Pene 56

Ua Taparahihia te Peropheta

(Tiunu 1844)

Ua pari te tahi mau taata ia Iosepha Semita no te mau pe‘ape‘a i tupu i Navu. Ua afaihia o Iosepha i te fare auri. Ua parau mai te haava aita o Iosepha i rave i te hoê ohipa hape. Ua iritihia o Iosepha i rapae.

Ua riri roa te mau pŭpŭ taata iino i te haava. Ua parau ratou e e taparahi ratou i te haava. Ua ri‘ari‘a te mau Feia Mo‘a i Navu. Ua ani atu ratou i te tavana rahi no taua tufaa fenua ra ia tauturu mai ia ratou. Tera râ, aita oia i hinaaro. Ua tono atu oia i te mau faehau no te imi ia Iosepha Semita.

Ua ite o Iosepha Semita e mea papu e tuu-faahou-hia oia i roto i te fare auri. Ua pe‘ape‘a hoi oia no to’na ra taeae ia Hairamu o te tuu-atoa-hia oia i roto i te fare auri. Ua parau atu o Iosepha ia Hairamu ia afai atu i to’na utuafare i te hoê oire ê atu. Tera râ, aita o Hairamu i hinaaro ia faarue atu ia Iosepha.

Ua parau mai o Iosepha e mea tia ia’na e Hairamu ia faarue atu i Navu. Mai te mea e na reira raua aita ïa te pŭpŭ taata iino e hamani ino i te mau Feia Mo‘a. No reira ua haere o Iosepha raua Hairamu i te tahi pae mai o te anavai.

Ua parau ihora te tahi mau taata ua horo o Iosepha no te mea ua ri‘ari‘a oia. No reira ua afai atu o Ema, te vahine a Iosepha i te tahi o to raua mau hoa no te ani ia’na ia ho‘i mai. Ua feruri o Iosepha Semita e taparahihia oia mai te mea e ho‘i atu oia i Navu. Tera râ, ua na reira oia no te mea o te reira ta to’na mau hoa e hinaaro ia’na ia rave.

Ua ho‘i atu o Hairamu e Iosepha i Navu. Ua haruhia raua. Ua rave atu te mau faehau ia raua e ia Willard Richards e Ioane Tela, e ua afai atu ia ratou i te oire ra i Karetegi. Ua tuuhia ratou i roto i te fare auri i Karetegi.

Te mahana i muri iho, oia hoi, i te 27 no Tiunu 1844. Ua haere mai te tahi mau hoa to Iosepha Semita e farerei ia’na i te fare auri. Ua tai‘o ratou i te mau papairaa mo‘a. Ua himene o Ioane Tela i te hoê o te mau himene au-roa-hia e Iosepha no nia iho ia Iesu.

Aita i maoro ua faaroo ratou i te hoê maniania i rapaeau mai. Te pupuhi ra te hoê pŭpŭ taata iino i te fare auri. Ua hau atu i te hanere taata i roto i taua pŭpŭ taata iino ra. Ua penihia to ratou mau hoho‘a mata ia ore ratou ia itehia.

Ua horo atu te tahi o te mau taata no te pŭpŭ taata iino na mua i te taata tiai opani e ua tura‘i i te opani o te fare auri. Ua horo atu ratou i te tahua i nia. Ua pupuhi atu ratou i roto i te piha. Ua puta o Ioane Tela, tera râ aita oia i pohe. Ua puta e ua pohe roa o Hairamu. I to Iosepha iteraa e ua pohe o Hairamu, ua parau ihora oia, “E to’u taeae here e Hairamu!”

Ua horo atu o Iosepha Semita i te pae haamaramarama. E ua pupuhihia mai oia e te mau taata iino. Ua aue ihora oia i te na ôraa e, “E te Fatu to’u Atua.” Ua topa atura oia i rapaeau na roto i te haamaramarama. Ua pohe te peropheta o te Atua.

Ua afaihia’tu te tino o Iosepha Semita e to to’na ra taeae o Hairamu i Navu. Ua oto roa te mau Feia Mo‘a. Ua pohe to ratou taata faatere e to ratou Peropheta. Ua horoa oia i to’na ora no te evanelia a Iesu Mesia.

Buka Fafau 135

Ua rave te Peropheta o Iosepha Semita e rave rahi mau ohipa faufaa roa. Ua iriti oia i te Buka a Moromona. Ua haamata oia i te Ekalesia mau a Iesu Mesia. Ua tono atu oia i te mau misionare no te poro haereraa i te evanelia i te tahi atu mau fenua. Ua patu oia i te hoê oire ia tia i te mau Feia Mo‘a ia ora. Ua here te Atua ia Iosepha Semita. Ua here te mau Feia Mo‘a ia’na. Ua rahi atu ta Iosepha Semita mau ohipa i rave no te tauturu ia tatou i te tahi atu mau taata o te ao nei, maori râ ia Iesu Mesia.

Buka Fafau 135:3