7–13 ni Epereli: “Dou Tabalaka Cake na Domomudou … me Vunautaki na Noqu Kosipeli”

Vunau kei na Veiyalayalati 30–36

Sa rauta beka e dua na vula na nona lewena na Lotu o Pali P. Pereta ena gauna a kacivi kina me vunautaka na kosipeli “ena lekutu” (Vunau kei na Veiyalayalati 32:2). O Tomasi B. Masi a se sega sara ni va oya na balavu ni nona lewena na Lotu ena gauna a tukuni kina vua “Ni sa yaco mai na gauna mo vakayacora kina na nomu ilesilesi” (Vunau kei na Veiyalayalati 31:3). O Osoni Pereta, Etuwate Patereji, kei na vuqa tale era a vakakina ni a yaco mai na nodra veikacivi ki na kaulotu ni ra se qai papitaiso oti ga. Ena rairai tiko talega e dua na lesoni ena ituvatuva oqo me baleti keda nikua: ke veirauti na nomu kila ka mo ciqoma kina na kosipeli vakalesui mai ena papitaiso, sa na veirauti tale ga na kila ka oqori mo wasea yani kina vei ira na tani. E dina sara nida dau via vakalevutaka cake na noda kila na kosipeli, ia na Kalou e se sega sara ni lomalomaruataka me kacivi ira sa “sega ni vuku” me ra vunautaka na Nona kosipeli (Vunau kei na Veiyalayalati 35:13). Na ka dina, e sa sureti keda kece sara o Koya mo, “Dolava na gusumu ka vunautaka na noqu kosipeli” (Vunau kei na Veiyalayalati na 30:5). Ka eda kitaka vakavinaka sara oya sega ena noda yalomatua kei na kilaka, ia “ena kaukauwa [ni] Yalo” (Vunau kei na Veiyalayalati 35:13).

Raica talega na “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” ena Revelations in Context, 54–69.

Vakasama eso ni Vuli e Vale kei na Lotu

Vunau kei na Veiyalayalati 30–36

Au sa kacivi meu vunautaka na kosipeli i Jisu Karisito.

Ke tiko se sega na nomu veikacivi vakaivolataki vakadaukaulotu, sa rawa mo ivakadinadina kei Jisu Karisito “ena veigauna kecega, kei na veika kecega, kei na veivanua kecega” (Mosaia 18:9). Ni o vulica na Vunau kei na Veiyalayalati 30–36, vola na veika o sa vulica me baleta na madigi eso mo wasea kina na kosipeli. Sa rawa mo vola edua na lisi ni veika e kerea vei iko na Turaga kei na dua tale, na lisi ni yalayala e cakava na Turaga ni o wasea kina na kosipeli (me ivakaraitaki, raica na Vunau kei na Veiyalayalati 30:8; 31:3–5; 32:1, 5; 35:13–15, 24). Sa rawa talega mo vakasaqara na ivakavuvuli ena rawa ni vukei iko mo wasea na kosipeli. Na cava o raica ka vakauqeti iko mo “vunautaka yani na itukutuku rekitaki mera marau vakalevu kina”? (Vunau kei na Veiyalayalati 31:3).

E vakatavulica o Elder Gary E. Stevenson ni vunautaki ni kosipeli “e rawa ni rawati ena ivakavuvuli kilai rawarawa, ka vakavulici vei keda yadua ena gauna ni gone: loloma, wasea ka sureta” (“Loloma,Wasea,Sureta,” Liaona, Me 2022, 85). Nio vulica tiko na nona itukutuku nanuma mo vakasamataki ira tiko na nomu veikilai, itokani, kei na matavuvale. Na vakasama cava soti e lako mai vei iko me baleta na sala e rawa ni o wasea kina vei ira “na cava [o] taleitaka me baleta na kosipeli i Jisu Karisito”? Na veisala cava soti o rawa ni sureti ira kina me ra “lako mai ka raica,” “lako mai ka veiqaravi,” ka “lako mai ka mai lewena”? Ni o lagata se vakarorogo ki na “Au Lako Ke Ko Ni Lewa” (Serenilotu, naba 164) se dua na serenilotu veisemati, o na rairai tarogi iko beka, “Na cava e vinakata na Turaga meu tukuna ka vakarau tu meu wasea na Nona Kosipeli?”

Raica talega na Marcos A. Aidukaitis, “Laveta Cake na Yalomu ka Reki,” Liaona, Me 2022, 40–43; Topics and Questions [Ulutaga kei na Taro], “Inviting All to Receive the Gospel of Jesus Christ [Sureti Ira Na Tamata Kecega Mera Ciqoma na Kosipeli i Jisu Karisito],” “Ministering as the Savior Does [Veiqaravi me Vakataka na iVakabula],” Gospel Library; “Inviting All to Come unto Christ: Sharing the Gospel” (vidio), Gospel Library.

Inviting All to Come unto Christ: Sharing the Gospel

When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

Vunau kei na Veiyalayalati 31:1–2, 5–6, 9, 13

Na Turaga e rawa ni vukei au ena noqu veimaliwai vakamatavuvale.

Era a sotava na vei matavuvale ena 1830 e vuqa na dredre vata ga ka ra sotava tiko na vei matavuvale nikua. Na veituberi kei na yalayala cava a solia na Turaga vei Tomasi B. Masi me baleta na nona matavuvale ena Vunau kei na Veiyalayalati 31? (raica vakatabakidua na tikina e 1–2, 5–6, 9, 13). Ena vukei iko vakacava na Nona vosa ena nomu veimaliwai vakamatavuvale?

Raica na ikuri ni ivakamacala me baleti Tomasi B. Masi, ena Ira na Yalododonu, 1:79–80, 119–20.

Vunau kei na Veiyalayalati 32–33; 35

Na Turaga ena vakarautaki au ki na cakacaka e vinakata o Koya meu cakava.

Na vulici ni nodra bula na tamata ka cavuti ena Vunau kei na Veiyalayalati 32–33; 35 ena rawa ni vukei iko mo kila na sala e vakarautaki iko tiko kina na Turaga ki na Nona cakacaka. Me ivakaraitaki, e rawa ni o wilika na nodrau veiwekani o Pali P. Pereta kei Sidini Rikitoni ena “Domo Eso ni Veivakalesuimai: Ira na Saumaki Taumada.” E vakalougatataki ira vakacava na luve ni Kalou na veiwekani oqo? (raica na Vunau kei na Veiyalayalati 35).

Oqo edua tale na ivakaraitaki: A vola ko Esera Tea, ena dua na gauna ni bera na nona a papitaisotaki, ni a raica ena dua na raivotu ni a lako mai vua e “dua na tamata ka kauta tiko mai edua na ivivivi pepa ka solia vei au, vata kei na dua talega na biukila ka kaya meu [uvuca]. Au a tukuna vua niu se bera vakadua ni bau [uvuca] vakadua edua ena noqu bula. A kaya o koya o rawa nio [uvuca], tovolea mada. … E a solia edua na irorogo totoka vakaoti kau se qai rogoca vakadua” (“iVakatakila, Okot 1830–B, Revelation Book 1,” ivakamacala taumada ni itukutuku makawa, josephsmithpapers.org). Ni qai mai ciqoma emuri ko Josefa Simici e dua na ivakatakila me baleti Esera Tea kei Nocorope Suwiti, ka sa vakacurumi me Vunau kei na Veiyalayalati 33, e vakadewataka o Esera ni ivakatakila sai koya na ivivivi pepa ka raica ena nona raivotu. A vakarautaki Esera vakacava tiko na Turaga ki na ilesilesi a solia vua o Koya ena Vunau kei na Veiyalayalati 33:1–13?

Na ivakadinadina cava eda raica ni a kunei na liga ni Turaga ena nodra bula na lewe ni Lotu taumada oqo? O cei sa solia mai na Turaga ena nomu bula me vukei iko mo lako mai vei Karisito? E vakarautaki iko tiko vakacava o Koya mo vakalougatataki ira na tani ena nomu yalodina, loloma, se veisureti?

Raica talega na “A Mission to the Lamanites,” ena Revelations in Context, 45–49.

Vunau kei na Veiyalayalati 33:12–18

Kevaka au tara cake na noqu bula ena kosipeli ni iVakabula, au na sega ni bale.

NaVunau kei na Veiyalayalati 33 a vagolei ki vei Nocorope Suiti kei Esera Tea, e rua na saumaki vou mai ki na Lotu. A biuta na Lotu o Nocorope ni soli oti ga na ivakatakila oqo. A veiqaravi ena yalodina o Esera me dua na gauna, ia a qai lutu tani talega emuri okoya. Na nomu wilika me baleti rau ena iwase oqo ena rawa ni uqeti iko mo vakasamataka na dei ni nomu tara cake “ena dela [ni] vatu” ni kosipeli (tikina e 13). Na dina cava so ena veitikina oqo ena rawa ni vukei iko mo yalodina tikoga vua na iVakabula?

Raica talega na Ilamani 5:12.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 30:1–2

Sa dodonu meu vakanamata vakalevu ki na veika va-Kalou mai na veika vaka vuravura.

• Ena rawa ni marautaki vei ira na luvemu mera tovolea me ra cakava e rua na itavi ena dua ga na gauna, me vaka na cavuqaqataki ni qaqa ni dua na sere taleitaki ni ra vola tiko na yacadra kece na lewe ni nodra matavuvale. Na cava na vuna e dredre kina meda cakava e rua na ka ena dua ga na gauna? Sa rawa mo ni qai wilika vata na Vunau kei na Veiyalayalati 30:1–2 . Na cava soti na “veika ni vuravura” e rawa ni vakagolei keda tani mai na noda nanumi Jisu Karisito kei na Nona kosipeli? E rawa vakacava ni da raici Koya matua tikoga?

Vunau kei na Veiyalayalati 33:2–3, 6–10

Au rawa ni wasea na kosipeli i Jisu Karisito.

• Me vukei ira na luvemu me matata vinaka vei ira na Vunau kei na Veiyalayalati 33:8–10, e rawa nio sureti ira me ra tovolea me ra cavuta e dua na malanivosa ni sogo tiko na gusudra ka o qai tovolea kei ira na vo ni gone moni vakilakila se cava era tukuna tiko. Wilika na tikina e 8–10 ka kerei ira me ra dolava na gusudra ena veigauna e cavuti kina na malanivosa “dolava na gusumudrau”. Na cava na vuna e vinakata kina na Tamada Vakalomalagi meda dolava na gusuda ka wasea na kosipeli vei ira tale eso? Na cava eda rawa ni tukuna ki na noda matavuvale kei ira na itokani me baleta na iVakabula se na Nona kosipeli? E rawa talega ni o lagata e dua na sere me baleta na wasei ni kosipeli, me vaka na “Ko Vuravura Me Sa Lotu” (iVolanisere ni Gonelalai, 92).

• Sa rawa mo wasea na veika o sa sotava e semati ki na ivakavuvuli se yalayala ena Vunau kei na Veiyalayalati 30–34. Na cava o sa vulica se vakila me baleta na nomu iVakabula kei na Nona cakacaka ni o qaravi Koya?

E tu e vuqa na sala me wasei kina na kosipeli.

Vakadinadinataka na veivakalougatataki yalataki. Ni o sureti ira na gone me ra bulataka e dua na ivakavuvuli ni kosipeli, wasea na yalayala eso e yalataka na Kalou vei ira era bulataka na ivakavuvuli oya. Me ivakaraitaki, e rawa ni o vakadinadinataka na veivakalougatataki e solia o Koya vei keda nida dolava na gusuda ka wasea na kosipeli.

Vunau kei na Veiyalayalati 33:12–13

Au rawa ni tara cake na noqu bula ena kosipeli i Jisu Karisito.

• E rawa ni o kauti ira na luvemu ki tautuba me ra raica na yavu ni nodra vale se vale ni Lotu ka kerei ira me ra vakamacalataka. Na cava na vuna e gadreva kina e dua na vale na yavu kaukauwa, ka tudei? Wilika vata kei ira na Vunau kei na Veiyalayalati 33:12–13, ka veiwaseitaka na nomuni nanuma me baleta na vuna e vinakata kina na Turaga meda tara cake na noda bula ena Nona kosipeli. Na cava na vuna e vosa vinaka me vakamacalataka na kosipeli na “vatu”? Eda na tara cake vakacava na noda bula ena vatu ni kosipeli? (raica talega na Maciu 7:24–29).

Me baleta na vakasama tale eso, raica na ilavelave ni mekasini na iTokani ni vula oqo.

Go into the Wilderness [Dou Lako ki na Loma ni Lekutu], mai vei Robert T. Barrett