28 ni Epereli–4 ni Me: “Noqu Lawa me Cicivaki kina na Noqu Lotu”

Vunau kei na Veiyalayalati 41–44

A tubu vakatotolo sara na Lotu ena 1830 kei na 1831, vakabibi ni dua na ilawalawa ni lewenilotu vou era a curu vata ga ena dua na gauna mai Katiladi, Oaio. A taleitaki ka veivakayaloqaqataki vei ira na Yalododonu na tubu oqo, ia a vure talega kina eso na bolebole. O na vakaduavatataka vakacava e dua na ilawalawa tamata vakabauta ka tubu sara tiko vakatotolo? Vakabibi, na cava o na cakava ni ra dui kauta mai na ivunau kei na ivakarau eso mai na nodra lotu e liu? Me ivakaraitaki, ni a yaco yani ki Katiladi o Josefa Simici ena itekivu ni Feperueri, 1831, a kunei ira na lewenilotu vou ni ra a taukena vata tu na nodra iyau ena sasaga dina mera vakamurimuri ira na Lotu Vakarisito ni Veiyalayalati Vou (raica na Cakacaka 4:32–37). A vakayacora na Turaga eso na veivakadodonutaki bibi kei na veivakamatatataki ena ka oqo kei na veiulutaga tale eso. A vakayacora vakalevu oqo ena dua na ivakatakila ka volai tu ena Vunau kei na Veiyalayalati 42 ka a vakatoka me “noqu lawa me cicivaki kina na noqu lotu” (tikina e 59). Ena ivakatakila oqo, eda vulica kina na dina era sa bibi sara ena kena tauyavutaki na Lotu ni Turaga ena iotioti ni gauna. Ka da vulica kina ni tu e levu tale na ka me da vulica: “Ia kevaka ko na kerea,” sa yalataka na Turaga, “ko na ciqoma na ivakatakila ena ivakatakila, na kila ka ena kila ka” (Vunau kei na Veiyalayalati 42:61).

Raica talega na Ira na Yalododonu,, 1:114–19.

Vakasama eso ni Vuli e Vale kei na Lotu

Vunau kei na Veiyalayalati 41

“Raica ko koya sa ciqoma na noqu lawa ka talairawarawa kina, sa noqu tisaipeli.”

Ena itekivu ni 1831, era sa tekivu soqoni vata yani na Yalododonu ki Oaio. Era sa nanamaki tu me ra ciqoma na lawa a yalataka na Kalou mena vakatakila mai kea (raica na Vunau kei na Veiyalayalati 38:32). Ia, taumada, o Koya a vakavulica na sala mera vakavakarau kina na Nona tisaipeli mera ciqoma na Nona lawa. Na ivakavuvuli cava soti o raica ena Vunau kei na Veiyalayalati 41:1–6 e a rawa ni vukei ira na Yalododonu mera ciqoma na lawa ni Kalou? Era na vukei iko vakacava na vei ivakavuvuli oqo mo ciqoma kina na veivakasalataki mai Vua?

Raica talega na “A Bishop unto the Church (E Dua na Bisopi ki na Lotu),” ena Revelations in Context, 77–83.

Vunau kei na Veiyalayalati 42

Sa solia vei au na Turaga na ivakaro baleta o Koya e lomani au.

Era a okata na Yalododonu na ivakatakila e kune ena Vunau kei na Veiyalayalati 42:1–72 me dua vei ira e bibi duadua ka sa ciqoma oti na Parofita. E a dua vei ira na imatai ni ivakatakila me tabaki. Ena vuqa na yabaki, era a vakatoka tu ga na Yalododonu me “lawa.” E dina ni sega ni okati ena iwase oqo na ivakaro se lawa taucoko ni Turaga, sa yaga me vakasamataki vakatitobu na vuna a bibi kina na ivakavuvuli oqo ki na Lotu vakalesui mai vou. Na cava era bibi kina vei keda edaidai?

E balavu toka na wase e 42 ka na rairai vinaka me vulici vakaiwase lalai, me vakaoqo. Vakaraica na ivakavuvuli e vakavulici kina, ka vakasamataka se sala cava e ivakatakilakila kina ni nona loloma na Turaga vei ira na Nona tamata na vei lawa oqo.

• Tikina e 4–9, 11–17, 56–58

• Tikina e 18–29

• Tikina e 30–31

• Tikina e 40–42

• Tikina e 43–52

Cava na vuna e solia kina vei keda na Kalou na lawa kei na ivakaro? Na veisala cava soti o sa vakalougatataki kina ena nomu kila ka muria na ivakaro?

Vunau kei na Veiyalayalati 42:30–42

“Mo lomani ira na dravudravua.”

Me tiki ni lawa ka vakatakilai ena wase e 42, na Turaga a vakavulica vei ira na Nona Yalododonu na sala e rawa nira, “dui solia kina na nodra iyau yadua mera taukena vata” me vakataki ira na daumuri Karisito ena gauna e liu (Cakacaka 2:44; 4 Nifai 1:3), ka “sa sega vei ira sa dravudravua” (Mosese 7:18). Na cava o vulica mai na Vunau kei na Veiyalayalati 42:30–42 me baleta na sala era a bulataka kina na Yalododonu na lawa ni vakatatabu? (Me vakatabui e kena ibalebale me biu vakatikitiki e dua na ka me baleta edua na inaki tabu.)

E dina ga nida sega ni “taukena vata tu” na veika kece ni kua, ia ena valetabu era veiyalayalati na Yalododonu Edaidai mera bulataka na lawa ni vakatatabu. O na vakatabuya vakacava na veika sa solia vei iko na Kalou mo vakalougatataki ira kina na tamata era vakaleqai tu? Na lagati ni dua na sere me vaka “Na iSolisoli Sa Soli Mai” (Serenilotu, naba 219) ena rawa beka ni solia na vakasama eso.

Raica talega na Sharon Eubank “Masulaka Me Vakayagataki Keda o Koya,” Liaona, Nove. 2021, 53–56; “The Law (Na Lawa),” ena Revelations in Context, 93–95.

Karisito kei na Cauravou iLiuliu Vutuniyau, mai vei Heinrich Hofmann

Vunau kei na Veiyalayalati 42:61, 65–68; 43:1–16

Na Kalou e solia na ivakatakila me dusimaka na Nona Lotu—ka dusimaki au talega.

Raitayaloyalotaka ni o veivosaki tiko kei na dua na lewe ni Lotu vou ka marautaka me kila ni Lotu e dusimaki tiko ena ivakatakila. O na vakayagataka vakacava na Vunau kei na Veiyalayalati 43:1–16 mo vukei koya me kila na ivakarau e dusimaka kina na Nona Lotu na Turaga mai vua na Nona parofita? O na vakayagataka vakacava na Vunau kei na Veiyalayalati 42:61, 65–68 mo vakavulica kina na veika e baleta na ciqomi ni ivakatakila ni tamata yadua?

Na cava soti eso na “veika ni veivakacegui” kei na veika rekitaki o sa ciqoma mai vua na Turaga mai vua na Nona Yalotabu?

Mo vulica na sala era sa rogoca kina na iliuliu ni Lotu na domo ni Turaga, sa rawa mo sarava e dua na vidio mai na ikumuni ni vidio na “Hear Him (Mo Rogoci Koya” ena Gospel Library. Vakasamataka mo katona ga na nomu vidio, ka vakamacalataka kina na sala e veitaratara kina kei iko na Turaga.

Raica talega na Russell M. Nelson, “iVakatakila ki na Lotu iVakatakila ki na Noda Bula,” Liaona, Me 2018, 93–96; “All Things Must Be Done in Order (Na Veika Kece Me Vakayacori Ena Kena iVakarau),” ena Revelations in Context, 50–53.

Vakayagataka na lesoni vakaraitaki. Na lesoni vakaraitaki se iyaloyalo e rawa ni vukei ira na tamata o vakavulica me matata vakavinaka cake vei ira na veidina vakosipeli ka nanuma tu me dua na gauna balavu. Me ivakaraitaki, e rawa ni o vakayagataka e dua na iba, vakaciqira vata na veitikina yadua, mo vakavulica kina na ciqomi ni “ivakatakila ena ivakatakila, na kilaka ena kila ka” (Vunau kei na Veiyalayalati 42:61).

Vakasama eso ni Nodra Vakatavulici na Gonelalai

Vunau kei na Veiyalayalati 41:5

Na tisaipeli sai koya e dua ka ciqoma na lawa ni Kalou ka talairawarawa kina.

• Me vukei ira na luvemu me ra kila na ibalebale mo dua na tisaipeli i Jisu Karisito, e rawa ni o vola na Vunau kei na Veiyalayalati 41:5 ena dua na tiki ni pepa, ka vakalala na vanua e dodonu me tiko kina na vosa tisaipeli. Mera qai vakaraica ena tikina e 5 na vosa e yali tiko. Me vaka e tukuna na tikina oqo, na cava na kena ibalebale meda dua na tisaipeli i Jisu Karisito? Eda sa saga tiko vakacava meda tisaipeli vinaka cake i Karisito?

Vunau kei na Veiyalayalati 42:2

Au dau marau niu talairawarawa vua na Turaga.

• Era na marautaka beka na luvemu me ra qitora edua na qito ka na gadrevi vei ira me ra vakarogoca vakavinaka sara ka muria na ivakaro. E rawa mo vakayagataka na qito oqo me veivosakitaki kina na ibalebale ni “vakatudaliga mo dou rogoca ka talairawarawa” vua na Turaga (Vunau kei na Veiyalayalati 42:2). Nai vakaro cava e sa solia vei keda o Koya? Eda sa vakalougatataki vakacava ena noda talairawarawa ki na Nona lawa kei na ivakaro?

• Vakacavara vata kei ira na gone na tabana ni itaviqaravi ni macawa oqo. Sa rawa moni lagata vata talega edua na sere me baleta na talairawarawa ki na lawa ni Kalou, me vaka na “Meu Sa Bulataka Tu” (iVolanisere ni Gonelalai, 72). Sa rawa moni veiwaseitaka vakai kemuni na sala sa kauta mai kina vei iko na marau na talairawarawa ki na lawa ni Kalou.

  

Vunau kei na Veiyalayalati 42:38

Au sa qaravi Jisu Karisito tiko niu qaravi ira na tani.

• Ni wiliki oti vata na Vunau kei na Veiyalayalati 42:38, vukei ira na luvemu me ra vakasamataka na sala eso era rawa ni qaravi Jisu kina ena nodra qaravi ira na tani. E rawa ni ra kunea eso na vakasama mai na vidio “Pass It On (Solia Yani)” (ChurchofJesusChrist.org). E rawa talega ni ra raica na iyaloyalo ni iVakabula ni vukei ira tiko na tani, vakabulai ira na tauvimate, se dau yalovinaka vei ira na gone (raica na iVola ni iYaloyalo Vakosipeli, naba 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• E rawa ni o vakaraitaka vei ira na luvemu e dua na tikidua ni iKatini kei na iSolisoli Tale Eso ka veivosakitaka na kena vakayagataki meda solia na veika e tu vei keda meda vakalougatataki ira kina na tani (raica talega na “Tithing and Donations Online”).

Vunau kei na Veiyalayalati 43:1–7

Na parofita duadua ga e rawa ni ciqoma na ivakatakila me baleta na Lotu raraba.

• Sureti ira na gone me ra raitayaloyalotaka mada ni dua e duri cake ena soqoni ni soli ivakadinadina ka tukuna ki na tabanalevu ni sa ciqoma o koya edua na ivakatakila me baleta na Lotu raraba (me ivakaraitaki, ni sa sega ni dodonu meda kana kareti se ni sa dodonu meda savata na ligada ena sucu ka sega ena wai.) E kaya o koya ni sa dodonu me da rogoca na ka e tukuna tiko ka kua ni rogoca na parofita. Na cava e cala kina na ka oya? Sa rawa me qai vulici vata na Vunau kei na Veiyalayalati 43:1–7 me kunei kina na sala e dau soli ivakaro kina na Turaga ki na Nona Lotu.

• Sa rawa talega mo vakaraitaka edua na kena iyaloyalo na parofita bula ka sureti ira na luvemu mera wasea edua na ka se qai vakavulica wale toka ga oqo o koya. Kevaka era gadreva na veivuke, vakaraitaka e dua na vidio se wilika e dua na iwase ni vosa mai na itukutuku ni koniferedi raraba se qai oti toka ga oqo. Cava na vuna e dua kina na veivakalougatataki me tiko e dua na parofita bula nikua?

Me baleta na vakasama tale eso, raica na ilavelave ni mekasini na iTokani ni vula oqo.

Vunau tiko o Josefa Simici, mai vei Sam Lawlor