Tiki ni droini mai na Saints Move to Kirtland [Era toki ki Katiladi na Yalododonu], mai vei Sam Lawlor

21–27 ni Epereli: “Kevaka Dou Sa Sega Ni Duavata, Dou Sa Sega Ni Noqu”

Vunau kei na Veiyalayalati 37–40

Vei ira na Yalododonu taumada, na Lotu e a sega ni vanua ga ni vakarogo ivunau ena Sigatabu. Na ivakatakila e vakayagataka na vosa me vaka na inaki, matanitu, Saioni, ka vakavuqa, na cakacaka. Oya e a rairai tiki ni veika era a malele mai kina na tamata ki na Lotu vakalesui mai. Me vaka na nodra taleitaka na ivunau, e vuqa talega era a vinakata edua na ka tabu ka rawa mera solia kina na nodra bula. E dina ni vakakina, ia a sega ni rawarawa na talairawarawa ki na ivakaro ni Turaga ena 1830 me vakasoqoni vata ki Oaio. Vei ira e vuqa, a kena ibalebale me biu tu mai na veivale logaloga vinaka ki na dua na vanua tawakilai (raica na “Domo Eso ni Veivakalesui Mai: Vakasoqoni Vata ki Oaio”). Nikua eda rawa ni raica vakamatata na veika era a rawa ni raica o ira na Yalododonu oya ena mata ga ni vakabauta: na Turaga a vakarautaka tu na veivakalougatataki cecere vei ira mai Oaio.

Na gagadre ni vakasoqoni vata ki Oaio sa sivi makawa sara, ia o ira na Yalododonu edaidai era se duavata tikoga e na inaki vata ga oya: me “vakabulabulataki ko Saioni” (Vunau kei na Veiyalayalati 39:13). Me vakataki ira na Yalododonu taumada oya, eda sa sureti meda biuta tani “na kauwaitaka na veika vakavuravura” (Vunau kei na Veiyalayalati 40:2) ka nuitaka na yalayala ni Turaga: “Ko na rawata na veivakalougatataki sa uasivi sara ko sa sega mada ni bau kila e liu” (Vunau kei na Veiyalayalati 39:10).

Raica talega na Ira na Yalododonu, 1:109–11.

Vakasama eso ni Vuli e Vale kei na Lotu

Vunau kei na Veiyalayalati 37–38

E vakasoqoni keda vata na Kalou me vakalougatataki keda.

O ira na lewe ni Lotu mai Fayette, Niu Ioka, era a cakava eso na solibula dredre me ra toki ki Oaio (sivia na 250 na maile kena yawa) ena vulaibatabata ni 1831. Ni o wilika na ivakaro ni Turaga ena Vunau kei na Veiyalayalati 37:3–4, o na vakasamataka beka na solibula e kerea vei iko na Turaga. Oti oya, ni o vulica na Vunau kei na Veiyalayalati 38:1–33, vaqara na dina me baleta na iVakabula ka solia vei iko na vakabauta mo muria na Nona ivakasala. Na cava o vulica rawa mai na tikina e 11–33 me baleta na veivakalougatataki ni vakasoqoni vata me vaka nida muri Jisu Karisito?

Vunau kei na Veiyalayalati 38:22

“Mo dou rogoca na domoqu ka muri au”

E rawa vakacava meda cakava me noda “vunilawa” o Jisu Karisito? E rawa vakacava meda “tamata galala” ni da vakamuria na Nona lawa?

Raica talega na 2 Nifai 2:26–27.

Vunau kei na Veiyalayalati 38:30

Kevaka au vakarau vakavinaka tu, au na sega sara ni rere.

Na gauna cava o sa bau sotava kina na ivakavuvuli a vakatakila na Turaga ena Vunau kei na Veiyalayalati 38:30: “Kevaka dou sa vakarau vakavinaka tu, dou na sega sara ni rere”? Ni o vulica na wase e 38, raica na sala e vakarautaki ira kina na Nona Yalododonu na Turaga me rawa ni ra sotava na veisiga ni mataka ena yaloqaqa. E vinakata vakacava o Koya mo vakavakarau ki na veibolebole eso mo kakua kina ni rere?

Raica talega na David A. Bednar, “Eda na Vakatovolei Ira Mada Kina,” Liaona, Nove. 2020, 8–11.

Vunau kei na Veiyalayalati 38: 24–27

E vinakata na Kalou meda “duavata” sara.

O ira na Yalododonu era a vakasoqoni vata ki Oaio era a cavutu mai na veimataqali ituvaki ni bula eso. Ena rairai dina talega oqo vei ira na tamata ena nomu tabanalevu. Ia na Turaga sa vakaroti ira na Nona tamata mera “duavata” sara (tikina e 27). Ena rawa vakacava meda rawata na mataqali duavata vakaoqo? Na veivakasama cava so e basika mai ki na nomu vakanananu nio wilika na Vunau kei na Veiyalayalati 38:24–27? Na cava na vuna e gadrevi kina meda duavata me rawa ni da tamata ni Kalou?

Na wiliki ni veitikina oqo e rawa talega ni vakauqeti iko mo vakasamataka na nomu veimaliwai—me ivakaraitaki, vata kei ira na lewe ni matavuvale, lewe ni tabanalevu, kei ira na lewe ni kuoramu se kalasi. Na cava beka e rawa ni tarovi iko tiko mo duavata vei Karisito? Ena rawa vakacava ni vukei iko na iVakabula meda “duabau”? Na vidio na “A Friend to All” se “Love in Our Hearts” (Gospel Library) ena rawa ni vukei iko mo sauma na veitaro oqo. Sa rawa talega mo kunea eso na vakasama ena vosa nei Elder Dale G. Renlund “Na Vakacegu i Karisito e Mudukatani na Veicacati,” Liaona, Nove. 2021, 83–85.

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

Ena rawa vakacava mo vukei ira na veilawalawa oqo mera duavata sara? Me kena ivakaraitaki, vakasamataka mo vola se vakauta e dua na itukutuku ni veinanumi ena talevoni vei ira na lewe ni nomu kuoramu, kalasi, se matavuvale. O cei o vakauqeti mo dolele yani vua?

Na cava e vakauqeti iko me baleta na ivakaraitaki ni iVakabula ena Efeso 2:14, 18–22; 2 Nifai 26:24–28?

Raica talega na Quentin L. Cook, “Semati na Lomada ena Duavata kei na Bula Savasava,” Liaona, Nove. 2020, 18–21; “Dou Veilomani,” Sere ni Lotu, naba 188.

Vunau kei na Veiyalayalati 38:39; 39:40

Na Tamada Vakalomalagi e vinakata me solia vei au na iyau ni gauna tawamudu.

Na cava o nanuma e kedrau duidui na “iyau kei vuravura” kei na “iyau ni gauna tawamudu”? (Vunau kei na Veiyalayalati 38:39). Na veika cava soti o sa sotava e sa vakavulici iko mo vakamareqeta kina na iyau ni gauna tawamudu?

Nanuma tiko oqo ni o wilika na veika me baleti James Covel ena wase e 39–40 (oka kina na itukutuku makawa ena ulutaga ni wase). Vakasamataka na sala e rawa ni yaga kina vei iko na veika a sotava. Me ivakaraitaki, vakasamataka na veigauna ko a “ivalavala dodonu kina e matana [Kalou]” (Vunau kei na Veiyalayalati 40:1). O a vakalougatataki vakacava ena vuku ni nomu yalodina? Vakasamataka talega na veika “vakavuravura o kauwaitaka” ka o sotava. Era na tarovi iko vakacava mai na nomu ciqoma na vosa ni Kalou “ena marau”? (Vunau kei na Veiyalayalati 39:9; 40:2). Na cava so o raica ena veiwase oqo e vakauqeti iko mo talairawarawa vagumatua cake kina vua na Kalou?

Raica talega na Maciu 13:3–23.

Mo bulataka na ivolanikalou ena nomu bula. “E dua na sala e rawa ni o vukei ira kina na vuli me ra raica na yaga ni [ivolanikalou] oya na kena tarogi na taro vakaoqo ‘Ena vukei iko vakacava na ka oqo ena dua na ka o sotava sara tiko ga oqo?’ ‘Na cava e bibi kina vei iko mo kila na ka oqo?’ Na duidui cava e rawa ni vakayacora na ka oqo ki na nomu bula?’” (Veivakavulici ena iVakarau ni iVakabula, 23). Na taro ena itaviqaravi oqo me baleta na Vunau kei na Veiyalayalati 39–40 era ivakaraitaki tale eso ni taro e rawa ni vukei keda meda bulataka na ivakatakila oqo ena noda bula.

Me baleta na vakasama tale eso, raica na ilavelave ni mekasaini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 37; 38:31–33

E vakasoqoni keda vata na Kalou me vakalougatataki keda.

• Na mape oqo kei na tabana ni itaviqaravi ena mua ni ituvatuva oqo e rawa ni vukei ira na luvemu me matata vinaka vei ira na veika e vakarota na Kalou ena Vunau kei na Veiyalayalati 37:3. Ena rawa vei iko mo vukei ira me ra kunea na veivanua era tukuni tiko ena vei ivakatakila oqo. E rawa talega ni o vukei ira me ra kunea e dua na malanivosa mai na Vunau kei na Veiyalayalati 38:31–33 e vakamacalataka na vuna e vinakata kina na Kalou me ra vakasoqoni vata na Nona tamata.

Vunau kei na Veiyalayalati 38: 24–27

E vinakata na Kalou meda “duavata” sara.

• Ni o wilika na Vunau kei na Veiyalayalati 38:24–25 vata kei ira na luvemu, veivosakitaka na kena ibalebale mo lomana na tacimu se ganemu me vaka nomu lomani iko (raica talega na Maciu 7:12). Vukei ira mera cavuta tale na ivolanikalou, ka vakaisosomitaka “na wekana” ena dui yacadra.

• Mo vakavulica vei ira na luvemu na ibalebale ni mo dou “duabau” sara (Vunau kei na Veiyalayalati 38:27), sa rawa mo vukei ira mera droinitaka e dua na naba 1 levu ka ukutaka ena yacadra kei na kedra droini se itaba ni tamata yadua ena nomu matavuvale se kalasi. E yasa ni 1, e rawa ni o vola kina na veika o na cakava moni duavata vakalevu cake kina.

• Nanuma mo wasea e dua na lesoni ivakaraitaki e vakaraitaka na sala era rawa ni cokoti vata se vakaduavatataki kina na ka mera duabau ga, me vaka na veitiki ni sulu e caka kina e dua na lacadrau se na veika eso e buli kina e dua na ibuli madrai. Na cava e vakavulica vei keda na vei ivakaraitaki oqo me baleta na noda yaco meda duabau vaka tamata ni Kalou?

Vunau kei na Veiyalayalati 38:30

Kevaka au vakarau vakavinaka tu, au na sega sara ni rere.

• Ni oni wilika vata na Vunau kei na Veiyalayalati 38:30, sa rawa mo veivosakitaka kei ira na luvemu na veika e qai sotavi wale tikoga oqo ka gadrevi kina na vakavakarau. Mo qai taroga vei ira na luvemu na veika e vinakata na Tamada Vakalomalagi meda vakavakarau kina. Wasea vei ira na luvemu e dua na gauna a vukei iko kina na vakavakarau mo kakua ni rere. E rawa talega nio dou sarava vata na vidio “Men’s Hearts Shall Fail Them [Era Na Kani Yatedra na Tamata ena Rere]” (Gospel Library).

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Vunau kei na Veiyalayalati 39:6, 23

Au ciqoma na isolisoli ni Yalo Tabu ena gauna au vakadeitaki kina.

• Sa rawa mo vakaraitaka e dua na iyaloyalo ni dua e vakadeitaki tiko. Kerei ira na luvemu me ra vakamacalataka na veika e yaco tiko ena iyaloyalo. Sa rawa talega mo sureti ira mera dusia na iyaloyalo ni ra rogoca na vosa Yalo Tabu ena Vunau kei na Veiyalayalati 39:6, 23 (se ena dua na sere me vaka na “Jisu Karisito,” iVolanisere ni Gonelalai, 56). Veiwaseitaka na sala sa vakalougatataki iko kina na isolisoli ni Yalo Tabu.

Me baleta na vakasama tale eso, raica na ilavelave ni mekasini na iTokani ni vula oqo.