“Pene 37: Te Mau Taata Faatere no te Autahu‘araa: Fepuare 1835,” Te Mau Aamu no Roto Mai i te Parau Haapiiraa e te Mau Parau Fafau (2002), 140–44
“Pene 37,” Te Mau Aamu no Roto Mai i te Parau Haapiiraa e te Mau Parau Fafau, 140–44
Pene 37
Te Mau Taata Faatere no te Autahu‘araa
(Fepuare 1835)
E apooraa faufaa rahi roa ta Iosepha Semita i faatupu i Ketelani, Ohio. Ua ani atu oia i te mau tane no te Puhapa o Ziona ia haere mai. Ua parau atu o Iosepha ia ratou e ua hinaaro o Iesu 12 Aposetolo no te tauturu i te aratairaa i ta’na Ekalesia.
Ua parau mai te Fatu ia Olive Kaudere, ia Davida Uitima, e Maratini Hareti no te maiti i te mau Aposetolo. I roto i ta ratou apooraa ua haamaitaihia o Olive, Davida, e Maratini e te Peresideniraa Matamua o te Ekalesia. E i reira ua pure tahoê atu ratou. Ua maiti ratou 12 mau taata maitai.
Ua faatoro‘ahia teie mau tane. Ua riro ratou ei mau Aposetolo no te Ekalesia.
E mau taata faufaa roa te mau Aposetolo i roto i te Ekalesia. Ua ite ratou e o Iesu to ratou Faaora. Te haapii nei ratou i te evanelia i to te ao atoa nei.
I te tahi mau mahana rii i muri mai, ua maitihia te tahi atu â mau tane ei mau taata faatere i roto i te Ekalesia. Ua piihia ratou te Pŭpŭ Matamua no te Hitu Ahuru. E tauturu hoi te Pŭpŭ Matamua no te Hitu Ahuru no te mau Aposetolo. O ratou ïa te mau taata faatere no te mau ohipa misionare i roto i te Ekalesia.
I te hoê mahana tei roto te Tino Ahuru e Ma Piti Aposetolo i te apooraa. Te faaineine ra ratou no ta ratou mau misioni. Te tamata ra ratou ia riro ei mau taata parau-tia. Ua hinaaro ratou i te tautururaa a to tatou Metua i te Ao.
Ua ani atu te mau Aposetolo ia Iosepha Semita ia pure no te hoê heheuraa no te tauturu mai ia ratou i roto i ta ratou mau misioni. Ua horoa mai Iesu ia Iosepha e te mau Aposetolo i te hoê heheuraa rahi. Ua parau oia ia ratou no nia i te autahu‘araa.
Te autahu‘araa ra o te mana ïa o te Atua. O te reira ïa te hoê mana rahi roa i nia i te fenua nei. E horoa te Atua i te autahu‘araa i te mau tane parau-tia. E faaohipa te mau tane i te autahu‘araa no te rave i te ohipa a te Atua.
Te vai nei e piti autahu‘araa i roto i te Ekalesia. Te hoê o teie, o te Autahu‘araa a Melehizedeka ïa. Te mau nei te mau taata faatere no te Ekalesia i te Autahu‘araa a Melehizedeka. Teie te mau taata faatere, oia hoi, te Peresideni o te Ekalesia e to’na ra na tauturu, te Tino Ahuru e Ma Piti e te Pŭpŭ Matamua o te Hitu Ahuru.
Te Peresideni o te Ekalesia o te Peropheta ïa o te Atua. O oia te faaite i te mau taata i te mau mea o ta Iesu e hinaaro ia ratou ia rave. Te vai nei to te Peropheta mau taata no te tauturu ia’na. E tauturu te reira mau taata no’na. E parauhia te peropheta e to’na na tauturu te Peresideniraa Matamua no te Ekalesia.
Te mau nei te tahi mau tane o te Ekalesia i te Autahu‘araa a Melehizedeka. Ua piihia ratou te mau tahu‘a rahi, te mau hitu ahuru, e te mau peresibutero. E nehenehe i te mau tahu‘a rahi ia maitihia ei patereareha, ei peresideni tĭtĭ, e ei mau melo no te apooraa teitei, e e mau episekopo.
Buka Fafau 107:5, 7, 9, 10, 17, 25, 39
Ua maitihia te tahi mau tane ia riro ei mau hitu ahuru. E haapii ratou i te evanelia i roto i te mau paroita e te mau tĭtĭ.
Buka Fafau 107:96–97
Ua maitihia te tahi mau tane ia riro ei mau peresibutero. E haere te mau peresibutero i te misioni.
Buka Fafau 107:7; 133:8
E nehenehe i te mau tane paatoa o tei mau i te Autahu‘araa a Melehizedeka ia haamaitai i te mau taata. E tia ia ratou ia horoa i te horoa no te Varua Maitai.
Te tahi atu autahu‘araa o te Autahu‘araa a Aarona ïa. E farii te mau tahu‘a, te mau haapii, e te mau diakono i te Autahu‘araa a Aarona. E tia i te mau tahu‘a ia bapetizo i te taata. E nehenehe hoi ia ratou ia haamaitai i te oro‘a. E tauturu ratou i te mau peresibutero.
E tauturu te mau haapii i te faaineineraa i te oro‘a. E haere ratou i te mau hahaereraa utuafare. E tauturu ratou i te mau melo o te Ekalesia ia ora i te mau oraraa maitai.
E opere te mau diakono i te oro‘a. E tauturu ratou i te episekopo. E haere ratou e ohi mai i te mau moni haapaeraa maa.
Ua parau mai Iesu e mea tia i te mau taata atoa o tei mau i te autahu‘araa ia haapii i te mau mea o ta te Atua i hinaaro ia ratou ia rave. E mea tia ia ratou ia rave itoito i te ohipa. E i reira ïa te Atua te Metua i te Ao ra e haamaitai mai ai ia ratou.