“Pene 61: Te Mau Faehau Momoni: Tiunu 1846–Tiurai 1847,” Te Mau Aamu no Roto Mai i te Parau Haapiiraa e te Mau Parau Fafau (2002), 218–22
“Pene 61,” Te Mau Aamu no Roto Mai i te Parau Haapiiraa e te Mau Parau Fafau, 218–22
Pene 61
Te Mau Faehau Momoni
(Tiunu 1846–Tiurai 1847)
Tei Council Bluffs te mau Feia Mo‘a. Ua haere maira te hoê raatira no te faehau o te Hau Marite e farerei ia Birigama Ioune. To’na i‘oa o Captain Allen.
Ua parau mai o Captain Allen ua hinaaro te peresideni no te Hau Marite e 500 taata no te haere i te faehau. Ua parau atura o Birigama Ioune e rave te mau Feia Mo‘a i te ohipa o ta te peresideni e hinaaro.
Ua paraparau atu te Captain Allen i te mau tane e ua amui atu e 500 o ratou no te haere i te faehau. Ua piihia ratou te nuu faehau Momoni. I te tahi mau taime ua piihia te mau melo no te Ekalesia e Momoni no te mea te tiaturi nei ratou i te Buka a Moromona.
Ua parau atu o Birigama Ioune i te mau tane ia riro ei mau faehau maitai roa i roto i te aua faehau. E mea tia ia ratou ia afai atu i te Buka a Moromona e te Bibilia. E mea tia ia ratou ia riro ei feia mâ, e te hi‘oraa maitai, e te peu maitai. E mea tia atoa ia ratou ia haapae i te mau parau ino e te pere moni. Ua parau atu o Birigama Ioune i te mau tane ia haapao i te mau faaueraa a te Atua. E eita ia ratou e taparahi atu i te hoê taata.
Ua haere atu te pŭpŭ faehau Momoni na muri iho ia Captain Allen. Ua oto te mau Feia Mo‘a i to ratou haereraa atu. Ua hinaarohia hoi te mau tane no te tauturu i te mau Feia Mo‘a no te haere atu i te Tooa o te Râ. Aita ratou i hinaaro i te mau tane ia haere ê atu no te aro i roto i te tama‘i. Tera râ, ua ite ratou e e aufauhia te mau faehau. E riro ia teie moni ei tautururaa i te mau Feia Mo‘a.
Ua tere atu te mau pŭpŭ Faehau Momoni i te pae apatoa. Ua tere atu te tahi o te mau utuafare o te faehau na muri i teie mau pŭpŭ faehau Momoni. E mea fifi roa hoi no teie mau taata teie tere. E mea na raro noa hoi ratou i te haereraa.
E mea ino roa hoi te mau purumu. I te tahi mau taime ua mure te mau pereoo tura‘i i roto i te one. Aita hoi ta ratou e pape no te inu. Aita atoa hoi e tumu raau to reira no te mau taata no te faafaaea i raro a‘e i te mărŭmărŭ. Ua ma‘ihia te tahi mau taata. E o te mau taata ma‘i ana‘e hoi te tia ia haere na nia i te mau pereoo tura‘i.
No reira ua opua ihora o Captain Allen ia vaiiho i te mau faehau ma‘i e te mau vahine e te mau tamarii i Colorado. Ua faaea ratou i reira i te hoê oire o tei parauhia o Pueblo. Ua aufauhia te mau faehau no te faaôraa i roto i te faehau. Ua hapono hoi te tahi o teie mau faehau ma‘i i ta ratou moni i to ratou ra utuafare i Council Bluffs. Ua hapono atoa atu ratou i te moni na te mau taata veve i Navu e na te mau misionare.
Ua tamau noa te mau faehau Momoni i roto i te faehau i te haere noa i te vahi i faataahia. I te tahi mau taime aita ratou i taa e te haere ra ratou i hea. Ia hinaaro ana‘e ratou i te pape e mea tia ia ia ratou ia ŏ atu i raro i te one no te imi i te pape. Eita te pape i te mea maitai roa. Aita atoa hoi i rava‘i ta ratou maa. Aita hoi e vahie no te tutu‘i i te auahi, e no reira ua rave noa ratou i te aihere no te faaama i te auahi.
Ua farerei te mau faehau i te mau taata Inidia e te tahi atu mau taata e maa ta ratou. Aita hoi ta te mau faehau e moni no te hoo mai i te maa. Ua horoa atu ratou i te tahi o to ratou mau ahu no te mau taata Inidia. Ua horoa mai te mau Inidia i te tahi mau maa na te mau faehau.
Ua haere atu te mau pŭpŭ Faehau Momoni i te tooa o te râ. E ua tae atu ratou i pihai iho i te tahi mau mou‘a teitei roa. E ua tia roa i te mau tane ia taamu i ta ratou mau pereoo tura‘i no te huti atu i nia. E ia tae ana‘e i nia, i reira ïa ratou e faahee-noa-atu ai i raro i te tahi pae mai o te mou‘a.
I te hoê mahana ua ite atu te mau faehau i te mau puaatoro oni. Ua a‘ua‘u mai te mau puaatoro oni i te mau faehau. Ua tiahi atu ratou i teie mau puaatoro. I te pae hopea ua horo atu teie mau puaatoro. Ua pepe te hoê o to ratou mau faehau. Aita i tia ia‘na ia haere no te hoê taime maoro.
I te pae hopea ua tae atu te pŭpŭ Faehau Momoni i te pae miti no te Moana Patitifa i te 29 no Tenuare 1847. Ua rohirohi roa te mau tane. Ua mahaehae roa hoi to ratou mau ahu. Ua oaoa roa râ ratou no te mea ua tae ratou i te vahi i faataahia.
Ua aufauhia te mau faehau no te faaôraa i roto i te faehau. Aita hoi ratou i titau-faahou-hia ia faaea i roto i te aua faehau. Ua tia ia ratou ia ho‘i atu i to ratou ra mau utuafare.
Ua faaea te tahi o te mau tane i Kalafonia. Ua ho‘i atu te pae rahi o te mau tane i te mau Mou‘a Ofa‘i i pihai iho i te tahi atu mau Feia Mo‘a o tei tae atu i reira na te fenua Council Bluffs mai.