Omuaraa

Na Mua i te Buka Fafau

I ora na tatou i te ao ra na mua tatou i haere mai ai i nia i te fenua nei. Ua horoa mai to tatou Metua i te Ao ra i te hoê opuaraa no te faaoraraa. Na taua opuaraa no te faaoraraa e tauturu nei ia tatou ia faaineine no te ho‘i faahou atu e ora i te ao ra. Mai te mea e haapao tatou i te opuaraa, e nehenehe ïa ia tatou ia ora i pihai iho i to tatou Metua i te Ao ra i muri mai i to tatou tia-faahou-raa.

Ua ora o Iesu i pihai iho ia tatou i te ao ra. Ua hinaaro oia ia haapao i te opuaraa a to tatou Metua i te Ao ra. Ua parau hoi o Iesu e, e haere mai oia i te fenua nei ia riro ei faaora no tatou. E e rave oia i te ohipa a to tatou Metua i te Ao ra.

Ua ora atoa o Satane i te ao ra i pihai iho ia tatou. Area râ e mea ino roa oia. Aita oia e haapao i te opuaraa a to tatou Metua i te Ao ra. No reira ua tiavaru atu to tatou Metua i te Ao ra ia Satane i rapae i te ao ra. Ua hinaaro Satane ia haamou i te opuaraa no te faaoraraa. Ua hinaaro oia ia tapea i te ohipa a to tatou Metua i te Ao ra.

Ua hamani Iesu i te fenua. E ua haere mai te mau tamarii a to tatou Metua i te Ao ra e ora i nia i te fenua nei. Ua tono mai Iesu i te mau peropheta no te haapii ia ratou ia vai parau-tia noa. Ua faaroo te tahi mau taata i te mau peropheta.

Aita te tahi mau taata e faaroo i te mau peropheta. Ua faaroo râ teie mau taata ia Satane. E ua tiro hoi ratou ei mau taata ino.

Te faaite mai nei hoi te Faufaa Tahito no nia i te mau taata o tei ora na i Palesetina e rave rahi mau matahiti i mairi i muri. Ua ite teie mau taata i te parau no Iesu. Ua farii te feia parau-tia i ta’na evanelia. Ua farii hoi te mau tane parau-tia i te autahu’araa. Ua haapii te mau peropheta i te mau taata e e haere mai o Iesu i nia i te fenua nei. E e tiro oia ei Faaora no ratou.

Te faaite mai nei hoi te Buka a Moromona no nia i te mau taata o tei ora i nia i te fenua Amerika i te matamua roa. Ua ite ratou i te parau no Iesu. Ua farii ratou i ta’na evanelia. Ua farii hoi te mau tane parau-tia i te autahu’araa. Ua haapii te mau peropheta i te mau taata e e riro Iesu ei Faaora no ratou. E e haere mai oia i rotopu ia ratou i muri iho i to’na tia-faahou-raa.

Ua ora o Iesu Mesia i nia i te fenua nei. Te faaite mai nei te Faufaa Apî no nia i to’na oraraa i nia i te fenua nei. Ua haapii Iesu i ta’na evanelia i te taata nei. Ua haapii oia ia ratou ia haapao i te mau faaueraa a to tatou Metua i te Ao ra.

Ua maiti Iesu hoê ahuru e ma piti taata ei mau Aposetolo. Ua horoa oia i te autahu‘araa ia ratou. Ua haamata oia i ta’na ekalesia. E rave rahi mau taata i here ia Iesu. E mau feia parau-tia ratou e ua haapao hoi ratou i ta’na mau haapiiraa.

Aita Satane i hinaaro i te mau taata ia faaroo ia Iesu. Ua faahema Satane i te mau taata, e ua riro ratou ei mau taata iino. Aita ratou e tiaturi ia Iesu. Aita hoi ratou e au ia Iesu. Ua taparahi ratou ia’na.

E toru mahana i muri iho, ua tia faahou mai Iesu. Ua paraparau atu oia i ta’na mau Aposetolo. Ua parau oia ia ratou ia haapii i te evanelia i te mau taata atoa. Ua haere atoa atu Iesu e farerei i te mau taata parau-tia i te fenua i Amerika. E i muri iho ua haere atu oia i pihai iho i to tatou Metua i te Ao ra.

Ua riro te mau Aposetolo ei mau aratai no te Ekalesia a Iesu Mesia. Ua haere atu i te mau fenua e rave rahi. Ua haapii atu ratou i te evanelia i te mau taata. E rave rahi mau taata i tiaturi ia Iesu e o tei bapetizohia. Ua horoa atu te mau aposetolo i te autahu‘araa i te mau taata parau-tia. E e mea rahi roa te mau melo no te Ekalesia mau a Iesu Mesia.

Ua hinaaro Satane ia haamou i te Ekalesia a Iesu Mesia. Ua faahema oia i te mau taata, e ua faaroo hoi ratou ia’na. E rave rahi mau taata tei faaea i te tiaturi ia Iesu. Ua taparahi te mau taata iino i te mau melo parau-tia o te Ekalesia. Ua taparahi ratou i te mau aposetolo. Aita e taata faatere faahou no te aratai i te Ekalesia. Aita hoi e taata faahou no te horoa atu i te autahu‘araa i te mau taata.

Ua taui te tahi mau taata i te mau haapiiraa a te Ekalesia a Iesu Mesia. Ua taui ratou i te mau ture a te Atua. E ua mou te Ekalesia mau o ta Iesu i haamata. Ua haamata te mau taata i te faatia i ta ratou iho ekalesia. Area râ, aita te hoê a‘e o te reira i riro ei ekalesia mau.

E rave rahi mau matahiti i mairi. E ua rahi te mau ekalesia êê i nia i te fenua nei. Area râ, aita roa te hoê noa a‘e o te reira mau ekalesia i riro ei ekalesia mau na Iesu Mesia. Ua tiaturi te mau melo no te reira mau ekalesia ia Iesu Mesia. Area râ, aita roa te evanelia mau i roto i te reira mau ekalesia. Aita hoi to ratou e autahu‘araa no te Atua. Aita to ratou e mau peropheta e e mau Aposetolo.

Ua parau mai Iesu e haere faahou mai oia i nia i te fenua nei. Ua parau mai oia e mea tia ia vai ta’na Ekalesia mau i nia i te fenua nei ia ho‘i faahou mai ana’e oia. E mea tia i te mau taata ia ite i ta’na evanelia mau. E mea tia i te mau tane ia mau i te autahu’araa. E e mea tia ia vai te mau peropheta e te mau Aposetolo. E mea tia ia vai te mau heheuraa.

No ŏ mai te mau heheuraa ia Iesu ra. E faaite mai hoi te mau heheuraa i te mau ohipa ta Iesu e hinaaro ia tatou ia ite. E faaite mai hoi te reira i te mau mea o ta’na e hinaaro ia tatou ia rave. Te horoa nei Iesu i te mau heheuraa i ta’na ra mau peropheta. No ta’na hoi Ekalesia mau te mau heheuraa.

Ua riro Te Parau Haapiiraa e te Mau Parau Fafau (Buka Fafau) ei buka no te mau heheuraa. Te faaite mai nei te Buka Fafau i te mau mea no nia i te Ekalesia mau a Iesu Mesia. Te faaite atoa mai nei te reira no nia i te autahu‘araa, no nia i te mau peropheta e te mau aposetoio. Te faaite mai nei te Buka Fafau i te mau mea o te tia ia tatou ia rave no te faaineineraa ia ho‘i faahou ana’e mai Iesu.

Te buka o ta oe e tai’o nei no nia ïa i te Buka Fafau. Te faaite mai nei teie buka i te tahi o te mau heheuraa. Te faaite mai nei teie buka i te huru no te faaho’i-faahou-raa-hia mai te Ekalesia mau a Iesu Mesia i nia i te fenua nei. Te faaite atoa mai nei te reira i te huru no te tahi atu mau taata o tei ora i te taime a haamatahia ai te Ekalesia.