“Eprōļ 28–Māe 4: “Aō Kien n̄an Tōl Kabun̄ in Aō”

Katak im Bujen Ko 41–44

Kabun̄ in ekar m̧ōkaj an eddōkļo̧k ilo 1830 n̄an 1831 eo, eļap tata kōn juon oran kumi in membōr rekāāl ilo Kirtland Ohio. Eddōkļo̧k in ekar kaitoktok limo im kōketak n̄an Armej ro Rekwojarjar; bōtaab ekar barāinwōt kwaļo̧k jet idajon̄jon̄ ko. Ekōjkan am̧ kakuktok juon kumi in rittōmak ro em̧ōkaj an ererakļo̧k? Eļap tata, ta eo kwoj kōm̧m̧an n̄e rej bōktok katak ko im iminene ko jān kabun̄ ko aer m̧okta. N̄an waanjon̄ak, ke Josep Smith eaar tōkākļo̧k ilo Kirtland ilo jino in Pāpode ilo1831 eo, eaar lo membōr ro rekāāl mour kōn juon iminene ilo lukkuun kajjieon̄ arin Rikūrijin ro ilo Kallim̧ur Ekāāl (lale Jerbal 4:32–37). Irooj ekar kōm̧m̧ane jet kajjim̧we ko raorōk im kalikkar ko ioon menin im unin kōnono ko jet. E ekar kōm̧m̧ane menin eļap wōt kōn juon revelesōn kar rekoote ilo Katak im Bujen Ko 42 jon̄an E ekar ņa etan “aō kien n̄an tōl kabun̄ in aō” (eoon 59). Ilo revelesōn in, jej katak m̧ool ko me raar pedped in katak n̄an ejake Kabun̄ eo an Irooj ilo raan ko āliktata. Im ilo ad katak bwe eļap ijo jej aikuj katak kake: “Eļan̄n̄e kom̧ naaj kajjitōk,” Irooj ekar kallim̧ur, “kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen Ko 42:61).

Bar lale Armej ro Rekwojarjar, 1:114–19.

Ļōmnak ko n̄an Ekkatak ilo M̧weeo im ilo Kabun̄

Katak im Bujen Ko 41

“E eo ej bōk kien eo Aō im kōm̧m̧an e, ejja in wōt Aō rikaļoor.”

Iturinļo̧k 1831 eo, Armej ro Rekwojarjar raar jino aindoon ilo Ohio. Ekar wōr raar kijooror n̄an bōk kien eo me Anij ekar kallim̧ur n̄an kwaļo̧ke ijo (lale Katak im Bujen Ko 38:32). Bōtaab m̧oktata, E ekar kwaļo̧k wāween an rikaļoor ro An aikuj pojak n̄an bōk kien eo An. Ta pedped in katak ko jej loi ilo Katak im Bujen Ko 41:1–6 me renaaj kar jipan̄ Armej ro Rekwojarjar bōk kien eo an Anij? Ekōjkan an pedped in katak kein maron̄ jipan̄ eok bōk naan in kōmeļeļe eo jān E?

Bar lale “A Bishop unto the Church,” in Revelations in Context, 77–83.

Katak im Bujen Ko 42

Irooj ej letok n̄an eō kien ko kōnke E ej iakwe eō.

Armej ro Rekwojarjar raar ļōmņak kōn revelesōn eo loe ilo Katak im Bujen Ko 42:1–72 āinwōt juon iaan men ko raorōk tata Rikanaan eo eaar bōke. Ekar juon iaan revelesōn ko jinoin tata kar je. Ium̧win elōn̄ iiō ko, Armej ro Rekwojarjar kar baj ņa etan “kien eo.” Ilo an jekjōn eo kar jab kobaik aolep kien ko an Irooj ak kakien ko, ewōr tokjān n̄an kejekļo̧kjeņ kake etke pedped in katakin kein raar aorōk n̄an Kabun̄ eo ekāāl kar kōjepļaaktok. Etke raorōk n̄an kōj rainin?

Kōnke jekjōn 42 ebwe an aitok, kwomaron̄ ļōmņak in ekkatak kake ilo m̧ōttan ko reddikļo̧k, āinwōt kein rej ellaajrak. Kile pedped in katak ko kar katakin ilo kajjojo, im ļōmņak ekōjkan an kien kein āinwōt juon kakōļļe in iakwe eo an Irooj n̄an armej ro An.

• Eoon 4–9, 11–17, 56–58

• Eoon 18–29

• Eoon 30–31

• Eoon 40–42

• Eoon 43–52

Etke Anij ekar letok n̄an kōj kakien ko im kien ko? Ilo wāween ta ko kwar jeraam̧m̧an kaki n̄an ļoor kien ko?

Katak im Bujen Ko 42:30–42

“Keememej ro rijeram̧ōl.”

Āinwōt m̧ōttan kien eo kar kwaļo̧ke ilo jekjōn 42, Irooj ekar katakin Armej ro An Rekwojarjar ekōjkan aer maron̄, āinwōt rikaļoor ro an Kraist etto, bōk “men otemjej ippāer” (Jerbal 2:44; 4 Nipai 1:3), kōn “ejjeļo̧k rijeram̧ōl” (Moses 7:18). Ta eo jej katak jān Katak im Bujen Ko 42:30–42 ekōjkan an Armej ro Rekwojarjar kar mour kōn kien wūjlepļo̧k? (N̄an wūjlepļo̧k ej meļeļe in kōjenolo̧k juon men n̄an juon jibadbad ekwojarjar).

Men̄e ejjeļo̧k ippād “men otemjej ippāer” rainin, ilo tampeļ ko Armej ro Rekwojarjar ilo Raan-ko Āliktata rej bujen n̄an mour kōn kien wūjlepļo̧k. Ekōjkan am̧ maron̄ wūjlepļo̧k ta eo Anij ekar lewaj n̄an eok n̄an kōjeraam̧m̧an armej ro rej pād ilo aikuj? Bōlen al juon al āinwōt “Because I Have Been Given Much” (Hymns, nō. 219) maron̄ lewaj n̄an eok ļōmņak ko.

Bar lale Sharon Eubank, “Ij Jar bwe Enaaj Kōjerbale Kōj,” Liaona, Nov. 2021, 53–56; “The Law [Kien Eo],” ilo Revelations in Context, 93–95.

Christ and the Rich Young Ruler [Kraist im Rim̧weie Eo Edik, jān Heinrich Hofmann

Katak im Bujen Ko 42:61, 65–68; 43:1–16

Anij ej letok revelesōn n̄an tōl Kabun̄ eo An—im n̄an tōl kōj.

Pijaikļo̧k bwe kwoj bwebwenato ippān juon eo ekāāl uwaan Kabun̄ in me ej lo̧udin̄din̄ n̄an jeļā bwe Kabun̄ in ej tōl kōn revelesōn. Ekōjkan am̧ maron̄ kōjerbal Katak im Bujen Ko 43:1–16 n̄an kōmeļeļeik ļeo ak lieo katak kōn jon̄an eo an Irooj n̄an tōl Kabun̄ eo An kōn rikanaan eo An? Ekōjkan am̧ maron̄ kōjerbal Katak im Bujen Ko 42:61, 65–68 n̄an katakin kōn revelesōn eo an juon make?

Ta jet iaan “mennin aenōm̧m̧an ko” im mennin lan̄lōn̄ ko kwar būki jān Irooj kōn Jetōb eo An?

N̄an katak ekōjkan ritōl ro an Kabun̄ in kar ron̄ ainikien Irooj, kwomaron̄ alooje juon iaan pija in alooj ko ilo “Hear Him [Ron̄jake E]” collection eo ilo Gospel Library eo. Ļōmņak in ejake juon make am̧ pija in alooj, kōmeļeļeik ekōjkan an Irooj kōnono ippam̧.

Bar lale Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 93–96; “All Things Must Be Done in Order [Aolep Men ko Rej Aikuj Kōm̧m̧an ilo Ko̧ņ],” ilo Revelations in Context, 50–53.

Kōjerbal kein katakin ko. Kein katakin ko ak kein alooj ko remaron̄ jipan̄ armej ro kwoj katakin er em̧m̧anļo̧k aer meļeļe m̧ool ko an gospel eo im aitokļo̧k aer keememeji. N̄an waanjon̄ak, kwomaron̄ kōjerbal juon bajōļ, kōļake m̧ōttan ko juon illo̧k juon, n̄an katakin kōn bōk “revelesōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen Ko 42:61).

Ļōmņak ko n̄an Katakin Ajri ro

Katak im Bujen Ko 41:5

Juon rikaļoor ej juon eo ej bōk kien eo an Anij im pokaki.

• N̄an jipan̄ ajri ro jeļā ta meļeļe in n̄an erom juon rikaļoor an Jisōs Kraist, kwomaron̄ je Katak im Bujen Ko 41:5 ioon juon m̧ōttan peba edik, kōm̧m̧an bwe en ejjeļo̧k kobban naan eo rikaļoor aikuj kar pād ie. Innām remaron̄ lale ilo eoon 5 kōn naan eo ejako. Ekkar n̄an eoon in, ta meļeļe in n̄an erom juon rikaļoor an Jisōs Kraist? Ekōjkan ad kajjieon̄ in erom rikaļoor ro an Jisōs rem̧m̧anļo̧k?

Katak im Bujen Ko 42:2

Ij m̧ōņōņō n̄e ij pokake Irooj.

• Ajri ro nejūm remaron̄ lem̧ōņōņō ilo ikkure juon ikkure me ej aikuji aer lukkuun ron̄jake im ļoor naan in kōmeļeļe ko. Kwomaron̄ kōjerbal ikkure in n̄an kōnono kake ta meļeļe“ eo̧ron̄ im ron̄jake im pokake” Irooj (Katak im Bujen Ko 42:2). Ta naan in kōmeļeļe ko E ekar letok n̄an kōj? Ekōjkan ad kar jeraam̧m̧an jān pokake kakien im kien ko An?

• Kwomaron̄ kadedeļo̧k peij in m̧akūtkūt an wiik in ippān ajri ro nejūm. Kwomaron̄ barāinwōt al juon al kōn pokake kien ko an Anij,“I Want to Live the Gospel” (Children’s Songbook,148). Ļōmņak in kwaļo̧k n̄an doon ekōjkan an kien ko an Anij kar bōktok m̧ōņōņō n̄an kom̧.

  

Katak im Bujen Ko 42:38

Ij jerbal n̄an Jisōs Kraist n̄e ij jerbal n̄an ro jet.

• Ālkin riit ippān doon Katak im Bujen Ko 42:38, jipan̄ ajri ro nejūm̧ ļōmņak kōn wāween ko remaron̄ jerbal n̄an Jisōs ilo jerbal n̄an ro jet. Remaron̄ pukōt jet ļōmņak ko jān pija in alooj eo “Pass It On” (ChurchofJesusChrist.org). Remaron̄ barāinwōt lale pijain an Rilo̧mo̧o̧r eo jipan̄ ro jet, kemour rinan̄inmej, ak jouj n̄an ajri ro Bok in Gospel Pija, nō. 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• Kwomaron̄ kwaļo̧k n̄an ajri ro nejūm juon Tithing and Other Offering slip im kōnono ekōjkan kōjerbale n̄an leļo̧k ta eo ewōr ippam̧ n̄an kōjeraam̧m̧an ro jet (bar lale “Tithing and Donations Online”).

Katak im Bujen Ko 43:1–7

Rikanaan eo wōt emaron̄ bōk revelesōn n̄an aolepān Kabun̄ in.

• Kajjitōk ippān ajri ro nejūm̧ n̄an pijaikļo̧k bwe juon armej ej jutak ilo kweilo̧k in kwaļo̧k naan in kam̧ool im jiron̄ ward eo bwe ekar bōk juon revelesōn n̄an aolepān Kabun̄ in (n̄an waanjon̄ak, juon revelesōn bwe jen jab bar m̧ōn̄ā kerōt ko ak bwe jej aikuj kwaļ peid kōn milik ijello̧kin dān.) Ej ba bwe jej aikuj ron̄jake ta eo ej ba ijello̧kin rikanaan eo. Ta eo enaaj kar bōd ilo men jab in? Innām kom̧ maron̄ ekkatak Katak im Bujen Ko 43:1–7 ippān doon n̄an lale ekōjkan an Irooj letok kien ko n̄an Kabun̄ eo An.

• Kwomaron̄ kwaļo̧k barāinwōt juon pija in juon rikanaan emour im kajjitōk ippān ajri ro nejūm̧ n̄an kwaļo̧k juon men ekar katakin kiiō epaak. Eļan̄n̄e rej aikuj jipan̄, kwaļo̧k juon pija in alooj ak eoon jān juon ennaan an kweilo̧k eo eļap kiiō epaak. Etke ej juon kōjeraam̧m̧an n̄an an wōr juon rikanaan emour rainin?

N̄an ļōmņak ko reļļapļo̧k, lale ennaan eo an allōn̄ in ilo eo Jera m̧āākjin eo.

Joseph Smith ej Kwaļo̧k Naan, jān Sam Lawlor