11:22

Buhi nga Propeta para sa Ulihing mga Adlaw

Ni Elder Allen D. Haynie

Sang Sitenta

Ang Amay sa Langit nagpili sang sulundan sang pagpahayag sang kamatuoran sa Iya mga anak paagi sa isa ka propeta.

Sang gamay pa ako, nanamian gid ako sang Sabado tungod ang tanan ko nga ginahimo sa sina nga adlaw daw makakulunyag. Pero bisan ano man ang ginahimo ko sadto, una gid pirme ang pinakaimportante sa tanan—ang paglantaw sang cartoons sa telebisyon. Isa sadtong Sabado sang aga, sang nagatindog ako malapit sa telebisyon kag ginasaylo-saylo ang mga channel, nakita ko nga ang cartoon nga ginapaabot ko nga lantawon ginbuslan sang broadcast sang pangkabilogan nga komperensya sang Ang Simbahan ni Jesucristo sang mga Santos sa Ulihing mga Adlaw. Samtang nagatan-aw sa telebisyon kag nagareklamo nga wala cartoons, nakita ko ang puti-buhok nga tawo nga naka-amerikana kag kurbata nga nagapungko sa manami nga siya.

May kinalain sa iya, gani ginpamangkot ko ang akon magulang, “Sin-o ina?”

Siling niya, “Si President David O. McKay ina; isa sia ka propeta.”

Madumduman ko nga may nabatyagan ako kag nahibal-an ko nga isa sia ka propeta. Dayon, tungod isa ako ka bata nga nayanggaw sa cartoons, ginsaylo ko ang channel. Pero wala ko gid nalimtan ang akon nabatyagan sadtong malip-ot, wala ginapaabot nga tion sang rebelasyon. Kon kis-a, madali lang kaayo mahibal-an nga ang propeta, isa ka propeta.¹

Ang paghibalo paagi sa rebelasyon nga may buhi nga propeta sa duta may daku nga impluwensiya sa kabuhi kag panumduman sang tawo.² Nagapadula ini sang interes sa pagdebate parte sa kon san-o ang propeta nagahambal bilang propeta ukon kon may rason bala ang isa ka tawo nga pilion lang ang laygay sang propeta nga iya sundon.³ Inang ginpahayag nga ihibalo nagaagda sa tawo nga magsalig sa laygay sang buhi nga propeta, bisan pa wala naton lubos nga nahangpan ini.⁴ Kay man, ginpili sang perpekto kag mahigugmaon nga Amay sa Langit ang sulundan sa pagpahayag sang kamatuoran sa Iya mga anak paagi sa propeta, isa ka tawo nga wala gid ginhandum ang amo ka sagrado nga calling kag wala nagakinahanglan sang aton bulig agud mahibal-an ang iya mga depekto.⁵ Ang propeta personal nga ginhanda, gintawag, gintadlong, gin-inspirar, ginsaway, ginpakabalaan kag ginsakdag mismo sang Dios.⁶ Amo ina kon ngaa wala gid kita sing espirituhanon nga risgo sa pagsunod sa laygay sang propeta.

Gusto man naton ukon indi, tanan kita ginpili sa pila ka paagi sa kabuhi-antes-sa duta nga matawo sa sining ulihing mga adlaw. May duha ka kamatuoran nga angot sa ulihing mga adlaw. Ang una amo nga ang Simbahan ni Cristo ipahamtang liwat sa duta. Ang ika-duha amo nga mangin tuman kabudlay ang tanan. Ang balaan nga mga kasulatan nagpahayag nga sa katapusan nga mga adlaw mangin may “dako nga unos sang yelo nga igapadala agud gub-on ang mga katamnan sang duta,”⁷ mga pamalatian,⁸ “mga giyera kag mga huring-huring sang mga giyera, kag ang bilog nga duta magginamo, … kag ang kalainan magadagsa.”⁹

Sang bata ako, nahadlok ako sa mga propesiya sang ulihing mga adlaw kag nagpangamuyo ako nga ang Ika-duhang Pagkari indi matabo sa akon kabuhi, nga daw natuman man kay wala pa man ini natabo asta subong. Pero subong, suli ang akon ginapangamuyo, bisan pa nga ang ginpropesiya nga mga hangkat sigurado nga matabo,¹⁰ tungod kon magbalik si Cristo agud maghari, tanan sang Iya mga gintuga mangin “hilway sa katalagman.”¹²

Ang mga nagakalatabo sa kalibutan subong nagapataranta sa iban. Bilang mga anak sang kasugtanan sang Dios, indi kinahanglan nga magpangita kita sang kon ano pa agud mahibal-an kon paano atubangon ining magamo nga panahon. Indi kita [dapat] nga magkahadlok.¹² Ang doktrina kag mga prinsipyo nga dapat naton sundon agud espirituhanon nga makalampuwas kag pisikal nga makapadayon makit-an sa mga pulong sang buhi nga propeta.¹³ Amo ina kon ngaa si President M. Russell Ballard nagpahayag nga “indi gamay nga bagay … nga may propeta sang Dios sa tunga naton.”¹⁴

Si President Russell M. Nelson nagsaksi nga ang “madugay na nga sulundan sang pagtudlo sang Dios sa Iya kabataan paagi sa mga propeta nagapasalig sa aton nga bugayan Niya ang tagsa ka propeta kag bugayan Niya inang mga nagapamati sa laygay sang mga propeta.”¹⁵ Gani ang yabi amo nga sundon ang buhi nga propeta.¹⁶ Mga kauturan, indi pareho sang antigo nga mga komiks kag mga awto, ang panudlo sang mga propeta wala mas nagamahal sa kadugayon. Amo gani nga indi naton dapat paggamiton ang mga pulong sang nagliligad nga mga propeta agud ibale-wala ang mga panudlo sang buhi nga mga propeta.¹⁷

Nanamian ako sang mga paanggid nga gingamit ni Jesucristo agud magtudlo sang dalagko nga mga prinsipyo sang ebanghelyo. Luyag ko magpaambit sang paanggid nga natabo sa matuod nga kabuhi sini nga aga.

Isa ka adlaw, nagsulod ako sa cafeteria sa headquarter sang Simbahan agud manyaga. Pagkatapos magkuha sang pagkaon, nagsulod ako sa kalan-an kag nakita ang lamesa sa diin ang tatlo ka miyembro sang Unang Pangulohan nagapungko, nga may isa ka bakante nga siya. Ang kakulang ko sang kompiyansa sa kaugalingon nagtulod sa akon nga maglikaw sing maabtik sa sinang lamesa, kag dayon nabatian ko ang tingug sang aton propeta, si President Russell M. Nelson nga nagasiling, “Allen, may bakante diri nga siya. Dali kag magpungko upod sa amon.” Kag ginhimo ko.

Sang manugtapos ang panyaga, nakibot ako nga makabati sang nagaragumo nga tunog, kag pagtan-aw ko, nakita ko nga ginpatindog ni President Nelson ang iya plastik nga botelya sang tubig kag dayon gintapan ini kag ginbalik ang takop.

Si President Dallin H. Oaks dayon namangkot sang gusto ko ipamangkot, “President Nelson, ngaa gintapan mo ang plastik nga botelya?

Sabat niya, “mas mahapos ini para sa mga nagapatigayon sang pagrecycle tungod mas diutay ang lugar nga okuparon sini sa suludlan.

Samtang ginabinagbinag inang sabat, nakabati naman ako sang pareho nga tunog. Nagbalikid ako sa akon tuo, kag si President Oaks nagtapan man sang iya plastik nga botelya pareho kay President Nelson. Dayon nakabati ako sang tunog sa akon wala, kag si President Henry B. Eyring nagatapan man sang iya plastik nga botelya, ugaling lain ang iya paagi kay ginhimo niya ini nga nagahigda ang botelya nga mas mabudlay sangsa nagatindog nga botelya. Pagkadirapa sini, malulo nga ginpakita sa iya ni President Nelson ang teknik sang patindog nga botelya agud mas mahapos nga tapanon ini.

Sa sina nga punto, nagpamangkot ako sing mahinay kay President Oaks “Ang pagtapan bala sang plastik nga boteyla bag-o nga ginapatuman sang cafeteria?”

Nagsabat si President Oaks nga nagayuhum, “Kabalo ka Allen, dapat mo sundon ang propeta.”

Nakasiguro ako nga si President Nelson wala nagapahayag sang bag-o nga doktrina parte sa pagrecycle sa cafeteria sina nga adlaw. Pero makatuon kita sa maabtik nga pagresponde¹⁸ ni President Oaks kag President Eyring sa ehemplo ni President Nelson kag sa kaabtik ni President Nelson sa pagbulig tudlo sang mga natungdan sing mas maayo nga paagi.¹⁹

Pila ka tuig ang naligad, si Elder Neal A. Maxwell nagpaambit sang pila ka matagnaon nga pagtalupangod kag laygay nga sigo gid sa aton panahon:

“Sa mga binulan kag mga tinuig nga magaabot, ang mga hitabo magapangayo nga ang tagsa ka miyembro magpamat-od kon bala sundon niya ang Unang Pangulohan ukon indi. Ang mga miyembro mas mabudlayan nga magpangalag-ag sa ila pagpili. …

“… Magbilin kita sang rekord agud mangin klaro ang mga pagpili, nga ginatugotan ang iban nga himuon ang ila gusto pagkatapos mabaton ang laygay sang propeta. …

“Si Jesus nagsiling nga kon ang mga kahoy sang higera [magpanalingsing] na, ‘malapit na ang tingadlaw.’ … Nga napaandaman nga ang tingadlaw malapit na, indi kita magreklamo sang kainiton!”²⁰

Ang ulihing tubo nagdalagko sa tion nga may mas madamo nga salingsing sang mga dahon kag mas labi nga kainiton. Inang kamatuoran nagabutang sang mas mabug-at nga responsibilidad sa mga hamtong na, labi na gid parte sa pagsunod sa laygay sang propeta. Kon ginabale-wala sang mga ginikanan ang mga laygay sang buhi nga propeta, indi lang nila madula ang ginpromisa sa ila nga mga bugay kundi mas masubo, ginatudloan ang ila kabataan nga ang ginahambal sang propeta indi importante ukon nga ang laygay sang propeta pwede lang pilion pareho sa pagkaon nga wala sing kabalaka sa resulta nga espirituhanon nga malnutrisyon.

Si Elder Richard L. Evans sadto nagsiling: “Abi sang pila ka ginikanan nga mahugakan nila diutay ang ila panggawi kag pagsunod … nga makapatawhay sila diutay sa panguna nga mga butang nga indi makaapekto sa ila pamilya ukon sa palaabuton sang ila pamilya. Pero, kon ang ginikanan maglisa diutay, labanlaban nga lapawan sang kabataan ang ehemplo sang mga ginikanan.”²¹

Bilang henerasyon nga may sagrado nga buluhaton nga ihanda ang ulihing tubo para sa ila ginpropesiya nga papel sa ulihing mga adlaw,²² papel nga dapat tumanon sa panahon nga ang impluwensya sang kaaway tuman kabaskog,²³ indi pwede nga kita ang halinan sang pagpangalag-ag parte sa importansya sang pagsunod sa laygay sang mga propeta. Amo ina mismo ang laygay nga magatugot sa ulihing tubo nga makita “ang kaaway samtang malayo pa [sia]; kag dayon [makahanda sila]” nga batuan ang pag-atake sang kaaway.²⁴ Ang aton dawsa magagmay nga paglisa, mahipos nga pagpabaya, ukon ginahutik nga mga kritisismo bilang sabat sa laygay sang propeta mahimo magresulta sa aton lang paglakat sa bibi sang dalan sang kasugtanan; pero kon padakuon ini sang kaaway sa kabuhi sang mga ulihing tubo, inang mga buhat mahimo mag-impluwensia sa ila nga lubos nga biyaan inang dalan. Ang negatibo nga epekto sini sa palaabuton nga mga henerasyon mangin tuman kadako.²⁵

Ang pila sa inyo mahimo magbatyag nga nagkabus kamo sa inyo pagtinguha nga sundon ang laygay ni President Russell M. Nelson. Kon amo, maghinulsol, sugdi liwat nga sundon ang laygay sang propeta nga pinili sang Dios. Ipahigad ang pagkawili sa binata-bata nga cartoons kag magsalig sa hinaplas sang Ginuo. Magkalipay tungod sa liwat “may [propeta] sa Israel.”²⁶

Bisan nga indi kamo sigurado, nagasaksi ako nga mabatuan naton ang impluwensia sang kaaway sa ulihing mga adlaw kag bisan pa gani mag-uswag sa sini. Mga Santos kita sa ulihing mga adlaw kag manami ini nga mga adlaw. Nalangkag kita sadto nga magkadto sa kalibutan sa sini nga panahon, nga may kompiyansa nga indi kita pagpabay-an nga masandad kon sugataon kita sing labing nagadulom kag makatulublag nga mga gal-um sang kaaway²⁷ kundi magbaton sang laygay kag direksyon halin sa iya nga amo gid lang ang gintugotan nga magsiling sa aton kag sa bilog nga kalibutan “Amo ini ang ginasiling sang Ginuong Dios.”²⁸ Sa sagrado nga ngalan sang propeta nga ginbangon sang Dios, ang Balaan sang Israel,²⁹ bisan si Jesucristo, amen.