“Pene 44: Te Tufaa Ahuru: Tiurai 1838,” Te Mau Aamu no Roto Mai i te Parau Haapiiraa e te Mau Parau Fafau (2002), 165–66
“Pene 44,” Te Mau Aamu no Roto Mai i te Parau Haapiiraa e te Mau Parau Fafau, 165–66
Pene 44
Te Tufaa Ahuru
(Tiurai 1838)
Tei Fa Uete, Misouri, te Feia Mo‘a. Ua parau mai te Fatu ia Iosepha Semita e mea tia i to’na ra mau taata ia aufau i te tufaa ahuru. Ua pure oia i to tatou Metua i te Ao ra no nia i te tufaa ahuru e tia i te Feia Mo‘a ia aufau. Ua farii oia i te hoê heheuraa no ŏ mai i te Fatu ra. Ua parau mai te Fatu e mea tia i te Feia Mo‘a ia aufau i te ahururaa o te mau mea atoa e roaa mai ia ratou no te tufaa ahuru.
Buka Fafau 64:23; 119: Omuaraa Parau
Mai te mea e roaa mai ia ratou hoê ahuru toata e mea tia ïa ia ratou ia horoa atu hoê toata no te tufaa ahuru. Mai te mea e roaa mai ia ratou hoê hanere toata e mea tia ïa ia ratou ia horoa atu hoê ahuru toata.
E tia atoa i te mau Feia Mo‘a ia aufau atu i te tufaa ahuru na roto i te tahi mau ravea ê atu. Ua aufau te Feia Mo‘a i te tufaa ahuru na nia i te mau maa o ta ratou i faaapu. Ua horoa ratou i te ahururaa no te mau huero maa e te maa puaatoro. Ua horoa ratou i te ahururaa no te mau moa e te tahi atu mau animaia o ta ratou i faaamu. Ua aufau ratou i te tufaa ahuru no nia i te û e te mau maa tupu.
I te matamua ua faaohipahia te tahi tufaa no te tufaa ahuru no te tauturu i te mau melo o te Ekalesia e te feia riirii o te ore e nehenehe ia tauturu ia ratou iho.
Ua faaohipahia te tufaa ahuru no te patu i te mau hiero e no te tauturu i te ohipa misionare. Ua faaohipa-atoa-hia te reira no te tauturu i te mau taata o tei horoa i te taatoaraa o to ratou taime no te rave i te ohipa a te Fatu.
E horoa atu tatou i ta tatou tufaa ahuru i te episekopo. E horoa atu te episekopo i te reira i te mau feia faatere o te Ekalesia. E i reira e maiti ai ratou nahea ia faaohipa i te tufaa ahuru.
E horoa mai to tatou Metua i te Ao ra i te mau haamaitairaa i te mau Feia Mo‘a atoa o te aufau i te tufaa ahuru. Te mau Feia Mo‘a o te ore e aufau i te tufaa ahuru eita ïa ratou e farii i teie mau haamaitairaa. Te faaite maira te Bibilia e te mau Feia Mo‘a atoa o te ore e aufau i te tufaa ahuru, te eiâ nei ïa ratou i ta te Atua.