“Pene 13: Iosepha e Ema: Tiurai 1830,” Te Mau Aamu no Roto Mai i te Parau Haapiiraa e te Mau Parau Fafau (2002), 51–55
“Pene 13,” Te Mau Aamu no Roto Mai i te Parau Haapiiraa e te Mau Parau Fafau, 51–55
Pene 13
Iosepha e Ema
(Tiurai 1830)
Te faaea ra o Iosepha raua Ema i Penetivenia. Te vai ra ta raua hoê faaapu hu‘a. Ua here hoi raua te tahi i te tahi. Ua rave puai raua i te ohipa no te tauturu i te tahi e te tahi.
E rave rahi te fifi i tupu i roto i to raua oraraa. E mea veve hoi raua. Ua hinaaro raua i te tamarii. Ua fanau mai o Ema i te hoê tamaroa, area râ ua pohe oia. Ua oto o Ema. I muri mai ua fanau faahou mai raua i te tahi mau tamarii.
Ua pe‘ape‘a to Iosepha feruriraa no nia i to’na utuafare. Ua hinaaro oia ia haapao maitai ia ratou. E mea tia hoi ia’na ia tanu i te maa na to’na utuafare.
Ua pe‘ape‘a hoi to Iosepha mana‘o no nia i te Ekalesia. Te haape‘ape‘a nei hoi te mau taata iino i te Feia Mo‘a. Ua tapuni te tahi mau feia faatere o te Ekalesia i te mau feia iino. Ua titauhia ia Iosepha ia rave puai i te ohipa no te tauturu i te Feia Mo‘a.
I te tahi mau taime ua haere atu o Iosepha e tauturu i te Feia Mo‘a. Ua pe‘ape‘a o Iosepha ia faarue noa i to’na utuafare. Ua oto hoi o Ema i to Iosepha faarueraa i te fare. Ua pe‘ape‘a oia i te mea e tupu i nia ia Iosepha.
Ua ani atu o Iosepha ia Iesu eaha te tia ia’na ia rave. Ua parau mai Iesu i te peropheta ia Iosepha eiaha e haape‘ape‘a no nia i to’na mau fifi. Ua parau mai Iesu ia’na eiaha e ri‘ari‘a i te feia iino. Ua parau mai Iesu e tauturu noa oia ia Iosepha.
Ua parau mai Iesu e mea tia ia Iosepha ia tanu i te maa na to’na utuafare. E i reira a haere atu ai e tauturu i te Feia Mo‘a. Ua parau mai Iesu ia Iosepha eiaha e haape‘ape‘a no nia i te maa, te ahu, e te moni. E horoa mai te Feia Mo‘a ia Iosepha i te mau mea e hinaarohia.
Ua horoa mai Iesu i te hoê heheuraa ia Ema na roto ia Iosepha Semita. Ua parau mai o Iesu e vahine taa ê mau o Ema Semita. Ua maiti oia ia’na no te rave i te hoê ohipa faufaa rahi roa.
Ua parau mai Iesu e mea tia ia Ema ia here ia Iosepha i roto i to’na mau taime fifi. E mea tia ia’na ia tauturu ia Iosepha ia vai oaoa noa e eiaha ia feruri i te mau ohipa pe‘ape‘a.
Ua parau mai Iesu e mea tia ia Ema ia haapii i te Feia Mo‘a. E mea tia ia’na ia tauturu ia ratou ia haapii i te mau papairaa mo‘a. Ua parau mai oia e tauturu te Varua Maitai ia’na ia ite i te mau mea e tano ia haapii.
Ua parau mai Iesu e mea tia ia Ema ia faaohipa i to’na taime no te tamau i te papairaa mo‘a. E mea tia ia’na ia haapii e ia papai e rave rahi mau mea.
Ua ani mai Iesu ia Ema ia maiti i te mau himene e tano i te Feia Mo‘a ia himene. E e neneihia te reira mau himene i roto i te hoê buka himene.
E mea au na te Atua ia faaroo i te feia parau-tia ia himene. E ua au hoi ta ratou mau himene mai te pure ia’na ra. E haamaitaihia te feia parau-tia o te himene atu i te Atua.
Ua parau mai Iesu ia Ema ia faahaehaa ia’na. Ua parau mai oia ia’na ia here i ta’na tane. Ua parau mai oia ia’na ia oaoa no te mea te vai atura te mau haamaitairaa rahi o te horoahia mai ia Iosepha.
Ua parau mai Iesu ia Ema eiaha e haape‘ape‘a i to’na mana‘o no nia i teie nei ao. E mea tia ia’na ia vai ineine noa no te hoê ao maitai atu i te ra‘i ra. E mea tia ia’na ia oaoa e ia haapao i te mau faaueraa a te Atua. E i reira e nehenehe ai ia’na ia haere atu i te ao ra.
Ua parau mai Iesu e ua riro te mau mea ta’na i parau atu ia Ema Semita no te mau vahine atoa.