5–11 nō Mē : « E fa’atupuhia te mau fafaura’a »

Te Ha’api’ira’a Tumu ’e te mau Fafaura’a 45

’Ua fa’ari’ihia te heheura’a i roto i te tufa’a 45 mai te au i te upo’o tufa’a, e « ’oa’oa te feiā mo’a ». ’E e rave rahi te mau mea e ’oa’oa ai tātou i roto i teie heheura’a. I roto i te reira, tē hōro’a mai nei te Fa’aora i tāna fafaura’a marū nō te ti’a atu nō tātou i mua i te Metua (hi’o i te mau ’īrava 3–5). Tē fa’ati’a nei ’oia i tāna fafaura’a mure ’ore tei parare nā te ao ato’a nei, « ’ia riro ’ei ve’a […] nō te fa’aineine i te ’ē’a i mua [iāna] » (’īrava 9). ’E tē tohu nei ’oia nō tōna Tae-Piti-Ra’a mai hanahana. Tē rave nei te Fa’aora i teie mau mea ato’a ma te fa’a’ite ato’a ē, e mau taime fifi teie (hi’o ’īrava 34), hō’ē o te mau tumu ’oia ho’i nō te mau ’ati e tupu hou tōna taera’a mai. Terā rā, taua ’ati ra, taua pōuri ra, ’aita ïa e nava’i tōna pūai nō te tūpohe i te māramarama o te ti’aturira’a. ’Ua parau te Fatu : « Nō te mea ’oia mau tē parau atu nei au ia ’outou na », « ’o vau nei […] te māramarama ’o tē ’ana’ana nei i roto i te pōiri » (’īrava 7). Terā noa a’e, e tumu ïa nō te fa’ari’i i teie heheura’a—noa atu te a’o ’e te fa’aarara’a ’e te parau mau tāna e hina’aro nei ’ia hōro’a—ma te ’oa’oa.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 45:1–5

’O Iesu Mesia tō’u ārai i te Metua ra.

’Ia fa’ari’i ana’e tātou i te mana’o ti’a ’ore ’e te ti’amā ’ore i mua i te Atua, e nehenehe tātou e ’ite mai i te ha’apāpūra’a i roto i te mau parau a te Fa’aora i roto i Te Ha’api’ira’a Tumu ’e te mau Fafaura’a 45:1–5. ’A tuatāpapa ai ’outou i teie mau ’īrava, ’a feruri na i te mau uira’a mai teie :

• E aha te mau ta’o ’aore rā te mau pereota i roto i teie mau ’īrava tei riro ’ei mea faufa’a ta’a ’ē nō ’outou ?

• Te hō’ē pāruru, ’o te hō’ē ïa ta’ata e pāturu nei i mua i te ta’ata ’aore rā e paraparau nei nō te hō’ē ta’ata ’aore rā, e ti’a nei nō tōna pae. ’Ia au i teie mau ’īrava, nāhea tā Iesu Mesia ravera’a i te reira nō ’outou ? E aha tāna faufa’a e vai nei e ti’a ai iāna ’ia rave i te reira ?

• E aha tā ’outou e fa’ahiahia nei i te mau parau a te Fa’aora i te Metua ? (mau ’īrava 4–5).

E nehenehe ato’a ’outou e tuatāpapa i te parau ha’api’i a Elder Dale G. Renlund nō ni’a ia Iesu Mesia, tō tātou Ārai, i roto « E mā’iti na ’outou i teie nei mahana » (Liahona, Novema 2018, 104–5). ’Ia au i te parau a Elder Renlund, e aha te ta’a-’ē-ra’a i roto i te ’ōpuara’a a te Fa’aora ’e tā Lucifero ?

E nehenehe te mau ’īrava i muri nei e fa’arahi i tō ’outou māramarama i te ti’ara’a o te Fa’aora ’ei Ārai. ’A tuatāpapa ai ’outou i te reira, ’a ha’amana’o e pāpa’i i te mau pereota ’aore rā te mau parau mau tā ’outou e nehenehe e fa’a’ite atu ia vetahi ’ē : 2 Nephi 2:8–9 ; Mosia 15:7–9 ; Moroni 7:27–28 ; Te Ha’api’ira’a Tumu ’e te mau Fafaura’a 29:5 ; 62:1. Nō te aha e mea faufa’a teie mau pereota nō ’oe ?

Hi’o ato’a « Tē māere nei au », Te mau hīmene, N°111 ; Topics and Questions, « Atonement of Jesus Christ [Tāra’ehara a Iesu Mesia] », Vaira’a buka ’evanelia ; « The Mediator » (video), Vaira’a buka ’evanelia.

The Mediator

A portrayal of the analogy Elder Boyd K. Packer used in his April 1977 general conference address. A young man who fails to pay a debt is saved from the grasp of justice through the mediation of a friend.

Te Ha’api’ira’a Tumu ’e te mau Fafaura’a 45:9–10

Te ’evanelia, e reva tumu ïa nō te mau nūna’a.

I tahito ra, te reva tumu, e reva ïa tei amohia i roto i te ’arora’a nō te ’āmui ’e nō te tāhō’ē i te mau nu’u. [Nā roto i te reo peretāne, teie ta’o nō te reva], e hi’ora’a ato’a ïa ’e ’aore rā e ture nō te fāito i te tahi atu mau mea. ’A tai’o ai ’outou i Te Ha’api’ira’a Tumu ’e te mau Fafaura’a 45:9–10, ’a feruri nō te aha e nehenehe ai e fa’aau i tā ’outou mau fafaura’a ’e te Fatu ’ei reva tumu nō ’outou.

Te Ha’api’ira’a Tumu ’e te mau Fafaura’a 45:11–75

E ho’i fa’ahou mai Iesu Mesia ma te hanahana.

’Ua fa’aauhia te tae-piti-ra’a mai o te Fatu mai te mahana « rahi » ’e te « mata’u » (Malaki 4:5). I roto Te Ha’api’ira’a Tumu ’e te mau Fafaura’a 45, e mea tano mau teie nā fa’ata’ara’a e piti. Tei roto i teie heheura’a te mau fa’aarara’a pāpū ’e te mau parau fafau tei ’ī i te tīa’ira’a nō ni’a i te taera’a mai o te Fatu. ’A tuatāpapa ai ’outou i te mau ’īrava 11–75, ’a feruri nāhea ’outou ’ia fa’aineine nō te tae-piti-ra’a mai ma te fa’aro’o i te Mesia ’eiaha rā ma te mata’u. E pāpa’i ’outou i te mea tā ’outou e ’ite nei i roto i te hō’ē tāpura mai teie i muri nei :

Te tohura’a ’e ’aore rā, te fafaura’a	E aha tā’u e nehenehe e rave
Te tohura’a ’e ’aore rā, te fafaura’a E tae mai te hō’ē māramarama (te ’evanelia) ia rātou e pārahi i roto i te pōiri (’īrava 28)	E aha tā’u e nehenehe e rave ’A fa’ari’i i te māramarama—’e ’a fa’a’ite i te reira (’īrava 29)
Te tohura’a ’e ’aore rā, te fafaura’a	E aha tā’u e nehenehe e rave
Te tohura’a ’e ’aore rā, te fafaura’a	E aha tā’u e nehenehe e rave
Te tohura’a ’e ’aore rā, te fafaura’a	E aha tā’u e nehenehe e rave

I roto i te video « Men’s Hearts Shall Fail Them » (Vaira’a buka ’evanelia), e aha te parau a’o tā te peresideni Russell M. Nelson i hōro’a mai nō te tauturu ia tātou ’ia fa’aruru i te mau ’ohipa ri’ari’a ma te hau ?

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Te Ha’api’ira’a Tumu ’e te mau Fafaura’a 45:31–32, 56–57

E nehenehe au e « ti’a i te mau vāhi mo’a » ’e ’eiaha e fa’anu’u-’ē-hia atu.

E aha tā ’outou i ha’api’i mai i roto i Te Ha’api’ira’a Tumu ʼe te mau Fafaura’a 45 :31–32, 56–57 nō ni’a i te fa’aineinera’a nō te tae-piti-ra’a mai o te Fatu ? E aha tō ’outou « mau vāhi mo’a » ? E aha te aura’a ’eiaha ’ia « fa’anu’uhia atu » ? Nāhea ’outou e fa’ariro ai i te vāhi tā ’outou e ti’a ra ’ei vāhi mo’a atu ā ?

’A ha’amana’o na, ’ua fa’ahiti te Fatu i te parabole nō nā paretenia hō’ē ’ahuru, ma te fa’aau i te hinu i roto i te parabole i te parau mau ’e te Vārua Maita’i. E nehenehe ’outou e tai’o i te parabole i roto ia Mataio 25:1–13 ma te reira mana’o i roto i tō ferurira’a. E aha te tahi atu mau mana’o tā ’outou i ’āpī mai ?

Hi’o ato’a David A. Bednar, « ’Āhiri ’outou i ’ite na iā’u », Liahona, Novema 2016, 102–5.

Parable of the Ten Virgins [Parabole nō nā paretenia hō’ē ’ahuru], nā Dan Burr

Te Ha’api’ira’a Tumu ’e te mau Fafaura’a 45:11–15, 66–71

E vāhi hau Ziona nō te feiā mo’a a te Atua.

’Ua hina’aro roa te feiā mo’a i tō Iosepha Semita ’anotau ’ia patu ia Ziona, te Ierusalema ’Āpī (hi’o Etera 13:2–9 ; Mose 7:18, 62–64). E aha tā ’outou i ha’api’i mai nō ni’a ia Ziona—te ’oire tahito i te ’anotau nō Enoha ’e te ’oire nō te ’anotau hope’a nei—i roto i Te Ha’api’ira’a Tumu ’e te mau Fafaura’a 45:11–15, 66–71 ? I teie mahana, te fa’auera’a ’ia ha’amau ia Ziona, ’o te ha’amaura’a ïa i te bāsileia o te Atua i te mau vāhi ato’a tā tātou e ora nei. E aha tā ’outou e nehenehe e rave nō te patu ia Ziona i te vāhi i reira ’outou e ora ai ?

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 45:3–5

’O Iesu Mesia tō tātou ārai i te Metua ra.

• E hina’aro paha ’outou e tauturu i tā ’outou mau tamari’i ’ia hāro’aro’a ē, te hō’ē ārai ’o te hō’ē ïa ta’ata e pāturu i te tahi atu ta’ata. I muri iho e nehenehe ’outou e paraparau nō ni’a i te mau hi’ora’a nō te rirora’a ’ei ārai (pāruru) o tā rātou i mātau (mai te ti’ara’a nō te hō’ē hoa). ’A tai’o ’āmui ai ’outou i Te Ha’api’ira’a Tumu ’e te mau Fafaura’a 45:3–5 ’a tauturu i tā ’outou mau tamari’i ’ia ’imi ’o vai tō tātou ārai ’e nāhea ’oia ’ia tauturu ia tātou.

Te Ha’api’ira’a Tumu ’e te mau Fafaura’a 45:32

E nehenehe au e « ti’a i te mau vāhi mo’a ».

• E mea ’ārearea paha ’ia tāpiripiri i te mau hōho’a o te hō’ē ’utuāfare, te hō’ē fare purera’a a te ’Ēkālesia, ’e te hō’ē hiero nā roto i te piha. I muri iho e nehenehe ’outou e hōro’a i tā ’outou mau tamari’i i te mau tāpa’o fa’a’ite nō ni’a i teie mau vāhi ’e e ani ia rātou ’ia ti’a i pīha’i iho i te hōho’a tā ’outou e fa’ata’a nei. E ani ia rātou ’ia ti’a noa mai ’a tai’o ai ’outou i te rēni mātāmua i roto i Te Ha’api’ira’a Tumu ’e te mau Fafaura’a 45:32. E aha te tahi mau vāhi mo’a tā te Atua i hōro’a mai ia tātou ? E tauturu i te mau tamari’i ’ia māramarama ē, te aura’a nō te parau ra « e ti’a noa […] i te mau vāhi mo’a ra, ’e e ’ore roa rātou e fa’anu’u-’ē-hia atu », ’oia ho’i, ’ia mā’iti i te parauti’a i te mau taime ato’a, noa atu te huru o te ’ohipa e tupu. Nāhea tātou e fa’ariro ai i tō tātou ’utuāfare ’ei vāhi mo’a atu ā ?

Te Ha’api’ira’a Tumu ’e te mau Fafaura’a 45:9

Te ’evanelia a Iesu Mesia, e reva tumu ïa nō tō te ao nei.

• E ti’a ia ’outou ’ia fa’ata’a ē, i tahito ra, e amohia te hō’ē reva i roto i te tāma’i. ’Ua tauturu te reira i te mau fa’ehau ’ia ’ite ē, i hea e ha’aputuputu ai, ’e e aha tē rave. ’A tai’o ’āmui i Te Ha’api’ira’a Tumu ’e te mau Fafaura’a 45:9, ’e ’a ’āparau i te mau rāve’a e riro ai te ’evanelia mai te hō’ē reva. E ’ana’anatae paha tā ’outou mau tamari’i ’ia hāmani i tā rātou iho reva, ’oia ato’a ’ia tu’u atu i te mau hōho’a ’aore rā te mau parau e fa’a’ite rā i tō rātou mau mana’o nō ni’a i te Fa’aora.

E au te ’evanelia mai te hō’ē arata’i ’aore rā te hō’ē reva ’aore rā te hō’ē tāpa’o.

Te Ha’api’ira’a Tumu ’e te mau Fafaura’a 45:44–45

Pāpū roa e ho’i fa’ahou mai Iesu Mesia.

• E fa’ari’ari’a paha te ha’amoura’a e tupu hou te Tae-piti-ra’a mai i te mau tamari’i. ’Ia fa’atoro rā tātou i te rima ia Iesu Mesia ra e tauturu ïa te reira ia rātou ’ia hi’o i mua ma te ’ī i te fa’aro’o ! E ani na ia rātou ’ia feruri i tō rātou iho huru ’ia tae ana’e mai te hō’ē ta’ata fa’ahiahia nō te fārerei ia rātou, mai tō rātou metua rū’au ’aore rā te hō’ē hoa. Nāhea rātou i te fa’aineine nō te fārereira’a ? ’A fa’a’ite na i te hō’ē hōho’a o te Fa’aora, ’e e tai’o i Te Ha’api’ira’a Tumu ’e te mau Fafaura’a 45:44–45. ’A fa’a’ite i te tahi ’e te tahi i tō ’outou mana’o nō ni’a i te ho’ira’a mai o te Fa’aora.

• Nō te tauturu i tā ’outou mau tamari’i ’ia ’oa’oa i te tae-piti-ra’a mai o te Fa’aora, e nehenehe ’outou e pāpa’i i ni’a i te mau ’api parau te tahi o te mau fafaura’a nō roto mai i te tufa’a 45 (hi’o, ’ei hi’ora’a, ’īrava 44–45, 51–52, 55, 58–59, 66–71). Hōro’a atu i tā ’outou mau tamari’i i te mau ’api parau ’e ’a ani ia rātou ’ia ’āfa’i mai i tō rātou rima i ni’a ’ia fa’ahiti-ana’e-hia i te fafaura’a i pāpa’ihia i ni’a i te ’api tā rātou e mau nei, ’a tai’o noa ai ’outou i te mau ’īrava. E ’āparau e aha te aura’a o teie mau parau fafau. E nehenehe ato’a ’outou e hīmene ʼāmui i te hōʼē hīmene nō niʼa i te Tae-piti-raʼa mai o te Fa’aora, mai te hīmene ra « Quand Jésus reviendra » (Chants pour les enfants, 46–47).

Tauturu i te mau tamari’i ’ia ’ite i te Vārua. ’A ha’api’i noa ai ’outou i te mau tamari’i, ’a fa’a’ite ia rātou te tahi o te mau taime ’outou i fa’ari’i ai i te Vārua Maita’i. ’A paraparau mea nāhea ’outou e ’ite ai i tāna fa’aurura’a. ’Ei hi’ora’a, e fāri’i paha ’outou i te hau ’aore rā, i te ’oa’oa ’a hīmene ai ’outou i te hō’ē hīmene nō ni’a i te Fa’aora.

Nō te tahi atu ā mana’o, ’a hi’o i te ve’a Hoa nō teie ’āva’e.

The Second Coming [Te tae-piti-ra’a mai], nā Harry Anderson