“Pene 46: Iosepha Semita i Roto i te Fare Auri i Libereti: Mati 1839,” Te Mau Aamu no Roto Mai i te Parau Haapiiraa e te Mau Parau Fafau (2002), 173–75
“Pene 46,” Te Mau Aamu no Roto Mai i te Parau Haapiiraa e te Mau Parau Fafau, 173–75
Pene 46
Iosepha Semita i Roto i te Fare Auri i Libereti
(Mati 1839)
Ua tapeahia o Iosepha Semita e to’na mau hoa i roto i te fare auri e rave rahi mau mahana. E i muri iho ua afai-ê-hia atu ratou i roto i te tahi atu fare auri. E tei Libereti, Misouri ïa taua fare auri ra.
E mea to‘eto‘e e mea repo roa hoi taua fare auri i Libereti ra. Ua mauiui roa hoi o Iosepha e to’na mau hoa. I te tahi mau taime ua taamuhia ratou i te fifi. E ua taoto noa hoi ratou i nia i te tahua.
E ere atoa hoi te maa i te mea maitai. I te tahi mau taime ua faataerohia te maa e ua ma‘ihia ratou na roto i te reira.
Ua oto roa o Iosepha. Ua tapeahia oia e to’na mau hoa i roto i te fare auri no te hoê taime maoro roa. Aita hoi o Iosepha i ite mai te mea e mahuti anei ratou i rapae. Te pe‘ape‘a nei hoi oia no nia i te Ekalesia.
Ua pure atu o Iosepha i to tatou Metua i te Ao ra. Ua ani atu oia eaha te maororaa i titauhia ia’na e te mau Feia Mo‘a ia faaruru i teie mamae. Ua ani atu oia i to tatou Metua i te Ao ra ia tauturu mai ia ratou, e ia faautu‘a i to ratou mau enemi.
Ua parau mai Iesu ia Iosepha e e farii oia i te mamae no te hoê taime rii noa. Ua parau mai oia ia Iosepha ia faaitoito noa. E i reira ïa te Atua e haamaitai mai ai ia’na. Ua parau mai Iesu ia Iosepha e aita e maoro e ho‘i faahou atu oia i rotopu i to’na mau hoa. Ua here to Iosepha mau hoa ia’na, e e oaoa hoi ratou ia farerei faahou ia’na.
Ua ite Iesu i te mau ohipa iino o ta te mau taata iino i rave. Ua faaite mai Iesu ia Iosepha e nahea oia ia faautu‘a ia ratou. Eita roa e tia i te mau taata iino ia farii i te autahu‘araa. Eita roa atoa e tia i ta ratou mau tamarii ia farii i te autahu‘araa. E farii te mau taata iino i te mauiui e e pohe ratou.
Ua faaite atu Iesu ia Iosepha i te mau mea maitai e tupu i nia i te Feia Mo‘a. Aita te hoê mea e tia ia tapea i te Atua ia ia haamaitai ia ratou. E faaite te Varua Maitai ia ratou i te mau mea maitai no nia i te mana o te Atua. E ite ratou i te mau mea no nia i te ra‘i e te fenua.
Ua parau atu Iesu ia Iosepha eiaha e măta‘u mai te mea e tupu te mamae ia’na. Eiaha atoa o Iesopha e haape‘ape‘a ia tupu ana’e mai te tahi mau fifi ia’na. Ua parau mai Iesu e faatupu mai te pe‘ape‘a i te maitai no tatou iho. E tauturu mai te pe‘ape‘a ia tatou. Ua rahi atu te mamae ta Iesu i farii i ta te hoê noa’tu taata.