Mayo 5–11: “Ang mga Saad … Matuman”

Doktrina ug mga Pakigsaad 45

Ang pagpadayag diha sa seksiyon 45 gidawat, sumala sa ulohan sa seksiyon, “sa hingpit nga kalipay sa mga Santos.” Ug daghan ang angay nga ikalipay mahitungod niini nga pagpadayag. Dinhi niini ang Manluluwas mihatag sa Iyang malumo nga saad nga mangaliyupo alang kanato sa atubangan sa Amahan (tan-awa sa mga bersikulo 3–5). Siya naghisgot bahin sa Iyang mahangtoron nga pakigsaad nga mikatap sa tibuok kalibotan, sama sa “sinugo … sa [Iyang] atubangan sa pag-andam sa agianan” (bersikulo 9). Ug Siya nanagna bahin sa Iyang mahimayaong Ikaduhang Pag-anhi. Ang Manluluwas naghimo sa tanan niini samtang nag-ila usab nga mga panahon kini karon sa kasamok (tan-awa sa bersikulo 34), kabahin niana tungod sa mga katalagman nga mahitabo sa dili pa ang Iyang pag-anhi. Apan kana nga katalagman, kana nga kangitngit dili ingon kalig-on nga mowagtang sa kahayag sa paglaom. “Kay sa pagkatinuod Ako moingon nganha kaninyo,” ang Ginoo namahayag, “nga Ako … ang kahayag nga nagdan-ag sa kangitngit” (bersikulo 7). Kana lamang rason na aron dawaton kini nga pagpadayag—uban sa bisan unsa nga tambag ug mga pasidaan ug kamatuoran nga gusto Niya nga ihatag—uban sa kamaya.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 45:1–5

Si Jesukristo mao ang akong Manlalaban ngadto sa Amahan.

Kon kita mobati nga dili angay o dili takos sa atubangan sa Dios, kita makakaplag og kadasig gikan sa mga pulong sa Manluluwas diha sa Doktrina ug mga Pakigsaad 45:1–5. Samtang mangita ka niini nga mga bersikulo, ikonsiderar ang mga pangutana sama niini:

• Unsa nga mga pulong o hugpong sa mga pulong niini nga mga bersikulo ang makahuloganon kaayo nganha kanimo?

• Ang usa ka manlalaban mao ang usa ka tawo kinsa dayag nga mosuporta o morekomendar sa usa ka tawo o sa kawsa. Sumala niini nga mga bersikulo, giunsa ni Jesukristo sa paghimo niini alang kanimo? Unsa ang nakapasarang Kaniya sa paghimo niini?

• Unsa ang nakapadyeg nimo mahitungod sa mga pulong sa Manluluwas ngadto sa Amahan? (mga bersikulo 4–5).

Mahimo usab ka nga magtuon sa unsay gitudlo ni Elder Dale G. Renlund mahitungod ni Jesukristo, atong Manlalaban, diha sa “Magpili Kamo Niining Adlawa” (Liahona, Nob. 2018, 104–5). Sumala ni Elder Renlund, unsa ang kalainan sa katuyoan sa Manluluwas kon itandi sa kang Lucifer?

Ang mosunod nga mga tudling mahimong makadugang sa inyong panabot bahin sa tahas sa Manluluwas isip Manlalaban. Samtang magtuon ka niini, ikonsiderar ang pagsulat sa hugpong sa mga pulong o mga kamatuoran nga mahimo nimong ipakigbahin sa uban: 2 Nephi 2:8–9; Mosiah 15:7–9; Moroni 7:27–28; Doktrina ug mga Pakigsaad 29:5; 62:1. Nganong makahuloganon man kini nga hugpong sa mga pulong nganha nimo?

Tan-awa usab sa “Ako Nagpabilin nga Natingala,” Mga Himno, nu. 114; Mga Hilisgotan ug mga Pangutana [Topics and Questions], “Pag-ula ni Jesukristo [Atonement of Jesus Christ],” Librarya sa Ebanghelyo [Gospel Library]; “The Mediator” (bidyo), Librarya sa Ebanghelyo.

The Mediator

A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.

Doktrina ug mga Pakigsaad 45:9–10

Ang ebanghelyo usa ka sumbanan ngadto sa kanasoran.

Sa karaang panahon, ang usa ka sumbanan mao ang usa ka bandera nga dad-on ngadto sa gubat nga gamiton sa pagmartsa ug paghiusa sa mga tropa. Ang sumbanan usa usab ka ehemplo o lagda nga mahimong sukdanan sa ubang mga butang. Samtang magbasa ka sa Doktrina ug mga Pakigsaad 45:9–10, pamalandongi kon sa unsang paagi nga ang imong mga pakigsaad ngadto sa Ginoo nahimong sumbanan alang kanimo.

Doktrina ug mga Pakigsaad 45:11–75

Si Jesukristo mobalik diha sa himaya.

Ang Ikaduhang Pag-anhi sa Ginoo gihulagway isip “dako” ug “makalilisang” (Malaquias 4:5). Diha sa Doktrina ug mga Pakigsaad 45, ang duha ka paghulagway daw miahom. Kini nga pagpadayag naglangkob sa klaro nga mga pasidaan ug malaomon nga mga saad mahitungod sa pag-anhi sa Ginoo. Samtang magtuon ka sa mga bersikulo 11–75, pamalandongi kon sa unsang paagi nga ikaw makaandam alang sa Ikaduhang Pag-anhi uban sa hugot nga pagtuo diha ni Kristo imbes sa kahadlok. Irekord unsay imong makit-an diha sa usa ka talaan nga sama niini:

Panagna o panaad	Unsay akong mahimo
Panagna o panaad Usa ka kahayag (ang ebanghelyo) moabot niadtong naglingkod diha sa kangitngit (bersikulo 28)	Unsay akong mahimo Dawata ang kahayag—ug ipakigbahin kini (bersikulo 29)
Panagna o panaad	Unsay akong mahimo
Panagna o panaad	Unsay akong mahimo
Panagna o panaad	Unsay akong mahimo

Diha sa bidyo nga “Men’s Hearts Shall Fail Them” (Gospel Library), unsa ang tambag nga gihatag ni Presidente Russell M. Nelson aron matabangan kita sa pag-atubang sa makahahadlok nga mga sitwasyon uban sa kalinaw?

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina ug mga Pakigsaad 45:31–32, 56–57

Ako makahimo sa “pagbarog sa balaan nga mga dapit” ug dili mabalhin.

Unsa ang imong nakat-onan diha sa Doktrina ug mga Pakigsaad 45:31–32, 56–57 mahitungod sa pagpangandam alang sa pag-anhi sa Ginoo? Unsa ang imong “balaan nga mga dapit”? Unsa ang buot ipasabot sa “dili mabalhin”? Unsaon nimo sa paghimo sa dapit kon asa ikaw nga mas balaan?

Hinumdomi nga ang Ginoo naghisgot sa napulo ka mga birhen, nga nagtandi sa lana diha sa sambingay ngadto sa kamatuoran ug sa Balaang Espiritu. Ikonsiderar ang pagbasa sa sambingay diha sa Mateo 25:1–13 nga maghunahuna niana. Unsa nga mga ideya ang imong naangkon?

Tan-awa usab sa David A. Bednar, “Kon Nakaila Pa Kamo Kanako,” Liahona, Nob. 2016, 102–5.

Parable of the Ten Virgins [Ang Sambingay sa Napulo ka mga Birhen], ni Dan Burr

Doktrina ug mga Pakigsaad 45:11–15, 66–71

Ang Zion usa ka dapit sa kahilwasan [safety] alang sa mga Santos sa Dios.

Ang mga Santos sa panahon ni Joseph Smith matinguhaon sa pagtukod sa Zion, ang Bag-ong Jerusalem (tan-awa sa Ether 13:2–9; Moises 7:18, 62–64). Unsay imong nakat-onan mahitungod sa Zion—ang karaang siyudad sa panahon ni Enoch ug ang siyudad sa ulahing mga adlaw—gikan sa Doktrina ug mga Pakigsaad 45:11–15, 66–71? Karong panahona ang sugo nga magtukod og Zion nagpasabot sa pag-establisar sa gingharian sa Dios bisan asa man kita nagpuyo. Unsay imong mahimo sa pagtabang sa pagtukod sa Zion kon asa man ka nagpuyo?

Mga Tawo, Mga Dapit, Mga Panghitabo

• Joseph Smith Jr.

• Umahan nila ni Isaac ug Lucy Morley

• Ang Hubad ni Joseph Smith sa Biblia

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 45:3–5

Si Jesukristo mao ang akong Manlalaban ngadto sa Amahan.

• Mahimo nimong tabangan ang imong mga anak nga makasabot nga ang manlalaban mao ang usa ka tawo nga mosuporta sa laing tawo. Dayon mahimo ka nga maghisgot mahitungod sa mga ehemplo sa pagkahimong usa ka manlalaban nga pamilyar nila (sama sa pagbarog alang sa usa ka higala). Samtang magbasa kamo og dungan sa Doktrina ug mga Pakigsaad 45:3–5, tabangi ang imong mga anak nga makadiskobre kon kinsa ang atong Manlalaban ug kon unsaon Niya sa pagtabang nato.

Doktrina ug mga Pakigsaad 45:32

Ako mahimong “magbarog sa balaan nga mga dapit.”

• Tingali makalingaw ang pagbutang og mga litrato sa usa ka balay, usa ka gambalay sa Simbahan, ug sa usa ka templo libot sa lawak. Dayon mahimo nimong hatagan ang imong mga anak og mga timailhan nga naghulagway niini nga mga dapit ug modapit nila sa pagbarog duol sa litrato nga imong gihisgotan. Hangyoa sila nga magpabiling magbarog samtang basahon nimo ang unang linya sa Doktrina ug mga Pakigsaad 45:32. Unsa ang pipila sa balaang mga dapit nga gihatag sa Dios kanato? Tabangi ang imong mga anak nga makasabot nga ang “pagbarog sa balaan nga mga dapit, ug … dili mabalhin” nagpasabot sa pagpili sa matarong sa tanang higayon, bisan unsa pay nahitabo. Unsaon nato paghimo sa atong panimalay nga mas balaan nga dapit?

Doktrina ug mga Pakigsaad 45:9

Ang ebanghelyo ni Jesukristo usa ka sumbanan sa kalibotan.

• Mahimo nimong ipasabot sa imong mga anak nga sa karaang panahon, ang usa ka sumbanan mao ang usa ka bandera o bandila nga gidala ngadto sa panggubatan. Kini nakatabang sa mga kasundalohan nga makahibalo asa magpundok ug unsay buhaton. Basaha og dungan ang Doktrina ug mga Pakigsaad 45:9, ug hisgoti ang mga paagi nga ang ebanghelyo susama sa usa ka sumbanan. Ang imong mga anak tingali malingaw sa paghimo og ilang kaugalingong sumbanan o bandila, nga naglakip og mga imahe o mga pulong nga nagpahayag sa ilang mga pagbati mahitungod sa Manluluwas.

Ang ebanghelyo nahisama sa usa ka sumbanan, o sa usa ka bandera o bandila.

Doktrina ug mga Pakigsaad 45:44–45

Si Jesukristo moanhi pag-usab.

• Ang pagkagun-ob nga mahitabo sa dili pa ang Ikaduhang Pag-anhi tingali makapahadlok sa mga bata. Ang pagpunting kanila ngadto kang Jesukristo makatabang nila nga magpaabot uban sa hugot nga pagtuo! Ikonsiderar ang pagdapit nila sa paghunahuna kon unsa ang ilang bation kon ang usa ka espesyal nga tawo mobisita, sama sa apohan o higala. Sa unsa nga paagi sila mangandam alang sa pagbisita? Dayon mahimo ka nga mopakita og hulagway sa Manluluwas, ug basahon ang Doktrina ug mga Pakigsaad 45:44–45. Mopakigbahin sa usag usa kon unsa ang inyong bation mahitungod sa pag-anhi sa Manluluwas.

• Aron matabangan ang imong mga anak nga mobati og kahinam mahitungod sa Ikaduhang Pag-anhi sa Manluluwas, mahimo nimong isulat diha sa ginunting nga mga papel ang pipila sa puno sa paglaom nga mga saad gikan sa seksiyon 45 (tan-awa, pananglitan sa mga bersikulo 44–45, 51–52, 55, 58–59, 66–71). Ihatag sa imong mga anak ang mga papel ug hangyoa sila sa pagpataas sa ilang mga kamot kon ang saad nga ilang gigunitan malitok samtang magbasa ka sa mga bersikulo. Hisgoti kon unsay ipasabot niini nga mga saad. Mahimo usab nimong kantahon uban sa imong mga anak ang usa ka awit mahitungod sa Ikaduhang Pag-anhi sa Manluluwas, sama sa “Kon Siya Moanhi Pag-usab” (Songbook sa mga Bata, 46–47).

Tabangi ang mga bata nga makaila sa Espiritu. Samtang magtudlo ka sa imong mga anak, sultihi sila kon bation nimo ang Espiritu Santo. Hisgoti kon giunsa nimo sa pag-ila ang Iyang impluwensya. Pananglitan, ikaw mahimong mobati og kalinaw o kalipay samtang nagkanta og usa ka awit mahitungod sa Manluluwas.

Alang sa dugang nga mga ideya, tan-awa sa isyu karong bulana sa Higala nga magasin.

The Second Coming [Ang Ikaduhang Pag-anhi], ni Harry Anderson