5–11 ni Me: “Na Yalayala … Ena Vakayacori”

Vunau kei na Veiyalayalati 45

A ciqomi na ivakatakila ena wase 45, me vaka na ulutaga ni iwase, “era sa reki vakalevu na Yalododonu.” Ka sa levu sara na ka me rekitaki ena ivakatakila oqo. Sa solia kina na iVakabula na Nona yalayala malumu me vakamamasu ena vukuda e matai Tamada (raica na tikina e 3–5). E tukuna na Nona veiyalayalati tawamudu ni tete tiko e vuravura taucoko, me vaka na “dautukutuku … me caramaka na sala e [matana]” (tikina e 9). Ka sa parofisaitaka o Koya na iKarua ni Nona Lako Mai ena lagilagi. E cakava na veika kece oqo na iVakabula ena nona vakadinadinataka talega ni oqo na veigauna dredre (raica na tikina e 34), vakatikina me baleta na leqa ena yaco ni bera na Nona lako mai. Ia na leqa oya, na butobuto oya e sega ni kaukauwa sara me bokoca rawa na rarama ni inuinui. “Niu sa kaya vakaidina vei kemudou,” a kaya na Turaga, “koi Au … na rarama sa cilava na butobuto” (tikina e 7). Oqori duadua ga na vuna me ciqomi kina na ivakatakila oqo—ena ivakasala kei na ivakaro kei na dina cava ga e vinakata o Koya me solia—ena reki.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 45:1–5

O Jisu Karisito na noqu Dautataro vei Tamaqu.

Ni da vakila ni da tawayaga se tawakilikili ena mata ni Kalou, sa rawa ni da kunea na veivakadeitaki mai na vosa ni iVakabula ena Vunau kei na Veiyalayalati 45:1–5. Ni o vakasaqara na veitikina oqo, vakasamataka na taro vakaoqo:

• Na vosa se malanivosa cava ena veitikina oqo e vakaibalebale vakalevu vei iko?

• Na dautataro sai koya e dua e dau tokona se vakatura e matanalevu e dua na tamata se inaki. Me vaka na veitikina oqo, e cakava vakacava oqo o Jisu Karisito me baleti iko? Na cava e rawa kina Vua me cakava?

• Na cava e vakauqeti iko me baleta na vosa ni iVakabula vei Tamana? (tikina e 4–5).

Sa rawa talega mo vulica na veika a vakavulica o Elder Dale G. Renlund baleti Jisu Karisito, na noda Dautataro, ena “Mo Ni Digitaki Koya Edaidai” (Liaona, Nove. 2018, 104–5). Me vaka e kaya o Elder Renlund, e vakatauvatani vakacava na inaki ni iVakabula ki na nei Lusefa?

Na veitikina oqo e rawa ni vakuria na nomu kila vinaka na itavi ni iVakabula vaka Dautataro. Ni o vulici ira, vakasamataka mo vola na malanivosa se dina eso o rawa ni wasea vei ira tale eso: 2 Nifai 2:8–9; Mosaia 15:7–9; Moronai 7:27–28; Vunau kei na Veiyalayalati 29:5; 62:1. Na cava e vakaibalebale kina vei iko na veimalanivosa oqo?

Raica talega na “Loloma i Jisu,” Sere ni Lotu, naba 110; Topics and Questions, “Atonement of Jesus Chris,” Gospel Library; “The Mediator” (vidio), Gospel Library.

The Mediator

A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.

Vunau kei na Veiyalayalati 45:9–10

Na kosipeli sa dua na ivakatagedegede ki na veimatanitu.

Ena gauna eliu, e dua na ivakatagedegede oya na drotini e kau ena ivalu ka vakayagataki me ra veitauriliga ka vakaduavatataki kina na sotia. Na ivakatagedegede sa ivakaraitaki talega se lawa mera vakarautaki kina na veika tale eso. Ni o wilika na Vunau kei na Veiyalayalati 45:9–10, vakasamataka vakatitobu na sala era sa ivakatagedegede kina vei iko na nomu veiyalayalati.

Vunau kei na Veiyalayalati 45:11–75

Ena lesu mai o Jisu Karisito ena lagilagi.

Na iKarua ni Lako Mai ni Turaga e vakamacalataki ruarua me “levu” ka “rerevaki” (Malakai 4:5). Ena Vunau kei na Veiyalayalati 45, e veirauti vinaka na ivakamacala ruarua. Na ivakatakila oqo e oka ruarua kina na ivakasala ni qaqarauni kei na yalayala nuitaki me baleta na nona lako mai na Turaga. Ni o vulica na tikina e 11–75, vakasamataka vakatitobu na sala o rawa ni vakavakarau kina ki na iKarua ni Lako Mai ena vakabauti Karisito ka sega ena rere. Vola na veika o kunea ena dua na ituvatuva me vakaoqo:

Parofisai se yalayala	Na cava au rawa ni cakava
Parofisai se yalayala E dua na rarama (na kosipeli) ena lako mai vei ira era dabe voli ena butobuto (tikina e 28)	Na cava au rawa ni cakava Ciqoma na rarama—ka wasea (tikina e 29)
Parofisai se yalayala	Na cava au rawa ni cakava
Parofisai se yalayala	Na cava au rawa ni cakava
Parofisai se yalayala	Na cava au rawa ni cakava

Ena vidio “Men’s Hearts Shall Fail Them” (Gospel Library), na ivakasala cava a solia o Peresitedi Russell M. Nelson me vukei keda meda sotava na ituvaki rerevaki eso ena vakacegu?

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Vunau kei na Veiyalayalati 45:31–32, 56–57

Au rawa ni “tudei tu ena veivanua tabu” ka sega ni yavalati rawa.

Na cava o vulica ena Vunau kei na Veiyalayalati 45:31–32, 56–57 me baleta na vakavakarau ki na nona lako mai na Turaga? Na cava so na nomu “veivanua tabu”? Na cava na kena ibalebale mo “sega ni yavalati rawa”? O na cakava vakacava na vanua o tu kina me vanua tabu vakalevu cake?

Mo kila tiko ni a tukuna na Turaga na vosa vakatautauvata ni tini na goneyalewa, ka vakatauvatana na waiwai ena vosa vakatautauvata ki na dina kei na Yalo Tabu. Vakasamataka mo wilika na italanoa vakaibalebale ena Maciu 25:1–13 ni o vakasamataka tiko oqori. Na vakasama cava so o sa rawata?

Raica talega na David A. Bednar, ““Kevaka Dou sa Kilai Au”,” Liaona, Nove. 2016, 102–5.

iTalanoa Vakaibalebale ni Tini na Goneyalewa, mai vei Dan Burr

Vunau kei na Veiyalayalati 45:11–15, 66–71

O Saioni sa dua na vanua ni veitaqomaki vei ira na Yalododonu ni Kalou.

Era a maqusa na Yalododonu ena gauna i Josefa Simici me ra tarai Saioni, na Jerusalemi Vou (raica na Ica 13:2–9; Mosese 7:18, 62–64). Na cava o sa vulica baleti Saioni—o ya ruarua na koro levu makawa ena gauna nei Inoki kei na koro levu edaidai—mai na Vunau kei na Veiyalayalati 45:11–15, 66–71? Nikua na ivakaro me tauyavutaki o Saioni e vakaibalebaletaki ki na tauyavutaki ni matanitu ni Kalou ena vanua cava ga eda tiko kina. Na cava o rawa ni cakava mo vukea na kena tarai cake o Saioni ena vanua ga o tiko kina?

Vakasama eso ni Nodra Vakatavulici na Gonelalai

Vunau kei na Veiyalayalati 45:3–5

O Jisu Karisito na noqu Dautataro vei Tamaqu.

• O na vinakata beka mo vukei ira na luvemu me ra kila ni dua na dautataro e dua e dau tokona e dua tale na tamata. Sa rawa mo qai veivosakitaka na ivakaraitaki eso ni dua na dautataro e rawa ni ra na kila vinaka (me vaka na tu vata kei na dua na itokani). Ni o wilika vata na Vunau kei na Veiyalayalati 45:3–5, vukei ira na luvemu me ra kila o cei na noda Dautataro kei na sala e dau vukei keda kina o Koya.

Vunau kei na Veiyalayalati 45:32

Au rawa ni “tu ena veivanua tabu.”

• Ena ka marautaki beka me biu na iyaloyalo ni dua na vale, dua na vale ni Lotu, kei na dua na valetabu wavokita na rumu. Mo qai solia vei ira na luvemu na ivakatakilakila eso me vakamacalataki kina na veivanua oqo ka sureti ira me ra tu volekata na iyaloyalo o vakamacalataka tiko. Kerei ira me ra tu vakadua ni o wilika na imatai ni laini mai na Vunau kei na Veiyalayalati 45:32. Na cava eso na vanua tabu e solia vei keda na Kalou? Vukei ira na luvemu me ra kila ni “tudei tu ena veivanua tabu, ka … sega ni yavalati rawa” e kena ibalebale me digitaki na dodonu ena veigauna kecega, se cava ga na veika e yaco tiko. Eda na cakava vakacava me dua na vanua tabu cake na noda itikotiko?

Vunau kei na Veiyalayalati 45:9

Na kosipeli i Jisu Karisito sa dua na ivakatagedegede ki vuravura.

• Sa rawa mo vakamacalataka vei ira na luvemu ni ena gauna e liu, e dau kau e dua na drotini se kuila me ivakatagedegede ki na ivalu. E dau vukei ira na sotia me ra kila na vanua me ra sota kina kei na veika me ra cakava. Wilika vata na Vunau kei na Veiyalayalati 45:9, ka veivosakitaka na sala eso e vaka kina e dua na ivakatagedegede na kosipeli. Era na marautaka beka na luvemu me ra cakava vakai ira na nodra ivakatagedegede se kuila, oka kina na iyaloyalo se vosa e vakaraitaka na nodra nanuma me baleta na iVakabula.

Na kosipeli e vaka e dua na ivakatagedegede, se dua na drotini se kuila.

Vunau kei na Veiyalayalati 45:44–45

Ena lako tale mai o Jisu Karisito.

• Na veivakarusai ena yaco ni bera na iKarua ni Lako Mai ena rawa ni vakarerei ira na gone. Ni o dusimaki ira vei Jisu Karisito ena rawa ni vukei ira me ra nanamaki ena vakabauta! Navuca mo sureti ira me ra vakasamataka na veika era vakila ni veisiko mai e dua e bibi vei ira, me vaka e dua na tubunigone se itokani. Era na vakavakarau beka vakacava ki na veisiko oqori? Qai vakaraitaka e dua na iyaloyalo ni iVakabula, ka wilika na Vunau kei na Veiyalayalati 45:44–45. Veiwaseitaka vakai kemuni na nomuni nanuma me baleta na nona lako mai na iVakabula.

• Me vukei ira na luvemu me ra marautaka na iKarua ni Lako Mai ni iVakabula, sa rawa mo vola ena tiki ni pepa eso na yalayala nuitaki eso mai na wase 45 (raica, me ivakaraitaki, na tikina e 44–45, 51–52, 55, 58–59, 66–71). Solia vei ira na pepa eso oqori ka kerei ira me ra laveta na ligadra ena gauna e tukuni tiko kina na yalayala era taura tiko ni o wilika yani na veitikina eso. Veivosakitaka na ibalebale ni yalayala eso oqo. O rawa talega ni o lagata vata kei ira e dua na sere baleta nai Karua ni Lako Mai ni iVakabula, me vaka na “Ena Lesu Tale Beka Mai” (iVolanisere ni Gonelalai, 46).

Vukei ira na gone me ra vakila na Yalotabu. Ni o vakavulici ira na luvemu, tukuna vei ira ni ko sa vakila na Yalo Tabu. Talanoataka na ivakarau o dau vakila kina na Nona veivakayarayarataki. Me kena ivakaraitaki, e rawa beka mo vakila na vakacegu se marau ni o lagata tiko e dua na sere me baleta na iVakabula.

Me baleta na vakasama tale eso, raica na ilavelave ni mekasini na iTokani. ni vula oqo.

Na iKarua ni Lako Mai, mai vei Harry Anderson