Sanza ya Minei 28–Sanza ya Mitano 4: “Mobeko na Ngai mpo na Kokamba Eklezia na Ngai”

Malongi mpe Mayokani 41–44

Eklezia ekolaki na lobango na mobu 1830 mpe 1831, mingimingi na boyei na lobango ya mbalakaka ya bandimi ya sika na Kirtland, Ohio. Bokoli oyo ezalaki ya esengo mpe ya kolendisa mpo na Basantu, kasi elakisaki lisusu mwa mikakatano. Lolenge nini bosangisaka na lombango liboke epanzana ya bandimi? Mingimingi, bosalaka nini ntango bamemaka malongi mpe misala uta na biyamba na bango ya kala? Ndakisa, ntango Joseph Smith akomaki na Kirtland na ebandeli ya Sanza ya mibale 1831, akutaki bandimi ya sika kokabolaka esika ya kofanda kaka moko na likanisi malamu ya komekola Baklisto ya Boyokani ya Sika (tala Misala 4:32–37 Nkolo asembolaki mpe apesaki ndimbola na likambo oyo mpe makambo mosusu. Asalaki oyo mingimingi na nzela ya emoniseli ekomami na Malongi mpe Mayokani 42 oyo Abengaki “mobeko na ngai mpo na kokamba eklezia na ngai” (molongo 59). Na emoniseli oyo, toyekoli bosolo oyo ezali motuya na kotiaka Eklezia ya Nkolo na mikolo ya nsuka. Mpe toyekoli ete tozali na mingi koleka ya koyekola: “Soki bokosenga,” Nkolo alakaki, “bokozwa emoniseli likolo ya emoniseli, boyebi likolo ya boyebi” (Malongi mpe Mayokani 42:61).

Tala lisusu Basantu, 1:114–19.

Makanisi mpo na Koyekola na Ndako mpe na Eklezia

Malongi mpe Mayokani 41

“Ye oyo azwi mobeko na ngai mpe asaleli yango, ye moko wana azali moyekoli na ngai.”

Pene na ebandeli ya mobu 1831, Basantu babandaki kosangana na Ohio. Bazalaki na mposa makasi ya kozwa mobeko oyo Nzambe alakaki mpo na komonisa kuna (tala Malongi mpe Mayokani 38:32). Kasi yambo, Ye ateyaki lolenge nini bayekoli na Ye basengelaki komilengela mpo na kozwa mobeko na Ye. Mabongisi nini bozwi na Malongi mpe Mayokani 41:1–6 oyo esengelaki kosunga Basantu bazwa mobeko ya Nzambe? Lolenge nini mabongi oyo esungaka yo kozwa makebisi uta na Ye?

Tala lisusu “A Bishop unto the Church [Episikopo na Eklezia],” na Revelations in Context, 77–83.

Malongi mpe Mayokani 42

Nkolo apesaka ngai mitindo mpo ete Alingaka ngai.

Basantu bazwaki emoniseli oyo ekomami na Malongi mpe Mayokani 42:1–72 lokola moko ya motuya koleka nyonso oyo Profeta azwaki. Ezalaki moko ya bimoniseli ya kobimisama. Mpo na mibu mingi, Basantu babengaki yango na pete “mobeko.” Atako eteni yango ezali kosangisa mitindo nyonso ya Nkolo to mibeko te, ezali motuya komanyolaka mpo na nini mabongisi oyo ezalaki motuya mpo na Eklezia ezongisami sika. Mpo na nini ezali motuya mpo na biso lelo?

Lokola eteni 42 ezali mwa molayi, bokoki kokanisa koyekola yango na biteni mike mike koleka, lokola oyo elandi. Bomona mabongisi eteyami na moko na moko, mpe bokanisa lolenge nini mibeko oyo ezali elembo ya bolingo ya Nkolo mpo na bato na Ye.

• Milongo 4–9, 11–17, 56–58

• Milongo 18–29

• Milongo 30–31

• Milongo 40–42

• Milongo 43–52

Mpo na nini Nzambe apesaka biso mibeko mpe mitindo? Na ndenge nini opambolami na koyebaka mpe kolandaka mitindo yango?

Malongi mpe Mayokani 42:30–42

“Bomikundola babola.”

Lokola eteni ya mobeko emonisama na eteni 42, Nkolo ateyaki Basantu na Ye lolenge nini bakoki, lokola balandi ya Klisto ya kala, kotia “biloko nyonso esika moko” (Misala 2:44; 4 Nefi 1:3), na “mobola te kati na bango” (Moses 7:18 Boyekoli nini uta na Malongi mpe Mayokani 42:30–42 na oyo etali lolenge nini Basantu basalelaki mobeko yango ya kobulisa? (Kobulisa elingi koloba kotia eloko moko pembeni mpo na ntina ya bule.)

Atako tozali na “biloko nyonso esika moko” te lelo, na batempelo Basantu ya Mikolo mya Nsuka bayokanaka kosalela mobeko ya bobulisi. Lolenge nini ekoki bino kobulisa oyo nzambe apesi bino mpo na kopambola bato na bosenga? Ntango mosusu koyembaka loyembo moko lokola “Because I Have Been Given Much [Mpo ete Napesami Mingi]” (Hymns, no. 219) ekoki kopesa bino makanisi.

Tala lisusu Sharon Eubank, “Nasambeli Ye Akosalela Biso,” Liahona, Sanza ya zomi na moko 2021, 53–56; “The Law [Mobeko],” na Revelations in Context, 93–95.

Klisto mpe Elenge Mokambi ya Mozwi, na Heinrich Hofmann

Malongi mpe Mayokani 42:61, 65–68; 43:1–16

Nzambe apesaka emoniseli mpo na kokamba Eklezia na Ye—mpe kokamba ngai.

Bobanza ete bozali kosolola na mondimi ya sika ya Eklezia oyo azali na mposa makasi ya koyeba ete Eklezia ekambami na emoniseli. Lolenge nini bokoki kosalela Malongi mpe Mayokani 43:1–16 mpo na kosalisa ye ayekola oyo etali emekoleli ya Nkolo mpo na kokamba Eklezia na Ye na nzela ya profeta na Ye? Lolenge nini bokoki kosalela Malongi mpe Mayokani 42:61, 65–68 mpo na koteya oyo etali kozwaka emoniseli ya moto ye moko?

Nini ezali mwa ndambo ya “biloko epesaka kimia” mpe makambo ya esengo bozwi uta na Nkolo na nzela ya Molimo na Ye?

Mpo na koyekola oyo etali lolenge nini bakambi ya Eklezia bayoki mongongo ya Nkolo, bokoki kotala moko ya bavideo na lisanga ya “Boyokela Ye” na Biblioteke ya Nsango Malamu. Bokanisa kokela video ya bino moko, kolimbolaka lolenge nini Nkolo asololaka na bino.

Tala Russell M. Nelson, “Emoniseli mpo na Eklezia, Emoniseli mpo na Bomoi na Biso,” Liahona, Sanza ya mitano 2018, 96; “All Things Must Be Done in Order [Makambo Nyonso Esengeli Kosalema na Molongo],” na Revelations in Context, 50–53.

Bosalela mateya ya ndakisa. Mateya ya ndakisa to masungi emonanaka na miso ekoki kosalisa bato bozali koteya basosola bosolo ya nsango malamu mingi koleka mpe bamikundola yango ntango molai. Ndakisa, bokoki kosalela pozele, kosangisa eteni likolo ya eteni, mpo na koteya na ntina ya kozwa “emoniseli likolo ya emoniseli, boyebi likolo ya boyebi” (Malongi mpe Mayokani 42:61).

Makanisi mpo na Koteya Bana

Malongi mpe Mayokani 41:5

Moyekoli azali moto moko oyo azwaka mobeko ya Nzambe mpe atosaka yango.

• Mpo na kosalisa bana na biso bayeba maye elingi koloba kozala moyekoli ya ysu Klisto, bokoki kokoma Malongi mpe Mayokani 41:5 na papie, kotikaka bisika ya polele epayi wapi liloba moyekoli asengeli kozala. Nsima bakoki koluka na molongo 5 liloba oyo ezangi. Engebene na molongo oyo, elingi koloba nini kozala moyekoli ya Yesu Klisto? Lolenge nini tomekaka kozala malamu mingi koleka bayekoli ya Klisto?

Malongi mpe Mayokani 42:2

Nazali na esengo ntango natosaka Nkolo.

• Bana na bino bakoki kosepela kosakana lisano moko oyo esengaka bango bayoka na bokebi mpe balanda mitindo. Bokoki kosalela lisano oyo mpo na kosolola oyo etali maye elingi koloba “koyokela mpe kotosa” Nkolo (Malongi mpe Mayokani 42:2). Mitindo nini Ye apesi biso? Lolenge nini topambolamaka na kotosaka mibeko mpe mitindo na Ye?

• Bosengelii kotondisa lokasa ya milulu ya poso oyo elongo na bana na bino. Bokoki lisusu koyemba loyembo etali kotosaka mibeko ya Nzambe, ndakisa “I Want to Live the Gospel” (Children’s Songbook, 148). Bokanisa kokabola elongo na moko na mosusu lolenge nini kotosaka mibeko ya Nzambe ememeli bino bosepeli.

  

Malongi mpe Mayokani 42:38

Nazali kosalela Yesu Klisto ntango nazaki kosalela basusu.

• Nsima ya kotanga elongo Malongi mpe Mayokani 42:38, bosalisa bana na bino bakanisa ndenge nini bakoki kosalela Yesu na kosalisaka basusu. Bakoki kozwa makanisi mosusu uta na video “Pass It On [Bolekisa yango]” (ChurchofJesusChrist.org). Bakoki lisusu kotala na bililingi ya Mobikisi kosalisa basusu, kobikisaka babeli, to kozalaka boboto epayi ya bana (tala Gospel Art Book [Buku ya Ntoki ya Nsango Malamu], nos. 42, 47).

  Pass It On

  

• Bokoki kolakisa bana na bino lokasa ya Zomi na Moko mpe ya Makabo Mosusu mpe kosolola oyo etali lolenge nini kosalela yango mpo na kopesa oyo tozali na yango mpo na kopambola basusu (tala lisusu“Tithing and Donations Online [Moko na Zomi mpe Makabo na nzela ya singa]”).

Malongi mpe Mayokani 43:1–7

Bobele profeta nde akoki kozwa emoniseli mpo na Eklezia mobimba.

• Bobengisa bana na bino babanza ete moto moko atelemi na liyangani ya matatoli mpe alobi na palwasi ete azwi emoniseli mpo na Eklezia mobimba (ndakisa, emoniseli ete tosengeli lisusu kolia karoti te to ete tosengeli kosukola maboko na biso na miliki na esika ya mayi.) Alobi ete tosengeli koyokela maye alobi na esika ya oyo ya profeta. Nini ekozala mabe na yango? Nsima bokoki koyekola Malongi mpe Mayokani 43:1–7 elongo mpo na komona lolenge nini Nkolo apesaka mitindo na Eklezia na Ye?

• Bokoki lisusu kolakisa elilingi moko ya profeta ya bomoi mpe kobengisa bana na bino bakabola likambo moko ateyaki kala te. Soki basengeli na lisalisi, bokabola video to eteni moko uta na nsango ya likita linene ya kala te. Mpo na nini ezali lipamboli ya kozala na profeta ya bomoi lelo?

Mpo na makanisi koleka, botala nsango ya sanza oyo na magazini Moninga .

Joseph Smith Azali Koteya, na Sam Lawlor