The Camp Meeting [Ang Miting sa Kampo], ni Worthington Whittredge

Mayo 12–18: “Pangitaa sa Matinguhaon nga Paagi ang Labing Maayo nga Gasa”

Doktrina ug mga Pakigsaad 46–48

Samtang sila si Parley P. Pratt, Oliver Cowdery, Ziba Peterson, ug Peter Whitmer Jr. mibiya sa Kirtland ug milakaw aron sa pagpadayon sa pagsangyaw sa ebanghelyo, gibiyaan nila ang sobra sa usa ka gatos ka kinabig nga adunay dakong kadasig apan gamay ra og kasinatian o direksyon. Sila walay tamdanan nga mga basahon nga pang-instruksiyon, walay mga miting sa pagbansay sa pagpangulo, walay mga sibya sa kinatibuk-ang komperensiya—gani, wala kaayoy daghang kopya sa Basahon ni Mormon nga magamit. Daghan niining bag-o nga mga tumutuo naagni sa gipahiuli nga ebanghelyo tungod sa saad sa talagsaong mga manipestasyon sa Espiritu, ilabi na niadtong gihulagway diha sa Bag-ong Tugon (tan-awa, pananglitan sa 1 Mga Taga-Corinto 12:1–11). Apan daghan ang naglisod sa pag-ila sa tinuod nga mga manipestasyon sa Espiritu. Nakakita sa kalibog, si Joseph Smith nag-ampo alang sa tabang. Ang tubag sa Ginoo mahinungdanon sa panahon karon, diin ang mga tawo sa kasagaran molimod o mobaliwala sa mga butang nga may kalabotan sa Espiritu. Siya mipamatuod nga ang espirituhanon nga mga manipestasyon tinuod. Giklaro usab niya kon unsa kini: mga gasa gikan sa usa ka mahigugmaong Langitnong Amahan, “ihatag alang sa kaayohan niadto kinsa nahigugma [Kaniya] ug naghupot sa [Iyang] mga sugo, [ug kaniya nga nagtinguha sa pagbuhat niana];” (Doktrina ug mga Pakigsaad 46:9).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 46:1–7

Ang Manluluwas mohangop sa tanan nga gustong mosimba diha sa Iyang Simbahan.

Sa imong pamati ang mga higala ug ang mga tawo sa inyong kasilinganan nakabatyag ba nga gihangop ngadto sa mga tulumanon sa pagsimba sa inyong ward? Unsa ang imong gibuhat aron mahimo ang inyong mga miting sa Simbahan nga mga dapit nga gustong balikan sa mga tawo? Pamalandongi kon unsaon nimo paggamit ang tambag sa Ginoo diha sa Doktrina ug mga Pakigsaad 46:1–7 (tan-awa usab sa 2 Nephi 26:24–28; 3 Nephi 18:22–23).

Mahimo usab ka nga maghunahuna sa usa ka higayon nga mitambong ka sa mga tulumanon sa Simbahan—o sa usa ka miting sa laing grupo—sa unang higayon. Unsa ang gibuhat sa mga tawo aron matabangan ka nga mobati nga gihangop?

Tan-awa usab sa Moroni 6:5–9; “Pagkatam-is nga Kantahon sa Gugma Niyang Walay Sama,” Mga Himno, nu. 101; “Welcome” (bidyo), Gospel Library.

Welcome sa ComeUntoChrist.org

Welcome sa komunidad diin ang tanan naninguha nga magpuyo sama sa gitudlo ni Jesus. Dali ug tan-awa unsa ang among gituhoan sa ComeUntoChrist.org.

Doktrina ug mga Pakigsaad 46:7–33

Ang Langitnong Amahan mihatag nako og espirituhanong mga gasa sa pagpanalangin sa uban.

Ang unang mga Santos mituo sa espirituhanong mga gasa apan nagkinahanglan og tabang aron sa pag-ila niini ug sa pagsabot sa katuyoan niini. Samtang magtuon ka mahitungod sa mga gasa sa Espiritu diha sa Doktrina ug mga Pakigsaad 46:7–33, pamalandongi ang katuyoan “[nga kini] gihatag” (bersikulo 8). Unsa ang imong nakat-onan mahitungod sa Dios—ang tighatag niining mga gasa?

Makahunahuna ka ba og mga ehemplo nga imong nakita sa mga tawo nga naggamit niini o sa ubang espirituhanong mga gasa? Sa unsang paagi nga nakahatag kini og “kaayohan sa mga anak sa Dios”? (bersikulo 26). Mahimo usab nimong tan-awon kon makaila ka ba og mga ehemplo sa lainlaing espirituhanong mga gasa sama niini: 1 Mga Hari 3:5–15; Daniel 2:26–30; Mga Buhat 3:1–8; Helaman 5:17–19; Mormon 1:1–5; Ether 3:1–15; Doktrina ug mga Pakigsaad 6:10–12; Moises 7:13.

Ang imong pagtuon bahin sa espirituhanong mga gasa mahimong modala nimo ngadto sa pagpamalandong kon unsa nga mga gasa ang gihatag sa Dios nimo. Unsaon nga magamit nimo kini nga mga gasa sa pagpanalangin sa Iyang mga anak? Kon ikaw adunay patriyarkal nga panalangin, posible nga miila kini sa espirituhanong mga gasa nga gihatag nganha nimo. Ang pagbasa sa mensahe ni Elder John C. Pingree Jr. nga “Ako Adunay Buhat alang Kanimo” makaabli usab sa imong hunahuna ngadto sa mga gasa nga wala nimo hunahunaa (Liahona, Nob. 2017, 32–35).

Kon gusto ka nga makakat-on kon unsaon sa pagpalambo og espirituhanong mga gasa, ang analohiya diha sa sinugdanan sa mensahe ni Elder Juan Pablo Villar nga “Pagbansay sa Atong Espiritwal nga mga Kaunoran” makatabang (Liahona, Mayo 2019, 95). Unsa nga “mga pagbansay” ang makatabang nimo nga mapalambo ang imong espirituhanong mga gasa?

Tan-awa usab sa Mga Hilisgotan ug mga Pangutana [Topics and Questions], “Espiritu Santo [Holy Ghost],” Librarya sa Ebanghelyo [Gospel Library].

Doktrina ug mga Pakigsaad 47

Gusto sa Ginoo nga ang Iyang Simbahan magtipig og kasaysayan.

Ang calling ni John Whitmer sa pagtipig og kasaysayan sa Simbahan nagpadayon nga usa ka dugay na nga tradisyon sa mga tigtipig og mga rekord taliwala sa katawhan sa Dios. Ngano kaha nga ang pagtipig og kasaysayan importante man kaayo sa Ginoo? Pamalandongi kini samtang magbasa ka sa seksiyon 47 ingon man sa susama nga mga instruksiyon diha sa 2 Nephi 29:11–12; Moises 6:5; Abraham 1:28, 31. Sa imong pamati unsa ang gusto sa Ginoo nga imong irekord mahitungod sa imong kinabuhi?

Diha sa FamilySearch, makarekord ka og mga handomanan ug mga kasinatian gikan sa imong kinabuhi—ug sa mga kinabuhi sa imong mga katigulangan (tan-awa sa FamilySearch.org).

Tan-awa sa Henry B. Eyring, “O Hinumdumi, Hinumdumi,” Liahona, Nob. 2007, 66–69.

John Whitmer

Doktrina ug mga Pakigsaad 47

Ang Espiritu Santo makagiya kanako samtang tumanon nako ang akong calling.

Tingali makasabot ka sa gibati ni John Whitmer sa dihang gusto siya og kaseguroan nga ang iyang calling nagagikan sa Dios. Unsay gisulti sa Ginoo diha sa Doktrina ug mga Pakigsaad 47 ngadto ni John Whitmer—ug nganha kanimo—aron modasig og pagsalig sa pagtuman sa mga calling nga Iyang gihatag?

Ang tahas sa usa ka magtutudlo. Ang pagtudlo mas labaw pa kaysa pagpresentar og impormasyon. Naglakip kini sa pagmugna og palibot diin ang mga sakop sa klase makakat-on ug makadiskobre mismo og mga kamatuoran ug mopakigbahin sa ilang nakat-onan ngadto sa usag usa (tan-awa sa Pagtudlo sumala sa Pamaagi sa Manluluwas, 26).

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: John Whitmer

• Mga Miting sa Sakrament

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 46:2–6

Makatabang ko sa uban nga mobati nga gihangop sa simbahan.

• Human sa pagbasa sa Doktrina ug mga Pakigsaad 46:5 uban sa imong mga bata, hisgoti kon unsa ang gusto sa Manluluwas nga bation sa mga tawo kon sila moadto sa Iyang Simbahan. Dapita ang imong mga anak sa paghanduraw nga sila nakakita og usa ka tawo sa simbahan sa unang higayon. Tabangi sila nga magpraktis og mga paagi nga matabangan kini nga tawo nga mobati nga gihangop.

Doktrina ug mga Pakigsaad 46:7–26

Ang Langitnong Amahan mihatag nako og espirituhanong mga gasa sa pagpanalangin sa uban.

• Aron matabangan ang imong mga anak nga makakat-on mahitungod sa espirituhanong mga gasa nga gihulagway diha sa Doktrina ug mga Pakigsaad 46:13–26, ikonsiderar kini nga ideya. Mahimo nimong isulat ang mga gasa diha sa mga piraso sa papel ug itago kini libot sa lawak. Sa higayon nga makit-an sa imong mga anak ang matag papel, tabangi sila sa pagpangita kon asa kana nga gasa gihisgotan diha sa seksiyon 46. Sa matag gasa, sultihi sila kon unsaon kini paggamit aron sa pagpanalangin sa uban (ang mga paghulagway diha sa “Kapitulo 20: Mga Gasa sa Espiritu,”sa Mga Istorya sa Doktrina ug mga Pakigsaad, 77–80, makatabang).

  Chapter 20: Gifts of the Spirit: 8•March 1831

• Sultihi ang imong mga anak mahitungod sa mga gasa nga imong gibati nga gihatag sa Langitnong Amahan kanila, ug pasultiha sila mahitungod sa mga gasa nga ilang namatikdan sa usag usa. Sumala sa Doktrina ug mga Pakigsaad 46:8–9, 26, ngano nga ang Langitnong Amahan mihatag kanato og espirituhanong mga gasa? Unsaon nato sa paggamit ang atong mga gasa aron makatabang sa uban?

Doktrina ug mga Pakigsaad 47:1, 3

Akong marekord ang akong kasaysayan.

• Tugoti ang imong mga anak sa pagdiskobre kon unsa ang gusto sa Ginoo nga buhaton ni John Whitmer diha sa Doktrina ug mga Pakigsaad 47:1, 3. Mahimo usab kamo nga mopakigbahin sa usag usa og paborito nga mga istorya gikan sa mga kasulatan. Ipasabot og maayo nga kita nahibalo niini nga mga istorya tungod kay ang usa ka tawo mirekord niini.

• Ikonsiderar kon unsaon kaha nimo sa pagdasig sa imong mga anak nga irekord ang ilang personal nga mga kasaysayan. Mahimo kang mopakigbahin og pipila ka mga sinulat gikan sa imong personal nga journal o usa ka istorya mahitungod sa usa ka katigulangan (tan-awa sa FamilySearch.org o sa Mga Handomanan nga app). Mahimo kang mohatag og pipila ka mga journal prompt, sama sa “Unsay nahitabo karong semanaha nga gusto nimong masayran sa imong mga apo?” o “Sa unsang paagi nga imong nakita ang kamot sa Ginoo diha sa imong kinabuhi karong semanaha?” Ang gagmay nga mga bata mahimong magdrowing og mga hulagway gikan sa ilang mga kasinatian, o mahimo nimo silang irekord nga nagsaysay sa ilang mga istorya. Unsa nga mga panalangin ang moabot tungod sa pagtipig sa “kanunay og kasaysayan”? (Doktrina ug mga Pakigsaad 47:1).

Doktrina ug mga Pakigsaad 48:2–3

Ako makatabang sa uban pinaagi sa pagpakigbahin sa unsay gihatag kanako.

• Samtang magbasa ka sa Doktrina ug mga Pakigsaad 48:2–3 uban sa imong mga anak, mahimo nimong ipasabot nga ang mga tawo nangabot sa Ohio gikan sa Silangan, ug sila walay dapit nga kapuy-an. Unsa ang gisugo sa Ginoo nga buhaton sa mga Santos aron makatabang? Tabangi ang imong mga anak sa paghunahuna og mga butang nga gihatag sa Dios kanila nga mahimo nilang ipakigbahin sa uban. Mahimo usab ka nga mokanta uban nila og usa ka awit sama sa “Sulti sa Gamay nga Sapa ‘Hatag,’” (Songbook sa mga Bata, 116).

Alang sa dugang nga mga ideya, tan-awa sa isyu karong bulana sa Higala nga magasin.

Ang tanan nga gustong mosimba sa Manluluwas gihangop diha sa mga panagtigom sa Iyang mga Santos.