Marso 10–16: “Ang Pagsugod sang Simbahan ni Cristo”

Doktrina kag mga Kasugtanan 20–22

Ang buluhaton sang Manluluwas nga pagpagwa sang Libro ni Mormon kompleto na. Pero ang Iya buluhaton sang Pagpanumbalik nagasugod pa lang. Dugang pa sa pagpanumbalik sang doktrina kag awtoridad sang priesthood, ginklaro sang Ginuo paagi sa nauna nga mga rebelasyon nga gusto man Niya ipanumbalik ang pormal nga organisasyon—ang Iya Simbahan (tan-awa sa Doktrina kag mga Kasugtanan 10:53; 18:5). Sang Abril 6, 1830, sobra 40 ka tumuluo ang nagginutok sa balay nga kahoy sang pamilya Whitmer sa Fayette, New York, para saksihan ang pag-organisar sang Simbahan ni Jesucristo.

Ang iban nga mga tawo nagapanumdom kon ngaa kinahanglan ang organisado nga Simbahan. Ang sabat mahimo nga makit-an, sa isa ka bahin, sa mga rebelasyon nga konektado sa sinang una nga miting sang Simbahan sang 1830. Ginlaragway sini ang mga bugay nga indi kuntani matabo kon ang matuod nga Simbahan ni Jesucristo wala “maorganisar kag mapahamtang sing husto” sa ulihing mga adlaw (Doktrina kag mga Kasugtanan 20:1).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 20–21

Ginpanumbalik ni Jesucristo ang Iya Simbahan.

Ngaa may organisado kita nga Simbahan? Siguro ang pinakanami nga sabat amo ang “Tungod nag-organisar si Jesucristo sang Simbahan.” Samtang ginatun-an mo ang Doktrina kag mga Kasugtanan 20–21, mahimo nga matalupangdan mo ang pagpalareho sang Simbahan nga gintukod Niya sang una kag sang gin-organisar Niya karon nga panahon. Gamita ang masunod nga mga bersikulo para tun-an ang Simbahan sang Manluluwas sang una nga panahon: Mateo 16:15–19; Juan 7:16–17; Mga Taga-Efeso 2:19–22; 3 Nefi 11:23–26; Moroni 4–5. Gamita ining mga bersikulo para tun-an ang parte sa ginpanumbalik nga Simbahan: Doktrina kag mga Kasugtanan 20:17–25, 60, 72–79; 21:1–2. Pwede mo irekord ang imo makita sa isa ka tsart pareho sini:

	Doktrina	Mga Ordinansa	Awtoridad sang Priesthood	Mga Propeta
Ang Simbahan ni Jesucristo sang una	Doktrina	Mga Ordinansa	Awtoridad sang Priesthood	Mga Propeta
Ang ginpanumbalik nga Simbahan ni Jesucristo	Doktrina	Mga Ordinansa	Awtoridad sang Priesthood	Mga Propeta

Ano ang imo natun-an sa sining aktibidades parte sa kon ngaa gintukod ni Jesucristo—kag ginpanumbalik—ang Iya Simbahan?

Tan-awa man sa Dallin H. Oaks, “Ang Kakinahanglanon sang Simbahan,” Liahona, Nob. 2021, 24–26.

Manghagad sa pag-istorya. Kon hagaron mo ang mga tawo nga iistorya kon ano ang ila ginatun-an nga sila lang, magapagsik sila nga magpadayon sa ila personal nga pagtuon. Ano ang pwede mo ipaistorya sa iban?

Doktrina kag mga Kasugtanan 20:37, 75–79; 22

Ang sagrado nga mga ordinansa nagabulig sa akon nga mangin pareho sa Manluluwas.

Sang gin-organisar ang Simbahan, gintudloan sang Ginuo ang Iya mga Santos parte sa sagrado nga mga ordinansa, pati na ang bunyag kag ang sakramento. Samtang ginabasa mo ang parte sining mga ordinansa, binagbinaga kon paano ini nagabulig sa imo nga makabatyag nga konektado sa Manluluwas. Halimbawa, paano nagabulig ining mga ordinansa nga mamentinar mo ang imo “determinasyon sa pag-alagad [kay Jesucristo] tubtob sa katapusan”? (bersikulo 37). Pwede mo man basahon ang mga pangamuyo sa sakramento (mga bersikulo 77, 79) kag hunahunaon nga bag-o mo pa lang ini mabatian. Ano nga mga panghunahuna ang imo nabaton?

Doktrina kag mga Kasugtanan 20:38–60

Ang priesthood nagabugay sang mga miyembro sang Simbahan kag sang ila mga pamilya.

Nahunahuna mo bala kon ngaa importante sa Manluluwas nga ipanumbalik ang priesthood sa Iya Simbahan? Ang pagbasa kon ano ang Iya ginapangayo sa mga nagakapot sang priesthood sa Doktrina kag mga Kasugtanan 20:38–60 mahimo nga makabulig hatag sa imo sang mga ideya. Paano ka kag ang imo pamilya ginbugayan sang Manluluwas paagi sa buluhaton nga ginlaragway sa sining mga bersikulo?

Dugang pa sa mga gin-ordin sa priesthood, ang mga babayi nga gin-set apart para magserbisyo sa Simbahan nagagamit man sang awtoridad sang Dios samtang nagapartisipar sila sa Iya buluhaton. Para matun-an kon paano, tan-awa sa mensahe ni Pangulong Dallin H. Oaks sa “Ang Mga Yabi kag Awtoridad sang Priesthood” (Liahona, Mayo 2014, 49–52).

Doktrina kag mga Kasugtanan 21

Ang pagtuman sang pulong sang Dios paagi sa Iya mga propeta makahatag sa akon sang diosnon nga proteksyon.

Ang Doktrina kag mga Kasugtanan 21:4–9 may mga imbitasyon nga sundon ang propeta sang Ginuo kag mabaskog nga mga promisa sa mga tawo nga nagasunod sini. Makabulig ang masunod nga mga ideya para binagbinagon ining mga bersikulo:

• Ano nga mga tinaga sa mga bersikulo 4–5 ang nagalarawan sang gusto sang Manluluwas nga imo himuon sa mga pulong sang Iya buhi nga propeta? Ngaa pamatyag mo kinahanglan ang “pagpaumod kag pagtuo” para himuon ini?

• Binagbinaga ang imahe nga ginagamit sang Manluluwas sa bersikulo 6 para ilaragway ang mga bugay sang pagsunod sa Iya propeta. Ano sa banta mo ang buot silingon sang “mga puwertahan sang impiyerno”? Paano gina-“[tabog sang Ginuo] ang mga gahum sang kadulom” para sa imo? Ano ang buot silingon sang “pauyogon ang kalangitan para sa inyo kaayohan”?

• Ano ang ginapangayo sang Ginuo nga imo himuon paagi sa Pangulo sang Simbahan sa karon? Paano gintuman sang Ginuo ang Iya mga promisa sang ginsunod mo ang Iya laygay?

Watchman on the Tower

(Ezekiel 33:1-7) The Lord calls prophets to be the "watchmen" on the tower.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 20–21

Ang Simbahan ni Jesucristo ginpanumbalik.

• Pamensara nga gamiton ang tig-ulo sang seksyon sang Doktrina kag mga Kasugtanan 21, ChurchofJesusChrist.org) para buligan ang imo kabataan nga maintiendihan kon ano ang natabo sa adlaw sang gin-organisar ang Simbahan.

  Chapter 9: Organization of the Church of Jesus Christ: 6•April 1830

• Basi pwede man pareson sang imo kabataan ang mga litrato ni Jesucristo, sang tawo nga naga-ministering, bunyag, kag ang sakramento sa mga bersikulo sa seksyon 20 (tan-awa sa mga bersikulo 21–23, 47, 72–74, 75–79). Gamita ining mga litrato kag mga bersikulo para hambalan ang mga bugay nga ara sa aton tungod ginpanumbalik ni Jesucristo ang Iya Simbahan.

Doktrina kag mga Kasugtanan 20:37, 41, 71–74

Sang ginbunyagan ako kag ginkompirma, nagpromisa ako nga sundon si Jesucristo.

• Basi masadyahan ang imo kabataan nga makakita sang litrato sang bata nga ginabunyagan kag ginakompirma. Pwede nila ihambal kon paano ini nagasunod sa mga instruksyon sa Doktrina kag mga Kasugtanan 20:41, 71–74. Ano ang aton matun-an sa Doktrina kag mga Kasugtanan 20:37 parte sa mga tawo nga gusto magpabunyag?

  The Baptism of Jesus

  Jesus seeks out John the Baptist and is baptized in order to fulfill all righteousness.

  

• Kon nabunyagan kag nakompirma na ang imo kabataan, pamangkuta sila parte sa ila eksperiyensya. May mga litrato bala sila nga pwede nila ipakita? Hambali upod sa ila kon ano ang ila ginahimo para sundon si Jesucristo kag kon paano Niya sila ginabugayan.

Doktrina kag mga Kasugtanan 20:75–79

Pwede ko dalhon ang ngalan ni Jesus sa akon kaugalingon kag panumdumon Sia pirme.

• Pwede nga pangitaon sang imo kabataan ang tinaga nga “handa” sa Doktrina kag mga Kasugtanan 20:37 (parte sa bunyag) kag bersikulo 77 (sa pangamuyo sa sakramento). Ano ang gusto ni Jesucristo nga mangin handa kita nga himuon? Basi pwede nga magtan-aw ang imo kabataan sang bagay nga may ngalan (pareho sang tatak ukon personal nga ngalan). Ano ang ginasugid sa aton sang ngalan sina nga bagay? Ano ang buot silingon sang dalhon naton ang ngalan ni Jesucristo sa aton kaugalingon?

• Pamensara nga basahon ninyo sing dungan ang Doktrina kag mga Kasugtanan 20:77 kag ipahambal sa imo kabataan ang mga promisa nga ginahimo naton bilang parte sang sakramento. Basi pwede sila magbulos-bulos sa pagdrama-drama sang butang nga pwede nila himuon para “dalayon nga magdumdum” sa Manluluwas kag pakton ang mga aksyon sang kada isa. Suno sa bersikulo 77, paano kita ginabugayan kon pirme naton ginadumdom ang Manluluwas?

Doktrina kag mga Kasugtanan 21:4–6

Ginabugayan ako ni Jesus kon ginasunod ko ang Iya propeta.

• Pagkatapos nga diskubrehon ang mga imbitasyon kag mga promisa sa Doktrina kag mga Kasugtanan 21:4–6, pwede magtan-aw ang imo kabataan sang litrato sang propeta subong kag ihambal kon ano ang ila natun-an ukon nabatian halin sa iya. Iistorya sa isa kag isa ang mga paagi nga ginbugayan kamo ni Jesucristo tungod sa pagsunod sa Iya propeta.

Para sa dugang nga mga ideya, tan-awa sa isyu sang Abyan nga magasin sini nga bulan.

Oliver Cowdery Ordains Joseph Smith [Si Oliver Cowdery nga Naga-ordin kay Joseph Smith], ni Walter Rane