The Camp Meeting, jān Worthington Whittredge

Māe 12–18: “Kom̧in Kanooj Kappukot Mennin Letok ko Rem̧m̧antata”

Katak im Bujen Ko 46–48

Ke Parley P. Pratt, Oliver Cowdery, Ziba Peterson, im Piter Whitmer Jr. raar em̧m̧akūt jān Kirtland im kar em̧m̧akūtļo̧k n̄an kwaļo̧k kōn gospel eo, raar em̧m̧akūt jān elōn̄ļo̧k jān jibuki membōr ro rekāāl an Kabun̄ in me ekar ļap aer kijejeto bōtaab edik wōt jeļā ak tōl. Ekar ejjeļo̧k bok in bōk meļeļe ko n̄an tōl, ejjeļo̧k kweilo̧k in kaminene ko an ritōl, ejjeļo̧k kadiwōjļo̧k imejatoto in kweilo̧k eo eļap—ilo m̧ool, ekar jab bar bwe ippāer kape in Bok in Mormon n̄an lito litak. Elōn̄ wōt iaan ritōmak rein rekāāl raar reel tok n̄an gospel eo kar kōjepļaaktok kōn kallim̧ur ko rekabwilōn̄lōn̄ an Jetōb, eļaptata ro kar kōmeļeļeik er ilo Kallim̧ur Ekāāl (lale, n̄an waanjon̄ak, 1 Korint 12:1–11). Ak elōn̄ ekar pen aer jeļā mennin letok ko rem̧ool an Jetōb. Lo tarpok eo, Josep Smith ekar jar kōn jipan̄. Uwaak eo an Irooj rainin eaorōk, n̄e emakijkij an armej kaarmejette ak kōjekdo̧o̧n men ko an Jetōb. E eaar bar kalikkar bwe men ko an jetōb rej m̧ool. Eaar bar kalikkar ta ko: mennin letok ko jān Jemedwōj Ilan̄ “ekar liwōji n̄an jeraam̧m̧an eo an ro rej iakwe [E] im kōjparok aolep kien ko [An], im eo ej kappukot āindein n̄an kōm̧m̧an e” (Katak im Bujen Ko 46:9).

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 46:1–7

Rilo̧mo̧o̧r ej karuwaineneik aolep ro rekōņaan kabun̄jar ilo Kabun̄ eo An.

Kwoj en̄jake ke an ro m̧ōttam̧ im armej ro ilo ijo jikūm̧ ruawainene ilo kabun̄jar ko an ward eo am̧? Ta eo kwoj kōm̧m̧ane bwe armej ro ren kōņaan bar ro̧o̧ltok n̄an kweilo̧k ko an Kabun̄ eo ? Kōļmenļo̧kjeņ ekōjkan am̧ maron̄ kōjerbal kapilōk eo an Irooj ilo Katak im Bujen Ko 46:1–7 (bar lale 2 Nipai 26:24–28; 3 Nipai 18:22–23).

Kwomaron̄ bar ļōmņak kōn juon iien me kwaar pād ilo kweilo̧k ko an Kabun̄ in—ak juon kweilo̧k an bar juon kurup—kein kajuon. Ta eo armej ro raar kōm̧m̧ane n̄an jipan̄ eok en̄jake ruwainene?

Bar lale Moronai 6:5–9; “’Tis Sweet to Sing the Matchless Love,” Hymns, no. 177; “Welcome” (bitio), Gospel Library.

Koruwainene ItokNanKraist.org

Koruwainene tok n̄an juon jukjukin pād ijo im aolep armej rej kajjieon̄ mour āinwōt an Jisōs kar katakin. Itok im lale ta eo kōm̧ij tōmak kake ilo ItokNanKraist.org

Katak im Bujen Ko 46:7–33

Jemedwōj Ilan̄ ej letok mennin letok ko ilo jetōb n̄an kōjeraam̧m̧an ro jet.

Armej ro Rekwojarjar m̧okta raar tōmak ilo mennin letok ko an jetōb bōtaab rekar aikuj jipan̄ kile im m̧eļeļe kōn jibadbad ko aer. Ilo am̧ ekkatak kōn mennin letok an Jetōb ilo Katak im Bujen Ko 46:7–33, kōļmenļo̧kjeņ kōn jibadbad in “n̄an [ta] eo rekar litoki” (eoon 8). Ta eo kwoj katak kōn Anij—riletok eo an mennin letok kein?

Kwomaron̄ ke ļōmņak kōn waanjon̄ak ko em̧ōj am̧ lo an armej kōjerbali ak mennin letok ko jet an jetōb? Elmen aer kar “em̧m̧anļo̧k … an ro nejin Anij”? (eoon 26). Kwomaron̄ bar lale n̄e kwomaron̄ kile waanjon̄ak ko reoktatak an mennin letok ko an jetōb ilo eoon kein: 1 Kiin̄ Ro 3:5–15; Daniel 2:26–30; Jerbal 3:1–8; Hilamōn 5:17–19; Mormon 1:1–5; Ether 3:1–15; Katak im Bujen Ko 6:10–12; Moses 7:13.

Ekkatak ko am̧ kōn mennin letok ko an jetōb remaron̄ tōl eok n̄an kōļmenļo̧kjeņ kōn ta mennin letok ko Anij ekar lewaj n̄an eok. Ekōjkan am̧ maron̄ kōjerbal mennin letok kein n̄an kōjeraam̧m̧an ajri ro Nejin? Eļan̄n̄e ewōr juon am̧ kōjeraam̧man an petriak, emaron̄ in alikkar menin letok ko kar liwaj. Riiti enaan eo an Elder John C. Pingree Jr “I Have a Work for Thee” emaron̄ bar kōpeļo̧k kōļmenļo̧kjen eo am̧ n̄an mennin letok ko kōjan̄in kar ļōmņak kaki (Liaona, Nov. 2017, 32–35).

Eļan̄n̄e kwoj kōņaan ekkatak ekōjkan kōļapļo̧k mennin letok ko an jetōb, waanjon̄ak eo ilo jinoin ennaan eo an Elder Juan Pablo Villar “Kōmoururi M̧aajōļ in Jetōb ko Ad” emaron̄ jipan̄ (Liaona, Māe 2019, 95). Ta “m̧akūtkūt ko” remaron̄ jipan̄ eok kōļļapļo̧k mennin letok ko an jetōb ippam̧?

Bar lale Topic and Questions, “Holy Ghost,” Gospel Library.

Katak im Bujen Ko 47

Irooj ekōņaan bwe Kabun̄ eo An en kōjparok bwebwenato.

Kūr eo an John Whitmer n̄an kōjparok juon bwebwenato in Kabun̄ in ej wōņm̧anļo̧k iminene in armij ro rej ļo̧o̧k ibwilijin armij ro an Anij. Etke kwoj ļōmņak kōjparok juon bwebwenato ej lukkuun in aorōk n̄an Irooj? Kōļmenļo̧kjeņ kōn menin ilo am̧ riiti jekjōn 47 im bar kapilōk ko jet ilo 2 Nipai 29:11–12; Moses 6:5; Ebream̧ 1:28, 31. Ta eo kwoj en̄jake ke Irooj ekōņaan bwe kwon je kōn mour eo am̧?

Ilo FamilySearch, kwomaron̄ je kein kakeememej ko im en̄jake ko kōn mour eo am̧—im mour ko an ro jibūm̧ im jim̧m̧aam̧ (lale FamilySearch.org).

Lale Henry B. Eyring, “O Remember, Remember,” Liaona, Nov. 2007, 66–69.

Jon Whitmer

Katak im Bujen Ko 47

Jetōb Kwojarjar emaron̄ tōl eō ilo aō kakūrm̧ool kūr eo aō.

Bōlen kwomaron̄ kobaļo̧k ilo ta eo Jon Whitmer ekar en̄jake ke ekar kōņaan kalikkar bwe kūr eo an ej itok jān Anij. Ta eo Irooj ekar ba ilo Katak im Bujen Ko 47 n̄an Jon Whitmer—im n̄an kwe—n̄an im̧we lōke n̄an kakūrmo̧o̧l kūr ko E kar lewaj?

Jerbal eo an juon rūkaki. Katakin eļapļo̧k jān kwaļo̧k m̧eļeļe. Ekoba ejaake juon jikin me ro uwaan kūlaaj eo remaron̄ make ekkatak im lo m̧ool ko im jeeri ta ko raar ekkatak n̄an doon (lale Katakin ilo Wāween eo an Rilo̧mo̧o̧r, 26).

Ļōmņak ko n̄an Katakin Ajri ro

Katak im Bujen Ko 46:2–6

Imaron̄ jipan̄ ro jet en̄jake ruwainene ilo m̧ōnjar eo.

• Ālkin am̧ riiti Katak im Bujen Ko 46:5 ippān ajri ro nejum̧, kōnono kake elmen an Rilo̧mo̧o̧r kōņaan bwe armej ro ren en̄jake n̄e rej itok n̄an Kabun̄ eo An. Kajjitōk ippān ajri ro nejūm̧ n̄an ļōmņake n̄e rej kab loe armej eo ilo m̧ōnjar eo. Jipan̄ kamineneik er wāween ko n̄an jipan̄ armej in ruwainene.

Katak im Bujen Ko 46:7–26

Jemedwōj Ilan̄ ej letok n̄an eō menin letok ko an jetōb.

• N̄an jipan̄ ajri ro nejūm̧ ekkatak kōn mennin letok ko an jetōb kar kōmeļeļeiki ilo Katak im Bujen Ko 46:13–26, kōļmenļo̧kjeņ kōn ļōmņak kein. Kwomaron̄ je mennin letok ko ioon jidik peba im nooji ipeļaakin rūūm̧ eo. N̄e ajri ro nejūm̧ relo kajjojo pepa, jipan̄ er kappukōt ia eo menin ej kōnono kake jekjōn 46. N̄an kajjojo mennin letok, kōnono ippāer kake ekōjkan an jerbal n̄an kōjeraam̧m̧an ro jet (kōmeļeļe ko ilo “Jebta 20: Mennin Letok ko an Jetōb,” ilo Bwebwenato ko jen Katak im Bujen Ko, 77–80, remaron̄ jipan̄).

  Chapter 20: Gifts of the Spirit: 8•March 1831

• Jiron̄ ajri ro nejūm̧ kōn mennin letok ko kwoj en̄jake me Jemedwōj Ilan̄ ekar leļo̧k n̄an er, im kōtļo̧k bwe ren kōnono kake mennin letok ko rej kili ippān doon. Ekkar n̄an Katak im Bujen Ko 46:8–9, 26, etke Jemedwōj Ilan̄ ej letok n̄an kōj mennin letok ko an jetōb? Elmen ad kōjerbal mennin letok ko ad n̄an jipan̄ ro jet?

Katak im Bujen Ko 47:1, 3

Imaron̄ je bwebwenato eo aō.

• Kōtļo̧k bwe ajri ro nejūm̧ ren pukot ta eo Irooj ekōņaan bwe Jon Whitmer en kōm̧m̧ane ilo Katak im Bujen Ko 47:1, 3. Kwomaron̄ bar jeere n̄an doon bwebwenato ko rem̧m̧antata jān jeje ko rekwojarjar. Kalikkar bwe jejeļā kōn bwebwenato kein kōnke juon armej eaar je.

• Ļōmņak ekōjkan am̧ maron̄ im̧we ajri ro nejūm̧ n̄an je bwebwenato ko aer make. Kwomaron̄ kwaļo̧k jet jeje ko jān jōnōļ eo am̧ make ak juon bwebwenato kōn rūtto ro jibūd im jim̧mad (lale FamilySearch.org ak app in kein kakeememej eo). Kwomaron̄ leļo̧k jet im̧we ko jān jōnōļ eo am̧, āinwōt “Ta eo ekar waļo̧k wiik in me kwoj kōņaan bwe ajri ro jibūm̧ ren jeļā kake?” ak “Ekōjkan am̧ kar lo pein Irooj ilo mour eo am̧ wiik in?” Ajri ro reddik remaron̄ jin̄aik pija ko kōn en̄jake ko aer, ak kwomaron̄ je ilo am̧ ba n̄an er bwebwenato ko aer. Ta kōjeraam̧m̧an ko rej itok jān je juon “bwebwenato”? (Katak im Bujen Ko 47:1).

Katak im Bujen Ko 48:2–3

Imaron̄ jipan̄ ro jet n̄an kwaļo̧k ta eo ikar leļo̧k.

• Ilo am̧ riiti Katak im Bujen Ko 48:2–3 ippān ajri ro nejūm̧, kwomaron̄ aikuj kōm̧eļeļeiki bwe armej raar itok n̄an Ohio jān Reeaar, im ekar ejjeļo̧k jikin aer jokwe. Ta eo Irooj ekar kajjitōk bwe Rikwojarjar ro ren jipan̄ kōm̧m̧ane? Jipan̄ ajri ro nejūm̧ ļōmņak kōn men ko Anij ekar leļo̧k n̄an er me remaron̄ jeere n̄an ro jet. Kwomaron̄ bar al ippāer juon al āinwōt “‘Give,’ Said the Little Stream” (Children’s Songbook, 236).

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Aolep ro rekōņaan kabun̄jar n̄an Rilo̧mo̧o̧r rej ruwainene n̄an kweilo̧k ko an Rikwojarjar ro An.