“Pene 8: Te Faaineineraa no te Ekalesia a Iesu Mesia: Mati–Eperela 1830,” Te Mau Aamu no Roto Mai i te Parau Haapiiraa e te Mau Parau Fafau (2002), 34–39
“Pene 8,” Te Mau Aamu no Roto Mai i te Parau Haapiiraa e te Mau Parau Fafau, 34–39
Pene 8
Te Faaineineraa no te Ekalesia a Iesu Mesia
(Mati–Eperela 1830)
Ua fatata roa i te taime e faaho‘ihia mai ai te Ekalesia mau a Iesu Mesia i nia i te fenua nei. Ua horoa mai Iesu i te heheuraa no te mau taata ia Iosepha Semita ra. Ua hinaaro Iesu i te mau taata ia ineine no ta’na ra ekalesia. Ua parau mai oia ia ratou i te mau mea o tei tia ia ratou ia ite na mua ratou e haamata ai i ta’na ekalesia. Ua faaite oia ia ratou no nia i ta’na evanelia.
Ua parau mai Iesu e te haapii mai nei Te Buka a Moromona no nia i ta’na evanelia. Ua parau mai oia e parau mau Te Buka a Moromona. Ua hinaaro Iesu i te taata ia tiaturi e e parau mau Te Buka a Moromona. E tauturu mai hoi te reira i te taata ia haapao i te faaueraa a te Atua.
Ua faaite mai Iesu no nia i to’na oraraa. Ua tono mai te Atua ia Iesu no te tauturu i te taata i nia i te fenua nei. Ua tamata Satane i te faahema ia’na ia rave i te mau ohipa ino. Area râ aita Iesu i faaroo ia Satane.
Ua pe‘ape‘a Iesu no te mau ohipa ino ta te mau taata e rave ra. Ua haamaniihia to’na toto e ua mauiui oia no te mau taata atoa. Eita te taata e roohia e te mamae mai te mea e tatarahapa ratou.
Ua patiti te mau taata iino ia Iesu i nia i te satauro e ua taparahi pohe roa ia’na.
Ua tuu te mau hoa o Iesu i to’na tino i roto i te hoê menema.
E toru mahana i muri iho ua tia faahou mai o Iesu. Ua ora faahou mai oia.
Ua rave Iesu i teie mau ohipa no te tauturu i te mau taata o tei tatarahapa. Ua pohe oia no te tauturu i te mau taata e faaroo to ratou e o tei bapetizohia. Eita ratou e faautu‘ahia. E nehenehe hoi ta ratou ia haere atu i te ao ra. E faautu‘ahia te mau taata o tei ore e tatarahapa.
Ua parau Iesu no nia i te bapetizoraa. E mea tia i te mau taata o te hinaaro ia bapetizohia ia tatarahapa. E mea tia ia ratou ia here e ia haapao i te mau faaueraa a Iesu Mesia. E mea tia ia roaahia to ratou matahiti i te va‘u e aore râ ia hau atu. E i reira e tia ai ia ratou ia bapetizohia e ia riro ei mau melo no te Ekalesia.
Ua haapii mai Iesu i te e‘a tia no te bapetizoraa. Ua parau mai oia e tia i te hoê haapii i roto i te Autahu‘araa a Aarona e aore râ te hoê tane o tei mau i te Autahu‘araa a Melehizedeka ia bapetizo i te hoê taata. E afai te tane o tei mau i te autahu‘araa i te hoê taata i roto i te pape, e e faahiti oia i te hoê pure taa ê.
E utuhi te taata i mau i te autahu‘araa i te hoê taata i raro i te pape. E i muri iho e afai mai oia i taua taata ra i nia mai raro mai i te pape.
Ua parau mai Iesu e, ia bapetizohia ana‘e te hoê taata, te fafau ra ïa oia no te faaroo ia’na. E e mea tia ia ratou ia parau e ia rave i te mau mea maitai.
Ua parau mai Iesu no nia i te haamaitairaa i te mau aiû. E nehenehe i te mau tane o tei mau i te Autahu‘araa a Melehizedeka ia haamaitai i te mau aiû. E tapea te mau tane i taua aiû ra i roto i to ratou mau rima. E e horoa mai te hoê taata i te i‘oa e te hoê haamaitairaa.
Ua parau mai Iesu no nia i te oro‘a. Ua mai oia e mea tia i te mau taata ia rave pinepine i te oro‘a. Mai te mea e ua rave outou i te hoê ohipa ino, eita ïa i te mea tia ia tatou ia rave i te oro‘a. E mea tia ia tatou ia tatarahapa. E i reira e tia ai ia outou ia rave i te oro‘a.
Buka Fafau 20:75; 46:4
Te rave nei tatou i te oro‘a no te haamana‘oraa ia Iesu. Na te pane (faraoa) e tauturu ia tatou ia haamana‘o i te tino o Iesu Mesia. E mea tia hoi ia tatou ia haamana‘o e ua pohe oia no tatou i nia i te satauro.
Na te pape e tauturu ia tatou ia haamana‘o i te toto o Iesu. E mea tia ia tatou ia haamana‘o e ua tahe to’na toto e ua farii oia i te mamae rahi no tatou i roto i te O i Getesemane.
Te fafau ra tatou i te taime tatou e rave ai i te oro‘a. Te fafau nei tatou ia riro mai ia’na te huru. Te fafau nei tatou e e haamana‘o noa tatou ia’na. Te fafau nei tatou e e haapao tatou i ta’na mau faaueraa. E parahi noa to’na Varua i roto ia tatou mai te mea e haapao tatou i ta tatou mau fafauraa.