“Pene 2: Te Orama Matamua a Iosepha Semita: 1820,” Te Mau Aamu no Roto Mai i te Parau Haapiiraa e te Mau Parau Fafau (2002), 9–12
“Pene 2,” Te Mau Aamu no Roto Mai i te Parau Haapiiraa e te Mau Parau Fafau, 9–12
Pene 2
Te Orama Matamua a Iosepha Semita
(1820)
Ua tiaturi o Iosepha Semita e to’na utuafare i te Atua. Ua tai‘o amui ratou i te Bibilia. Ua haapii te metua tane e te metua vahine o Iosepha i ta raua mau tamarii ia riro ei mau tamarii maitai.
Te vai ra e rave rahi ekalesia i Palamaira. Ua parau hoi te mau taata atoa e o ta ratou te ekalesia mau. Ua parau atoa ratou e mea hape te tahi atu mau ekalesia. Aita roa Iosepha i ite e tei hea te ekalesia te tia ia’na ia amui atu. Ua hinaaro oia ia ite e tei hea te ekalesia mau a Iesu Mesia.
I te hoê mahana te tai‘o ra Iosepha i te Bibilia. Hoê huru ma maha matahiti to’na i taua taime ra. Ua tai‘o oia e e mea tia ia tatou ia ani i te Atua mai te mea e hinaaro tatou ia ite i te hoê mea. Ua opua ihora o Iosepha ia pure. Ua ani oia i te Atua e tei hea te ekalesia te tia ia’na ia amui atu.
I te hoê mahana nehenehe roa i te tau mahanahana, ua haere atura o Iosepha i roto i te uru raau i pihai iho mai i to’na fare. Ua tuturi oia i raro, e ua pure u‘ana atura. Ua vai te faaroo i roto ia’na e e pahono mai to tatou Metua i te Ao ra i ta’na pure.
Aita Satane i hinaaro ia Iosepha ia pure. Ua tamata ihora Satane ia tapea ia’na. Ua haapoiri Satane na pihai iho ia Iosepha. Aita ta’na e nehenehe ia paraparau. Ua ri‘ari‘a hoi oia.
Aita Iosepha i faaea i te pure. Aita hoi i tia ia Satane ia tapea ia’na.
I muri mai ua farii Iosepha i te hoê orama. Ua ite atura oia i te hoê pou maramarama e te nehenehe. Ua faaatihia oia e taua maramarama ra. Ua ite atu oia i to tatou Metua i te Ao ra e ia Iesu Mesia i te tiaraa i roto i te maramarama i nia noa a‘e ia’na. Ua faatoro atu to tatou Metua i te Ao ra i to’na rima i nia ia Iesu Mesia ma te parau mai, ”O Ta’u Tamaiti Here Teie. A Faaroo la’na!”
Ua ani atu Iosepha ia Iesu e tei hea te ekalesia mau o te tia ia’na ia amui atu. Ua parau mai Iesu ia Iosepha eiaha e amui noa atu i te hoê noa a‘e o teie mau ekalesia. Ua parau mai Iesu e mea hape ana‘e te reira mau ekalesia. Aita hoê a‘e ekalesia i roto i taua mau ekalesia ra i riro ei ekalesia na’na. Ua faaite oia e rave rahi atu â mau mea ia Iosepha. E i reira ua hope ihora te orama. E ua toe mai ra o Iosepha ana‘e.
Ua ho‘i atu o Iosepha i te fare. Ua ani mai to’na metua vahine ia’na e mai te mea e mea maitai anei oia. Ua parau atura o Iosepha e. Ua faaite atu oia i to’na metua vahine e ua ite oia i te hoê orama. Ua faaite atoa atu oia i te mau mea o ta’na i haapii mai na roto i ta’na orama.
Ua faaite atu Iosepha i te tahi mau taata i roto i taua oire ra no nia i ta’na orama. Aita te mau taata i tiaturi ia’na. Ua mana‘o ratou e te haavare nei oia. Ua riri ratou ia’na. E e mea ino roa ratou ia’na.
Ua faaite noa Iosepha i te parau mau no nia i ta’na orama. Ua ite oia e ua hi‘o mata atu oia i to tatou Metua i te Ao ra e ia Iesu Mesia. Ua ite atoa oia e aita roa e ekalesia mau i nia i te fenua nei.