“Pene 34: Te Faaara Mai Nei te Atua i te Mau Taata o Ziona: Tiurai–Atete 1833,” Te Mau Aamu no Roto Mai i te Parau Haapiiraa e te Mau Parau Fafau (2002), 128–31
“Pene 34,” Te Mau Aamu no Roto Mai i te Parau Haapiiraa e te Mau Parau Fafau, 128–31
Pene 34
Te Faaara Mai Nei te Atua i te Mau Taata o Ziona
(Tiurai–Atete 1833)
Ua faaue te Atua i te Feia Mo‘a ia haere atu i te Mataeinaa Iakona, Misouri. E rave rahi Feia Mo‘a i haere atu i reira faaea ai. Ua hamani ratou i te mau fare, te mau faretoa, e te hoê fare neneiraa parau.
Aita Satane i hinaaro i te Feia Mo‘a ia faaea i te Mataeinaa Iakona. Aita oia i hinaaro ia ratou ia patu i te oire no Ziona. Ua hinaaro oia i te tahi mau taata ia hamani ino ia ratou. Ua hinaaro Satane i te feia iino ia tiahi i te Feia Mo‘a i rapae i Iakona. Ua rave te feia iino i te mau mea mai ta Satane i hinaaro. Ua imi ratou i te ravea no te tiahi atu i te Feia Mo‘a i rapae i Iakona.
Ua amui te tahi mau pŭpŭ taata iino. E ua tono atu teie pŭpŭ taata iino i te tahi mau taata no te farerei i te feia faatere o te Ekalesia. Ua parau atu teie mau taata iino i te Feia Mo‘a ia faarue mai i te Mataeinaa Iakona. Tera râ, ua ite te feia faatere o te Ekalesia e ua hinaaro te Atua ia ratou ia patu i te oire o Ziona i te Mataeinaa Iakona. Ua parau atu te feia faatere o te Ekalesia i te pŭpŭ taata iino eita te Feia Mo‘a e faarue i reira.
Ua ho‘i atu teie mau taata iino i roto i to ratou pŭpŭ taata iino. Ua riri roa teie pŭpŭ taata iino. Ua vavahi ratou i te fare neneiraa parau a te Feia Mo‘a. Aita atura i tia faahou i te Feia Mo‘a ia nenei i te mau buka e aore râ i te mau ve‘a.
Ua haru teie feia iino i te Episekopo Patarite e to’na taeae ra ia Allen, e ua tatara i to raua aahu. Ua tuu ratou i te tâ e te huruhuru moa i nia i to raua iri. E ua taparahi atoa teie mau pŭpŭ taata iino i te tahi atu mau Feia Mo‘a o ta ratou i farerei.
E toru mahana i muri iho ua haere atu teie pŭpŭ taata iino na roto i te oire. Ua pupuhi ratou i te mau fare. Ua parau atu ratou i te mau parau iino i nia i te Feia Mo‘a. Ua parau mai ratou e tairi ratou i te mau taata atoa o ta ratou e farerei atu. Ua tamata ratou ia imi i te mau feia faatere o te Ekalesia. Ua tapuni hoi te mau feia faatere o te Ekalesia ia ore ratou ia itehia e teie pŭpŭ taata iino.
O Olive Kaudere te hoê o te mau taata faatere o te Ekalesia. Ua faarue oia i Iakona. Ua haere atu oia e farerei ia Iosepha i Ketelani.
Ua faaite atu Olive ia Iosepha i te mau ohipa ta te mau taata iino e rave ra i Ziona. Ua hinaaro te Feia Mo‘a i Iakona ia ite i te mea te tia ia ratou ia rave.
Ua parau atu Iosepha ia Olive no nia i te tahi o te mau heheuraa o ta Iesu i horoa mai ia’na. Ua parau mai te Fatu i te Feia Mo‘a e mea tia ia ratou ia patu i te hoê hiero i Ziona. E mea tia i te Feia Mo‘a ia aufau i te tufaa ahuru. E na te tufaa ahuru e aufau no te hiero. Ua parau mai Iesu ia Iosepha e e tupu mai o Ziona i te rahi mai te mea e haapao te Feia Mo‘a i te hinaaro o te Atua. E e faautu‘ahia te Feia Mo‘a mai te mea aita ratou e haapao i te parau a te Atua.
Ua parau mai Iesu i te Feia Mo‘a e mea tia ia ratou ia haapao i te mau ture o te fenua. E mea tia i te Feia Mo‘a ia maiti i te mau taata parau-tia no te faatere i te fenua. I te tahi mau taime e riro mai te mau taata iino ei mau taata faatere no te fenua. E faatupu hoi te reira i te oaoa ore i roto i te mau taata parau-tia.
Ua faaue mai te Fatu i te Feia Mo‘a ia faaea i te rave i te mau ohipa iino. Ua parau mai Iesu i te Feia Mo‘a eiaha ia haape‘ape‘a atu no nia i te mau pŭpŭ taata iino. Eiaha ratou ia hi‘o ino atu i te mau taata iino. E mea tia i te Feia Mo‘a ia faaore atu i te hapa a to ratou mau enemi. Eiaha ratou e aro atu i teie mau taata iino, maori râ na roto i te faaueraa a te Atua. E faautu‘a te Atua i te mau taata iino.
I muri iho, ua parau mai Iesu i te Feia Mo‘a i Ziona e e tupu te pe‘ape‘a no te hoê taime iti noa. Aita hoi ratou i haapao i te mau faaueraa. Te vai ra te mahana e tauturu mai Iesu i te Feia Mo‘a i te paturaa ia Ziona. E i reira hoi Iesu e haamaitai mai ai ia ratou.