“Pene 29: Te Hoê Heheuraa no Nia i te Autahu‘araa: Setepa 1832,” Te Mau Aamu no Roto Mai i te Parau Haapiiraa e te Mau Parau Fafau (2002), 113–16
“Pene 29,” Te Mau Aamu no Roto Mai i te Parau Haapiiraa e te Mau Parau Fafau, 113–16
Pene 29
Te Hoê Heheuraa no Nia i te Autahu‘araa
(Setepa 1832)
E rave rahi te mau tane no te Ekalesia o tei haere atu i te misioni. I to ratou ho‘iraa mai na te misioni, ua haere atu ratou e farerei ia Iosepha Semita i Ketelani.
Ua faaite atu te mau tane ia Iosepha no nia i ta ratou misioni. Ua bapetizo ratou e rave rahi mau taata. Ua oaoa ratou no ta ratou mau misioni. Ua oaoa atoa o Iosepha.
Ua farii teie mau misionare atoa i te mana no te autahu‘araa. Te autahu‘araa o te mana ïa o te Atua. Ua hinaaro te mau misionare ia rahi atu â to ratou ite no nia i te autahu‘araa.
Ua horoa mai Iesu ia Iosepha i te hoê heheuraa na ratou. Ua parau mai Iesu ia Iosepha no nia i te tahi mau tane o tei mau i te Autahu‘araa a Melehizedeka. Ua farii Adamu i te autahu‘araa. O oia te taata matamua i ora i nia i te fenua nei.
Ua farii hoi te mau peropheta atoa no te Faufaa Tahito i te autahu‘araa. Teie te tahi pae o taua mau peropheta ra, o Enosa, o Noa, o Mose, o Melehizedeka, e o Aberahama. Ua horoa atu Melehizedeka i te autahu‘araa ia Aberahama.
Ua parau mai Iesu e na te mau taata o te mau i te autahu‘araa e aratai i ta’na Ekalesia. E nehenehe ia ratou ia bapetizo e ia horoa i te horoa a te Varua Maitai. E tia ia ratou ia haamaitai i te oro‘a. E tia ia ratou ia haamaitai i te feia ma‘i. Na teie mau mea e tauturu i te Feia Mo‘a ia faaineine no te ite mata atu i te Atua.
Ua parau mai Iesu ia Iosepha e mea tia i te mau tane ia vai parau-tia noa. E i reira e tia ai ia ratou ia farii i te autahu‘araa. E fafau mai hoi te Atua ia ratou. Ua riro te fafauraa mai te hoê parau faaau te huru. Ua fafau mai te Atua ia haamaitai mai i te mau tane atoa o tei farii i te autahu‘araa. Ua fafau hoi te mau tane ia faaohipa i te mana o te autahu‘araa no te tauturu i te tahi atu mau taata. E nehenehe i te mau tane o tei farii i te autahu‘araa ia riro ei mau tamarii tamaroa taa ê na te Atua. Te vai ra te mahana e horoa mai ai to tatou Metua i te Ao ra i ta’na mau mea ia ratou.
Ua faaite mai Iesu ia Iosepha nahea te mau tane ia faaohipa i to ratou autahu‘araa. O te mau tane parau-tia ana‘e te tano ia faaohipa i te autahu‘araa. Eita roa i te mea tia i te mau tane teoteo e te ino ia faaohipa i te autahu‘araa. Eita roa te Atua e horoa mai i te mana no te autahu‘araa i te mau taata ino.
E mea tia i te mau tane ia faaohipa i te autahu‘araa na roto i te aroha e te maitai. E mea tia ia ratou ia faaroo i te Varua Maitai. E i reira e farii ai ratou i te mana no te autahu‘araa. E e parahi noa mai te Varua Maitai i pihai iho ia ratou e a muri noa’tu.
Ua parau mai Iesu ia Iosepha Semita e mea tia ia rahi te mau tane no te haere atu e rave i te ohipa misionare. E mea tia ia ratou ia haapii atu i te evanelia i te ao atoa nei. E mea tia hoi ia ratou ia haapii atu e e haava te Atua i te mau taata atoa. E mea tia ia ratou ia haapii atu i te mau taata ia tatarahapa. E mea tia ia ratou ia bapetizo e ia horoa atu i te Varua Maitai ia ratou.
Ua parau mai Iesu e haamaitaihia te mau misionare mai te mea e rave itoito ratou i te ohipa. E tauturu mai te mau melahi ia ratou. E horoa mai hoi to tatou Metua i te Ao ra i te mau mea o ta ratou e hinaaro.
Ua oti ihora te heheuraa. Ua oaoa hoi o Iosepha e te mau misionare no te iteraa i te tahi atu mau mea no nia i te autahu‘araa. Ua hinaaro ratou ia faaohipa i to ratou mana autahu‘araa na roto i te tano. Ua hinaaro ratou ia haapii i te tahi atu mau taata no nia i te Ekalesia.