“Pene 33: Te Hoê Heheuraa no Nia ia Iesu Mesia: Me 1833,” Te Mau Aamu no Roto Mai i te Parau Haapiiraa e te Mau Parau Fafau (2002), 126–27
“Pene 33,” Te Mau Aamu no Roto Mai i te Parau Haapiiraa e te Mau Parau Fafau, 126–27
Pene 33
Te Hoê Heheuraa no Nia ia Iesu Mesia
(Me 1833)
I te hoê mahana ua paraparau mai Iesu i te Peropheta Iosepha Semita. Ua parau mai oia ia Iosepha Semita no nia ia’na. Ua parau mai Iesu e tia i te taata ia hi‘o i to’na mata e ia ite hoi i to’na huru. Na mua ra i te reira e mea tia ia ratou ia faaore i ta ratou mau ohipa iino. E mea tia ia ratou ia pure e ia haapao i te mau faaueraa a te Atua. E ia tae i te hoê mahana e tia ia ia ratou ia ite ïa Iesu.
Ua parau mai Iesu o oia te maramarama o te ao nei. E faaite mai hoi te maramarama ia tatou i te e‘a tano ia haere. O Iesu te maramarama o te ao nei no te mea te faaite mai nei oia ia tatou i te e‘a tano nahea ia ora.
Ua ora Iesu i pihai iho i to tatou Metua i te Ao ra na mua a‘e te fenua nei i hamanihia ai. Ua hamani Iesu i te fenua nei. Ua hamani oia i te mau mea atoa i nia i te fenua nei.
E ere o Iesu mai to’na Metua i te Ao ra i te matamua. Aita oia i ite i te mau mea atoa o ta to’na Metua i ite. Aita to’na e mana e te hanahana mai to to’na Metua. Ua tamata puai oia ia riro mai to’na Metua i te Ao ra. E i muri mai ua riro mai oia mai te Atua, te Metua te huru. Ua farii Iesu i te mana e te hanahana.
Ua parau mai Iesu e mea tia ia tatou ia haapao i te mau faaueraa a te Atua. E i reira tatou e ite ai i te parau mau. E ite tatou i te mau mea atoa. E i muri iho e riro ïa tatou mai te Atua, te Metua te huru. E tia ia tatou ia farii i te mana e te hanahana.
Ua parau mai Iesu e aita Satane i hinaaro i te mau taata ia riro mai mai te Atua te huru. Aita oia i hinaaro ia ratou ia ite i te parau mau. Ua parau Iesu ia Iosepha ia haapii i to’na utuafare i te parau mau.
Ua parau mai Iesu e mea tia ia Sidene Rigidoni e ia Ferederika G. Viliamu ia haapii i to ratou utuafare ia haapao i te mau faaueraa a te Atua. I reira aita ïa e tia ia Satane ia tapea i to ratou utuafare ia ore ia ite i te parau mau.