“Pene 4: Maratini Hareti e te Mau Api i Mo‘e: 1824–1828,” Te Mau Aamu no Roto Mai i te Parau Haapiiraa e te Mau Parau Fafau (2002), 17–21
“Pene 4,” Te Mau Aamu no Roto Mai i te Parau Haapiiraa e te Mau Parau Fafau, 17–21
Pene 4
Maratini Hareti e te Mau Api i Mo‘e
(1824–1828)
E mea veve te utuafare o Iosepha Semita. Ua hinaaro ratou i te moni. Ua hinaaro o Iosepha ia tauturu i to’na utuafare. Ua haere atu oia i te tufaa fenua no Penetivenia no te rave i te ohipa. Ua faaea oia i pihai iho i te hoê taata i parauhia o Hale.
Te vai nei ta taua taata ra tamahine e o Ema te i‘oa. Ua farerei o Iosepha ia Ema. Ua here raua te tahi i te tahi, e ua faaipoipohia raua i muri iho. Ua haere atu raua e faaea i pihai iho i te utuafare o Iosepha. Ua tauturu Iosepha i to’na metua tane i roto i te faaapu.
E rave rahi mau taata tei ite e te vai nei te api auro ia Iosepha ra. Ua tamata ratou i te eiâ i te reira. Ua faatupu pe‘ape‘a te mau taata ia Iosepha. Ua parau haavare ratou no nia ia Iosepha e to’na utuafare.
No te pe‘ape‘a rahi i tupu, ua opua ihora o Iosepha e Ema ia faanuu. Ua hinaaro raua ia haere atu i Penetivenia, tapiri i te utuafare o Ema. Tera râ aita ta Iosepha e Ema moni i rava‘i.
Te faaea ra te hoê taata tapiri mai i te vahi o Iosepha ma, e o Maratini Hareti to’na i‘oa. E faaapu rahi ta Maratini Hareti. E taata moni hoi oia. E mea maitai roa teie taata o Maratini Hareti i nia ia Iosepha raua o Ema. Ua horoa oia i te moni na raua no te tauturu ia raua i te faanuuraa. Ua haere atu o Iosepha raua o Ema i Penetivenia.
Ua haamata ihora o Iosepha i te iriti i te mau papairaa i nia i te mau api auro. Aita Iosepha i ite i te auraa no te papairaa i nia i te mau api auro. Ua tauturu te Atua ia’na. Ua faaohipa o Iosepha i te Urima e te Tumima ia maramarama oia i te mau parau. E tia ia tatou ia tai‘o i te mau mea i iritihia e ana i roto i te reo Baratane, e o tei iritihia mai i muri iho i roto i to tatou nei reo. Ua parauhia hoi te reira Te Buka a Moromona.
Ua haere atu o Maratini Hareti i Penetivenia. Ua tauturu oia ia Iosepha Semita i te iritiraa i te mau api auro. Ua tai‘o o Iosepha i te mau parau no nia mai i te mau api auro, e ua papai o Maratini i te reira i nia i te tahi mau api parau. Ua iriti o Iosepha raua o Maratini Hareti 116 mau api no Te Buka a Moromona.
Ua hinaaro o Maratini ia afai atu i teie mau api 116 i te fare. Ua hinaaro oia i to’na utuafare ia ite i te reira. Ua ani atu o Iosepha i te Fatu mai te mea e nehenehe anei ta Maratini ia afai atu i te mau api parau i to’na fare. Ua parau mai te Fatu aita. Ua ani faahou atu o Iosepha. Ua parau faahou mai te Fatu aita.
Ua onoono noa o Maratini ia afai atu i teie mau api i te fare. Ua ani faahou atura o Iosepha i te Fatu. I teie taime ua faatia mai te Fatu ia afai atu o Maratini i te mau api parau i te fare. Ua parau mai te Fatu e nehenehe ta Maratini ia faaite atu i te mau api parau i to’na iho utuafare, e eiaha i te tahi mau taata ê atu.
Ua fafau atu o Maratini ia haapao i te parau a te Fatu. Ua afai atu oia i te mau api parau i te fare. Ua faaite atu oia i te reira i to’na utuafare. Area râ, aita oia i haapao i ta’na i fafau atu i te Fatu. Ua faaite atu oia i te reira mau api parau i te tahi atu mau taata. E i muri iho ua tuu atu i te reira i to’na vairaa.
I muri mai ua haere atu o Maratini e tii i taua mau api ra. Ua imi oia i te reira i te mau vahi atoa, e aita roa i itehia ia’na. Ua mo‘e roa taua mau api ra.
Ua pe‘ape‘a roa o Iosepha no nia i teie mau api parau i mo‘e. Aita roa i tia ia’na ia taoto.
Ua paraparau mai Iesu ia Iosepha. Ua parau mai oia e ua rave o Maratini i te hoê ohipa hape roa. Ua fafau hoi o Maratini ia haapao i te parau a te Fatu. Tera râ aita oia i haapao i ta’na fafauraa. I teie nei ua mo‘e roa teie mau api parau no Te Buka a Moromona. Aita roa e tia faahou ia Maratini ia tauturu i te iritiraa.
Buka Fafau 3:12–14
Ua parau mai o Iesu e ua hinaaro o Satane ia mo‘e teie mau api e 116. Tei te mau taata iino ra hoi teie mau api parau. Ua hinaaro o Satane e te mau taata iino ia haamou i te ohipa a te Atua. Aita ratou i hinaaro i te mau taata ia tiaturi i Te Buka a Moromona. Ua parau mai o Iesu e aita roa e tia ia Satane ia tapea i te ohipa a te Atua. Aita atoa e tia i te mau taata iino ia tapea i te ohipa a te Atua.
Buka Fafau 10; Omuaraa Parau 8, 12, 22–29, 33, 43
Ua parau mai o Iesu ia Iosepha eiaha e haape‘ape‘a no nia i te mau aamu o tei papaihia i nia i te mau api parau i mo‘e. Ua papaihia te tahi mau aamu mai te reira te huru i roto i te tahi atu mau tufaa no te mau api auro. Ua parau mai o Iesu e mea tia ia Iosepha ia iriti i te tahi atu mau tufaa no taua mau api auro ra. E i reira e nehenehe ïa i te mau taata maitai ia tai‘o i Te Buka a Moromona. E e tiaturi ratou e parau mau taua buka ra. E e haapii mai ratou i te evanelia.