“Pene 20: Te Mau Horoa a te Varua Maitai: 8 no Mati 1831,” Te Mau Aamu no Roto Mai i te Parau Haapiiraa e te Mau Parau Fafau (2002), 77–80
“Pene 20,” Te Mau Aamu no Roto Mai i te Parau Haapiiraa e te Mau Parau Fafau, 77–80
Pene 20
Te Mau Horoa a te Varua Maitai
(8 no Mati 1831)
Ua parau mai Iesu e tauturu te Varua Maitai i te feia parau-tia. E tauturu oia i te Atua i te horoaraa i te tahi mau horoa taa ê roa ia ratou. Te vai nei ta te Feia Mo‘a tataitahi horoa taa ê roa. E mea tia i te Feia Mo‘a ia faaohipa i teie horoa taa ê no te tauturu i te tahi e te tahi. Ua parau mai Iesu ia Iosepha Semita e eaha taua mau horoa ra.
Te horoa nei te Varua Maitai i te tahi mau Feia Mo‘a i te horoa no te iteraa papu. Te ite nei ratou e o Iesu Mesia te Tamaiti a te Atua. Te ite nei ratou e ua pohe oia no tatou. I te tahi mau Feia Mo‘a, ua horoahia mai ïa te horoa no te tiaturiraa i te iteraa papu no nia ia Iesu.
I te tahi mau Feia Mo‘a ua horoahia mai te horoa no te riro ei mau taata faatere.
I te tahi mau Feia Mo‘a, ua horoahia mai ïa te horoa no te ite i te Varua parau-tia e te varua iino. Ua tonohia mai te varua parau-tia e te Atua. E faaoaoa mai te reira ia tatou. Ua riro ratou mai te maramarama. Ua tonohia mai te varua ino e Satane. E tura‘i te reira ia tatou ia riro ei mea iino. Ua riro hoi ratou mai te poiri.
Te horoa mai nei hoi te Varua Maitai i te tahi mau Feia Mo‘a i te horoa no te paari. Ua tia hoi ia ratou ia maiti i te mau mea tano. I te tahi mau Feia Mo‘a ua horoahia ïa ia ratou te horoa no te haapii mai i te tahi mau mea. E tia hoi ia ratou ia haapii atu i te mau Feia Mo‘a i te mau mea o ta ratou i ite. E tia hoi ia ratou ia haapii atu i te tahi mau Feia Mo‘a ia maiti i te mau mea tano.
I te tahi mau Feia Mo‘a, ua horoahia ïa te horoa no te faaroo no te faaoraraa i te ma‘i. I te tahi atu mau Feia Mo‘a, ua horoahia ia te horoa no te faaora mai i te feia ma‘i. Te horoa nei te Varua Maitai i te tahi mau Feia Mo‘a i te horoa no te rave i te mau semeio. Te itehia nei te mana o te Atua na roto i te mau semeio.
I te tahi mau Feia Mo‘a, ua horoahia ïa te horoa no te paraparau i te mau reo o ta ratou i ore roa i ite.
Te horoa nei te Varua Maitai i te tahi mau Feia Mo‘a i te horoa no te ite i te mau mea e tupu na mua a‘e te reira e tupu ai.
I te tahi atu mau Feia Mo‘a, ua horoahia mai ïa te mau horoa e rave rahi.
Ua ite te episekopo i te mau horoa a te mau Feia Mo‘a tataitahi. Ua ite oia e o vai te mau taata e riro ei mau orometua maitai. Ua ite oia e o vai te nehenehe ia faatupu i te mau semeio. Ua ite oia e o vai te mau Feia Mo‘a tei here i te Atua e te haapao i te mau faaueraa a te Atua.
E farii hoi te mau Feia Mo‘a parau-tia e rave rahi horoa. E mea tia ia ratou ia rave i te ohipa no te farii i te mau horoa o ta ratou e hinaaro. No ǒ mai hoi teie mau horoa atoa i te Atua ra.