31 ni Maji–6 ni Epereli: “O Jisu Karisito Ena Vakasoqoni Ira Vata na Nona Tamata”

Vunau kei na Veiyalayalati 29

E dina ga ni a tauyavutaki na Lotu i Jisu Karisito ena 1830, e vuqa na dina ni kosipeli a se bera ni vakatakilai mai, ka so na lewe ni Lotu taumada a tu na nodra lomatarotaro. Era a wilika na veiparofisai ena iVola i Momani me baleta na vakasoqoni vata nei Isireli kei na kena taraicake o Saioni (raica na 3 Nifai 21). Ena yaco vakacava na ka oya? Na ivakatakila a kaya o Airame Peji ni a ciqoma a vosa tiko ena ulutaga oqori, ka ra sa qai lomatarotaro ga kina vakalevu na lewenilotu (raica na Vunau kei na Veiyalayalati 28). Eso tale era a vakataroga me baleta na Lutu nei Atama kei Ivi kei na mate vakayalo. A ciqoma na Turaga na veitaro oqo ena 1830, ka ciqoma tale ga o Koya na noda taro nikua. “A ka kecega dou sa kerea ena vakabauta,” a kaya o Koya vei ira na Yalododonu, “ni dou sa duavata ena masu me vaka na noqu ivakaro, dou na rawata vakaidina” (Vunau kei na Veiyalayalati 29: 6). Na ka dina, me vaka e vakaraitaka na ivakatakila maucokona vakaivunau ena Vunau kei na Veiyalayalati 29 ena so na gauna edau sauma na Turaga na noda taro ena Nona solia vei keda na dina kei na kila-ka e sivia cake na veika eda kerea.

Vakasama eso ni Vuli e Vale kei na Lotu

Vunau kei na Veiyalayalati 29

Na Tamada Vakalomalagi e tiko na Nona ituvatuva ni nodra vakabulai na luvena.

NaVunau kei na Veiyalayalati 29 e vakavulica e vuqa na dina me baleta na ituvatuva ni Kalou baleti iko. Ni o wiliwili, vaqara na dina o vulica me baleta na veitiki yadua oqo ni Nona ituvatuva:

• Bula taumada (raica na tikina e 36–37)

• Veibuli (raica na tikina 31–33)

• Na Lutu nei Atama kei Ivi (raica na tikina e 40–41)

• Bula vakayago (raica na tikina e 39, 42–45)

• Na Veisorovaki i Jisu Karisito (raica na tikina e 1, 42–43, 46–50)

• Na Tucaketale mai na mate (raica na tikina e 13, 26)

• Na iOtioti ni Veilewai (raica na tikina e 12–13, 27–30)

Na veivakararamataki cava o rawata mai kina? Kevaka e veivuke vei iko, e rawa ni o vola ena vanua lala e vakarautaki tu ena iyaloyalo ena mua ni ituvatuva oqo. E veivakayarayarataki vakacava ki na nomu bula na veidina oqo?

Raica talega na Topics and Questions [Ulutaga kei na Taro], “Plan of Salvation [iTuvatuva ni Veivakabulai],” Gospel Library.

Tiki ni droini mai na Come Unto Me [Lako Mai vei Au], mai vei Jenedy Paige

Vunau kei na Veiyalayalati 29:1–28

O Jisu Karisito e sureti au meu veivuke ena vakasoqoni ira vata na Nona tamata ni bera na iKarua ni Nona Lako Mai.

E vosa o Jisu Karisito me baleta na vakasoqoni vata ni Nona tamata “me vaka na tina ni toa sa vakasoqoni ira vata na luvena e ruku ni tabana” (Vunau kei na Veiyalayalati 29:2). Na cava e vakatavulica vei iko na veivakatautauvatataki oqo me baleti Jisu Karisito? Na ikuri ni vakasama se veiuqeti cava e yaco mai vei iko ni o dikeva na iyaloyalo ni dua na tina ni toa kei ira na luvena ena ituvatuva oqo? Vakasamataka na sala o a vakila kina na Nona karoni iko ka taqomaki iko o Jisu Karisito.

Ni o wilika na Vunau kei na Veiyalayalati 29:1–11, vakaraica na veivakararamataki eso me baleta:

• O cei ena vakasoqoni vata.

• Na cava na ibalebale ni “vakasoqoni vata” vei Karisito.

• Na vuna eda vakasoqoni vata kina ki vei Koya.

Vakasamataka vakatitobu na vuna o vinakata kina mera vakasoqoni vata mai kina na tani vei Jisu Karisito. Na cava o vakila ni o vakauqeti mo cakava mo veivuke kina?

E rawa ni o tarogi iko ena veitaro vata ga oqo nio sarava tiko na vidio “A Witness of God” (Gospel Library) se wilika se vakarorogo ki na dua na serenilotu me baleta na vakasoqoni vata, me vaka na “Isireli Bau Rogoca” (Serenilotu, naba 6). Na cava o vakila ni tovolea tiko na Turaga me vakavulica vei iko me baleta na Nona cakacaka ni vakasoqoni vata?

A Witness of God

Elder Neil L. Andersen describes how all of God's children are pieces of a large puzzle in preparation for the Second Coming of Jesus Christ.

A kaya o Peresitedi Russell M. Nelson: “Sa yaco tiko oqo na vakasoqoni vata ena veimatanitu yadua. Sa lewa na Turaga me tauyavutaki ko Saioni ena veiyasana yadua sa solia o Koya vei ira na Nona Yalododnu me ra laki sucu ka itaukei kina” (“Vakasoqoni o Isireli sa Veiseyaki,” Liaona, Nove. 2006, 81). E vukei keda vakacava na vakasoqoni vata ena sala oqo meda “vakarautaki keda ena veika kece” me baleta na iKarua ni Lako Mai ni iVakabula? (tikina e 8; raica talega na tikina e 14–28).

Raica talega na Russell M. Nelson kei Wendy W. Nelson, “Nuinui kei Isireli” (lotu ni itabagone e vuravura raraba, 3 ni June, 2018), Gospel Library; D. Todd Christofferson, “Na Vunau ni Kena Taukeni,” Liaona, Nove. 2022, 53–56; Topics and Questions [Ulutaga kei na Taro], “Gathering of Israel [Vakasoqoni vata nei Isireli],” Gospel Library.

Vunau kei na Veiyalayalati 29:31–35

“Au sa okata na ka kecega me ka vakayalo.”

Ni o vulica na Vunau kei na Veiyalayalati 29:31–35, tarogi iko, “Na sala cava era vakayalo kina na ivakaro kece?” O na rawa ni vola e vica na ivakaro ka vakasamataka na ivakavuvuli vakayalo e semati vei ira yadua. Na railesuvi ni Me iSakisaki ni iTabagone: E Dua na iDusidusi ni Digidigi e rawa ni veivuke—e vakavulica eso na dina tawamudu e taudaku ni vica na ivakaro ni Kalou.

E rawa vakacava ni vakayaco ka ki na sala eda raica kina na ivakaro ni Kalou na noda kila ni “ka kecega … era sa ka vakayalo”? Navuca mo vaqara tale ga na ibalebale se inaki vakayalo ena veitiki tale eso ni nomu bula.

Raica talega na 2 Nifai 9:39.

Vakaraici Jisu Karisito matua. “Na vei ulutaga kece sara ni kosipeli [e] dua na madigi me vakavulici ka vulici kina na veika me baleti Jisu Karisito” (Veivakavulici ena iVakarau ni iVakabula, 6). Na cava o vulica me baleta na Nona itovo ni bula, Nona itavi, kei na Nona ivakaraitaki ni o wilika na Vunau kei na Veiyalayalati 29?

Vunau kei na Veiyalayalati 29:36–50

O Jisu Karisito e vueti keda mai na Lutu.

O na vakayagataka vakacava na Vunau kei na Veiyalayalati 29:36–50 me vakamacalataka na vuna eda gadreva kina na veivueti ena vuku i Jisu Karisito?

Na Lutu nei Atama kei Ivi a kauta mai na mate kei na ivalavala ca ki vuravura, ia e vakarautaka talega na sala ni veivueti kei na reki ena vuku i Karisito. Ni vakasamataki tiko na vakasama oya, wilika na tikina e 39–43 ka vola na vosa kei na malanivosa e kauta mai vei iko na reki. Na cava e vakauqeti iko me baleta na veika erau a tukuna o Atama kei Ivi me baleta na Lutu ena Mosese 5:10–12?

Raica talega na “Why We Need a Savior” (vidio), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Vunau kei na Veiyalayalati 29

Na Tamada Vakalomalagi e tiko na Nona ituvatuva ni nodra vakabulai na luvena.

• Me tekivutaki e dua na veivosaki me baleta na ituvatuva nei Tamada Vakalomalagi me baleti keda, sa rawa nio veivosakitaka kei ira na luvemu e dua na gauna dou a cakava kina e dua na lalawa, me vaka edua na ilakolako se me rawati e dua na itavi. O rawa talega ni wasea na ivakaraitaki ni tuvatuva eso, vakataka na ivolanivula ka volai tu kina na itaviqaravi eso se ivakasala ni kena caka e dua na ka. Cava na vuna era yaga kina na ituvatuva? Sa rawa mo dou qai veivosakitaka na veika e vinakata na Tamada Vakalomalagi me vakayacora kei na sala e vukei keda kina na Nona ituvatuva meda rawata.

• Sa rawa mo vakayagataka na iyaloyalo ena mua ni ituvatuva oqo me vukei ira na luvemu mera kunea na veitikina ena Vunau kei na Veiyalayalati 29 e vakavulica na veitiki duidui ni ituvatuva nei Tamada Vakalomalagi. E rawa talega ni o kotiva tani na iyaloyalo ka kerei ira na luvemu me ra tuva vakadodonu. Na cava na vuna eda vakavinavinaka kina ni da kila ni tiko e dua na nona ituvatuva na Tamada Vakalomalagi me baleti keda? E vakayarayarataka vakacava na noda bula e veisiga na noda kila oqori?

Vunau kei na Veiyalayalati 29:1–2, 7–8

O Jisu Karisito e vakasoqoni ira tiko na Nona tamata ni bera na Nona lesu tale mai.

• Na iyaloyalo e ra ni dua na tina ni toa e vakasoqoni ira vata tiko na luvena se na vidio “Chicks and Hens” (ChurchofJesusChrist.org) e rawa ni vukei ira na luvemu me ra raitayaloyalotaka na vosa vakatautauvata ena Vunau kei na Veiyalayalati 29:1–2. Me qai wiliki vata na veitikina oqo ka veitalanoataki na sala e taqomaki ira kina na luvena na tina ni toa kei na sala e tautauvata kina kei na ka e rawa ni cakava vei keda na iVakabula.

  Chicks and Hens

  

  I Would Gather Thee [Au Na Vakasoqoni Kemudou Vata], mai vei Liz Lemon Swindle

• Na cava ena vakauqeti ira na luvemu me ra vinakata me ra vukea na iVakabula me vakasoqoni ira vata na Nona tamata? Era na vinakata beka me ra rogoca na veika a sotava e dua e “vakasoqoni” vei Koya ena nona lewena na Nona Lotu. Me ivakaraitaki, o cei a vakaveikilaitaka na nomu matavuvale ki na Lotu? Eda sa vakalougatataki vakacava ena noda ciqoma na kaci ni iVakabula me da vakasoqoni vata yani Vua? Eda na vukei ira vakacava na tani mera vakasoqoni vata yani Vua? (Raica na “A Message for Children from President Russell M. Nelson” [vidio], ChurchofJesusChrist.org.)

  Video: A Message for Children from President Russell M. Nelson

  In the 2021 Friend to Friend event, President Russell M. Nelson gave this message to children around the world.

Vunau kei na Veiyalayalati 29:11

Ena lako tale mai o Jisu Karisito.

• E dua na iyaloyalo se sere me baleta na iKarua ni Nona Lako Mai na iVakabula (me vaka ena iVola ni Yaloyalo Vakosipeli, naba 66) se na kena sere (me vaka na “Ena Lesu Tale Beka Mai” iVolanisere ni Gonelalai, 82–83) ena rawa ni vukei iko kei ira na luvemu me veivosakitaki na Vunau kei na Veiyalayalati 29:11. Vukei ira na luvemu me ra raica na malanivosa ena ivolanikalou e semati ki na dua na ka ena iyaloyalo se sere. Veiwaseitaka na nomuni dui nanuma me baleta na lesu tale mai nei Jisu Karisito ki vuravura.

Me baleta na vakasama tale eso, raica na ilavelave ni mekasini na iTokani ni vula oqo.