“Pene 31: Te Parau Paari: Fepuare 1833,” Te Mau Aamu no Roto Mai i te Parau Haapiiraa e te Mau Parau Fafau (2002), 119–22
“Pene 31,” Te Mau Aamu no Roto Mai i te Parau Haapiiraa e te Mau Parau Fafau, 119–22
Pene 31
Te Parau Paari
(Fepuare 1833)
Ua haamata o Iosepha i te hoê haapiiraa na te mau tane i roto i te Ekalesia. Ua topahia te i‘oa o te reira te Haapiiraa a te Mau Peropheta.
Tei roto taua piha haapiiraa ra i te faretoa a Nuela Uitini i Ketelani, Ohio. Ua haapii atu Iosepha i te mau tane no nia i te Ekalesia. Ua haapii atoa atu oia ia ratou no nia i te autahu‘araa e te mau papairaa mo‘a.
E rave rahi te mau tane o te pupuhi ra i te avaava e te paipu. Ua î roa hoi te piha i te auauahi. E te tahi mau tane te amuamu ra ratou i te avaava. E ua repo roa te tahua fare. E ua tia roa ia tamâhia te piha na mua a‘e ratou e ho‘i atu ai i te fare.
I muri iho i te mau haapiiraa atoa e haere mai, o Ema, te vahine a Iosepha no te tamâ i te piha. Ua feruri noa o Iosepha mai te mea e mea tano anei i te mau tane ia pupuhi e aore râ ia amuamu i te avaava.
Ua pure atu o Iosepha e ua ani atu i te Atua e eaha te mea tano. Ua horoa mai Iesu i te hoê heheuraa ia Iosepha, e ua parauhia te reira te Parau Paari. Ua parau mai Iesu te rave nei te tahi mau taata i te mau mea iino. Te hinaaro nei ratou i te tahi atu mau taata ia rave i te mau mea eita i te mea maitai no to ratou mau tino. 1 roto i te Parau Paari, ua parau mai Iesu i te Feia Mo‘a no nia i te mau mea maitai o te tano no to ratou mau tino. Ua parau atoa mai oia no nia i te mau mea eita i te mea maitai no to ratou mau tino. E haamaitaihia te Feia Mo‘a mai te mea e haapao ratou i te parau paari.
Ua parau mai Iesu eita te ava i te mea maitai no te taata. Eiaha ratou e inu i te mau mea e ava to roto. E mea tia i te ava ia faaohipahia na rapae noa mai i te tino.
Ua parau mai Iesu e ere i te mea tano ia faaohipa i te avaava. E ere hoi i te mea tia ia pupuhi i te mau huru avaava atoa e aore râ i te paipu. Eita atoa i te mea tia ia amuamu i te avaava. Te na ô maira Iesu, “e ere hoi te avaava no te tino ... e e ere hoi i te mea maitai no te taata.”
Ua parau mai Iesu e ere i te mea tia i te Feia Mo‘a ia inu i te mau inu ve‘ave‘a. E mau inu ve‘ave‘a hoi te taofe e te tî. E ere hoi ïa teie mau mea i te mea maitai no te tino.
Ua parau mai Iesu te vai nei te mau tumu raau e te mau animala o te au maitai i te taata ia amu. E mea tia i te taata nei ia haamauruuru i te Metua i te Ao ra no te mau maa maitai.
Ua parau mai Iesu e ere i te mea maitai i te taata nei ia amu rahi i te i‘o animala. E mea maitai i te taata nei ia amu i te i‘o animala i te tau to‘eto‘e. E mea tano ia ratou ia amu i te i‘o animala mai te mea e aita e rava‘i te tahi atu mau maa.
Ua parau mai te Fatu e mea maitai te mau maa huero no to tatou tino. Teie te tahi o taua mau maa huero ra, te sitona, te raiti, te tô popaa, e te olura. E mea maitai roa hoi te sitona no tatou. E mea maitai hoi te mau maa hotu e te mau pota no te taata nei.
Ua parau mai Iesu e mea tia i te Feia Mo‘a ia haapao i te Parau Paari. E i reira te Atua e haamaitai mai ai ia ratou. E e roaa hoi ia ratou te hoê oraraa tino maitai. E e riro ratou ei mau taata paari. E e tia ia ratou ia haapii i te mau mea e rave rahi. E haamaitaihia mai ratou mai te mea e amu ratou i te mau maa tano.