“Domo Eso ni Veivakalesui Mai: Vakasoqoni Vata ki Oaio,” Lako Mai, Mo Muri Au—Me Baleta na iTikotiko kei na Lotu: Vunau kei na Veiyalayalati 2025 (2025)
“Vakasoqoni Vata ki Oaio,” Lako Mai, Mo Muri Au—Me Baleta na iTikotiko kei na Lotu: 2025
Domo Eso ni Veivakalesui Mai
Vakasoqoni Vata ki Oaio
Kirtland Village [Na koro e Katiladi], mai vei Al Rounds
O Fipi Kata
A maliwai ira e vuqa na Yalododonu ka ra a soqoni yani ki Oaio ena 1830 o Fipi Kata. E a lewena o koya na Lotu ena tokalau vualiku kei Amerika ni se qai yabaki ruasagavulu vakacaca, ia erau a sega ni lewena na nona itubutubu. A qai vola emuri o koya na nona lewa me lako ki Oaio me duavata kina kei ira na Yalododonu:
“Era a kurabui ena noqu itosotoso na noqu itokani, me vakataki au, ia edua na ka e lomaqu a vakayavalati au tikoga. Na lomabibi nei tinaqu ena noqu biubiu mai vale a voleka sara me’u sega ni taura rawa; ka ke a sega na yalo e lomaqu ke’u a qai rawai sara ga emuri. A tukuna vei au o tinaqu ni na vinaka cake vua meu mate mai na noqu lako taudua yani ki na sala tawaloloma ni vuravura.
“‘[Fipi],’ a kaya o koya, ena yalobibi, ‘O na lesu tale beka mai vei au kevaka o raica ni cala na vakabauta vaka-Momani?’
“Au a sauma, ‘io, tinaqu; Au na cakava vakakina.’ … A vakaceguya na nona lomaleqa na noqu isau ni taro; ia keimami a lomabibi vakalevu kece sara ena neimami veitalatala. Ni yaco mai na gauna me’u sa biubiu kina au a sega ni nuitaki au rawa me’u cavuta na vakamoce; ka’u a mani vola na noqu vakamoce yadua, ka biuti ira tu ena dela ni noqu teveli, ciciva sobu na ikabakaba ka lade ki na kareti. A vakaoya na noqu biuta na vale lomani ni noqu gauna ni gone me semati kina na noqu bula vata kei ira na yalododonu ni Kalou.”
A vola vakaoqo o Fipi, ena dua vei ira na itukutuku ni veitalatala oya:
“Kemudrau noqu itubutubu lomani—Au sa vakarau me’u biuta vakalailai na vale kau a susugi cake kina … Au sega ni kila na kena dede—ia ka sega ena yalo ni tawa vakavinavinakataka na loloma, au a ciqoma ni’u se lailai sara me yacova mai na gauna oqo—ia oqo sa vaka e loma ni Kalou me yaco vakakina. Medatou biuta na veika kece oqo ki na liga ni Kalou ka vakavinavinaka nidatou sa vakatarai medatou bula vata mai vakabalavu ena vei ituvaki vinaka eso me vaka edatou sotava, kei na vakabauta ni na yaco me vinaka vei kedatou na ka kecega kevaka edatou lomana vakalevu sara na Kalou. Medatou kila tiko ni rawa nidatou masuta edua na Kalou ena rogoca na nodra masu yalodina na nona tamata kecega ka solia vei keda na ka sa uasivi duadua vei keda. …
“Tinaqu, au vakabauta ni sa loma ni Kalou me’u lako ki na ra ka’u sa vakadeitaka ni a vaka tu mai kina ena dua na gauna balavu. Oqo sa dolavi na sala …; Au vakabauta ni sai koya na yalo ni Turaga e sa cakava oqo ka sa ganita vinaka na ka kecega. Ia mo kua ni lomaleqataka kina na luvemu; na Turaga ena vakacegui au. Au vakabauta ni na maroroi au na Turaga ka solia vei au na ka meu na vinaka sara kina. … Au sa gole baleta ni sa kaci mai na noqu iVakavuvuli—ka sa vakamatatataka vei au o Koya na noqu itavi.”