The Camp Meeting [Te rurura’a i te pūhapara’a], nā Worthington Whittredge

12–18 nō Mē : « ’A ’imi māite ’outou i te mau hōro’a maita’i roa »

Te Ha’api’ira’a Tumu ’e te mau Fafaura’a 46–48

’A tāmau noa ai ’o Parley P. Pratt, Oliver Cowdery, Ziba Peterson ’e ’o Peter Whitmer Jr i roto i te porora’a ’evanelia, ’ua fa’aru’e mai rātou hau atu 100 melo fa’afāriu-’āpī-hia tei ’ī roa i te itoito, terā rā, e mea iti roa tō rātou mau ’itera’a, ’aore rā, te fa’aterera’a. ’Aita e buka arata’i, ’aita e rurura’a ha’api’ipi’ira’a nā te feiā fa’atere, ’aita e ha’apūrorora’a nō te ’āmuira’a rahi—’oia mau, ’aita ato’a i rahi te mau Buka a Moromona nō te ’ōpere. E rave rahi o teie feiā ti’aturi ’āpī tei ’umehia mai i roto i te ’evanelia i fa’aho’ihia mai nā roto i te fafaura’a o te mau fa’a’itera’a fa’ahiahia o te Vārua, terā iho ā rā tā rātou i tuatāpapa i roto i te faufa’a ’āpī (’ei hi’ora’a, ’a hi’o 1 Korinetia 12:1–11). E rave rahi rā tei mana’o e mea fifi ’ia ’imi i te mau fa’a’itera’a mau a te Vārua. I te ’itera’a Iosepha Semita i te pāpū ’ore o taua ’ohipa ra, ’ua pure atu ra ’oia nō te ani i te tauturu. ’Ua riro te pāhonora’a a te Fatu ’ei mea faufa’a rahi ato’a nō teie ’anotau, mai te mea ē, e pāto’i pinepine ’aore rā, e tau’a ’ore te ta’ata i te mau mea o te Vārua. ’Ua ha’apāpū fa’ahou ’oia ē, e mea mau te mau fa’a’itera’a pae vārua. ’Ua ha’amāramarama ato’a ’oia i tō rātou huru : e mau hōro’a nā te Metua here i te ao ra, « ’ua hōro’ahia mai te reira ’ei maita’i nō rātou ’o tei here [iāna] ’e ’o tei ha’apa’o noa i [tāna] mau fa’auera’a ato’a, ’e o iāna ato’a ’o tē tāmata ’ia nā reira » (Te Ha’api’ira’a Tumu ’e te mau Fafaura’a 46:9).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 46:1–7

Tē fa’ari’i poupou nei te Fa’aora i te feiā ato’a e hina’aro nei e ha’amori i roto i tāna ’Ēkālesia.

Tē mana’o ra ānei tō ’outou mau hoa ’e te mau ta’ata tāpiri mai ia ’outou ē, e mea fāri’i-pōpou-hia rātou i roto i te mau ’ohipa ha’amorira’a a tā ’outou pāroita ? E aha tā ’outou e rave nei nō te fa’ariro i tā ’outou mau putuputura’a a te ’Ēkālesia ’ei vāhi e hina’aro te ta’ata e ho’i fa’ahou mai ? ’A feruri nāhea ’outou e fa’a’ohipa i te a’o a te Fatu i roto i Te Ha’api’ira’a Tumu ’e te mau Fafaura’a 46:1–7 (hi’o ato’a 2 Nephi 26:24–28 ; 3 Nephi 18:22–23).

E feruri na ’outou i te hō’ē taime ’a haere ai ’outou i te mau purera’a a te ’Ēkālesia—’aore rā, hō’ē rurura’a nō te tahi atu pupu—nō te taime mātāmua. E aha tā te mau ta’ata i rave nō te tauturu ia ’outou ’ia fa’ari’i-poupou-hia ’outou ?

Hi’o ato’a Moroni 6:5–9 ; « Ha’amaita’i ia Iesu ē, nō tōna ra here rahi », Te mau hīmene, N°98.

Mānava i te ComeUntoChrist.org

Mānava i te hō’ē orara’a va’amata’eina’a i reira te mau ta’ata e tāmata ai e ora mai tā Iesu i ha’api’i. Haere mai ’e ’a hi’o e aha te mea tā mātou e ti’aturi nei nō te ComeUntoChrist.org.

Te Ha’api’ira’a Tumu ’e te mau Fafaura’a 46:7–33

’Ua hōro’a mai te Metua i te ao ra iā’u i te mau hōro’a pae vārua nō te ha’amaita’i ia vetahi ’ē.

’Ua ti’aturi te feiā mo’a mātāmua i te mau hōro’a pae vārua terā rā, tītauhia te tahi tauturura’a nō te ’ite i te reira ’e nō te hāro’aro’a i tā rātou fā. ’A tuatāpapa ai ’outou i te mau hōro’a a te Vārua i roto i Te Ha’api’ira’a Tumu ’e te mau Fafaura’a 46:7–33, ’a feruri i te tumu « i hōro’ahia mai ai te reira » (’īrava 8). E aha tā ’outou i ha’api’i mai nō ni’a i te Atua—te ta’ata hōro’a i teie mau ō ?

E nehenehe ānei ’outou e feruri i te tahi mau ta’ata tē fa’a’ohipa ra i teie mau hōro’a pae vārua ’aore rā te tahi atu mau hōro’a pae vārua ? ’Ua nāhea te reira i te rirora’a « ’ei maita’i nō te mau tamari’i a te Atua ra » ? (’īrava 26). E hi’o na, e nehenehe ānei tā ’outou e ’imi i te mau hi’ora’a ’ē atu o te mau hōro’a pae vārua i roto i te mau pāpa’ira’a mo’a mai teie : 1 Te mau Ari’i 3:5–15 ; Daniela 2:26–30 ; Te ’Ohipa 3:1–8 ; Helamana 5:17–19 ; Moromona 1:1–5 ; Etera 3:1–15 ; Te Ha’api’ira’a Tumu ’e te mau Fafaura’a 6:10–12 ; Mose 7:13.

E nehenehe tā ’outou tuatāpapara’a i te mau hōro’a pae vārua e ha’aferuri ia ’outou e aha te mau hōro’a tā te Atua i hōro’a nō ’outou. Nāhea ’outou e fa’a’ohipa ai i teie mau hōro’a nō te ha’amaita’i i tāna mau tamari’i ? Mai te mea ē, e ha’amaita’ira’a pātereāreha tō ’outou, e nehenehe te reira e riro ’ei fa’a’itera’a i te mau hōro’a i fa’ari’ihia e ’outou. E nehenehe ato’a te tai’ora’a i te a’ora’a a Elder John C. Pingree Jr. « E ’ohipa tā’u nā ’oe » e ’īriti ato’a i tō ’outou ferurira’a i te mau hōro’a ’aita ā ’outou i mana’o a’enei (Liahona, Novema 2017, 32–35).

Mai te mea e hina’aro ’outou e ha’api’i mai nāhea e fa’ananea i te mau hōro’a pae vārua, e nehenehe te fa’aaura’a i te ha’amatara’a o te a’ora’a a Elder Juan Pablo Villar « Fa’a’ohipa i tō tātou mau ponapona pae vārua » e tauturu (Liahona, Mē 2019, 95). E aha te mau « fa’a’ohipara’a » e nehenehe e tauturu ia ’outou ’ia fa’ahotu i tā ’outou mau hōro’a pae vārua ?

Hi’o ato’a Topics and Questions, « Holy Ghost [Vārua Maita’i] », Vaira’a buka ’evanelia.

Te Ha’api’ira’a Tumu ’e te mau Fafaura’a 47

Tē hina’aro nei te Fatu ’ia tāpe’a tāna ’Ēkālesia i te hō’ē ’ā’amu.

’Ua riro te pi’ira’a o John Whitmer ’ia tāpe’a i te hō’ē ’ā’amu o te ’Ēkālesia ’ei peu tumu nō te mau ta’ata ha’apa’o parau pāpa’i i roto i te nūna’a a te Atua. Nō te aha ’outou e mana’o ai ē, e mea faufa’a te pāpa’ira’a i te ’ā’amu i mua i te Fatu ? ’A feruri i te reira ’a tai’o ai ’outou i te tufa’a 47 ’e tae noa atu i te mau arata’ira’a mai te reira te huru i roto i te 2 Nephi 29:11–12 ; Mose 6:5 ; Aberahama 1:28, 31. I tō ’outou mana’o, e aha te mau mea tā te Fatu e hina’aro nei ’ia pāpa’i ’outou ?

I ni’a ia FamilySearch, e nehenehe ’outou e pāpa’i i te mau ha’amana’ora’a ’e te mau ’ohipa i tupu i roto i tō ’outou orara’a—’e te orara’a o tō ’outou mau tupuna (hi’o FamilySearch.org).

Hi’o Henry B. Eyring, « E ha’amana’o ē, e ha’amana’o », Liahona, Novema 2007, 66-69.

John Whitmer

Te Ha’api’ira’a Tumu ’e te mau Fafaura’a 47

E arata’i te Vārua Maita’i iā’u i te taime ’a rave ai au i tō’u mau pi’ira’a.

E nehenehe ’outou e māramarama i te mea tā John Whitmer i fa’ari’i i te taime ’a hina’aro ai ’oia i te ha’apāpūra’a ē nō ’ō mai iho ā tōna pi’ira’a i te Atua. E aha tā te Fatu i parau i roto i Te Ha’api’ira’a Tumu ’e te mau Fafaura’a 47 ia John Whitmer—’e ia ’outou—nō te tāmarū i tō mana’o i roto i te fa’a’ohipara’a i te mau pi’ira’a tāna e hōro’a mai ?

Te ’ohipa a te ’orometua. ’Ua hau atu te ’ohipa ha’api’i i te hōhora-noa-ra’a i te mau ha’amāramaramara’a. ’O te fa’atupura’a rā i te hō’ē vāhi i reira te mau pīahi e nehenehe ai e ’apo mai ’e e ’ite mai i te mau parau mau nō rātou iho ’e ’ia fa’a’ite i te mea tā rātou i ha’api’i mai te tahi ’e te tahi (hi’o Te Ha’api’ira’a mai tā te Fa’aora, 26).

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 46:2–6

E nehenehe au e tauturu ia vetahi ’ē ’ia fa’ari’i i te mana’o ē, ’ua fāri’i-maita’i-hia rātou i te fare purera’a.

• I muri a’e i te tai’ora’a i Te Ha’api’ira’a Tumu ’e te mau Fafaura’a 46:5 ’e tā ’outou mau tamari’i, ’a ’āparau nō ni’a i te ’ohipa tā te Fa’aora e hina’aro nei i te ta’ata ’ia fa’ari’i ’ia haere ana’e mai rātou i tāna ’Ēkālesia. ’A ani i tā ’outou mau tamari’i ’ia feruri ē, ’ua ’ite rātou i te hō’ē ta’ata i te fare purera’a nō te taime mātāmua roa. Tauturu ia rātou ’ia ha’api’ipi’i i te mau rāve’a nō te tauturu i teie ta’ata ’ia ’ite i te fa’ari’i poupou.

Te Ha’api’ira’a Tumu ’e te mau Fafaura’a 46:7–26

’Ua hōro’a mai te Metua i te ao ra iā’u i te mau hōro’a pae vārua nō te ha’amaita’i ia vetahi ’ē.

• Nō te tauturu i tā ’outou mau tamari’i ’ia ha’api’i mai nō ni’a i te mau hōro’a pae vārua tei fa’a’itehia i roto i Te Ha’api’ira’a Tumu ’e te mau Fafaura’a 46:13–26, ’a feruri i teie mana’o. E nehenehe ’outou e pāpa’i i te mau hōro’a i ni’a i te mau ’api parau ’e e huna te reira nā roto i te piha. ’A ’imi ai tā ’outou mau tamari’i i te ’api parau tāta’itahi, ’a tauturu ia rātou ’ia ’imi i hea te reira hōro’ara’a i fa’ahitihia i roto i te tufa’a 46. Nō te hōro’a tāta’itahi, ’a paraparau na ia rātou nāhea te reira i fa’a’ohipahia nō te ha’amaita’i ia vetahi ’ē (e nehenehe te mau fa’a’itera’a i roto i te « Pene 20 : Te mau hōro’a a te Varua Maita’i », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 77–80, e tauturu).

  Chapter 20: Gifts of the Spirit: 8•March 1831

• ’A parau i tā ’outou mau tamari’i nō ni’a i te mau hōro’a tā ’outou i ’ite mai ē, ’ua hōro’a mai te Metua i te ao ra ia rātou, ’e ’a vaiiho ia rātou ’ia paraparau nō ni’a i te mau hōro’a tā rātou i ’ite nō te tahi ’e te tahi. ’Ia au i Te Ha’api’ira’a Tumu ’e te mau Fafaura’a 46:8–9, 26, nō te aha te Metua i te ao ra e hōro’a nei ia tātou i te mau hōro’a pae vārua ? Nāhea ’outou e fa’a’ohipa ai i tō ’outou mau hōro’a nō te tauturu ia vetahi ’ē ?

Te Ha’api’ira’a Tumu ’e te mau Fafaura’a 47:1, 3

E ti’a iā’u e pāpa’i i tō’u ’ā’amu.

• ’A vaiiho i tā ’outou mau tamari’i ’ia ’ite e aha tā te Fatu i hina’aro ia John Whitmer ’ia rave i roto i Te Ha’api’ira’a Tumu ’e te mau Fafaura’a 47:1, 3. E nehenehe ato’a ’outou e fa’a’ite i te tahi ’e te tahi i te mau ’ā’amu au-roa-hia nō roto mai i te mau pāpa’ira’a mo’a. ’A fa’a’ite maita’i ē, ’ua ’ite tātou i teie mau ’ā’amu nō te mea ’ua pāpa’i te hō’ē ta’ata i te reira.

• ’A feruri ’outou nāhea ’ia fa’auru i tā ’outou mau tamari’i ’ia pāpa’i i tō rātou iho ’ā’amu. E nehenehe tā ’outou e fa’a’ite i te tahi mau pāpa’ira’a nō roto mai i tā ’outou iho buka ’ā’amu ’aore rā, e fa’a’ite i te hō’ē ’ā’amu nō te hō’ē tupuna (hi’o FamilySearch.org ’aore rā te Memories app). E nehenehe ’outou e hōro’a i te tahi mau mana’o, mai teie te huru, « E aha te ’ohipa tei tupu i teie hepetoma ’o tā ’outou e hina’aro ’ia ’ite i tā ’outou mau mo’otua ? » ’aore rā, « ’Ua nāhea ’outou i te ’itera’a i te rima o te Fatu i roto i tō ’outou orara’a i teie hepetoma ? » E nehenehe te mau tamari’i na’ina’i e pāpa’i i te mau hōho’a nō tō rātou mau ’itera’a, ’aore rā, e nehenehe ’outou e haruharu i tō rātou reo ’a fa’ati’a ai rātou i tō rātou mau ’ā’amu. E aha te mau ha’amaita’ira’a e tae mai nō te tāpe’ara’a i « te hō’ē ’ā’amu tāmau » ? (Te Ha’api’ira’a Tumu ’e te mau Fafaura’a 47:1).

Te Ha’api’ira’a Tumu ’e te mau Fafaura’a 48:2–3

E nehenehe au e tauturu ia vetahi ’ē nā roto i te fa’a’itera’a i te mea tei hōro’ahia mai iā’u.

• ’A tai’o ai ’outou i Te Ha’api’ira’a Tumu ’e te mau Fafaura’a 48:2–3 e tā ’outou mau tamari’i, e ti’a ia ’outou ’ia fa’ata’a ē, ’ua haere mai te ta’ata i Ohio mai te Hiti’a o te ra mai, ’e ’aita tō rātou e vāhi nō te ora. E aha tā te Fatu i fa’aue i te feiā mo’a ’ia rave nō te tauturu ? E tauturu i tā ’outou mau tamari’i ’ia feruri i te mau mea tā te Atua i hōro’a nā rātou ’o tā rātou e nehenehe e fa’afāna’o ia vetahi ’ē. E nehenehe ato’a ’outou e hīmene nā muri ia rātou i te hō’ē hīmene mai te « Je serai vaillant » (Chants pour les enfants, 85).

Nō te tahi atu ā mana’o, ’a hi’o i te ve’a Hoa nō teie ’āva’e.

Te feiā ato’a e hina’aro nei e ha’amori i te Fa’aora, e fa’ari’i-poupou-hia rātou i roto i te mau rurura’a a tāna mau Feiā mo’a.