“Pene 52: Te Pe‘ape‘a i Navu: Me–Atete 1842,” Te Mau Aamu no Roto Mai i te Parau Haapiiraa e te Mau Parau Fafau (2002), 191–93
“Pene 52,” Te Mau Aamu no Roto Mai i te Parau Haapiiraa e te Mau Parau Fafau, 191–93
Pene 52
Te Pe‘ape‘a i Navu
(Me–Atete 1842)
E rave rahi te mau taata tei haere atu e faaea i Navu. Ua patu ratou i te hoê oire nehenehe roa. Ua haamata ratou i te patu i te hiero. Ua hinaaro te mau Feia Mo‘a i Navu i te hoê tavana oire no ratou.
Ua maiti te mau Feia Mo‘a ia John C. Bennett ia riro ei tavana oire no Navu. I te haamataraa ua riro oia ei tavana oire maitai roa. Tera râ, ua haamata ihora oia i te rave i te mau ohipa iino. Aita oia i au ia Iosepha Semita.
Ua hinaaro te mau taata i Navu ia faatupu i te hoê mahana faafaaearaa taa ê. Ua hinaaro ratou i te mau faehau o Navu ia porote na nia i te purumu.
Ua riro o John Bennett ei taata faatere no te mau faehau. Ua opua oia ia faatupu te mau faehau i te hoê aroraa. Eiaha i te hoê aroraa mau, ei mea faaarearea noa ra.
Ua ani te taata ra o Bennett ia Iosepha Semita ia aratai i te mau faehau i roto i taua aroraa ra. Ua ite o Iosepha Semita e aita o John Bennett e au ra ia’na. Ua mana‘o o Iosepha e ua hinaaro o Bennett ia taparahi ia’na. Ua parau mai te Fatu ia Iosepha eiaha e haere atu i roto i taua aroraa ra.
Ua riri roa o John Bennett. Aita oia i hinaaro faahou ia riro ei tavana oire no Navu. Ua maiti ihora te mau taata ia Iosepha Semita ei tavana oire.
Aita o John Bennett e te tahi atu mau tane i hinaaro faahou ia riro ei mau melo no te Ekalesia. Ua faaino ratou i te Peropheta Iosepha Semita.
Ua paraparau atu o Iosepha i te tahi mau tane melo no te Ekalesia. Ua parau atu oia e rahi mai â te pe‘ape‘a e tupu i nia i te mau Feia Mo‘a. Te vai ra te mahana e mea tia ia ratou ia faarue i Navu. E e haere atu ratou i te pae too‘a o te râ no te fenua Marite, i te mau tufaa fenua mou‘a ofa‘i. I reira e patu ai te mau Feia Mo‘a i te mau oire. E e faaroo ratou i te Atua e e riro mai hoi ratou ei mau taata itoito.