta sa kaisog kag kompiyansa sa mabudlay nga mga sitwasyon. Pwede si Nefi “[maglakat] kag himuon”¹¹ ang ginsugo sang Ginuo nga “wala mahibal-i nga daan”¹² ang mga butang nga dapat niya himuon tungod nahibal-an niya nga pagagiyahan sia sang Espiritu, sa pagtuman sang wala katapusan nga plano sang mapinalanggaon nga Amay nga Langitnon. Ang kompiyansa nagaabot kon makita naton ang mga butang halin sa panan-awan sang wala katapusan. Ginlaygayan sang Ginuo ang Iya mga disipulo nga “tan-awa ninyo sing maayo”¹³ kag “tugoti ang sagrado nga mga kamatuoran sang wala’y katapusan nga magpabilin sa inyo mga panghunahuna.”¹⁴ Kon panumdumon naton ang tinion sang kabudlayan nga may perspektibo sang wala katapusan, ang pressure mangin pribelihiyo sa pagpalangga, pagserbisyo, pagtudlo, kag pagbugay. Ang wala katapusan nga panan-awon nagaresulta sa Cristohanon nga kompiyansa.

Hibaloa ang Nagapabakod nga Gahum ni Jesucristo kag sang Iya Pagbayad-Sala

Kag katapusan, ang nagapabakod nga gahum ni Cristo, nga ginpatigayon sang Iya nagabayad-sala nga sakripisyo, nagahatag sa aton sang kusog nga magpadayon kag mangibabaw. Tungod kay Jesucristo sarang kita magsulod sa kasugtanan upod sa Dios kag mangin mabakod sa pagtuman sinang kasugtanan. Pwede kita mahigot sa Manluluwas sa kalipay kag kalinong, wala sapayan sang aton temporal nga mga sirkumstansya.¹⁵ Ang Alma kapitulo 7 matahum nga nagatudlo parte sa nagapabakod nga gahum ni Cristo. Dugang pa sa pagtubos sa aton sa sala, sarang kita pabakuron sang Manluluwas sa aton mga kahuyang, mga ginakahadlukan, kag mga kabudlayan sa sining kabuhi.

Kon magtutok kita kay Cristo, magakalma ang aton mga kakulba, pareho sang ginhimo sang katawhan ni Alma sa Helam.¹⁶ Samtang nagatipon ang makahaladlok nga mga soldado, ang matinuohon nga mga disipulo ni Cristo nagpakita sang kompiyansa. Si Elder David A. Bednar nagtudlo: “Si Alma naglaygay sa mga sumulunod nga panumdumon ang Ginuo kag ang kaluwasan nga Sia lamang ang makahatag (tan-awa sa 2 Nefi 2:8). Kag ang ihibalo sang nagaamlig nga pagbantay sang Manluluwas naghatag sang kusog sa katawhan nga pakalmahon ang ila mismo mga kahadlok.”¹⁷ Nagapakita ini sang kompiyansa.

Ang Maayo nga Tawo sa Tunga sang Unos

Madamo si Noe sang gintudlo sa aton parte sa pasensya sa tunga sang unos, pero ang Manluluwas amo ang pinakadako nga manunudlo kon paano makatibawas sa unos. Sia ang maayo nga tawo sa tunga sang unos. Pagkatapos sang bilog nga adlaw nga pagpanudlo upod sa Iya mga Apostoles, kinahanglan sang Manluluwas nga magpahuway kag nagsiling nga matabok sila sa pihak sang Dagat sang Galilea paagi sa baruto. Samtang nagapahuway ang Manluluwas, may nag-abot nga mamadlos nga bagyo. Sang daw malunod ang baruto tungod sa hangin kag balod, nagsugod nga makulbaan ang mga Apostoles para sa ila mga kabuhi. Kag tandai, pila sinang mga Apostoles mga mananagat nga kabisado kaayo ang mga unos sa sina nga dagat! Pero, may kabalaka,¹⁸ ginpukaw nila ang Ginuo kag namangkot, “[Ginuo], wala ka bala nagakabalaka nga daw malunod na kita?” Dayon, nga may sulundon nga kompiyansa, ang Manluluwas “nagmata kag nagsabdong sang hangin, kag nagsiling sa dagat, “Maglinong, magpuas. Dayon naglinong kag naglinaw.”¹⁹

Kag dayon isa ka leksyon parte sa kompiyansa para sa Iya mga Apostoles. Pamangkot Niya, “Ngaa bala nahadlok gid kamo? Ano, wala pa bala kamo sing pagtuo?”²⁰ Ginapadumdom Niya sa ila nga Sia ang Manluluwas sang kalibutan kag ginpadala Sia sang Amay para ipahanabo ang pagkawala’y kamatayon kag kabuhi nga wala’y katapusan sang mga anak sang Dios. Sigurado ang Anak sang Dios indi mapatay sakay sa baruto. Ginpakita Niya ang diosnon nga kompiyansa tungod nahibal-an Niya ang Iya pagkadios kag nahibal-an Niya nga may plano sang kaluwasan kag pangkahitaasan kag kon ano kaimportante ang Iya Pagbayad-Sala sa wala katapusan nga kadalag-an sina nga plano.

Paagi kay Cristo kag sa Iya Pagbayad-Sala nga ang tanan nga maayo nga mga butang nagaabot sa aton mga kabuhi. Kon tandaan naton kon sin-o kita, nga nakahibalo nga may diosnon nga plano sang kaluoy kag nagapakaisog sa kusog sang Ginuo, mahimo naton ang tanan nga butang. Makakita kita sang kalinong. Mangin maayo kita nga mga babayi kag lalaki sa bisan ano nga unos.

Kabay nga pangayuon naton ang bugay sang Cristohanon nga kompiyansa, indi lang para buligan ang aton kaugalingon sa tinion sang kabudlayan kundi para bugayan ang iban kag buligan sila sa mga unos sang ila mga kabuhi. Sa sining bisperas sang Domingo de Ramos, malipayon ako nga nagapamatuod kay Jesucristo. Nabanhaw Sia. Nagapamatuod ako sang paghidaet, kalinong, kag langitnon nga kompiyansa nga Sia lamang ang makadala sa aton mga kabuhi kag ginahimo ini sa Iya sagrado nga ngalan, si Jesucristo, amen.