Pene 42

Fa Uete, Misouri

(Tenuare–Tiurai 1838)

Aita te mau taata iino i Ketelani i tatarahapa. Ua hinaaro ratou ia taparahi ia Iosepha Semita. No reira ua faarue o Iosepha i Ketelani. E tau to‘eto‘e hoi te reira e e mea to‘eto‘e roa hoi. Ua apee atu te mau enemi o Iosepha ia’na. Te vai ra hoi ta ratou mau tipi e te mau pupuhi no te taparahi ia’na.

E ua tia roa hoi ia Iosepha ia haere atu e tapuni. Ua paruru te Fatu ia’na ia ore oia ia itehia e te mau enemi. I te hoê pô ua taoto o Iosepha i roto i te hoê â fare no to’na ra mau enemi. Aita roa ratou i ite e tei reira atoa o Iosepha.

I te hoê atoa taime ua haere atu o Iosepha na nia i te purumu. Ua hi‘o mai to’na mau enemi ia’na, e aita ratou i taa e o Iosepha oia.

Ua ratere o Iosepha e rave rahi hanere maiie. Ua haere atu oia i te pae Fa Uete, Misouri. Ua oaoa te mau Feia Mo‘a i te farereiraa ia’na.

Aita hoi te tahi o te mau feia faatere i Misouri e haapao ra i te mau faaueraa a te Atua. Aita ratou e tatarahapa. Ua riri ratou ia Iosepha. Ua hinaaro ratou ia monihia ratou.

Ua oto o Iosepha. E mau hoa ana‘e hoi teie no’na. Ua hurihia o Olive Kaudere, Davida Uitima, e te tahi atu mau taata i rapae i te Ekalesia. Aita ratou i riro faahou ei melo no te Ekalesia a Iesu Mesia.

Ua maitihia te tahi atu mau tane ia riro mai ei mau feia faatere no te Ekalesia i Fa Uete.

I te hoê mahana ua haere atu o Iosepha i te hoê vahi i tapiri atu i Fa Uete. Ua parau maira o Iesu e ua topahia te i‘oa o teie vahi o Adamu-Onidi-Ahamana. E vahi faahiahia roa teie. Ua paraparau mai o Iesu ia Adamu e ua haamaitai mai ia’na i taua vahi ra. Ua haamaitai mai o Adamu i ta’na ra mau tamarii i Adamu-Onidi-Ahamana. Te vai ra te mahana e farerei faahou ai o Iesu e Adamu e te tahi atu â mau feia parau-tia i taua vahi ra.

Buka Fafau 116