14–20 ni Epereli: “Sai Au Sa Bula, Sai Au Talega Ka Vakamatei”

Siganimate

Na ika 3 ni Epereli, 1836, e a Sigatabu ni Siganimate. Ni oti na qaravi ni sakaramede vei ira na Yalododonu ena valetabu vakatabui vou e Katiladi, o Josefa Simici kei Oliva Kaudari rau a raica e dua na vanua vakanomodi ena daku ni dua na ilati ena valetabu ka tekicuva ena masu lo. Oti oya, ena siga bibi oqo ni ra vakananuma kina na lotu Vakarisito e veivanua kecega na Tucaketale nei Jisu Karisito, a basika mai vakai Koya na iVakabula vakaturi cake tale ena Nona vale tabu, ka tukuna mai, “Sai Au sa bula, sai Au talega ka vakamatei” (Vunau kei na Veiyalayalati 110:4).

Na cava na kena ibalebale me tukuni ni o Jisu Karisito “sai Koya sa bula”? E sega ni kena ibalebale ga ni a tucake tale mai na ibulubulu ka rairai vei iratou na Nona tisaipeli mai Kalili. E kena ibalebale ni bula tiko o Koya edaidai. E dau vosa mai o Koya mai vei ira na parofita nikua. E liutaka tiko na Nona Lotu nikua. E vakabulai ira na yalo sa mavoa ka kavoro ni nikua. Sa rawa kina ni da vakavoqataka na vosa ni ivakadinadina kaukauwa nei Josefa Simici: “Ia oqo ni sa oti na ivakadinadina kece sara e tukuni me baleti koya, sai koya oqo na ivakadinadina … me keirau tukuna me baleti koya: Ni bula dina tiko!” (Vunau kei na Veiyalayalati 76:22). Eda rawa ni rogoca na Domona ena vei ivakatakila oqo, vakadinadinataka na Ligana ena noda bula, ka vakila “na reki e solia na iyatuvosa oqo: ‘Au kila ni bula tiko na noqu Dauniveivueti!’” (Serenilotu,, naba 76).

Vakasama eso ni Vuli e Vale kei na Lotu

E bula tiko o Jisu Karisito.

E vuqa vei keda eda se bera ni raici Jisu Karisito me vakai Josefa Simici. Ia eda rawa ni kila, me vakataki koya, ni bula tiko na iVakabula, ni kila o Koya na noda rawa ka kei na dredre, ka na vukei keda o Koya ena gauna ni leqa. Vakasamataka na nomu ivakadinadina me baleta na Karisito bula ni o vakasamataka vakatitobu na vei taro e ra ka vulica na ivurevure veitokoni eso.

• “O cei o Jisu Karisito? Na cava na vuna eda sokalou kina Vua? (raica na “Se Bula na Karisito: Nodra iVakadinadina na iApositolo”).

• Na cava e vakavulica vei au na Yalo me baleta na veika a sotava o Josefa Simici kei ira eso era a raica na iVakabula? E vaqaqacotaka vakacava na noqu na nodra ivakadinadina? (raica na Vunau kei na Veiyalayalati 76:11–14, 20–24; 110:1–10; Josefa Simici—Ai Tukutuku:17).

• Na cava au sa vulica me baleta na ilesilesi ni Vakabula kei na Nona ituvaki vakalou mai na Nona vosa vakataki Koya? (raica na Vunau kei na Veiyalayalati 29:5; 38:7).

• Ena rawa ni vukei au vakacava na iVakabula nikua? (raica na Aisea 53:3–5; Iperiu 2:17–18; Mosaia 3:7; Alama 7:11–13; 36:3; Ica 12:27; Mosese 5:10–12).

Na kaukauwa e lako mai na cavuqaqa. E vakamacalataka o Elder Richard G. Scott: “E rawa ni yaco mai na kaukauwa levu ena kena cavuqaqataki na ivolanikalou. Me cavuqaqataki e dua na ivolanikalou sa ikoya me da bukia e dua na veitokani vou. E vaka na noda raica vou e dua e rawa ni veivuke ena gauna ni leqa, me dau veivakauqeti ka veivakacegui, ka me ivurevure ni veivakayaloqaqataki me baleta na veisau e gadrevi” (“Na Mana ni iVolanikalou,” Liaona, Nove. 2011, 6). Kevaka o kunea e dua na ivolanikalou me baleta na iVakabula e vakaibalebale vakalevu vei iko—e dua beka ka rawa ni solia vei iko na vakacegu ena gauna ni leqa—vakasamataka mo vulica mo cavuqaqataka.

Ena vidio “My Spiritual Goal [Na Noqu Lalawa Vakayalo],” a lewa e dua na goneyalewa me cavuqaqataka na “Se Bula na Karisito” (Gospel Library). Na cava o taleitaka me baleta na ka a sotava o koya? Na cava o vakauqeti mo cakava mo ciqoma kina na dina ena “Se Bula na Karisito” e yalomu kei na nomu vakasama?

Let Your Goals Be Guided by the Spirit

Ashley’s spiritual goal was to grow closer to Christ. So she made a plan, wrote it down, and set a completion date. Setting goals has increased Ashley’s ability to accomplish things she feels inspired to do.

Mo vulica eso tale na ka me baleta na sala e vakalougatataki keda kina nikua na iVakabula, e rawa ni o vulica, vakarogoca, se lagata na “Au Sa Kila ni Bula Tu” (Serenilotu, naba 76). E rawa ni veivakauqeti me vakasaqarai na dina eso ena serenilotu oqo ka vakavulici talega ena Vunau kei na Veiyalayalati 6:34; 84:77; 98:18; 138:23.

Raica talega na Topics and Questions [Ulutaga kei na Taro], “Jesus Christ,” Gospel Library.

Ena vukui Jisu Karisito, au na tucake tale.

O Josefa Simici a kila se vakacava tu na vakilai ni lolositaki ni nodra mate o ira eda lomana, oka kina o tamana kei na rua na tacina. Erau a buluta o Josefa kei Ema e ono na luvedrau, ka sega ni dua a sivia na yabaki rua. Mai na vei ivakatakila a solia na Kalou, erau a rawata kina o Josefa kei Ema e dua na rai tawamudu.

Vakaraica na dina me baleta na mate kei na ituvatuva tawamudu ni Kalou ena Vunau kei na Veiyalayalati 29:26–27; 42:45–46; 63:49; 88:14–17, 27–31; 93:33–34. E vakayaco ka vakacava ki na nomu rai me baleta na mate na vei dina oqo? Era na vakayaco ka vakacava ki na ivakarau ni nomu bula?

Raica talega na 1 Korinica 15; Nodra iVakavuvuli na Peresitedi ni Lotu: Josefa Simici (2007), 174–76; Easter.ChurchofJesusChrist.org.

A rawata o Jisu Karisito e dua na “veisorovaki e uasivi sara” ena vukuqu.

E dua na sala meda rai matua kina vua na iVakabula ena gauna ni Siganimate sai koya meda vulica na vei ivakatakila ena Vunau kei na Veiyalayalati ka vakavulica me baleta na Nona veisorovaki. Eso vei ira oqo e rawa ni kune ena Vunau kei na Veiyalayalati 18:10–13; 19:16–19; 45:3–5; 76:69–70. Vakasamataka mo cakava e dua na lisi ni veidina o kunea ena veitikina oqo. Me vakatitobutaki na nomu vuli, e rawa ni o vakuria na nomu lisi ena nomu vakasaqaqara ena Luke 22:39–44; 1 Joni 1:7; 2 Nifai 2:6–9; Mosaia 3:5–13, 17–18; Moronai 10:32–33.

Oqo eso na taro e rawa ni dusimaka na nomu vuli:

• Na cava na Veisorovaki i Jisu Karisito?

• Na cava na vuna a digitaka kina o Jisu Karisito me vakararawataki ka mate ena vukuda?

• Na cava meu na cakava meu ciqoma kina na veivakalougatataki ni Nona solibula?

• Na cava au vakila me baleti Jisu Karisito ni oti na wiliki ni veitikina oqo?

Raica talega na iDusidusi ki na iVolanikalou, “Veisorovaki,” Gospel Library [Valenivola Vakosipeli]; “The Savior Suffers in Gethsemane [Kune Rarawa na iVakabula e Kecisemani]” (vidio), Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Ena vukui Jisu Karisito, au na tucake tale.

• Me vakavulici vei ira na luvemu me baleta na tucaketale, e rawa ni o tekivu ena nomu vakaraitaka vei ira na iyaloyalo ni mate kei na Tucaketale ni iVakabula. Vakatara vei ira nomu gone mera wasea na veika era kila me baleta na veika ka yaco oqo. E rawa talega ni o lagata e dua na sere vaka na “Ko Jisu Ni Sa Bula Tu” (iVolanisere ni Gonelalai, 45).

• Vakasamataka e dua na lesoni vakaraitaki e rawa ni vukei ira nomu gone me matata vei ira na ka ena yaco nida mate (ena veitawasei na yaloda kei na yagoda) kei na gauna eda na tucaketale kina (ena cokoti vata tale na yaloda kei na yagoda, ka na taucoko ka tawamate rawa na yagoda ). Me ivakaraitaki, na cava e yaco ni da kauta tani na batiri mai na dua na cina livaliva se na bola ni iqi mai na dua na peni? Na cava e yaco ni cokoti vata tale na veika oqo? (Raica na Alama 11:44–45.)

• Era kila tu beka na luvemu e dua ka sa mate? Mera wasea vakalailai eso na veika me baleti ira na tamata oqo, ka qai wilika vata na Vunau kei na Veiyalayalati 138:17. Veitalanoataka vata na veika e vakilai nida kila nira na tucake tale na noda daulomani vata kei na yagodra.

• Kevaka era sa qase cake na luvemu, sa rawa mo sureti ira mera vaqara na malanivosa e tiko kina na itukutuku ni Siganimate ena veitikina oqo: Vunau kei na Veiyalayalati 63:49; 88:14–17, 27; 138:11, 14–17. E rawa nira cakava vakakina ena vidio “Because He Lives [Baleta Ni Bula Tiko O Koya]” (Gospel Library). E rawa vakacava nida wasea na itukutuku oqo vei ira na tani?

Na Parofita o Josefa Simici a raici Jisu Karisito.

• E rawa ni dou malele kei iratou na luvemu me wilika na tolu na gauna duidui a rairai kina o Jisu Karisito vei Josefa Simici kei ira eso tale, me vaka e volai ena Josefa Simici—Ai Tukutuku 1:14–17; Vunau kei na Veiyalayalati 76:11–24; 110:1–10. E rawa talega ni ra raica na luvemu na iyaloyalo ni veika a yaco oqo ena tabana ni itaviqaravini macawa oqo. Na cava eda sa vulica baleti Jisu Karisito mai na veika sotavi yadua oqo? A cava na vuna e veivakalougatataki kina na kena kilai ni a raica na iVakabula ni oti na Nona tucaketale o Josefa Simici kei na so tale?

Ena vuku i Jisu Karisito, sa rawa ni vosoti na noqu ivalavala ca.

• Na dina a vulica o Josefa Simici me baleta na veivosoti ena vukui Karisito, e rawa ni solia vei ira na luvemu na inuinui nira rawa ni vosoti mai na nodra cala kei na ivalavala ca. Vakasamataka mo sureti ira na luvemu me ra bulia e dua na ituvatuva ena ulutaga vakaoqo: Na cava e cakava vei au na iVakabula kei na Cava e dodonu meu cakava meu ciqoma kina na Nona veivosoti. Vukei ira na luvemu mera vaqaqara ena vei iwasenivosa oqo me raici kina na veika e oka ena ruku ni vei ulutaga oqo: Vunau kei na Veiyalayalati 18:10–13; 19:16–19; 45:3–5; 58:42–43. Veiwaseitaka na nomudou marau kei na vakavinavinaka ena vuku ni veika a cakava na iVakabula vei keda.

• E rawa talega ni dou sarava na vidio “The Shiny Bicycle [Na Basikeli Caliva]” kei iratou na luvemu (Gospel Library) ka wasea na veika o sotava nio a vakila na veivosoti ni iVakabula ena nomu veivutuni.

The Shiny Bicycle

Everybody makes mistakes, and even though it's not easy, with the help of Heavenly Father and Jesus Christ we can receive forgiveness for our sins.

Me baleta na vakasama tale eso, raica na ilavelave ni mekasini na iTokani ni vula oqo.

Christ and Mary at the Tomb [O Karisito kei Meri ena iBulubulu], mai vei Joseph Brickey