“Māe 19–25: ‘Men Eo ej jān Anij ej Meram’: Katak im Bujen Ko 49–50,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 49–50,” Itok, Ļoor Eō—N̄an M̧weeo im Kabun̄ in: 2025
Māe 19–25: “Men Eo ej jān Anij ej Meram”
Katak im Bujen Ko 49–50
Rilo̧mo̧o̧r ej ad “seperd eo em̧m̧an” (Katak im Bujen Ko 50:44). E jeļā ke jet iien siip ko rej jebwābwe ilo āne jem̧aden im elōn̄ uwōta ko iie. Kōn menin E ej tōl kōj ilo iakwe n̄an kōjparok kōn An katak. E ej tōļļo̧k kōj jān kauwōtata ko āinwōt “jetōb ko rejjab m̧ool, ko em̧ōj aer ajeeded ilo laļ in, im m̧oņe laļ in” (Katak im Bujen Ko 50:2). Emakijkij ļoor E ej meļeļe in kōtlo̧k ļōmņak ko rebōd ak iminene ko. Menin ekar m̧ool n̄an Leman Copley im ro jet ilo Ohio. Raar bōk gospel eo em̧ōj an jepļaaktok bōtaab raar dāpij wōt jet iaan tōmak ko aer me rekar jab jim̧we. Ilo Katak im Bujen Ko 49, Irooj ekar kean̄ kōn m̧ool ko me raar kajim̧we tōmak ko an Leman m̧oktaļo̧k kōn unnin kōnono ko āinwōt m̧are im Itok Eo Kein Karuo an Rilo̧mo̧o̧r. Im ke rioktak ro ilo Ohio raar “bōk … jetōb ko me [er] ar jab meļeļe,” Irooj eaar katakin er ekōjkan kile waļo̧ktok ko rem̧ool an Jetōb (Katak im Bujen Ko 50:15). Seperd eo Em̧m̧an ej kijenmej wōt ippād, “ajri ro reddik” Nejin ro rej “aikuj eddek ilo jouj im ilo jeļā kōn m̧ool eo” (Katak im Bujen Ko 50:40).
Ļōmnak ko n̄an Ekkatak ilo M̧weeo im ilo Kabun̄ in
Jisōs Kraist ekōņaan bwe n̄a in atbakwoj m̧ool ko an gospel eo An.
M̧okta jān an kar kobatok ilo Kabun̄ in, Leman Copley ekar m̧ōttan juon kurub in kabun̄ ebun̄bun̄ āinwōt juon United Society of Believers in Christ’s Second Appearing, bar ņaetaer Shaker ro. Ālkin juon bwebwenato ippān Leman, Josep Smith eaar kappukot alikkar jān Irooj kōn katak ko an Shaker ro. Irooj eaar uwaak kōn revelesōn eo ilo jekjōn 49. Jet iaan tōmak ko an Shaker ro ej waļo̧k ilo kōmeļeļe in jekjōn in.
Ta eo Irooj ekar kwaļo̧k ilo jekjōn 49 n̄an kajim̧we tōmak ko an Shaker ro? Ta kein kam̧ool ko kwoj loi ilo revelesōn in kōn iakwe im kea eo An n̄an armej ro ejjeļo̧k ippāer tarlep in m̧ool eo An? Ekōjkan am tōpar er kōn iakwe im kea?
Ta ko rej im̧we eok kōn ta eo Irooj ekar mije ilo eoon 2? Kwomaron̄ keidi menin n̄an ta eo enaaj waļo̧k n̄e kwoj alooje wōt jim̧ettan in juon pija, lale juon tipdik in bajōļ, ak ron̄jake juon m̧ōttan akweleel. Ewi wāween an kakkōl eo an Irooj ekkeijel n̄an Katak im Bujen Ko 50:24? Ļōmņake ta kwoj kōm̧m̧ane n̄an bōk eļapļo̧k meram jān Irooj.
Bar lale “Leman Copley and the Shakers,” ilo Revelations in Context, 117–21.
M̧are eo ikōtaan em̧m̧aan eo im kōrā eo ej juon men eaorōk ilo karōk eo an Anij.
Ilo juon jibadbad n̄an kakure karōk eo an Jemedwōj Ilan̄, Setan ej pukot n̄an ejaak tarpok kōn m̧are. Irooj, ijo iturājet eo juon, ej wōnm̧aanļo̧k wōt im kwaļo̧k m̧ool ko kōn m̧are n̄an rikanaan ro An. Kwomaron̄ lo jet iaan m̧ool kein ilo Katak im Bujen Ko 49:15–17; Jenesis 2:20–24; 1 Korint 11:11; im “Baam̧le Eo: Juon Kean̄ n̄an Laļin.” Kōm̧m̧ane juon laajrak in m̧ool ko kwoj loi. Etke m̧are eaorōk ilo karōk eo an Anij?
Elder Ulisses Soares ekar katakin bwe “gospel in an Jisōs Kraist me em̧ōj an jepļaaktok ej kwaļo̧k bwe pedped in katak eo n̄an erom̧ juon wōt ikōtaan ļeo im lio pālele, jim̧or ilo mour in wabanban im mour indeeo.” (“Juon Wōt Ippān Irooj,” Liaona, Nob. 2022, 42). Kwomaron̄ ekkatak enaan in an, kappok pedped in katak ko “me ej kōkajoorļo̧k pād eo ikōtaan ļeo im lieo.” Ekōjkan am̧ maron̄ kōjerbal pedped kein ilo mour eo am̧? N̄e juon armej jān bar juon tōmak en kar kajjitōk ippam etke m̧are eaorōk, elmen am̧ naaj kar uwaake? Etke kwoj kam̧m̧oolol kōn meļeļe in?
Bar lale Topics and Questions, “Marriage,” “Family,” Gospel Library; David A. Bednar, “Marriage Is Essential to His Eternal Plan,” Ensign, June 2006, 83–84; “Renaissance of Marriage” (pija), Gospel Library.
Renaissance of Marriage
Hear what President Eyring says we all must do to have a renaissance of happy marriages and productive families.
Kōm̧m̧an ekkar n̄an jekjek ko an kajjojo armej. Jekdo̧o̧n n̄e pālele eo elem̧ōņōņō im mour in baam̧le rej juon jon̄ak ilo gospel in an Jisōs Kraist, jejjab aolep bōk kōjeraam̧m̧an kein ilo mour in. N̄an kōnono kōn katak in, ļōmņak kōn jekjek ko an kajjojo armej im baam̧le ko, eļaptata armej ro rej “kōttar Irooj ilo kijenmej” n̄an an kallim̧ur ko indeeo naaj kūrm̧ool (lale Katak im Bujen Ko 98:1–3).
Katak ko an Irooj remaron̄ kōjparok eō jān m̧oņ ko an Setan.
Membōr ro rekāāl an Kabun̄ in ilo Ohio raar kijōrjōr in bōk waļo̧ktok ko an jetōb kar kallim̧ur kaki ilo jeje ko rekwojarjar. Ijoke, Setan ekar kijōrjōr in m̧ōņ er. Eļan̄n̄e kar kajjitōk ippam n̄an jipan̄ membōr rein meļeļe elmen kile waļo̧ktok ko remool an Jetōb Kwojarjar, ta pedped in katak ko ilo Katak im Bujen Ko 50 kwon kar jeeri? (eļaptata lale eoon 22–25, 29–34, 40–46). Ewi wāween an kar Rilo̧mo̧o̧r jipan̄ eok jeļā oktak eo ikōtaan m̧ool im bōd?
Bar lale 1 Korint 14:1–28; 2 Timote 3:13–17.
Rūkaki ro im rūkatak ro rej kōkajoor doon jān Jetōb eo.
Mour kōn gospel in an Jisōs Kraist ej letok elōn̄ iien em̧m̧an ko n̄an rūkaki im rūkatak, jimo̧r ilo m̧weeo im ilo Kabun̄ in. Juon wāween kwomaron̄ ekkatak Katak im Bujen Ko 50:13–24 ej n̄an jin̄aik juon pijaan rūkaki eo im rūkatak eo. Ituruer kajjojo, kōm̧m̧ane juon laajrak in naan ko im naan ko jān eoon ko me rej katakin eok jet men n̄an ekkatak im kwaļo̧k gospel in. N̄āāt eo ekar lōn̄ am en̄jake me ekar katakin eok kōn aorōk eo an Jetōb ilo katakin im ekkatak? Ļōmņak kōn ta eo kwomaron̄ kōm̧m̧ane n̄an kōkm̧anm̧anļo̧k kijejeto ko am̧ āinwōt juon rūkatak im juon rūkaki an gospel in
“Men eo ej jān Anij ej meram.”
Ilo am̧ kōļmenļo̧kjeņ kōn naan ko an Rilo̧mo̧o̧r ilo Katak im Bujen Ko 50:23–25, ļōmņak kōn wāween am̧ bōk meram̧ an Anij ilo mour eo am̧ im elmen am̧ “kokakļo̧k marok”. N̄an waanjon̄ak, elmen an eoon kein tōl kāālet ko am̧ kōn wāween kōjerbal iien ko am̧? ta kein kalimomo ko ak mitia ko kwoj kappukoti? ewi wōt ekkōnono ko kwoj kobaļo̧k ie? Ta kāālet ko jet eoon kein remaron̄ jipan̄ eok kaki? Al ko āinwōt “The Lord Is My Light” (Hymns, no. 89). emaron̄ imwe eok kōn ļōm̧ņak ko jet.
Bar lale “Etetal ilo Meram an Anij,” N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, 16–21.
Ļōmņak ko n̄an Katakin Ajri ro
Imaron̄ ļoor Jisōs Kraist
-
N̄an katakin ajri ro nejūm̧ pedped in eoon kein, komaron̄ kepooj emen pepa annan̄ in ne im emen pija ko me rej bōk jikin tōmak ilo Jisōs Kraist, ukeļo̧k, peptaij, im bōk Jetōb Kwojarjar (lale pija ko ilo peij in m̧akūtkūt eo an wiik in). Ajri ro nejūm̧ remaron̄ door annan̄ in ne ko ilaļ ippān pija ko iturier. Innām remaron̄ juon illo̧k juon etetal ioon annan̄ in ne ko ilo am̧ riiti Katak im Bujen Ko 49:12–14. Jipan̄ er meļeļe bwe n̄e jej kōm̧m̧an men ko ilo pija kein, jej ļoore Jisōs Kraist.
-
Kwomaron̄ bar karuwaineneik ajri ro n̄an keidi Katak im Bujen Ko 49:12–14 ippān Jerbal 2:38 im ippān laajrak in tōmak kein kemen. Ta men ko reier wōt juon rej loi? Etke m̧ool kein raorōk?
M̧are eo ikōtaan em̧m̧aan im kōrā eaorōk ilo karōk eo an Anij.
-
N̄an kwaļo̧k kadkadin eoon kein, kwomaron̄ kōmeļeļe bwe Shaker ro raar juon kurup in ritōmak me rej tōmak armij rejjab aikuj m̧are (lale jekjōn in kōmeļeļe eo n̄an Katak im Bujen Ko 49). Karuwaineneik ajri ro n̄an kapukkot men ko Irooj ej katakin kōn m̧are ilo Katak im Bujen Ko 49:15–17. Ta meļeļein menin bwe “m̧are ej kōmālim jān Anij”? Bōlen kwoj maron̄ riit ippān doon pārokreep ko jilu jinointata an “Baam̧le Eo: Juon Kean̄ n̄an Laļin.” Innām kōnono kake etke m̧are im baam̧le raorōk n̄an Jemedwōj Ilan̄.
“Men eo ej jān Anij ej meram.”
-
N̄an kwaļo̧k kadkad in Katak im Bujen ko 50: 23–25, kōnono ippān ajri ro kōn oktak eo ikōtaan meram̧ im maro̧k. Etke jej aikuj meram? Komi maron̄ riiti ippān doon pārōkōrāāp eo jinoin in “Etetal ilo Meram an Anij,” N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko (peij 17) im bar Katak im Bujen Ko 50:23–25. Kōnono kōn wāween ko jej bōk meram̧ an Anij im wāween ko jej maron̄ kokakļo̧k marok. Kom̧ maron̄ al ippān doon juon al kōn meram in jetōb, āinwōt “Shine On” (Children’s Songbook, 144).
Jisōs Kraist ej aō Seperd eo Em̧m̧an.
-
Ālkin riiti Katak im Bujen Ko 50:40–46 ippān doon, kwomaron̄ kwaļo̧k pijaan Rilo̧mo̧o̧r eo ilo jemļo̧kin katak in im kajjitōk kajjitōk ko āinwōt in: Ekōjkan an juon seperd en̄jake kōn siip ko An? Ekōjkan an Rilo̧mo̧o̧r āinwōt juon seperd n̄an kōj?
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.
Gentle Shepherd, jān Yongsung Kim