“Pene 39: Ua Haamo‘ahia te Hiero i Ketelani: Tenuare–Mati 1836,” Te Mau Aamu no Roto Mai i te Parau Haapiiraa e te Mau Parau Fafau (2002), 151–54
“Pene 39,” Te Mau Aamu no Roto Mai i te Parau Haapiiraa e te Mau Parau Fafau, 151–54
Pene 39
Ua Haamo‘ahia te Hiero i Ketelani
(Tenuare–Mati 1836)
Ua faaue mai te Fatu i te Feia Mo‘a ia patu i te Hiero i Ketelani. Ua rave itoito te Feia Mo‘a i te ohipa no te paturaa i te Hiero i Ketelani. Ua oti te tahi o te mau piha.
I muri iho ua faatere te Feia Mo‘a i te pureraa matamua i roto i te hiero. I roto i taua pureraa ra ua haamaitai te metua tane o Iosepha Semita i te mau feia faatere o te Ekalesia. O te metua tane o Iosepha hoi te patereareha o te Ekalesia.
Ua farii o Iosepha i te hoê orama nehenehe roa. Ua ite atu oia i te basileia tiretiera o te ra‘i. Tei te basileia tiretiera hoi te Atua i te faaearaa. Ua ite o Iosepha i te nehenehe o taua basileia tiretiera ra. Ua ite oia i to tatou Metua i te Ao ra e ia Iesu. Ua ite o Iosepha i to’na taeae ra ia Alavina, o tei pohe.
Ua haapii mai o Iosepha no nia i te mau tamarii o tei pohe na mua i te va‘u o te matahiti. Ua parau mai Iesu e haere atu ratou i roto i te basileia tiretiera.
Ua parau mai Iesu e te vai nei e rave rahi taata o tei ore i ite i te evanelia i to ratou oraraa i nia i te fenua nei.
E ora te tahi mau taata i nia i te fenua nei ma te faaroo ore i te evanelia.
E tiaturi hoi te tahi o teie mau taata i te evanelia mai te mea e ua ite ratou i te reira. E tia i teie mau taata ia haere atu i te basileia tiretiera.
I te pae hopea ua oti te hiero i Ketelani. E ua tae i te taime no te haamo‘araa i te hiero. Te auraa no te reira oia hoi e pûpûhia atu te hiero i te Fatu. E faaohipa-noa-hia te reira no te ohipa a te Fatu. Ua faatupuhia te hoê pureraa taa ê na te Feia Mo‘a no te haamo‘araa i te hiero.
E rave rahi Feia Mo‘a i haere mai i te pureraa. Ua oaoa ratou no te fariiraa i te hiero. Ua arue e ua pure te Feia Mo‘a i to tatou Metua i te Ao ra. Ua fafau atu ratou no te rave i te ohipa o ta to ratou peropheta e ta te tahi atu mau taata faatere i parau mai ia ratou ia rave.
Ua tai‘o o Iosepha Semita i te hoê pure no te haamo‘araa i te hiero. E i reira ua riro te hiero ei fare mo‘a, e ei fare no te Fatu. Tei roto hoi te mau melahi i te hiero i Ketelani i taua mahana ra. Ua î hoi te Feia Mo‘a i te Varua Maitai. E ua riro taua mahana ra ei mahana faahiahia roa.