“Pene 27: Te Ohipa a te Peropheta Iosepha Semita: Mati 1832,” Te Mau Aamu no Roto Mai i te Parau Haapiiraa e te Mau Parau Fafau (2002), 104–7
“Pene 27,” Te Mau Aamu no Roto Mai i te Parau Haapiiraa e te Mau Parau Fafau, 104–7
Pene 27
Te Ohipa a te Peropheta Iosepha Semita
(Mati 1832)
Ua fanau Ema, te vahine a Iosepha Semita, i te aiû maehaa. Ua ma‘ihia teie na aiû e ua pohe raua i muri iho. Ua fanau atoa to raua hoa i te aiû maehaa, tera râ ua pohe te mama. Ua faaamu mai Iosepha e Ema i taua na aiû ra e ua haapao maitai ia raua.
Ua faaue mai Iesu ia Iosepha ia tai‘o i te Bibilia. Ua taui hoi te mau taata i te tahi mau parau i roto i te Bibilia. Ua faaite mai Iesu ia Iosepha i te mau parau tia ia papai i roto i te Bibilia. Ua tauturu Sidene Rigidoni ia Iosepha i te papairaa i te mau parau o ta Iesu i hinaaro ia papai i roto i te Bibilia.
Aita Iosepha Semita i taa maitai i te tahi mau tufaa i roto i te Bibilia. Ua ani atu oia i te Atua. Ua pahono mai Iesu Mesia i te mau uiraa. Ua papai Iosepha i te mau pahonoraa ia tia i te Feia Mo‘a ia tai‘o.
Ua oaoa Iesu i te ohipa a Iosepha. E peropheta rahi hoi o Iosepha. Tera râ aita Stane i oaoa. Ua hinaaro Satane ia tapea i te ohipa a Iosepha. Ua hinaaro Satane i te mau taata ia riri ia Iosepha.
I te hoê pô, ua haere atu te hoê pŭpŭ taata iino i te fare o Iosepha. Ua haaparari ratou i te opani fare, e ua haere atu ratou i roto. Te tapea ra Iosepha i te hoê o na aiû. E ma‘i rahi hoi to taua aiû ra.
Ua haru teie mau taata iino ia Iosepha. Ua faarue mai ratou i te aiû ana‘e. I muri mai ua pohe taua aiû ra. Ua ume atu ratou ia Iosepha i rapae i taua pô to‘eto‘e roa ra. Ua uumi teie mau taata i te arapoa o Iosepha.
Ua hinaaro te tahi mau taata ia hamani ino ia Iosepha. E ua hinaaro hoi te tahi atu pae ia taparahi ia’na. Ua tamata ratou ia manii i te raau taero i roto i to’na arapoa. Ua ofati ratou i te hoê o to’na niho. Ua paapaa oia i te raau taero.
Ua pahae te mau taata i to’na ahu e ua parai i te tâ na nia ia’na. Ua tapo‘i ratou ia’na i te huruhuru moa. Ua piri hoi teie mau huruhuru i nia i te tâ o tei vai i nia i to’na ra tino.
I muri iho ua haere ê atu teie pŭpŭ taata iino. Ua mana‘o ratou e pohe o Iosepha. Ua tamata Iosepha i te tia i nia. Aita râ i tia ia’na ia na reira. Ua faafaaea rii oia no te hoê taime poto. E i muri iho ua nee atu oia i te fare.
Ua horoi te mau hoa o Iosepha i te tâ i nia i to’na tino. E mea rave atâ roa hoi ia horoi i teie tâ. Ua paapaa roa to’na iri e ua mauiui atoa.
Aita Iosepha Semita i vaiiho i teie pŭpŭ taata iino ia tapea i ta’na ohipa. E Sabati te mahana i muri iho, e ua haere atu Iosepha i te pureraa. Ua haere atoa mai te tahi pae o teie mau taata iino i te pureraa, e ua maere roa ratou i te iteraa ia Iosepha. Ua horoa atu o Iosepha i te hoê a‘oraa i te pureraa. Aita Satane i manuïa i te tapearaa i te ohipa a te Peropheta.