Na Soqoni ni Keba, mai vei Worthington Whittredge

12–18 ni Me: “Dou Vakasaqara Vagumatua na iSolisoli Uasivi Duadua”

Vunau kei na Veiyalayalati 46–48

Ni ratou sa biuti Katiladi mai o Parley P. Pratt, Oliver Cowdery, Ziba Peterson, kei Peter Whitmer Jn. ka gole yani ki na tomani tiko ni vunautaki ni kosipeli, e ratou a biuta tu mai e sivia e 100 na lewe ni Lotu vou era a gugumatua dina ia e lailai nodra kila-ka se veimuataki. A sega ni dua nodra ivoladusidusi ni veivakasalataki, sega ni dua na soqoni ni veituberi ni veiliutaki, sega ni dua na kakaburaki ni koniferedi raraba—na kena dina, a sega sara mada ga ni veirauti tu na ilavelave ni iVola i Momani me ra lako wavoki. E vuqa vei ira na vakabauta vou oqo era a vagolei ki na kosipeli vakalesui mai ena yalayala ni ivakatakila talei eso ni Yalotabu, vakabibi na kena era vakamacalataki tu ena Veiyalayalati Vou (raica, me ivakaraitaki na, 1 Korinica 12:1–11). Ia e vuqa era kunea ni dredre me ra kila na ivakaraitaki dina ni Yalotabu. Ni sa raica o Josefa Simici na veilecayaki oqo, a masulaka o koya na veivuke. Sa yaga sara nikua na nona isaunitaro na Turaga, ni ra dau cakitaka se vakawalena na tamata na veika ni Yalotabu. A vakadeitaka tale o Koya ni ra sa ka dina na ivakaraitaki vakayalo. A vakamatatataka talega na veika e baleta: na isolisoli mai vua na Tamada Vakalomalagi dauloloma, “sa soli na veika oqo me yaga vei ira sa lomani [Koya] ka muria na [Nona] ivakaro kece sara, io vei koya sa segata sara me vakayacora” (Vunau kei na Veiyalayalati 46:9).

Vakasama eso ni Vuli ena iTikotiko vakakina ena Lotu

Vunau kei na Veiyalayalati 46:1–7

Na iVakabula e sa kidavaki ira kece era via sokalou ena Nona Lotu.

O vakila beka ni ra dau yalo vakacegu o ira na nomu itokani kei ira ena nomu itikotiko raraba ni ra tiko ena nomuni veiqaravi ni sokalou ni tabanalevu? Na cava o sa cakava tiko me rawa ni yaco kina na nomuni soqoni ni Lotu me vanua era via lesuva tale na tamata? Vakasamataka vakatitobu na sala o rawa ni vakayagataka kina na ivakasala ni Turaga ena Vunau kei na Veiyalayalati 46:1–7 (raica talega na 2 Nifai 26:24–28; 3 Nifai 18:22–23).

O na rairai vakasamataka talega e dua na gauna o a tiko kina ena soqoni ni Lotu—se dua na soqoni ni dua tale na ilawalawa—ena imatai ni gauna. Na cava era a cakava na tamata me vukei iko mo vakila ni ko sa kidavaki?

Raica talega na Moronai 6:5–9; “Kamica Ni Da Sere Tu,” Sere ni Lotu, naba 102; “Welcome” (vidio), Gospel Library.

Ni sa kidavaki mai ki na ComeUntoChrist.org

Ni sa kidavaki ki na dua na itikotiko era tovolea tiko kina na tamata kece me ra bula me vaka a vakavulica o Jisu. Lako mai ka raica na veika keimami vakabauta ena ComeUntoChrist.org.

Vunau kei na Veiyalayalati 46:7–33

Sa solia vei au na Tamada Vakalomalagi na isolisoli vakayalo eso me vakalougatataki ira na tani.

Era a vakabauta na Yalododonu taumada na isolisoli vakayalo eso ia era a gadreva eso na veivuke me ra kilai ira vinaka kina kei na kedra inaki. Ni o vulica na veika me baleta na isolisoli ni Yalo ena Vunau kei na Veiyalayalati 46:7–33, vakasamataka vakatitobu na inaki “era a soli kina” (tikina e 8). Na cava o vulica me baleta na Kalou—o koya ka solia na isolisoli oqo?

E rawa beka ni o vakasamataka na ivakaraitaki o sa raica me baleti ira na tamata era vakayagataka tiko na veika oqo se so tale na isolisoli vakayalo? Na sala cava era a “yaga [kina] vei ira na luve ni Kalou”? (tikina e 26). E rawa talega ni o raica kevaka o rawa ni kunea na ivakaraitaki ni veisolisoli vakayalo duidui eso ena ivolanikalou vakaoqo: 1 Tui 3:5–15; Taniela 2:26–30; Cakacaka 3:1–8; Ilamani 5:17–19; Momani 1:1–5; Ica 3:1–15; Vunau kei na Veiyalayalati 6:10–12; Mosese 7:13.

Na nomu vulica na isolisoli vakayalo ena rawa ni muataki iko mo vakasamataka vakatitobu na isolisoli cava so sa solia vei iko na Kalou. O na vakayagataka vakacava na isolisoli oqo mo vakalougatataki ira kina na Luvena? Kevaka e tiko nomu veivakalougatataki vakapeteriaki, ena rawa ni tukuna tiko na isolisoli eso sa soli vei iko. Na wiliki ni itukutuku nei Elder John C. Pingree Jr. “Au na Solia Vei Iko e Dua na Cakacaka” e rawa talega ni dolava na nomu nanuma ki na isolisoli o se bera ni bau vakasamataka (Liaona, Nove. 2017, 32–35).

Kevaka o vinakata mo vulica na sala me tarai cake kina na isolisoli vakayalo, na vosa vakatautauvata ena itekivu ni itukutuku nei Elder Juan Pablo Villar “Vakaukauwataka Nomu Masela Vakayalo” e rawa ni veivuke (Liaona, Me 2019, 95). Na “veivakaukauwataki” cava ena rawa ni vukei iko mo vakatorocaketaka kina na nomu isolisoli vakayalo?

Raica talega na Topics and Questions, “Holy Ghost,” Gospel Library.

Vunau kei na Veiyalayalati 47

E vinakata na Turaga na Nona Lotu me dau vola itukutuku.

Na nona kacivi o John Whitmer me maroroya e dua na itukutuku makawa ni Lotu a tomani tikoga kina na nodra ivakarau ni bula o ira era dauvola itukutuku ena kedra maliwa na tamata ni Kalou. Na cava o nanuma ni rui bibi kina vua na Turaga na maroroi ni itukutuku makawa? Vakasamataka vakatitobu oqo ni o wilika na wase 47 ka vakakina na idusidusi tautauvata eso ena 2 Nifai 29:11–12; Mosese 6:5; Eparaama 1:28, 31. Na cava o nanuma e vinakata na Turaga mo vola me baleta na nomu bula?

Ena FamilySearch, e rawa ni o vola na ivakananumi kei na veika o sotava ena nomu bula—kei na nodra bula na nomu qase e liu (raica na FamilySearch.org).

Raica na Henry B. Eyring, “Mo Nanuma, Mo Nanuma,” Liaona, Nove. 2007, 66–69.

John Whitmer

Vunau kei na Veiyalayalati 47

Sa rawa me dusimaki au na Yalo Tabu niu vakayacora na noqu veikacivi.

De dua o na rawa ni vakamacalataka na veika a vakila o John Whitmer ni vinakata me vakadeitaka ni nona veikacivi a vu mai vua na Kalou Na cava a kaya na Turaga ena Vunau kei na Veiyalayalati 47 vei John Whitmer—vakakina vei iko—me vakauqeta na yalodei ena kena vakayacori na veikacivi e solia o Koya?

Na itavi ni dua na qasenivuli. Na veivakavulici e levu cake sara mai na kena vakaraitaki na itukutuku. E oka kina na kena buli e dua na ituvaki e rawa ni ra vulica ka kunea kina vakai ira na lewe ni kalasi na dina ka wasea na veika era sa vulica vakai ira (raica na Veivakavulici ena iVakarau ni iVakabula, 26).

Vakasama eso ni Nodra Vakatavulici na Gonelalai

Vunau kei na Veiyalayalati 46:2–6

Au rawa ni vukei ira na tani mera vakila ni ra taleitaki e valenilotu.

• Ni o wilika oti na Vunau kei na Veiyalayalati 46:5 vata kei ira na luvemu, veivosakitaka na sala e vinakata kina na iVakabula me ra vakila na tamata ni ra lako mai ki na Nona Lotu. Sureti ira na luvemu me ra raitayaloyalotaka ni ra raica e dua e valenilotu ena imatai ni gauna. Vukei ira me ra vakatovotovotaka na sala eso me vukea na tamata oqo me vakila ni ciqomi.

Vunau kei na Veiyalayalati 46:7–26

Sa solia vei au na Tamada Vakalomalagi na isolisoli vakayalo eso me vakalougatataki ira na tani.

• Me vukei ira na luvemu me ra vulica me baleta na isolisoli vakayalo e vakamacalataki ena Vunau kei na Veiyalayalati 46:13–26, vakasamataka na nanuma oqo. Sa rawa mo vola na isolisoli ena tiki ni pepa eso ka vunitaka wavokita na rumu. Ni ra kunea na luvemu na pepa yadua, vukei ira me ra raica na vanua e cavuti kina na isolisoli oya ena wase 46. Me baleta na isolisoli yadua, veitalanoataka vata kei ira na sala e vakayagataki kina me vakalougatataki ira na tani (e rawa ni veivuke na ivakamacala ena “Wase 20: iSolisoli ni Yalotabu,” ena iTalanoa mai na Vunau kei na Veiyalayalati,, 77–80).

  Chapter 20: Gifts of the Spirit: 8•March 1831

• Tukuna vei ira na luvemu me baleta na isolisoli o vakila ni sa solia vei ira na Tamada Vakalomalagi, ka laiva me ra veivosakitaka na isolisoli era raica vei ira vakataki ira. Me vaka ena Vunau kei na Veiyalayalati 46:8–9, 26, na cava e solia kina vei keda na Tamada Vakalomalagi na isolisoli vakayalo eso? Eda na vakayagataka vakacava na noda isolisoli me vukei ira kina na tani?

Vunau kei na Veiyalayalati 47:1, 3

Au rawa ni vola na kequ itukutuku.

• Laiva me ra raica na luvemu na ka a vinakata na Turaga me cakava o John Whitmer ena Vunau kei na Veiyalayalati 47:1, 3. E rawa talega ni o veiwaseitaka e so tale na italanoa taleitaki mai na ivolanikalou. Dusimaka ni da mai kila na italanoa eso oqo baleta ni a vola e dua.

• Vakasamataka na sala e rawa ni o vakauqeti ira kina na luvemu me ra vola na kedra itukutuku makawa. Sa rawa ni o wasea eso na itukutuku mai na nomu ivolaniveisiga se dua na italanoa ni dua na qase e liu (raica na FamilySearch.org se na Memories app). Sa rawa mo vakarautaka eso na veiuqeti ni ivolaniveisiga, me vakataka “Na cava a yaco ena macawa oqo o na vinakata me ra na kila na makubumu?” se “O a raica vakacava na liga ni Turaga ena nomu bula ena macawa oqo?” Sa rawa me ra droinitaka na gonelalai sobu na veika era sa sotava, se mo katona na veika era talanoataka tiko. Na veivakalougatataki cava e yaco mai ni maroroi tiko “e veigauna e dua na itukutuku”? (Vunau kei na Veiyalayalati 47:1).

Vunau kei na Veiyalayalati 48:2–3

Au rawa ni vukei ira na tani ena noqu wasea na ka sa soli vei au.

• Ni o wilika na Vunau kei na Veiyalayalati 48:2–3 vata kei ira na luvemu, o na gadreva beka mo vakamacalataka ni ra a lako tiko mai ki Ohio na tamata mai na Tokalau, ka sega na vanua me ra tiko kina. Na cava a kerea na Turaga vei ira na Yalododonu me ra cakava me ra veivuke kina? Vukei ira na luvemu me ra vakasamataka na veika sa solia vei ira na Kalou ka rawa ni ra wasea vei ira na tani. E rawa talega ni o lagata vata kei ira e dua na sere me vaka na “‘Drodro,’ na Uciwai” (iVolanisere ni Gonelalai, 116).

Me baleta na vakasama tale eso, raica na ilavelave ni mekasini na iTokani ni vula oqo.

O ira kece era vinakata me ra sokalou vua na iVakabula era sa kidavaki ena nodra soqoni na Nona Yalododonu.